ພາຍຫຼັງທີ່ໄດ້ສຳຫຼວດຄວາມຮຽກຮ້ອງຕ້ອງການຕົວຈິງ ແລະ ແນໃສ່ຮ່ວມມືກັບແຂວງ ຟຸຖໍ້ ໃນວຽກງານຕ້ານ, ປ້ອງກັນ ແລະ ຈຳກັດການແຜ່ລະບາດຂອງພະຍາດ, ອົງການ COPI ຕົກລົງຊ່ວຍເຫຼືອຢາບຳລຸງຍີ່ຫໍ້ Ceelin ຈຳນວນ 1.150 ຕຸກ ຊຶ່ງຊ່ວຍບຳລຸງວິຕາມິນ C, ຍົກລະດັບພູມຕ້ານທານ ແລະ ປັບປຸງສະພາບຮ່າງກາຍໃຫ້ແກ່ເປົ້າໝາຍທີ່ເປັນເດັກນ້ອຍຕ່ຳກວ່າ 16 ປີ ທີ່ຕິດພະຍາດໂຄວິດ-19 ເປັນມູນຄ່າທັງໝົດເກືອບ 42 ລ້ານດົ້ງ. ນີ້ເປັນໜຶ່ງໂຄງການທີ່ມີຄວາມໝາຍ ແລະ ຈຳເປັນທີ່ສຸດໃຫ້ແກ່ປະຊາຊົນ - ເປັນຕົ້ນແມ່ນເປົ້າໝາຍຜູ້ທີ່ຕິດເຊື່ອ F0 ທີ່ເປັນເດັກນ້ອຍ.
 |
| COPI ຊ່ວຍເຫຼືອເດັກນ້ອຍແຂວງ ຟຸຖໍ້ ທີ່ຕິດເຊື່ອໂຄວິດ-19. ພາບ: baophutho.vn |
ກ່າວໃນພິທີຮັບເຄື່ອງຊ່ວຍເຫຼືອດັ່ງກ່າວ, ຕາງໜ້າພະແນກສາທາລະນະສຸກແຂວງ ຟຸຖໍ້ ສະແດງຄວາມຂອບໃຈເປັນຢ່າງສູງຕໍ່ກັບຄວາມເອົາໃຈໃສ່, ການແບ່ງປັນ ແລະ ຮ່ວມແຮງຮ່ວມໃຈຂອງອົງການ ແລະ ຢືນຢັນວ່າຈະແບ່ງປັນ, ນຳໃຊ້ຈຳນວນຢາດັ່ງກ່າວຢ່າງມີປະສິດທິຜົນ. ພ້ອມທັງຫວັງວ່າໃນຕໍ່ໜ້າ, ອົງການ COPI ຈະສືບຕໍ່ຮ່ວມແຮງຮ່ວມມືກັບແຂວງໃນການຈຳກັດການແຜ່ລະບາດ, ຮັກສາການພັດທະນາເສດຖະກິດ - ສັງຄົມຂອງແຂວງ ຟຸຖໍ້.
Children of Peace International (COPI) ແມ່ນອົງການທີ່ບໍ່ຂຶ້ນກັບລັດຖະບານຂອງອາເມລິກາ ສ້າງຕັ້ງຂຶ້ນໃນປີ 1993. COPI ເຄື່ອນໄຫວໃນຂົງເຂດຊ່ວຍເຫຼືອການກວດ ແລະ ປິ່ນປົວພະຍາດໂດຍບໍ່ເສັຍຄ່າ, ຊ່ວຍເຫຼືອເດັກນ້ອຍທີ່ຫຍຸ້ງຍາກດ້ອຍໂອກາດ (ບໍ່ລວມບັນຫາການເອົາເດັກມາເປັນລູກລ້ຽງ)
ຢູ່ແຂວງ ຟຸຖໍ້, ກ່ອນການແຜ່ລະບາດຂອງພະຍາດໂຄວິດ-19, COPI ໄດ້ດຳເນີນ 2 ໂຄງການກວດພະຍາດໂດຍບໍ່ເສຍຄ່າ ແລະ ແຈກຢາຍຢາໂດຍບໍ່ເສັຍຄ່າໃຫ້ນັກຮຽນປະຖົມຢູ່ບັນດາທ້ອງຖິ່ນຄື: ຕາມນົງ, ດວານຮຸ່ງ, ແທງເຊີນ.
ວິລະຊົນ
