 |
ມະຫາວິທະຍາໄລແຫ່ງຊາດ ລາວ ສອບເສັງຄັດເລືອກນັກສຶກສາ ສົກປີ 2019-2020
ທ່ານ ຄຳຜົງ ນາມມະວົງມີໄຊ ຫົວໜ້າຫ້ອງການວິຊາການ ມະຫາວິທະຍາໄລແຫ່ງຊາດໄດ້ໃຫ້ຮູ້ວ່າ: ເພື່ອຮັບປະກັນຄວາມພ້ອມຂອງການສອບເສັງໃຫ້ມີປະສິດທິຜົນ ມະຫາວິທະຍາໄລແຫ່ງຊາດໄດ້ມີການກະກຽມ ໂດຍມີຄະນະກຳມະການຊີ້ນຳການສອບເສັງລະດັບຊາດ ຊຶ່ງແມ່ນທ່ານຮອງລັດຖະມົນຕີກະຊວງສຶກສາທິການ ແລະກິລາເປັນປະທານ, ມີການແຕ່ງຕັ້ງຄະນະກຳມະການຊີ້ນຳລວມ, ຄະນະກຳມະການຊີ້ນຳແຕ່ລະຈຸດສອບເສັງລວມທັງແຕ່ງຕັ້ງອະນຸກຳມະການຕ່າງໆເຊັ່ນ: ອະນຸກຳມະການຮັບຜິດຊອບລົງທະບຽນອອນລາຍ, ສະຖານທີ່, ດ້ານການເງິນງົບປະມານ, ຍາມຫ້ອງເສັງ ແລະ ອະນຸກຳມະການຄວບຄຸມບົດສອບເສັງ ແລະ ອື່ນໆ, ພ້ອມທັງກຽມພ້ອມອຸປະກອນຮັບໃຊ້ທີ່ຈຳເປັນຢ່າງຄົບຖ້ວນ.
ໃນການສອບເສັງຄັດເລືອກນັກສຶກສາເຂົ້າຮຽນທີ່ ມຊ ປີນີ້ ມີນັກຮຽນທີ່ລົງທະບຽນຜ່ານອອນລາຍສະໝັກເຂົ້າສອບເສັງທັງໝົດ 15.00 ກວ່າຄົນ ແບ່ງຈຸດສອບເສັງອອກເປັນ 18 ຈຸດ ມີ 647 ຫ້ອງສອບເສັງຄື: ສູນສອບເສັງສາຍ A ມີ 6 ຈຸດ ຄື: ຈຸດເສດຖະສາດ, ສະຖາບັນລາວ-ຍີ່ປຸ່ນ, ສຶກສາສາດ, ວິທະຍາສາດທຳມະຊາດ, ວິທະຍາສາດສັງຄົມ, ວິທະຍາສາດປ່າໄມ້ ລວມມີຫ້ອງສອບເສັງທັງໝົດ 199 ຫ້ອງ ມີນັກສອບເສັງ 4.910 ຄົນ. ສູນສອບເສັງສາຍ B ມີ 11 ຈຸດ ຄື: ຈຸດວິສະວະກຳສາດ, ນິຕິສາດ-ລັດຖະສາດ, ວິທະຍາໄລສັບພະວິຊາ, ມສ ວຽງຈັນ, ອັກ ສອນສາດ, ສະຖາບັນຂົງຈື້, ສະໂມສອນໃຫຍ່ມຊ, ມສ ສາ ທິດ, ປະຖົມສາທິດ, ສະຖາປັດ ຕະຍະກຳສາດ. ລວມມີຫ້ອງສອບເສັງ 414 ຫ້ອງ ມີນັກສອບເສັງ 9.070 ຄົນ ແລະ ສູນ ສອບເສັງສາຍ C ມີຈຸດສອບ ເສັງ 1 ຈຸດທີ່ວິທະຍາສາດສິ່ງແວດລ້ອມ ມີຫ້ອງສອບເສັງ 34 ຫ້ອງ ມີນັກສອບເສັງ 1.020 ຄົນ.
ໃນການສອບເສັງ ປີນີ້ມີວິຊາສອບເສັງທັງໝົດ 8 ວິຊາ. ແບ່ງອອກເປັນ 3 ສາຍຄື: ສາຍວິທະຍາສາດທຳມະຊາດ, ສາຍສັງຄົມ ແລະ ສາຍເຄິ່ງສັງຄົມເຄິ່ງທຳມະຊາດ. ພາຍຫຼັງການສອບເສັງຄາດວ່າຈະປະກາດຜົນໄດ້ພາຍໃນ 20 ວັນ ຊຶ່ງນັກສຶກສາສາມາດຕິດຕາມໄດ້ທາງເວັບໄຊຂອງ ມຊ ແລະ ຕິດຕາມການປະກາດຜົນທີ່ມະຫາວິທະຍາໄລແຫ່ງຊາດ ພ້ອມດຽວກັນນີ້ກໍ່ຈະສົ່ງຜົນການສອບເສັງໄປຍັງພະແນກສຶກສາທິການ ແລະ ກິລາໃນແຕ່ລະແຂວງ ແລະ ນະຄອນຫຼວງ.
（ແຫຼ່ງຂໍ້ມູນ： pasaxon.org.la）
