 |
| ທ່ານເຈິ່ນວັນເຕິນ ຮອງປະທານຄະນະກຳມະການແຂວງກ໋ວາງນາມ ກ່າວຄຳເຫັນທິ່ກອງປະຊຸມ (ພາບ: VGP) |
ຜະລິດຕະພັນການທ່ອງທ່ຽວໃໝ່, ເປັນເອກະລັກສະເພາະ
ຈາກເຂດຖະໜົນເກົ່າໂຮ້ຍອານ ແລະ ເຂດທາດມີເຊີນ ເຊິ່ງ UNESCO ໄດ້ຮັບຮອງເອົາເປັນມໍລະດົກວັດທະນະທຳໂລກ, ມີຫຼາຍກາລະໂອກາດທີ່ສະດວກເປີດອອກໃຫ້ແກ່ແຂວງກ໋ວາງນາມໃນການພັດທະນາການທ່ອງທ່ຽວ, ການບໍລິການ. ຈຳນວນແຂກທ່ອງທ່ຽວນັບມື້ນັບເພີ່ມຂຶ້ນ. ການທ່ອງທ່ຽວກາຍເປັນຂະແໜງປາຍແຫຼມຢູ່ທ້ອງຖິ່ນ. ເຖິງຢ່າງໃດກໍ່ຕາມ, ວິວັດການຂຸດຄົ້ນ, ພັດທະນາການທ່ອງທ່ຽວກໍ່ໄດ້ສ້າງຄວາມກົດດັນຕໍ່ບັນດາມໍລະດົກ, ເກີດຂຶ້ນຫຼາຍບັນຫາໃນການຄຸ້ມຄອງ, ຂຸດຄົ້ນ ແລະ ອະນຸລັກຮັກສາຄຸນຄ່າມໍລະດົກວັດທະນະທຳ.
ເພື່ອແກ້ໄຂບັນຫານີ້, ຊຸມປີຜ່ານມາ, ແຂວງກ໋ວາງນາມໄດ້ມີແຜນນະໂຍບາຍສົ່ງເສີມບັນດາທ້ອງຖິ່ນ, ວິສາຫະກິດລົງທຶນພັດທະນາການທ່ອງທ່ຽວຕາມທິດຍືນຍົງ. ທ່ານປະທານຄະນະກຳມະການປະຊາຊົນນະຄອນໂຮ້ຍອານ ຫງວຽນວັນເຊີນ ໃຫ້ຮູ້ວ່າ, ໂດຍຕອບສະໜອງແຜນນະໂຍບາຍຂອງແຂວງ, ເປັນຕົ້ນແມ່ນແນໃສ່ຫຼຸດຜ່ອນຜົນກະທົບຈາກເຂດຖະໜົນເກົ່າ, ນະຄອນໂຮ້ຍອານ ໄດ້ຮຽກຮ້ອງ, ດຶງດູດວິສາຫະກິດມາລົງທຶນເປີດກວ້າງເຂດທ່ອງທ່ຽວ, ສ້າງບັນດາສະຖານທີ່ທ່ອງທ່ຽວໃໝ່ຢູ່ໝູ່ບ້ານແຄມຖະໜົນເກົ່າ, ບັນດາການບໍລິການທ່ອງທ່ຽວຢູ່ຊົນນະບົດບົນພື້ນຖານເສີມຂະຫຍາຍຊັບພະຍາກອນວັດທະນະທຳ ແລະ ຄຸນຄ່າມະນຸດສະທຳສົມທົບກັບການຂຸດຄົ້ນຊັບພະຍາກອນຊີວະນາໆພັນ. ດ້ວຍແຜນນະໂຍບາຍຍູ້ແຮງການທ່ອງທ່ຽວຕິດພັນກັບການອະນຸລັກບັນດາຄຸນຄ່າວັດທະນະທຳ, ໂຮ້ຍອານໄດ້ສົ່ງເສີມ, ໜູນຊວ່ຍບັນດາໝູ່ບ້ານອາຊີບປ່ຽນແປງໃໝ່ວິທີການເຄື່ອນໄຫວ, ຕາມທິດຕິດພັນກັບການຜະລິດ, ດຳເນີນທຸລະກິດ ດ້ວຍການທ່ອງທ່ຽວເພື່ອແນໃສ່ສ້າງລະບົບຄຸນຄ່າໃໝ່.
ມາຮອດປັດຈຸບັນ,ໂຮ້ຍອານອະນຸລັກ ແລະ ຂຸດຄົ້ນການທ່ອງທ່ຽວທີ່ມີປະສິດທິຜົນຢູ່ບັນດາໝູ່ບ້ານທີ່ເປັນມູນເຊື້ອຄື: ມົກກິມບົ່ງ, ເຄື່ອງປັ້ນດິນເຜົາ ແທງຮ່າ, ຜັກ ຈ່າເກ, ໄມ້ໄຜ່ - ໝາກພ້າວ ເກິມແທັງ, ໝາກແປ້ນ - ດອກໄມ້ປະດັບ ເກິມຮ່າ… ນັບແຕ່ເວລາສ້າງຕັ້ງບັນດາ tour ທ່ອງທ່ຽວຊີວະນາໆພັນ, ການທ່ອງທ່ຽວໝູ່ບ້ານອາຊີບ: ມົກກິມບົ່ງ, ເຄື່ອງປັ້ນດິນເຜົາ ແທງຮ່າ, ຜັກ ຈ່າເກ, ໄມ້ໄຜ່- ໝາກພ້າວ ເກິມແທັງ, ໝາກແປ້ນ - ດອກໄມ້ ເກິມຮ່າ… ໄດ້ຊ່ວຍໃຫ້ແຂກທ່ອງທ່ຽວ, ເປັນຕົ້ນແມ່ນແຂກທ່ອງທ່ຽວສາກົນມີເງື່ອນໄຂລົງພຶດຕິກຳຕົວຈິງ, ຂຸດຄົ້ນຮ່ອງຮອຍ, ມູນເຊື້ອວັດທະນະທຳ, ທິວທັດທຳມະຊາດ ແລະ ການດຳລົງຊີວິດຂອງປະຊາຊົນທ້ອງຖິ່ນ.
ມຸ່ງໄປເຖິງໃຈກາງທ່ອງທ່ຽວສີຂຽວແຫ່ງຊາດ
ທ້າຍເດືອນມີນາຜ່ານມາ, ແຂວງກ໋ວາງນາມໄດ້ຈັດຕັ້ງກອງປະຊຸມສຳມະນາ “ກ໋ວາງນາມພັດທະນາການທ່ອງທ່ຽວສີຂຽວ - ຮັກສາຄຸນຄ່າທ້ອງຖິ່ນ” ແລະ ປະກາດຊຸດມາດຖານການທ່ອງທ່ຽວສີຂຽວກ໋ວາງນາມ. ມີວິສາຫະກິດ, ຮາກຖານການທ່ອງທ່ຽວ 14 ແຫ່ງໄດ້ໃຫ້ຄຳໝັ້ນສັນຍາປະຕິບັດຊຸດມາດຖານດັ່ງກ່າວ.
ທ່ານຫງວຽນແທັງຮົ່ງ ຫົວໜ້າພະແນກວັດທະນະທຳ, ກິລາ ແລະ ການທ່ອງທ່ຽວແຂວງ ກ໋ວາງນາມໃຫ້ຮູ້ວ່າ, ພ້ອມກັບການພັດທະນາຂອງບັນດາຜະລິດຕະພັນຕາມຮູບແບບຊີວະພາບ, ການທ່ອງທ່ຽວສີຂຽວ, ນັບແຕ່ຕົ້ນປີມາຮອດປັດຈຸບັນ, ແຂວງກ໋ວາງນາມໄດ້ຈັດຕັ້ງສຳເລັດຫຼາຍການເຄື່ອນໄຫວນອນໃນລະບົບປີທ່ອງທ່ຽວແຫ່ງຊາດ, ດຶງດູດປະຊາຊົນ ແລະ ແຂກທ່ອງທ່ຽວເປັນຈຳນວນຫຼາຍ. ໃນ 4 ເດືອນຕົ້ນປີ, ທົ່ວແຂວງ ໄດ້ຕ້ອນຮັບແຂກກ່ວາ 382.000 ເທື່ອຄົນ (ເພີ່ມຂຶ້ນ 53,4% ເມື່ອທຽບໃສ່ໄລຍະດຽວກັນຂອງປີກາຍນີ້), ໄລ່ສະເພາະວັນບຸນ 30 ເມສາ ແລະ 1 ພຶດສະພາ, ແຂວງໄດ້ຕ້ອນຮັບແຂກກ່ວາ 200.000 ເທື່ອຄົນ ມາຢ້ຽມຢາມ ແລະ ພັກເຊົາ.
ແຂວງກ໋ວາງນາມ ໄດ້ເປີດນຳໃຊ້ລະບົບທ່ອງທ່ຽວອັດສະລິຍະ, ປະກອບສ່ວນຍົກສູງປະສິດທິຜົນໃນການຄຸ້ມຄອງ, ໂຄສະນາພາບພົດການທ່ອງທ່ຽວໃຫ້ແກ່ຫົວໜ່ວຍ, ວິສາຫະກິດ, ປະຊາຊົນ ແລະ ແຂກທ່ອງທ່ຽວ.
ບຸນຄົງ
