 |
ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ.
ທ່ານ ອາລຸນໄຊ ສູນນະລາດ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ, ເປັນປະທານກອງປະຊຸມກອງປະຊຸມ, ຊຶ່ງມີບັນດາລັດຖະມົນຕີຊາວໜຸ່ມອາຊຽນ, ບັນດາເຈົ້າໜ້າທີ່ອາວຸໂສອາຊຽນ, ຜູ້ຕາງຫນ້າຈາກກອງເລຂາອາຊຽນ ແລະ ຄະນະຜູ້ແທນຈາກ 3 ປະເທດຄູ່ເຈລະຈາ ຄື: ຈີນ, ຍິ່ປຸ່ນ ແລະ ສ.ເກົາຫລີ ເຂົ້າຮ່ວມ. ທ່ານ ອາລຸນໄຊ ສູນນະລາດ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ໄດ້ກ່າວຕ້ອນຮັບຜູ້ແທນປະຊຸມໃນຄັ້ງນີ້ ໂດຍໄດ້ສະແດງຄວາມຂອບໃຈບັນດາລັດຖະມົນຕີອາຊຽນ, ຄູ່ເຈລະຈາ, ປະເທດເພື່ອນມິດ, ເຈົ້າໜ້າທີ່ອາວຸໂສຊາວໜຸ່ມທີ່ໄດ້ໃຫ້ຄວາມຮ່ວມມື ແລະ ຊ່ວຍເຫລືອຄະນະຊາວໜຸ່ມລາວໃນການເປັນປະທານກອງປະຊຸມຊາວໜຸ່ມອາຊຽນໃນຄັ້ງນີ້ ຊຶ່ງມີຈຸດປະສົງເພື່ອປຶກສາຫາລືແລກປ່ຽນຄວາມຄິດເຫັນທີ່ໄດ້ຮັບໝາກຜົນ ແລະ ທັດສະນທີ່ສ້າງສັນກ່ຽວກັບຫົວຂໍ້ຕ່າງໆກວມເອົາຫລາຍຂົງເຂດ ເພື່ອເພີ່ມທະວີບົດບາດຂອງຊາວໜຸ່ມໃນການປະກອບ ສ່ວນເຂົ້າໃນການພັດທະນາແບບຍືງຍົງ ແລະ ການເຊື່ອມໂຍງອາຊຽນ ໂດຍການຮັບຮອງເອົາຖະແຫລງ ການ, ໂດຍສະເພາະຮັບຮອງເອົາຮ່າງພາລະບົດບາດພາຍໃຕ້ຂອບອາຊຽນຮ່ວມມືກນ ແລະ ບັນດາເອກະສານທີ່ກ່ຽວຂ້ອງ, ສະທ້ອນໃຫ້ເຫັນເຖີງຄໍາໝັ້ນໃນການຮ່ວມມືກັນເພື່ອຮັດແໜ້ນ ແລະ ສ້າງຄວາມເຂັ້ມແຂງຕໍ່ຄວາມພະຍາຍາມ ແລະ ການຮ່ວມມືກັນເຮັດໃຫ້ພາກພື້ນອາຊຽນບັນລຸວິໄສທັດປະຊາຄົມອາຊຽນ 2025 ແລະ ເປົ້າໝາຍ ພັດທະນາແບບຍືນຍົງ, ພ້ອມທັງພິຈາລະນາຮັບຮອງຖະແຫລງການຈາກຄະນະຜູ້ແທນລັດຖະມົນຕີຊາວໜຸ່ມອາຊຽນຄັ້ງທີ 11. ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ໄດ້ໃຫ້ກຽດກ່າວໄຂກອງປະຊຸມຢ່າງເປັນທາງການ ໂດຍທ່ານໄດ້ສະເໜີໃຫ້ປະເທດສະມາຊິກອາຊຽນ ສືບຕໍ່ຈັດຕັ້ງປະຕິບັດ 4 ໜ້າວຽກບູລິມະສິດໃນການພັດທະນາ ຊາວໜຸ່ມອາຊຽນໃນຕໍ່ໜ້າໃຫ້ດີຂຶ້ນກ່ວາ ຄື: 1). ສະເໜີໃຫ້ປະເທດສະມາຊິກອາຊຽນເກົ່າສືບຕໍ່ໃຫ້ການຊ່ວຍ ເຫລືອປະເທດສະມາຊິກອາຊຽນໃໝ່ທາງດ້ານເຕັກນິກວິຊາການ ກໍ່ຄື ການແລກປ່ຽນໄປມາຫາສູ່ກັນໃຫ້ຫລາຍຂຶ້ນ. 2). ເພີ່ມທະວີແຜນງານ ຫລື ໂຄງການພັດທະນາຜູ້ປະກອບການຊາວໜຸ່ມ ໂດຍສະເພາະຜູ້ປະກອບການຊາວໜຸ່ມເພດຍິງ. 3).ກຽມຄວາມພ້ອມຮັບມື ແລະ ຈັບເອົາກາລະໂອກາດຈາກຄວາມກ້າວໜ້າໃນຍຸກ 4.0 ແລະ 4). ຕັ້ງໜ້າອອກແຮງສືບຕໍ່ເພີ່ມທະວີການພົວພັນຮ່ວມມືກັບຊາວໜຸ່ມປະເທດຄູ່ເຈລະຈາອາຊຽນ ແລະ ຄູ່ຮ່ວມມືພາຍນອກ ເພື່ອພ້ອມກັນກ້າວຂຶ້ນ ແລະ ປະກອບສ່ວນເຂົ້າໃນການເຮັດໃຫ້ພາກພື້ນ ກໍ່ຄື ສາກົນ ມີສັນຕິພາບ, ສະຖຽນລະພາບ ແລະ ຄວາມຈະເລີນວັດຖະນາຖາວອນ.
（ແຫຼ່ງຂໍ້ມູນ： ບຸນຕຽງ ຈັນທະວົງ/Lao National Radio）
