 |
| ພາບປະກອບ: TTXVN |
ຕາມສຳນັກຂ່າວສານຫວຽດນາມ ປະຈຳ ມົສກູ ແລ້ວ, ມາຮອດຕອນຄ່ຳວັນທີ 7 ມີນາ, ຄະນະຜູ້ແທນສະຖານທູດຫວຽດນາມ ປະຈຳສະຫະພັນລັດເຊຍ ໄດ້ສົມທົບກັບສະມາຄົມຊາວ ຫວຽດນາມ ຢູ່ບັນດານະຄອນພາກໃຕ້ ລັດເຊຍ ຈັດຕັ້ງພິທີຮັບຊາວອົບພະຍົບຫວຽດນາມ 20 ຄົນ ອອກຈາກເຂດສູ້ຮົບ ຢູ່ຢູແກຼນ ໄປຍັງສະຫະພັນລັດເຊຍ.
ສະຖານທູດ ຫວຽດນາມ ປະຈຳ ລັດເຊຍ ແລະ ປະຊາຄົມຊາວ ຫວຽດນາມ ປະຈຳ Rostov ແລະ Voronezh ໜູນຊ່ວຍປະຊາຊົນເຮັດລະບຽບການເອກະສານຜ່ານແດນ, ມີບ່ອນພັກຜ່ອນຊົ່ວຄາວເປັນປົກກະຕິ ແລະ ສະໜອງສິ່ງຂອງທີ່ຈຳເປັນໃນການດຳລົງຊີວິດປະຈຳວັນ.
ໂດຍຕອບສຳພາດຕໍ່ນັກຂ່າວ, ລຸງ ຮວ່າງມິນຮົ່ງ (ເກີດປີ 1962) - ຜູ້ໜຶ່ງທີ່ຫາກໍ່ອົບພະຍົບຈາກແຂວງ Kharkov ກ່າວວ່າ: “ເມື່ອເກີດສົງຄາມ, ທຸກຄົນມີຄວາມກັງວົນໃຈ, ກິນບໍ່ໄດ້, ນອນບໍ່ຫຼັບ, ຍາມໃດກໍ່ຢູ່ໃນທ່າກຽມພ້ອມຫຼົບໄປຍັງບ່ອນລີ້ໄພ".
ພາຍຫຼັງການປຶກສາຫາລືຫຼາຍຄັ້ງກັບສະຖານທູດຫວຽດນາມ ປະຈຳ ລັດເຊຍ ແລະ ສະຖານທູດ ຫວຽດນາມ ປະຈຳ ຢູແກຼນ ເພື່ອໜູນຊ່ວຍການອົບພະຍົບຈາກເຂດສົງຄາມ, ລຸງຮວ່າງ ພ້ອມດ້ວຍຄອບຄົວ 9 ຄົນ ແລະ ຄົນບ້ານໃກ້ເຮືອນຄຽງ 1 ຄົນ ໄດ້ຕັດສິນໃຈອົບພະຍົບໄປຍັງ ລັດເຊຍ.
ທ່ານ ຫວູຮູຍລານ, ຮອງປະທານສະມາຄົມຊາວ ຫວຽດນາມ ຢູ່ນະຄອນ Voronezh ໃຫ້ຮູ້ວ່າ: ພາຍຫຼັງໄດ້ຮັບແຈ້ງການວ່າ ມີຊາວ ຫວຽດນາມ ອົບພະຍົບຈາກ ຢູແກຼນ ໄປຍັງ ສະຫະພັນລັດເຊຍ, ສະມາຄົມໄດ້ເຄື່ອນໄຫວຈົດທະບຽນຮັບເອົາ ແລະ ໜູນຊ່ວຍຊາວອົບພະຍົບ.
ຫົວໜ້າສະມາຄົມຊາວ ຫວຽດນາມ ຢູ່ Voronezh ຢືນຢັນວ່າ ຈະສືບຕໍ່ຕິດຕໍ່ພົວພັນ ແລະ ໜູນຊ່ວຍຊາວ ຫວຽດນາມ ທີ່ຍັງຕິດຄ້າງຢູ່ ຢູແກຼນ ເພື່ອຊ່ວຍເຫຼືອຊາວອົບພະຍົບເຂົ້າໄປຍັງສະຫະພັນ ລັດເຊຍ.
ບຸນຄົງ
