 |
ທ່ານ ບຸນຍັງ ບໍລະຈິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ. (ພາບ: laoupdatenews)
ພວກຂ້າພະເຈົ້າ ຕີລາຄາສູງຕໍ່ວິວັດທະນາການແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງພັກກອມມູນິດຈີນ ຕະຫລອດໄລຍະເກືອບໜຶ່ງສັດຕະວັດທີ່ຜ່ານມາ, ເຊິ່ງໄດ້ຜ່ານການທົບສອບອັນດຸ ເດືອດຂ້ຽວຂາດ ໃນແປວໄຟປະຕິວັດ ແລະ ໄລຍະທາງປະຫວັດສາດທີ່ສໍາຄັນຂອງຊາດ, ພັກກອມມູນິດຈີນ ໄດ້ສ້າງວິລະກໍາອັນລໍ້າເລີດ ໃນການນໍາພາປະຊາຊົນຈີນ ຕໍ່ສູ້ຕ້ານການຮຸກຮານຂອງຕ່າງຊາດ ຈົນສາມາດປົດປ່ອຍປະເທດ ແລະ ສະຖາປະນາເປັນປະເທດ ສາທາລະນະລັດ ປະຊາຊົນຈີນ ໃນເດືອນຕຸລາ 1949, ພ້ອມທັງຍາດໄດ້ຜົນສໍາເລັດຢ່າງໃຫຍ່ຫລວງ, ຮອບດ້ານ ໃນການພັດທະນາປະເທດຊາດ ຕະຫລອດ 70 ປີທີ່ຜ່ານມາ. ໃນໄລຍະໃໝ່, ພາຍໃຕ້ການນໍາພາອັນຖືກຕ້ອງ, ໜັກແໜ້ນຂອງພັກກອມມູນິດຈີນ ໂດຍສືບ ຕໍ່ຢຶດໝັ້ນລັດທິມາກ, ແນວຄິດເໝົາເຈີຕົງ, ທິດສະດີເຕີ້ງສຽວຜິງ, ແນວຄິດສໍາຄັນ 3 ຕົວແທນ, ທັດສະ ນະການພັດທະນາຢ່າງມີວິທະຍາສາດ ແລະ ແນວຄິດສີຈິ້ນຜິງ ວ່າດ້ວຍສັງຄົມນິຍົມ ທີ່ມີສີສັນພິເສດຂອງຈີນໃນຍຸກສະໄໝໃໝ່ ຍິ່ງເຮັດໃຫ້ການນໍາພາຂອງພັກ ມີຄວາມໜັກແໜ້ນ, ເຂັ້ມແຂງ ເຮັດໃຫ້ພາລະກິດແຫ່ງການປະຕິຮູບ ແລະ ເປີດປະຕູສູ່ພາຍນອກ ກໍ່ຄື ພາລະກິດແຫ່ງການກໍ່ສ້າງສັງຄົມນິຍົມ ທີ່ທັນສະໄໝຢ່າງຮອບດ້ານຕາມສີສັນຂອງຈີນ ສືບຕໍ່ມີຜົນສໍາເລັດໃໝ່ໃຫຍ່ຫລວງກວ່າເກົ່າ, ສັງຄົມມີຄວາມສະຫງົບ, ປະຊາຊົນດໍາລົງຊີວິດຢ່າງມີຄວາມຜາສຸກ, ມີຄວາມກົມກຽວປອງດອງ, ເສດຖະກິດມີການຂະຫຍາຍຕົວຢ່າງວ່ອງໄວ ແລະ ຕໍ່ເນື່ອງ ຕາມທິດຍືນຍົງ, ການພົວພັນຕ່າງປະເທດ ນັບມື້ນັບພົ້ນເດັ່ນ, ບົດບາດຂອງ ພັກກອມມູນິດຈີນ ແລະ ສປ ຈີນ ນັບມື້ນັບສູງເດັ່ນໃນເວທີພາກພື້ນ ແລະ ສາກົນ. ຜົນສໍາເລັດອັນໃຫຍ່ຫລວງຮອບດ້ານຂອງ ສປ ຈີນ ໄດ້ປະກອບສ່ວນອັນສໍາຄັນ ເຂົ້າໃນການຊຸກຍູ້ເສີມຂະຫຍາຍສັນຕິພາບ, ຄວາມໝັ້ນຄົງ ແລະ ການພັດທະນາຂອງພາກພື້ນ ແລະ ຂອງໂລກ, ທັງເປັນແບບຢ່າງ ທີ່ດີໃຫ້ແກ່ບັນດາປະເທດ ທີ່ຢຶດໝັ້ນອຸດົມການ ເດີນຕາມເສັ້ນທາງສັງຄົມນິຍົມ ກໍ່ຄື ຊາວກອມມູນິດ ແລະ ຊາວຜູ້ອອກແຮງງານໃນທົ່ວໂລກ.
ພັກປະຊາຊົນປະຕິວັດລາວ ມີຄວາມປິຕິຊົມຊື່ນເປັນຢ່າງຍິ່ງ ທີ່ເຫັນວ່າຕະຫລອດໄລຍະ 60 ປີ ທີ່ສອງພັກ ລາວ-ຈີນ ໄດ້ມີການພົວພັນຮ່ວມມືນໍາກັນ, ການພົວພັນຮ່ວມມືສອງຝ່າຍ ນັບມື້ນັບໄດ້ຮັບການ ເສີມຂະຫຍາຍທັງທາງກວ້າງ, ເຂົ້າສູ່ລວງເລິກ, ອັນພົ້ນເດັ່ນ ແມ່ນການນໍາຂັ້ນສູງສຸດຂອງສອງພັກ ໄດ້ເອ ກະພາບກັນລົງນາມ ໃນແຜນແມ່ບົດວ່າດ້ວຍຄູ່ຮ່ວມຊາຕາກໍາສັງຄົມນິຍົມ ລາວ-ຈີນ ໃນທ້າຍເດືອນເມສາ ທີ່ຜ່ານມາ, ເຊິ່ງເປັນການກໍານົດທິດທາງໃຫ້ແກ່ການເພີ່ມພູນຄູນສ້າງ ສາຍພົວພັນຮ່ວມມືແບບຄູ່ຮ່ວມຍຸດທະສາດຮອບດ້ານ ລະຫວ່າງສອງຝ່າຍໃຫ້ນັບມື້ເລິກເຊິ່ງ ແລະ ໜັກແໜ້ນໃນຍຸກສະໄໝໃໝ່.
ພັກປະຊາຊົນປະຕິວັດລາວ ຂໍສະແດງຄວາມຊົມເຊີຍຢ່າງສຸດອົກສຸດໃຈ ຕໍ່ບັນດາຜົນສໍາເລັດອັນ ໃຫຍ່ຫລວງຮອບດ້ານ ທີ່ພັກ, ລັດຖະບານ ແລະ ປະຊາຊົນຈີນ ອ້າຍນ້ອງຍາດມາໄດ້ໃນຕະຫລອດໄລຍະທີ່ຜ່ານມາ. ຜົນສໍາເລັດດັ່ງກ່າວ ໄດ້ເປັນບົດຮຽນອັນລໍ້າຄ່າ ແລະ ເປັນກໍາລັງໃຈຢ່າງແຮງກ້າໃຫ້ແກ່ພັກ, ລັດ ແລະ ປະຊາຊົນລາວບັນດາເຜົ່າ ໃນການສືບຕໍ່ດໍາເນີນພາລະກິດປົກປັກຮັັກສາ ແລະ ສ້າງສາພັດທະ ນາປະເທດຊາດ ສູ່ຈຸດໝາຍສັງຄົມນິຍົມ.
ເນື່ອງໃນໂອກາດອັນສະຫງ່າລາສີນີ້, ພວກຂ້າພະເຈົ້າ ຂໍອວຍພອນ ໃຫ້ພັກກອມມູນິດຈີນ ທີ່ມີສະ ຫາຍເລຂາທິການໃຫຍ່ ສີຈິ້ນຜິງ ເປັນແກນນໍານັ້ນ, ຈົ່ງສືບຕໍ່ຍາດໄດ້ຜົນສໍາເລັດໃໝ່, ໃຫຍ່ຫລວງກວ່າເກົ່າ ໃນການຈັດຕັ້ງ ປະຕິບັດ ມະຕິກອງປະຊຸມໃຫຍ່ຄັ້ງທີ XIX ຂອງພັກກອມມູນິດຈີນ ກໍຄື ພາລະກິດແຫ່ງການບັນລຸເປົ້າໝາຍສູ້ຊົນ 100 ປີທໍາອິດ ໃນການສ້າງສັງຄົມນິຍົມອີ່ມໜໍາສໍາລານຮອບດ້ານ ແລະ ການບັນລຸຈຸດ ໝາຍໃນການສ້າງປະເທດຈີນ ໃຫ້ເປັນປະເທດສັງຄົມນິຍົມທີ່ທັນສະໄໝເຂັ້ມແຂງ, ຈະເລີນຮຸ່ງເຮືອງ, ປະ ຊາທິປະໄຕ, ສີວິໄລ, ກົມກຽວປອງດອງ ແລະ ສວຍງາມໃນຕໍ່ໜ້າ.
ຂໍອວຍພອນໃຫ້ສາຍພົວພັນມິດຕະພາບ ອັນເປັນມູນເຊື້ອຖານບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ເປັນຄູ່ຮ່ວມມືທີ່ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ບົນພື້ນຖານແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ຈົ່ງສືບຕໍ່ໄດ້ຮັບການເສີມຂະ ຫຍາຍໃຫ້ແຕກດອກອອກຜົນຍິ່ງໆຂຶ້ນ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ນັບມື້ນັບຫລາຍຂຶ້ນ.
（ແຫຼ່ງຂໍ້ມູນ： ຂປລ）
