ພິທີປຸກລະດົມດັ່ງກ່າວໄດ້ຈັດຂຶ້ນດ້ວຍຮູບແບບເຊິ່ງໜ້າ ແລະ ທາງໄກ ຢູ່ສະຫະພັນບັນດາອົງການຈັດຕັ້ງມິດຕະພາບຫວຽດນາມ (ຮ່າໂນ້ຍ - ຫວຽດນາມ) ແລະ ສະມາຄົມມິດຕະພາບ ລາວ - ຫວຽດນາມ (ນະຄອນຫຼວງວຽງຈັນ - ລາວ).
ເຂົ້າຮ່ວມພິທີປຸກລະດົມມີ ທ່ານ ຟານແອງເຊີນ, ຮອງປະທານ, ເລຂາທິການສະຫະພັນບັນດາອົງການຈັດຕັ້ງມິດຕະພາບຫວຽດນາມ; ທ່ານ ຈັນທະພອນ ຄຳມະນີຈັນ, ອັກຄະລັດຖະທູດ ແຫ່ງ ສປປ ລາວ ປະຈຳ ຫວຽດນາມ ແລະ ບັນດາການນຳຂອງສະມາຄົມມິດຕະພາບ ຫວຽດນາມ-ລາວ, ສະມາຄົມມິດຕະພາບ ລາວ-ຫວຽດນາມ.
 |
| ບັນຍາກາດທີ່ພິທີປຸກລະດົມການປະກວດ "ໃຫ້ຂອງທີ່ລະລຶກເລົ່າເລື່ອງ" |
ການປະກວດແມ່ນການເຄື່ອນໄຫວຈຸດສຸມ ແລະ ແທດຈິງໃນໂຄງການສື່ສານພິເສດ “60 ປີແຫ່ງມິດຕະພາບຫວຽດນາມ - ລາວ: ຮ່ວມສາຍພູຫຼວງ” ເພື່ອສະເຫຼີມສະຫຼອງ 60 ປີແຫ່ງວັນສ້າງສາຍພົວພັນທາງການທູດຫວຽດນາມ - ລາວ (ວັນທີ 5 ກັນຍາ 1962 - ວັນທີ 5 ກັນຍາ 2022) ແລະ ສະເຫຼີມສະຫຼອງ 45 ປີ ແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ (ວັນທີ 18 ກໍລະກົດ 1977 - ວັນທີ 18 ກໍລະກົດ 2022) ໂດຍວາລະສານຍຸກສະໄໝ ແລະ ສະຖານເອກອັກຄະລັດຖະທູດລາວ ປະຈຳ ຫວຽດນາມ, ສະມາຄົມມິດຕະພາບຫວຽດນາມ - ລາວ ແລະ ສະມາຄົມມິດຕະພາບ ລາວ - ຫວຽດນາມ ຈັດຕັ້ງ.
 |
| ທ່ານ ຟານແອງເຊີນ, ຮອງປະທານ, ເລຂາທິການສະຫະພັນບັນດາອົງການຈັດຕັ້ງມິດຕະພາບຫວຽດນາມ ປະກາດການປຸກລະດົມການປະກວດ "ໃຫ້ຂອງທີ່ລະລຶກເລົ່າເລື່ອງ". |
ຕາງໜ້າການນຳສະຫະພັນບັນດາອົງການຈັດຕັ້ງມິດຕະພາບຫວຽດນາມ, ອົງການ ຊີ້ນໍາການປະກວດ ແລະ ຄະນະຈັດຕັ້ງການປະກວດ, ຮອງປະທານ, ເລຂາທິການສະຫະພັນບັນດາອົງການຈັດຕັ້ງມິດຕະພາບຫວຽດນາມ ໄດ້ ປະກາດປຸກລະດົມການປະກວດ "ໃຫ້ຂອງທີ່ລະລຶກເລົ່າເລື່ອງ" ເລີ່ມແຕ່ວັນທີ 9 ພຶດສະພາ 2022 ຫາວັນທີ 31 ສິງຫາ 2022. ທ່ານ ຟານແອງເຊີນ ເນັ້ນໜັກວ່າ: “ການປະກວດແມ່ນໂອກາດເພື່ອໃຫ້ປະຊາຊົນ, ພະນັກງານ, ອະດີດທະຫານ, ນັກປະພັນ, ນັກສິລະປິນ, ນັກຮຽນ, ນັກສຶກສາ ແລະ ປະຊາຊົນທຸກຊັ້ນວັນນະຂອງສອງປະເທດຫວນຄືນ, ເລົ່າຄືນ ແລະ ຂຽນກ່ຽວກັບຄວາມຊົງຈຳຂອງສອງປະເທດ, ເລື່ອງລາວທີ່ຕື້ນຕັນໃຈ, ສູງສົ່ງ, ໜ້າຈົດຈໍາ ແລະ ເອກອ້າງທະນົງໃຈກ່ຽວກັບສາຍພົວພັນມິດຕະພາບ ຫວຽດນາມ - ລາວ, ລາວ - ຫວຽດນາມ”.
 |
| ທ່ານພົນຕີ ຫງວຽນຕ໊ຽນລອງ, ຮອງປະທານສູນກາງສະມາຄົມມິດຕະພາບຫວຽດນາມ - ລາວ ກ່າວຄຳເຫັນທີ່ພິທີປຸກລະດົມການປະກວດ. |
ກ່າວຄຳເຫັນທີ່ພິທີ, ທ່ານພົນຕີ ຫງວຽນຕ໊ຽນລອງ, ຮອງປະທານສູນກາງສະມາຄົມມິດຕະພາບຫວຽດນາມ - ລາວ ຢືນຢັນວ່າ, ບັນດາຂອງທີ່ລະນຶກ, ຮ່ອງຮອຍ ແລະ ຄຸນຄ່າປະຫວັດສາດແຫ່ງສາຍພົວພັນສາມັກຄີແບບພິເສດຫວຽດນາມ - ລາວ ຕ້ອງສືບຕໍ່ໄດ້ຮັບການໂຄສະນາ, ສຶກສາ ແລະ ຫຼໍ່ຫຼອມ ເພື່ອພັດທະນາສອດຄ່ອງກັບລະດັບສູງທີ່ສອງປະເທດພວມປະຕິບັດໃນປະຈຸບັນ.
ການປະກວດ "ໃຫ້ຂອງທີ່ລະລຶກເລົ່າເລື່ອງ" ມີຄວາມໝາຍເປັນພິເສດ, ສໍາຄັນ, ປະກອບສ່ວນພ້ອມກັບສອງປະເທດສົ່ງເສີມບັນດາຄຸນຄ່າອັນສູງສົ່ງຂອງສາຍພົວພັນສາມັກຄີແບບພິເສດ ຫວຽດນາມ - ລາວ ເຖິງປະຊາຊົນທຸກຊັ້ນວັນນະ, ພິເສດແມ່ນໄວໜຸ່ມ, ດ້ວຍແບບວິທີໃໝ່ ແລະ ດຶງດູດກວ່າເກົ່າ. ຄຽງຂ້າງນັ້ນ, ການປະກວດຍັງໄດ້ປະກອບສ່ວນຊຸກຍູ້ຄວາມສາມັກຄີແບບພິເສດຂອງຊາວຫວຽດນາມ ກັບບັນດາປະເທດ ແລະ ເພື່ອນມິດໃນໂລກ.
 |
| ບັນຍາກາດຢູ່ ນະຄອນຫຼວງວຽງຈັນ-ລາວ. |
ສະມາຄົມມິດຕະພາບ ຫວຽດນາມ - ລາວ ຈະຕັ້ງໜ້າຜັນຂະຫຍາຍບັນດາເນື້ອໃນຂອງການປະກວດ "ໃຫ້ຂອງທີ່ລະລຶກເລົ່າເລື່ອງ" ໃຫ້ແກ່ພະນັກງານ, ສະມາຊິກພັກໃນທົ່ວປະເທດ, ພ້ອມກັນນັ້ນ ກໍປະກອບສ່ວນໂຄສະນາເຜີຍແຜ່ເຖິງປະຊາຊົນ ເພື່ອໃຫ້ການປະກວດປະສົບຜົນດີງາມທີ່ສຸດ.
ທີ່ວຽງຈັນ, ທ່ານ ສາຍຂອງ ສາຍນະສິນ ຫົວໜ້າກົມການສຶກສາຊັ້ນສູງ, ກະຊວງສຶກສາທິການ ແລະ ກິລາລາວ, ຮອງປະທານ ທັງເປັນ ເລຂາທິການສະມາຄົມມິດຕະພາບລາວ - ຫວຽດນາມ ຂັ້ນສູງກາງ ໄດ້ຕີລາຄາສູງການຈັດຕັ້ງການປະກວດ "ໃຫ້ຂອງທີ່ລະລຶກເລົ່າເລື່ອງ". ທ່ານ ເນັ້ນໜັກວ່າ, ນີ້ແມ່ນເຫດການທີ່ມີຄວາມໝາຍສໍາຄັນສໍາລັບການຊຸກຍູ້ ແລະ ສົ່ງເສີມຄົນໄວໜຸ່ມຮ່ຳຮຽນ ແລະ ຮັບຮູ້ຄວາມສຳຄັນຂອງສາຍພົວພັນແບບພິເສດລາວ-ຫວຽດນາມ, ແລະ ຢືນຢັນສາຍພົວພັນມິດຕະພາບທີ່ເປັນມູນເຊື້ອອັນດີງາມ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ລາວ-ຫວຽດນາມ.
 |
| ທ່ານ ຈັນທະພອນ ຄຳມະນີຈັນ, ອັກຄະລັດຖະທູດ ແຫ່ງ ສປປ ລາວ ປະຈຳ ຫວຽດນາມ ກ່າວຄຳເຫັນທີ່ພິທີປຸກລະດົມການປະກວດ. |
ທ່ານ ສາຍຂອງ ສາຍນະສິນ ໃຫ້ຮູ້ວ່າ, ຄະນະຈັດຕັ້ງຈະໝູນໃຊ້ປະສົບການ ຂອງຕົນເພື່ອກວດກາ ແລະ ຄັດເລືອກບົດປະພັນທີ່ມີຄວາມໝາຍທີ່ສຸດຂອງຜູ້ເຂົ້າຮ່ວມການປະກວດ ເພື່ອໃຫ້ປະຊາຊົນສອງປະເທດໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບສາຍພົວພັນມິດຕະພາບແບບພິເສດ, ບໍລິສຸດຜຸດຜ່ອງ ແລະ ຫາຍາກຢູ່ໃນໂລກ ລະຫວ່າງ ສອງປະເທດ ລາວ ແລະ ຫວຽດນາມ.
ກໍ່ໃນພິທີປຸກລະດົມ, ທ່ານ ຈັນທະພອນ ຄຳມະນີຈັນ, ອັກຄະລັດຖະທູດ ແຫ່ງ ສປປ ລາວ ປະຈຳ ຫວຽດນາມ ໃຫ້ຮູ້ວ່າ: ການປະກວດ "ໃຫ້ຂອງທີ່ລະລຶກເລົ່າເລື່ອງ" ມີເປົ້າໝາຍເພື່ອຊອກຄືນ ແລະ ເຕົ້າໂຮມບັນດາຄວາມຊົງຈຳ, ວັດຖຸພັນທີ່ປະຖົມປະຖານ, ເລັກໆ ນ້ອຍໆ, ເກົ່າແກ່ ແຕ່ບັນຈຸ ແລະ ຮັກສາບັນດາຄຸນຄ່າອັນລໍ້າຄ່າຂອງຄວາມຮູ້ສຶກ ແລະ ປະວັດສາດການພົວພັນ ລະຫວ່າງປະຊາຊົນສອງປະເທດ.
ທີ່ພິທີປຸກລະດົມ, ຄະນະຈັດຕັ້ງການປະກວດ "ໃຫ້ຂອງທີ່ລະລຶກເລົ່າເລື່ອງ" ໄດ້ແນະນຳໂດຍຫຍໍ້ກ່ຽວກັບກະຕິກາ ແລະ ຂໍ້ມູນຈຳເປັນຈຳນວນໜຶ່ງຂອງການປະກວດ.
ຕາມກະຕິກາການປະກວດ, ຜູ້ເຂົ້າຮ່ວມແມ່ນບັນດາບຸກຄົນ, ໝູ່ຄະນະນັກຊ່ຽວຊານ, ພະນັກງານ, ນັກຮົບຂອງບັນດາກຳລັງປະກອບອາວຸດ, ອົງການ, ອົງການຈັດຕັ້ງມະຫາຊົນ, ບັນດາຫົວໜ່ວຍ, ວິສາຫະກິດ, ນັກສິລະປິນ, ນັກສຶກສາຕ່າງປະເທດ, ນັກສຶກສາ, ນັກທ່ອງທ່ຽວ… ຫວຽດນາມ ທີ່ເຄີຍເຮັດວຽກ, ສຶກສາ, ໄປທ່ອງທ່ຽວຢູ່ລາວ ຫຼື ມີສາຍພົວພັນ, ເຮັດວຽກກັບເພື່ອນລາວ; ອົງການຈັດຕັ້ງ, ພົນລະເມືອງ, ພະນັກງານ, ນັກສຶກສາຕ່າງປະເທດ, ນັກສຶກສາ... ລາວ ໄດ້ເຮັດວຽກ, ສຶກສາ, ໄປທ່ອງທ່ຽວຢູ່ຫວຽດນາມ ຫຼື ມີການພົວພັນ ແລະ ເຮັດວຽກກັບຊາວຫວຽດນາມ.
 |
| ບັນດາຜູ້ແທນຖ່າຍຮູບເປັນທີ່ລະນຶກທີ່ພິທີປຸກລະດົມການປະກວດ. |
ບົດທີ່ເຂົ້າຮ່ວມການປະກວດແມ່ນບົດຂຽນ, ຄລິບວີດີໂອ, ເອົາດີໂອ ກ່ຽວກັບເລື່ອງລາວທີ່ກ່ຽວຂ້ອງກັບຂອງທີ່ລະນຶກຂອງຕົນ. ບົດທີ່ເຂົ້າຮ່ວມການປະກວດອາດຈະຂຽນ, ເລົ່າເລື່ອງຄວາມຊົງຈຳກ່ຽວກັບ ຂອງທີ່ລະນຶກອັນໜຶ່ງ ຫຼື ຫຼາຍກວ່ານັ້ນ, ໂດຍເປັນພາສາຫວຽດ ຫຼື ພາສາລາວ. ຜູ້ຂຽນແຕ່ລະຄົນ/ກຸ່ມ ສາມາດສົ່ງ 1 - 5 ບົດເຂົ້າປະກວດ. ບົດຂຽນຕ້ອງມີຮູບພາບ, ຂອງທີ່ລະນຶກ ແລະ ເອກະສານສາລະຄະດີທີ່ກ່ຽວຂ້ອງຕິດຄັດໄປນຳ. ແຕ່ລະບົດທີ່ເຂົ້າຮ່ວມການປະກວດຕ້ອງມີຄວາມຍາວບໍ່ເກີນ 2.000 ຄໍາ (ພາສາຫວຽດ).
ຂອງທີ່ລະນຶກໄດ້ຂຽນ, ອະທິບາຍແມ່ນບັນດາວັດຖຸພັນຂອງບຸກຄົນ, ອົງການຈັດຕັ້ງກ່ຽວກັບການພົວພັນລະຫວ່າງບຸກຄົນ, ໝູ່ຄະນະ, ໜ່ວຍງານ ແລະ ທ້ອງຖິ່ນລະຫວ່າງຫວຽດນາມ ແລະ ລາວ. ບັນດາວັດຖຸພັນແມ່ນວັດຖຸສິ່ງຂອງ (ໝວກ, ເສື້ອ, ກະເປົ໋າ, ໄຟສາຍ,...); ວັດຖຸພັນທີ່ຈົດກ່າຍບັນທຶກ, ບົດປະພັນວັນນະຄະດີ ແລະ ສິລະປະ (ຈົດໝາຍ, ບົດເພງ, ບົດກະວີ, ຮູບພາບ...). ວັດຖຸພັນຕ້ອງມີການເກັບຮັກສາໄວ້ຢ່າງຫນ້ອຍສຸດ 5 ປີ (ແຕ່ປີ 2017). ວັດຖຸພັນເຫຼົ່ານັ້ນຕ້ອງມີປະຫວັດ, ຕົ້ນກໍາເນີດ ແລະ ເນື້ອໃນ, ເຫດຜົນໃນການເກັບຮັກສາ. ວັດຖຸປະພັນທີ່ບໍ່ນອນໃນປະເພດທີ່ມີຄວາມຂັດແຍ້ງກ່ຽວກັບສິດເປັນເຈົ້າຂອງ, ບໍ່ຢູ່ໃນບັນຊີລາຍຊື່ວັດຖຸ, ສິນຄ້າ ແລະ ອື່ນໆ, ເຊິ່ງຖືເປັນຂອງຜິດກົດໝາຍ ຫຼື ເກັບຮັກສາໄວ້ແບບຜິດກົດໝາຍຫວຽດນາມ ແລະ ລາວ.
ຜູ້ຂຽນສາມາດເລືອກ 3 ວີທີເພື່ອສົ່ງບົດເຂົ້າຮ່ວມການປະກວດດັ່ງຕໍ່ໄປນີ້:
ວິທີທີ 1: ສົ່ງ CD/DVD, USB, ເອກະສານຜ່ານທາງໄປສະນີ ຫຼື ໂດຍກົງໄປຍັງຄະນະຈັດຕັ້ງການປະກວດ "ໃຫ້ຂອງທີ່ລະລຶກເລົ່າເລື່ອງ" ຢູ່ທີ່ຢູ່: ວາລະສານຍຸກສະໄໝ, ເລກທີ 61 ບ່າຈ້ຽວ, ຕາແສງ ຮ່າງບ່າຍ, ເມືອງ ຮວ່ານກ໋ຽມ, ນະຄອນຫຼວງຮ່າໂນ້ຍ); ເບີໂທລະສັບ 84-24-39445396. ໂທລະສັບສາຍດ່ວນ: 097.681.2201.
ວິທີທີ 2: ສົ່ງເອກະສານການເຂົ້າທີ່ຢູ່ ອີເມວ: toasoan@thoidai.com.vn
ວິທີທີ 3: ສົ່ງເຂົ້າເວັບໄຊຂອງການປະກວດ. ຜູ້ເຂົ້າຮ່ວມການປະກວດສາມາດເຂົ້າໃນ 3 ເວັບໄຊ: https://thoidai.com.vn/; https://huunghivietlao.thoidai.com.vn/ ; http://60namvietlao.thoidai.com.vn/ ຈະໄດ້ຮັບຄຳແນະນຳລະອຽດກ່ຽວກັບການປະກວດ.
ຄະນະຈັດຕັ້ງເປີດຮັບບົດເຂົ້າຮ່ວມການປະກວດແຕ່ວັນທີ 9 ພຶດສະພາ 2022 ເຖິງວັນທີ 31 ສິງຫາ 2022 (ຕາມວັນທີຝາກທາງໄປສະນີ ຫຼື ວັນທີຮັບບົດເຂົ້າຮ່ວມການປະກວດ ຜ່ານທາງອີເມວ, ເວັບໄຊຂອງຄະນະຈັດຕັ້ງ). ໂຄງປະກອບລາງວັນ ປະກອບມີ: ລາງວັນພິເສດ 01 ລາງວັນ, ລາງວັນທີໜຶ່ງ 05 ລາງວັນ, ລາງວັນທີສອງ 15 ລາງວັນ, ລາງວັນທີສາມ 20 ລາງວັນ ແລະ ລາງວັນຊົມເຊີຍ 30 ລາງວັນ.
ທີ່ພິທີມອບລາງວັນການແຂ່ງຂັນ, ຄະນະຈັດຕັ້ງຈະຈັດວາງສະແດງບັນດາຂອງທີ່ລະນຶກພິເສດ, ພົ້ນເດັ່ນ. ຜູ້ເຂົ້າຮ່ວມການປະກວດ ແລະ ກຸ່ມຜູ້ເຂົ້າຮ່ວມການປະກວດສາມາດຕິດຕໍ່ກັບຄະນະຈັດຕັ້ງການປະກວດ ຫຼື ສະແດງໃນບົດທີ່ເຂົ້າຮ່ວມການປະກວດກ່ຽວກັບຄວາມຕ້ອງການທີ່ຈະສົ່ງ ຂອງທີ່ລະນຶກມາວາງສະແດງທີ່ພິທີມອບລາງວັນ (ຄາດວ່າຈະຈັດຂຶ້ນໃນເດືອນກັນຍາ 2022).
ບູນມີ
