 |
ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງສປປ ລາວ.(ພາບ: vientianemai.net)
ທ່ານ ວົງເດືອນ ບຸນຍະແສງ ໄດ້ລາຍງານວ່າ: ເມືອງຫາດຊາຍຟອງ ມີ 60 ບ້ານ ພົນລະເມືອງ 100.204 ຄົນ ຍິງ 50.187 ຄົນ ມີທາງດິນແດງເຂົ້າບ້ານ 132 ເສັ້ນ ປະຊາກອນສ່ວນໃຫຍ່ປະກອບອາຊີບປູກຝັງ-ລ້ຽງສັດ ມີເນື້ອທີ່ນາປີ 6.080 ເຮັກຕາ ສະມັດຖະພາບ 4,49 ໂຕນຕໍ່ເຮັກຕາ ນາແຊງ 4.010 ເຮັກຕາ ສະມັດຖະພາບ 5,63 ໂຕນຕໍ່ເຮັກຕາ ເນື້ອທີ່ປູກພືດຜັກລະດູແລ້ງ 2.110 ເຮັກຕາ ລະດູຝົນ 1.163 ເຮັກຕາ ມີກຸ່ມຜະລິດພືດຜັກອິນຊີ ແລະ ກຸ່ມຜະລິດພືດຜັກສະອາດ ໃນນີ້ ກຸ່ມພືດຜັກສະອາດມີກຸ່ມ ບ້ານສິມມະໂນ ກຸ່ມບ້ານຫາດກັນຊາ ແລະ ກຸ່ມບ້ານສະຫວ່າງ ສ່ວນກຸ່ມພືດຜັກອິນຊີ ມີກຸ່ມຊາຍຟອງ ແລະ ກຸ່ມໂຄກຊາຍ ມີລະບົບຊົນລະປະທານ 16 ແຫ່ງ ໂຄງການສ້າງຄູປ້ອງກັນນ້ຳຖ້ວມ ຍາວ 32,2 ກິໂລແມັດ ເຊິ່ງເປັນຄູດິນແດງ ຍາວ 6 ກິໂລແມັດ ກວ້າງ 4 ແມັດ ປີ 2018 ໄດ້ຮັບຕົວເລກເກັບລາຍຮັບ 19,83 ຕື້ກວ່າກີບ ປະຕິບັດໄດ້ 18,99 ຕື້ກວ່າກີບ ເທົ່າກັບ 95,77% ປີ 2019 ໄດ້ຮັບຕົວເລກເກັບລາຍຮັບ 20,78 ຕື້ກວ່າກີບ ປັດຈຸບັນ ປະຕິບັດໄດ້ 11,79 ຕື້ກວ່າກີບ ເທົ່າກັບ 56,73% ໄດ້ຮັບອະນຸມັດງົບປະມານ 42 ໂຄງການ ມູນຄ່າ 2,94 ຕື້ກວ່າກີບ ໃນນີ້ ສືບຕໍ່ກໍ່ສ້າງ 14 ໂຄງການ ມູນຄ່າ 548,48 ລ້ານກີບ ໂຄງການສົ່ງເສີມວິຊາການ 3 ໂຄງການ ມູນຄ່າ 49,56 ລ້ານກີບ ໂຄງການຊຳລະໜີ້ 21 ໂຄງການ ມູນຄ່າ 1.854,39 ລ້ານກີບ ໂຄງການຟື້ນຟູໄພພິບັດ 4 ໂຄງການ ມູນຄ່າ 490,65 ລ້ານກີບ ໃນນີ້ ພະແນກໂຍທາທິການ ແລະ ຂົນສົ່ງ ນວ ເປັນເຈົ້າຂອງໂຄງການ ເຊັ່ນ: ໂຄງການທາງເບຕົງ ຈີ່ນາຍໂມ້ ຍາວ 14 ກິໂລແມັດ ປັດຈຸບັນ ຄືບໜ້າ 65% ໂຄງການກໍ່ສ້າງກັນຕາ ຝັ່ງເຈື່ອນ ຢູ່ບ້ານຊາຍຟອງເໜືອ ປັດຈຸບັນ ຄືບໜ້າ 30% ນອກນີ້ ວຽກງານອື່ນໆກໍໄດ້ຮັບການປັບປຸງດີຂຶ້ນ.
ໂອກາດນີ້ ທ່ານນາຍົກລັດຖະມົນຕີ ກໍໄດ້ສະແດງຄວາມຊົມເຊີຍຕໍ່ຜົນງານ ທີ່ເມືອງຫາດຊາຍຟອງ ຍາດມາໄດ້ໃນໄລຍະຜ່ານມາ ພ້ອມທັງໄດ້ເນັ້ນໃຫ້ອຳນາດການປົກຄອງ ກໍຄື ພາກສ່ວນກ່ຽວຂ້ອງສືບຕໍ່ເອົາໃຈໃສ່ສົ່ງເສີມການຜະລິດເປັນສິນຄ້າ ແລະ ລ້ຽງສັດ ເພື່ອຕອບສະໜອງໃຫ້ໂຄງການທາງລົດໄຟ ການຜະລິດຕ້ອງເນັ້ນໃຫ້ປອດສານພິດ ເຮັດເປັນກຸ່ມ ເປັນສະມາຄົມຂອງເມືອງ ເພື່ອສາມາດຕິດຕາມ ແລະ ຄຸ້ມຄອງ ໃຫ້ເມືອງຫາດຊາຍຟອງສົມທົບກັບ ນວ ແລະ ພາກສ່ວນກ່ຽວຂ້ອງ ຕິດຕາມ ແລະ ຄຸ້ມຄອງລາຄາສິນຄ້າ ແລະ ພືດຜັກຕ່າງໆ ສົມທົບກັບບັນດາກຸ່ມບ້ານ ແລະ ປະຊາຊົນ ເພື່ອຕ້ານສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໄຂ້ເລືອດອອກ ແລະ ພະຍາດອະຫິວາໝູອາຟຣິກາ ຖ້າເກີດຂຶ້ນແລ້ວຕ້ອງໄດ້ມີມາດຕະການເດັດຂາດໃນການແກ້ໄຂ ໃຫ້ກະຊວງອຸດສາຫະກຳ ແລະ ການຄ້າ ເອົາໃຈໃສ່ຄົ້ນຄວ້າປັບປຸງນະໂຍບາຍ ແລະ ນິຕິກຳສົ່ງເສີມການຜະລິດເປັນສິນຄ້າ ໂດຍການມີສ່ວນຮ່ວມຂອງພາກລັດ ຜູ້ປະກອບການ ແລະ ປະຊາຊົນ ໃຫ້ຊັດເຈນກວ່າເກົ່າ.
（ແຫຼ່ງຂໍ້ມູນ： vientianemai.net）
