ຕາມຖະແຫຼງການຂອງກະຊວງການຕ່າງປະເທດ, ໂດຍໄດ້ຮັບຄຳເຊີນຂອງທ່ານປະທານາທິບໍດີ ອາເມລິກາ Joseph Robinette Biden Jr, ທ່ານນາຍົກ ລັດຖະມົນຕີ ຟ້າມມີງຈິ໊ງ ຈະພ້ອມກັບການນຳບັນດາປະເທດ ອາຊຽນ ເຂົ້າຮ່ວມກອງປະຊຸມສຸດຍອດພິເສດສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນ ອາຊຽນ-ອາເມລິກາ ໃນວັນທີ 12-13 ພຶດສະພາ ຢູ່ວໍຊິງຕັນ ດີຊີ. ເນື່ອງໃນໂອກາດນີ້, ທ່ານນາຍົກລັດຖະມົນຕີ ຟ້າມມີງຈິ໊ງ ຈະນຳໜ້າຄະນະຜູ້ແທນຫວຽດນາມ ໄປຢ້ຽມຢາມ ແລະ ເຮັດວຽກຢູ່ ອາເມລິກາ ແລະ ສະຫະປະຊາຊາດ (ສປຊ) ແຕ່ວັນທີ 11-17 ພຶດສະພາ 2022.
 |
| ທ່ານນາຍົກລັດຖະມົນຕີ ຟ້າມມີງຈິ໊ງ ເຂົ້າຮ່ວມ ແລະກ່າວຄໍາເຫັນທີ່ກອງປະຊຸມສຸດຍອດອາຊຽນ-ອາເມລິກາ ຄັ້ງທີ 9 ຜ່ານລະບົບທາງໄກ ໃນວັນທີ 26 ຕຸລາ 2021. ພາບ: VGP |
ການຢ້ຽມຢາມຂອງທ່ານນາຍົກລັດຖະມົນຕີ ຟ້າມມີງຈິ໊ງ ແລະ ຄະນະຜູ້ແທນຫວຽດນາມ ໄດ້ຢືນຢັນທັດສະນະສະເໝີຕົ້ນສະເໝີປາຍຂອງຫວຽດນາມ ໃນການປະຕິບັດແນວທາງພົວພັນຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ເພື່ອສັນຕິພາບ, ມິດຕະພາບ, ການຮ່ວມມື ແລະ ພັດທະນາ, ຫັນການພົວພັນຕ່າງປະເທດເປັນຫຼາຍຝ່າຍ ແລະ ຫຼາຍຮູບຫຼາຍແບບ; ເປັນເພື່ອນມິດ, ເປັນຄູ່ຮ່ວມມືທີ່ໜ້າໄວ້ເນື້ອເຊື່ອໃຈ ແລະ ເປັນສະມາຊິກທີ່ຕັ້ງໜ້າ ແລະ ມີຄວາມຮັບຜິດຊອບໃນປະຊາຄົມສາກົນ; ຮັບປະກັນຜົນປະໂຫຍດສູງສຸດຂອງປະເທດຊາດ ບົນພື້ນຖານຫຼັກການພື້ນຖານຂອງກົດບັດ ສປຊ ແລະ ກົດໝາຍສາກົນ, ຄວາມສະເໝີພາບ, ການຮ່ວມມື ແລະ ຕ່າງຝ່າຍຕ່າງມີຜົນປະໂຫຍດ.
ດ້ວຍຈິດໃຈເປັນເຈົ້າການ, ຕັ້ງໜ້າ ແລະ ມີຄວາມຮັບຜິດຊອບ, ຄະນະຜູ້ແທນຫວຽດນາມ ຈະເຂົ້າຮ່ວມຢ່າງຄົບຖ້ວນ ແລະ ເໝາະສົມໃນບັນດາການເຄື່ອນໄຫວໃນຂອບເຂດກອງປະຊຸມສຸດຍອດພິເສດ ອາຊຽນ - ອາເມລິກາ ໃນຄັ້ງນີ້, ປະກອບສ່ວນເຂົ້າໃນບັນດາເນື້ອໃນປຶກສາຫາລື ແລະ ແລກປ່ຽນບົນຈິດໃຈ ຄວາມຈິງໃຈ, ຄວາມໄວ້ເນື້ອເຊື່ອໃຈ ແລະ ການຮ່ວມມື, ປະກອບສ່ວນຊຸກຍູ້ການພົວພັນຄູ່ຮ່ວມມືຍຸດທະສາດ ອາຊຽນ - ອາເມລິກາ ຂຶ້ນສູ່ລະດັບສູງໃໝ່ເພື່ອສັນຕິພາບ, ສະຖຽນລະພາບ ແລະ ຄວາມວັດທະນາຖາວອນຢູ່ພາກພື້ນ ແລະ ໃນທົ່ວໂລກ.
ນີ້ກໍ່ແມ່ນໂອກາດເພື່ອໃຫ້ບັນດາການນຳຫວຽດນາມ ໄດ້ພົບປະກັບບັນດາການນຳ ອາຊຽນ ໂດຍກົງ ເພື່ອແນໃສ່ຊຸກຍູ້ບັນດາເນື້ອໃນການຮ່ວມມື 2 ຝ່າຍ.
ບູນມີ
