ຖະແຫຼງການຮ່ວມຫວຽດນາມ - ລາຊະອານາຈັກກຳປູເຈຍ

ຍສໝ - ຖະແຫຼງການຮ່ວມລະຫວ່າງ ສາທາລະນະລັດສັງຄົມນິຍົມຫວຽດນາມ ແລະ ລາຊະອານາຈັກກຳປູເຈຍ ເນື່ອງໃນໂອກາດການຢ້ຽມຢາມທາງລັດຖະກິດຂອງ ທ່ານ ຫງວຽນຊວນຟຸກ, ປະທານປະທານ ແຫ່ງ ສາທາລະນະລັດສັງຄົມນິຍົມຫວຽດນາມ ໄປຍັງ ກຳປູເຈຍ (ແຕ່ວັນທີ 21 – 22 ທັນວາ 2021).

	ປະທານປະເທດ ປາດຖະໜາໃຫ້ຊາວຫວຽດນາມອາໄສຢູ່ກຳປູເຈຍ ຮັກສາພາສາຫວຽດ ແລະວັດທະນະທຳຫວຽດ
	ຫວຽດນາມ - ກຳປູເຈຍ ສືບຕໍ່ຍູ້ແຮງບັນດາການເຄື່ອນໄຫວການທູດປະຊາຊົນ

ຖະແຫຼງການຮ່ວມຫວຽດນາມ - ລາຊະອານາຈັກກຳປູເຈຍ

ທ່ານປະທານປະເທດ ສາທາລະນະລັດ ສັງຄົມນິຍົມ ຫວຽດນາມ ຫງວຽນຊວນຟຸກ ແລະ ພະບາດສົມເດັດພະບໍລົມມະນຽດ Norodom Sihamoni (ພາບ: TTXVN )

1.ໂດຍຕອບສະໜອງຕາມຄຳເຊີນຂອງ ພະບາດສົມເດັດພະບໍລົມມະນຽດ Norodom Sihamoni ແຫ່ງກຳປູເຈຍ,ທ່ານປະທານປະເທດ ສາທາລະນະລັດ ສັງຄົມນິຍົມ ຫວຽດນາມ ຫງວຽນຊວນຟຸກ ໄດ້ນຳໜ້າຄະນະຜູ້ແທນຂັ້ນສູງຫວຽດນາມ ໄປຢ້ຽມຢາມລາຊະອານາຈັກ ກຳປູເຈຍ ແຕ່ວັນທີ 21-22 ທັນວາ 2021.

ໃນຂອບເຂດການຢ້ຽມຢາມ, ທ່ານປະທານປະເທດ ຫງວຽນຊວນຟຸກ ໄດ້ມີການພົບປະກັບພະບາດສົມເດັດກຳປູເຈຍ Norodom Sihamoni, ເຂົ້າຢ້ຽມຂ່ຳນັບພະລາຊີນີ Norodom Monineath Sihanouk; ໄດ້ມີການພົບປະກັບ ທ່ານ Samdech Vibol Sena Pheakdei Say Chhum, ປະທານສະພາສູງແຫ່ງລາຊະອານາຈັກກຳປູເຈຍ; ທ່ານ Samdech Akka Moha Ponhea Chakrei Heng Samrin ປະທານສະພາແຫ່ງຊາດກໍາປູເຈຍ ແລະ ທ່ານ Samdech Akka Moha Sena Padei Techo Hun Sen ນາຍົກລັດຖະມົນຕີ ແຫ່ງລາຊະອານາຈັກກຳປູເຈຍ.

ທ່ານປະທານປະເທດ ຫງວຽນຊວນຟຸກ ໄດ້ເຂົ້າຢ້ຽມຂ່ຳນັບ ທ່ານ Samdech Preah Agga Maha Sangha Rajadhipati Tep Vong ແລະ ທ່ານພະພິກຂຸໃຫຍ່ Samdech Preah Abhisiri Maha Shangharajah Dhipati Bour Kry; ວາງພວງມາລາ ທີ່ອານຸສາວະລີ ພະບາດສົມເດັດພະເຈົ້າ Preah Bat Samdech Preah Norodom Sihanouk “Preah Borom Ratanak Kaudh” Norodom Sihanouk ແລະ ອານຸສາວະລີເອກະລາດ ແລະ ອານຸສາວະລີມິດຕະພາບ ຫວຽດນາມ-ກຳປູເຈຍ. ທ່ານປະທານປະເທດ ຫງວຽນຊວນຟຸກ ແລະ ທ່ານ Heng Samrin ໄດ້ເຂົ້າຮ່ວມພິທີວາງສີລາລຶກຕຶກອາຄານບໍລິຫານຫຼັງໃໝ່ຂອງສະພາແຫ່ງຊາດ ກຳປູເຈຍ, ໂດຍເປັນຂອງຂວັນຂອງພັກກອມມູນິດຫວຽດນາມ, ລັດ ແລະ ປະຊາຊົນ ສາທາລະນະລັດ ສັງຄົມນິຍົມ ຫວຽດນາມ ສະຫງວນໃຫ້ລັດ ແລະ ປະຊາຊົນ ກຳປູເຈຍ.

2.ສອງຝ່າຍໄດ້ຕີລາຄາສູງຄວາມໝາຍຂອງການຢ້ຽມຢາມທາງລັດຖະກິດຄັ້ງທຳອິດຂອງ ທ່ານ ຫງວຽນຊວນຟຸກ ໃນຖານະເປັນປະທານປະເທດ ສາທາລະນະລັດ ສັງຄົມນິຍົມ ຫວຽດນາມ ແລະ ເປັນການເປີດກ້ວາງການເຄື່ອນໄຫວ “ປີມິດຕະພາບຫວຽດນາມ - ກຳປູເຈຍ, ກຳປູເຈຍ - ຫວຽດນາມ 2022”. ໃນບັນຍາກາດແຫ່ງຄວາມສາມັກຄີ, ມິດຕະພາບ, ຄວາມເຂົ້າໃຈ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ການນຳຂອງສອງປະເທດໄດ້ແຈ້ງໃຫ້ກັນຮັບຊາບກ່ຽວກັບສະພາບການຂອງກັນ, ແລກປ່ຽນຄວາມຄິດຄວາມເຫັນຢ່າງເລິກເຊິ່ງກ້ວາງຂວາງກ່ຽວກັບການຮ່ວມມືລະຫວ່າງສອງປະເທດກໍ່ຄືບັນດາບັນຫາໃນພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ.

ພະບາດສົມເດັດພະບໍຣົມມະນຽດ Norodom Sihamoni ແລະ ການນຳ ກຳປູເຈຍ ໄດ້ຕ້ອນຮັບ ທ່ານປະທານປະເທດ ຫງວຽນຊວນຟຸກ ແລະ ຄະນະຜູ້ແທນຂັ້ນສູງ ຫວຽດນາມ ທີ່ມາຢ້ຽມຢາມ ກຳປູເຈຍຢ່າງສຸດໃຈ, ແລະ ຖືວ່າການຢ້ຽມຢາມຄັ້ງນີ້ໄດ້ປະກອບສ່ວນຮັດແໜ້ນນ້ຳໃຈສາມັກຄີ, ມິດຕະພາບ ແລະ ຄວາມຜູກພັນອັນດີງາມລະຫວ່າງສອງປະເທດບ້ານໃກ້ເຮືອນຄຽງ; ຍ້ອງຍໍບັນດາຜົນງານອັນໃຫຍ່ຫຼວງທີ່ປະເທດ ແລະ ປະຊາຊົນຫວຽດນາມ ບັນລຸໄດ້ໃນຂະບວນການປ່ຽນແປງໃໝ່, ກໍ່ສ້າງ ແລະ ພັດທະນາປະເທດຊາດ; ອວຍພອນໃຫ້ປະຊາຊົນຫວຽດນາມ, ພາຍໃຕ້ການນຳພາຂອງພັກກອມມູນິດຫວຽດນາມ ປະຕິບັດມະຕິກອງປະຊຸມໃຫຍ່ຄັ້ງທີ 13 ຂອງພັກຢ່າງມີໄຊ, ສ້າງສາປະເທດຫວຽດນາມນັບມື້ນັບຮັ່ງມີເຂັ້ມແຂງ, ມີບົດບາດ, ທີ່ຕັ້ງນັບມື້ນັບສູງ ຢູ່ພາກພື້ນ ແລະ ໃນໂລກ. ທ່ານປະທານປະເທດ ຫງວຽນຊວນຟຸກ ໄດ້ຍ້ອງຍໍບັນດາຜົນງານປະຫວັດສາດອັນສຳຄັນທີ່ລາຊະອານາຈັກ ແລະ ປະຊາຊົນ ກຳປູເຈຍ ບັນລຸໄດ້, ພາຍໃຕ້ການນຳພາອັນສະຫຼາດສ່ອງໃສຂອງ ພະບາດສົມເດັດ Norodom Sihamoni ແລະ ການນຳພາລັດຖະບານ ໂດຍທ່ານ ນາຍົກລັດຖະມົນຕີ Hun Sen ໄດ້ນຳໜ້າໃນພາລະກິດສ້າງສາ ແລະ ພັດທະນາປະເທດຊາດ, ຮັກສາສະຖຽນລະພາບດ້ານການເມືອງ-ສັງຄົມ, ປັບປຸງບົດບາດ, ທີ່ຕັ້ງຂອງ ກຳປູເຈຍ ຢູ່ພາກພື້ນ ແລະ ສາກົນຢ່າງບໍ່ຢຸດຢັ້ງ; ທ່ານໄດ້ອວຍພອນໃຫ້ກຳປູເຈຍປະສົບຜົນສຳເລັດໃນການຈັດຕັ້ງການເລືອກຕັ້ງສະພາຕາແສງ ໃນປີ 2022 ແລະ ການເລືອກຕັ້ງທົ່ວປະເທດໃນປີ 2023, ສ້າງປະຖົມປັດໄຈໃຫ້ກຳປູເຈຍກາຍເປັນປະເທດມີລາຍຮັບປານກາງໃນປີ 2030 ແລະ ມີລາຍຮັບສູງໃນປີ 2050.

ສອງຝ່າຍສະແດງຄວາມເພິ່ງພໍໃຈຕໍ່ການພັດທະນາຢ່າງຮອບດ້ານ, ໃກ້ຊິດຕິດແທດ, ມີປະສິດທິຜົນ ແລະ ແທດຈິງຂອງສາຍພົວພັນຮ່ວມມືຫວຽດນາມ - ກຳປູເຈຍ ໃນໄລຍະ 55 ປີຜ່ານມາ, ນຳມາເຊິ່ງຜົນປະໂຫຍດອັນແທດຈິງໃຫ້ປະຊາຊົນສອງປະເທດ. ໃນສະພາບການແຜ່ລະບາດຂອງພະຍາດໂຄວິດ-19, ການພົວພັນດ້ານການເມືອງລະຫວ່າງສອງປະເທດຍັງໄດ້ຮັບການຮັດແໜ້ນຢ່າງບໍ່ຢຸດຢັ້ງ ໂດຍຜ່ານການຮັກສາການແລກປ່ຽນຄະນະຜູ້ແທນຂັ້ນສູງ, ການພົບປະໂອ້ລົມທາງໂທລະສັບ ແລະ ການສົນທະນາທາງໄກ. ພ້ອມກັນນັ້ນ, ກໍເສີມຂະຫຍາຍບັນດາກົນໄກຮ່ວມມືສອງຝ່າຍຢ່າງມີປະສິດທິຜົນ. ສືບທອດມູນເຊື້ອຊ່ວຍເຫຼືອເຊິ່ງກັນ ແລະ ກັນໃນຍາມປະສົບກັບຄວາມຫຍຸ້ງຍາກ, ສອງຝ່າຍໄດ້ສົມທົບກັນຢ່າງແໜ້ນແຟ້ນ, ສະໜັບສະໜູນ ແລະ ໜູນຊ່ວຍເຊິ່ງກັນ ແລະ ກັນຢ່າງທັນການ ແລະ ມີປະສິດທິຜົນໃນການປ້ອງກັນ ແລະ ຕ້ານພະຍາດໂຄວິດ-19.

ຝ່າຍ ກຳປູເຈຍ ສະແດງຄວາມຂອບອົກຂອບໃຈຢ່າງເລິກເຊິ່ງຕໍ່ການໜູນຊ່ວຍ ແລະ ຊ່ວຍເຫຼືອອັນໃຫຍ່ຫຼວງຂອງບັນດາການນຳ ແລະ ປະຊາຊົນ ຫວຽດນາມ ລຸ້ນຕ່າງໆ ໂດຍໄດ້ສະຫງວນໃຫ້ປະຊາຊົນ ກຳປູເຈຍ ໃນເມື່ອກ່ອນກໍ່ຄືປັດຈຸບັນ, ທ່ານຢືນຢັນວ່າ ກຳປູເຈຍ ຍາມໃດກໍ່ລະນຶກເຖິງບັນດານັກຮົບອາສາສະໝັກ ຫວຽດນາມ ຊ່ວຍເຫຼືອຊາວ ກຳປູເຈຍ ໃນພາລະກິດແຫ່ງການປົດປ່ອຍກຳປູເຈຍ ໃຫ້ຫຼຸດພົ້ນອອກຈາກລະບອບດັບສູນເຊື້ອຊາດຂະເໝນແດງໃນປີ 1979.

ຝ່າຍຫວຽດນາມ ເນັ້ນໜັກວ່າ: ຫວຽດນາມ ຍາມໃດກໍ່ເຄົາລົບບັນດານ້ຳໃຈອັນດີງາມ ແລະ ການສະໜັບສະໜູນອັນລ້ຳຄ່າຂອງ ພະບາດສົມເດັດພະບໍລົມມະນຽດ Norodom Sihamoni, ບັນດາການນຳ ແລະ ປະຊາຊົນກຳປູເຈຍ ທີ່ສະຫງວນໃຫ້ແກ່ປະຊາຊົນ ຫວຽດນາມ ໃນພາລະກິດແຫ່ງການຕໍ່ສູ້ຍາດເອົາເອກະລາດແຫ່ງຊາດໃນເມື່ອກ່ອນ ກໍ່ຄືໃນພາລະກິດແຫ່ງການພັດທະນາປະເທດຊາດໃນປັດຈຸບັນ.

4.ສອງຝ່າຍໄດ້ເນັ້ນໜັກເຖິງຄວາມສຳຄັນ ແລະ ຄວາມຈຳເປັນໃນການສືບຕໍ່ເພີ່ມທະວີ ແລະ ພັດທະນາການພົວພັນສອງຝ່າຍພາຍໃຕ້ທິດນຳ “ບ້ານໃກ້ເຮືອນຄຽງທີ່ດີ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ”. ພ້ອມກັນນັ້ນ, ສອງຝ່າຍກໍສືບຕໍ່ຜັນຂະຫຍາຍບັນດາຫຼັກການທີ່ໄດ້ວາງອອກໃນຖະແຫຼງການຮ່ວມ ຫວຽດນາມ - ກຳປູເຈຍ ປີ 1999, 2005, 2009, 2011, 2014, 2016, 2017 ແລະ 2019; ເຄົາລົບເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງແຕ່ລະປະເທດ, ບໍ່ແຊກແຊງເຂົ້າວຽກງານພາຍໃນຂອງກັນ, ແກ້ໄຂບັນຫາທີ່ເກີດຂຶ້ນລະຫວ່າງສອງປະເທດໂດຍສັນຕິວິທີ.

5.ເນື່ອງໃນໂອກາດສະເຫຼີມສະຫຼອງ 55 ແຫ່ງວັນສ້າງຕັ້ງການພົວພັນທາງການທູດ ຫວຽດນາມ ແລະ ກຳປູເຈຍ (24 ມິຖຸນາ 1967 – 24 ມິຖຸນາ 2022), ສອງຝ່າຍໄດ້ເຫັນດີເພີ່ມທະວີການພົວພັນ ແລະ ແລກປ່ຽນຄະນະຜູ້ແທນຂັ້ນສູງທຸກຂັ້ນ; ຊຸກຍູ້ການແລກປ່ຽນປະຊາຊົນ, ພິເສດແມ່ນລະຫວ່າງບັນດາທ້ອງຖິ່ນທີ່ມີຊາຍແດນຕິດຈອດກັນ. ສອງຝ່າຍໄດ້ເນັ້ນໜັກເຖິງຄວາມສຳຄັນຂອງການໂຄສະນາເຜີຍແຜ່, ສຶກສາໃຫ້ແກ່ປະຊາຊົນ, ພິເສດແມ່ນລຸ້ນໜຸ່ມຂອງສອງປະເທດກ່ຽວກັບມູນເຊື້ອສາມັກຄີ, ມິດຕະພາບ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນລະຫວ່າງປະຊາຊົນສອງຊາດ.

6.ສອງຝ່າຍໄດ້ສະແດງຄວາມຊົມເຊີຍການຮ່ວມມືລະຫວ່າງສອງປະເທດໃນໄລຍະຜ່ານມາໃນຂົງເຂດເສດຖະກິດ, ການຄ້າ ແລະ ການລົງທຶນ. ພິເສດ, ການຄ້າໄດ້ກາຍເປັນຈຸດທີ່ພົ້ນເດັ່ນໃນຫວ່າງມໍ່ໆມານີ້ ດ້ວຍວົງເງິນການຄ້າສອງສົ້ນໄດ້ຮັກສາທ່າເຕີບໂຕຢ່າງຕັ້ງໜ້າໃນສະພາບການແຜ່ລະບາດຂອງພະຍາດໂຄວິດ-19. ສອງຝ່າຍໄດ້ເຫັນດີເລັ່ງການຜັນຂະຫຍາຍການປະຕິບັດສັນຍາວ່າດ້ວຍການສົ່ງເສີມ ແລະ ປົກປັກຮັກສາການລົງທຶນ ແລະ ສັນຍາຫຼີກລ້ຽງການເກັບພາສີຊ້ອນ; ອຳນວຍຄວາມສະດວກໃຫ້ແກ່ການພັດທະນາການຄ້າຊາຍແດນໂດຍເລັ່ງການລົງນາມໃນສັນຍາການຄ້າຊາຍແດນ, ປະຕິບັດບົດບັນທຶກຄວາມເຂົ້າໃຈກ່ຽວກັບການພັດທະນາ ແລະ ການເຊື່ອມຕໍ່ພື້ນຖານໂຄງລ່າງການຄ້າຂ້າມຊາຍແດນ, ສືບຕໍ່ສຶກສາ ແລະ ກໍ່ສ້າງຕະຫຼາດຊາຍແດນ ແລະ ເຂດເສດຖະກິດພິເສດຢູ່ບັນດາແຂວງທີ່ຕິດກັບຊາຍແດນສອງປະເທດ.ສອງຝ່າຍໄດ້ເຫັນດີຍູ້ແຮງການສ້າງແຜນຜັງສັງລວມກ່ຽວກັບການເຊື່ອມຕໍ່ເສດຖະກິດສອງປະເທດ ຫວຽດນາມ - ກຳປູເຈຍ ຮອດປີ 2030 ໃຫ້ສຳເລັດໃນທ້າຍປີ 2022.

7.ສອງຝ່າຍໄດ້ເນັ້ນໜັກເຖິງຄວາມສຳຄັນຂອງການປະສານງານການຮັບມືຕໍ່ຜົນກະທົບທາງດ້ານສຸຂະພາບ, ເສດຖະກິດ ແລະ ສັງຄົມຂອງພະຍາດໂຄວິດ-19. ບົນຈິດໃຈນັ້ນ, ສອງຝ່າຍຈະຊຸກຍູ້ການແລກປ່ຽນເພື່ອແນໃສ່ຮັບຮູ້ບັນດາໜັງສືຜ່ານແດນວັກແຊງ/ໃບຢັ້ງຢືນການສັກວັກແຊງປ້ອງກັນພະຍາດ Covid-19, ອຳນວຍຄວາມສະດວກໃຫ້ແກ່ການເດີນທາງຂອງສອງປະເທດ, ຊຸກຍູ້ການເປີດຄືນເສັ້ນທາງການບິນໂດຍກົງລະຫວ່າງ 2 ປະເທດຢ່າງປອດໄພໂດຍໄວ, ປະກອບສ່ວນຢ່າງແທດຈິງເຂົ້າໃນວິວັດການຟື້ນຟູເສດຖະກິດ-ສັງຄົມແບບຍືນຍົງຂອງແຕ່ລະປະເທດໃນໄລຍະ "ປົກກະຕິໃໝ່" ແລະ ໄລຍະຫຼັງໂລກລະບາດ.

8.ສອງຝ່າຍເຫັນດີເພີ່ມທະວີການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ ບົນຫຼັກການບໍ່ອະນຸຍາດໃຫ້ບໍ່ວ່າກຳລັງສັດຕູໃດສວຍໃຊ້ຜືນແຜ່ນດິນຂອງເຮົາເປັນພາຫະນະກໍ່ໃຫ້ເກີດຄວາມອັນຕະລາຍຕໍ່ຄວາມໝັ້ນຄົງຂອງປະເທດອື່ນ; ຈັດຕັ້ງປະຕິບັດຂໍ້ຕົກລົງຮ່ວມມືດ້ານປ້ອງກັນຄວາມສະຫງົບທີ່ມີຢູ່ແລ້ວຢ່າງມີປະສິດທິຜົນ; ເພີ່ມທະວີການສົມທົບກັນຮັກສາສະຖຽນລະພາບດ້ານການເມືອງ, ຄວາມໝັ້ນຄົງ, ຄວາມເປັນລະບຽບຮຽບຮ້ອຍທາງສັງຄົມ ແລະ ຄວາມປອດໄພຢູ່ແຕ່ລະປະເທດ; ປັບປຸງປະສິດທິຜົນການຄຸ້ມຄອງ ແລະ ປົກປັກຮັກສາເຂດຊາຍແດນ; ຍູ້ແຮງບັນດາກົນໄກຮ່ວມມືທີ່ມີຢູ່ແລ້ວ, ສືບຕໍ່ສົມທົບກັນຢ່າງແໜ້ນແຟ້ນໃນການຊອກຄົ້ນ ແລະ ສົ່ງອັດຖິຂອງທະຫານອາສາສະໝັກ ແລະ ນັກຊ່ຽວຊານຫວຽດນາມ ທີ່ເສຍຊີວິດຢູ່ ກຳປູເຈຍ.

9.ສອງຝ່າຍຢືນຢັນຄຳໝັ້ນສັນຍາເຄົາລົບ ແລະ ປະຕິບັດບັນດາສົນທິສັນຍາກ່ຽວກັບການວາງແຜນກຳນົດຫຼັກໝາຍຊາຍແດນທາງບົກ ແລະ ບັນດາສັນຍາ, ຂໍ້ຕົກລົງກ່ຽວກັບຊາຍແດນລະຫວ່າງສອງປະເທດຢ່າງຄົບຖ້ວນ. ສອງຝ່າຍໄດ້ຍ້ອງຍໍບັນດາຄວາມມານະພະຍາຍາມຂອງຄະນະກຳມະການປະສົມປັກຫຼັກໝາຍເຂດຊາຍແດນ ຫວຽດນາມ - ກຳປູເຈຍ, ກຳປູເຈຍ - ຫວຽດນາມ ທີ່ໄດ້ປະຕິບັດສຳເລັດປະມານ 84% ຈຳນວນວຽກງານປັກຫຼັກໝາຍຊາຍແດນລະຫວ່າງສອງປະເທດ; ສະແດງຄວາມຊົມເຊີຍ (i) ສົນທິສັນຍາເພີ່ມເຕີມກ່ຽວກັບສົນທິສັນຍາການວາງແຜນກຳນົດຊາຍແດນແຫ່ງຊາດ ປີ 1985 ແລະ ສົນທິສັນຍາເພີ່ມເຕີມປີ 2005 ແລະ (ii) ອະນຸສັນຍາວ່າດ້ວຍການແບ່ງເຂດປັກຫຼັກໝາຍຊາຍແດນດິນແດນລະຫວ່າງ ສາທາລະນະລັດສັງຄົມນິຍົມຫວຽດນາມ ແລະ ລາຊະອານາຈັກກຳປູເຈຍ, ມີຜົນບັງຄັບໃຊ້ຕັ້ງແຕ່ວັນທີ 22 ທັນວາ 2020; ຊຸກຍູ້ໃຫ້ຄະນະກຳມະການປະສົມເຂດຊາຍແດນ ຫວຽດນາມ - ກຳປູເຈຍ, ກຳປູເຈຍ - ຫວຽດນາມ ຊອກຫາມາດຕະການແກ້ໄຂທີ່ສອງຝ່າຍຍອມຮັບໄດ້ ເພື່ອແກ້ໄຂປະມານ 16% ເສັ້ນຊາຍແດນທາງບົກທີ່ຍັງບໍ່ທັນສຳເລັດການແບ່ງເຂດປັກຫຼັກໝາຍຊາຍແດນ. ໂດຍເສີມຂະຫຍາຍບັນດາຜົນງານທີ່ບັນລຸໄດ້ນັ້ນ, ສອງຝ່າຍມານະພະຍາຍາມສົມທົບກັນຢ່າງແໜ້ນແຟ້ນ ເພື່ອແນໃສ່ສຳເລັດການກໍ່ສ້າງຊາຍແດນແຫ່ງສັນຕິພາບ, ສະຖຽນລະພາບ ແລະ ການຮ່ວມມືລະຫວ່າງ ຫວຽດນາມ - ກຳປູເຈຍ. ສອງຝ່າຍໄດ້ເຫັນດີເປັນເອກະສັນກັນກ່ຽວກັບຄວາມຈຳເປັນຕ້ອງໄດ້ລົງນາມໃນຂໍ້ຕົກລົງກ່ຽວກັບດ່ານຊາຍແດນທາງບົກໃນໄລຍະຈະມາເຖິງເພື່ອປ່ຽນແທນຂໍ້ກຳນົດມາດຕາໃນສົນທິສັນຍາກ່ຽວກັບຂໍ້ກຳນົດການຄຸ້ມຄອງຊາຍແດນປີ 1983. ສອງຝ່າຍກໍ່ເຫັນດີເປັນເອກະພາບຊຸກຍູ້ການເຄື່ອນໄຫວຂອງລະບົບດ່ານຊາຍແດນຢ່າງມີປະສິດທິຜົນ ໂດຍການເປີດ ແລະ ຍົກລະດັບບັນດາຄູ່ດ່ານຊາຍແດນທີ່ສອງຝ່າຍໄດ້ຕົກລົງເປັນເອກະພາບ, ນຳດ່ານສາກົນ Meun Chey - ເຕີນນາມ ເຂົ້າໃນບັນຊີລາຍຊື່ດ່ານຊາຍແດນທີ່ອະນຸຍາດໃຫ້ບຸກຄົນ, ພາຫະນະ, ສິນຄ້າ ຜ່ານເຂົ້າ-ອອກຊາຍແດນ ຕາມສົນທິສັນຍາວ່າດ້ວຍການຂົນສົ່ງສິນຄ້າຜ່ານຊາຍແດນ ລະຫວ່າງລັດຖະບານຫວຽດນາມ ແລະ ລັດຖະບານກຳປູເຈຍ ໄດ້ລົງນາມເມື່ອປີ 2013.

10.ທ່ານປະທານປະເທດ ຫງວຽນຊວນຟຸກ ສະແດງຄວາມຂອບອົກຂອບໃຈພະມະຫາກະສັດ, ນາຍົກລັດຖະມົນຕີ ແລະ ການນຳ ກຳປູເຈຍ ທີ່ຍາມໃດກໍ່ເອົາໃຈໃສ່, ສະໜັບສະໜູນ ແລະ ບໍ່ຈຳແນກຄົນຫວຽດນາມ ອາໄສຢູ່ ກຳປູເຈຍ ໃນໄລຍະຜ່ານມານີ້.

11.ສອງຝ່າຍເຫັນດີເພີ່ມທະວີການຮ່ວມມືໃນຂົງເຂດສາທາລະນະສຸກ. ທ່ານປະທານປະເທດ ຫງວຽນຊວນຟຸກ ຢືນຢັນວ່າ ຫວຽດນາມ ຈະສືບຕໍ່ໜູນຊ່ວຍການເບິ່ງແຍງດູແລ ແລະ ປິ່ນປົວພະຍາດໃຫ້ບັນດາຄົນເຈັບ ກຳປູເຈຍ ຢູ່ບັນດາໂຮງໝໍນະຄອນ ໂຮ່ຈີມິນ ຄືກັນກັບໃຫ້ຊາວ ຫວຽດນາມ ແລະ ອີງຕາມກົນໄກຊຳລະຄ່າປິ່ນປົວຢູ່ໂຮງໝໍ ຫວຽດນາມ ສຳລັບຄົນບໍ່ມີປະກັນສຸຂະພາບ.

12.ສອງຝ່າຍຍັງເຫັນດີເປັນເອກະສັນກັນຊຸກຍູ້ ແລະ ຍົກສູງປະສິດທິຜົນການຮ່ວມມືໃນຂົງເຂດສຳຄັນອື່ນໆເຊັ່ນ: ກົດໝາຍ ແລະ ຍຸຕິທຳ, ແຮງງານ ແລະ ສັງຄົມ, ເຕັກໂນໂລຊີຂໍ້ມູນຂ່າວສານ ແລະ ສື່ສານ (ICT), ວັດທະນະທຳ, ກິລາ ແລະ ການທ່ອງທ່ຽວ, ການບິນ, ການທະນາຄານ, ການເງິນ, ກະສິກຳ-ປ່າໄມ້. - ການປະມົງ...

13.ສອງຝ່າຍໄດ້ແລກປ່ຽນທັດສະນະ ແລະ ເຫັນດີສືບຕໍ່ຮ່ວມມື ແລະ ສົມທົບກັນຢ່າງແໜ້ນແຟ້ນ ໃນຂອບເຂດຫຼາຍຝ່າຍ ເຊັ່ນ: ສະຫະປະຊາຊາດ ແລະ ອາຊຽນ ເພື່ອຮັບມືກັບບັນດາສິ່ງທ້າທາຍທົ່ວໂລກ ແລະ ພາກພື້ນ ແລະ ໃນຂອບເຂດອະນຸພາກພື້ນ ລວມທັງບັນດາກົນໄກການຮ່ວມມືແມ່ນ້ຳຂອງ ເພື່ອຮັບປະກັນການຄຸ້ມຄອງ ແລະ ນຳໃຊ້ແຫຼ່ງນ້ຳຂອງຢ່າງຍືນຍົງ. ທ່ານປະທານປະເທດ ຫງວຽນຊວນຟຸກ ຕີລາຄາສູງການສະໜັບສະໜູນ ແລະ ການຮ່ວມມືຂອງ ກຳປູເຈຍ ທີ່ມີໃຫ້ ຫວຽດນາມ ໃນວິວັດການດຳລົງຕຳແໜ່ງປະທານ ອາຊຽນ ໃນປີ 2020, ຢືນຢັນ ຫວຽດນາມ ຈະໜູນຊ່ວຍ ກຳປູເຈຍ ໃນລະດັບສູງສຸດໃນວິວັດການຮັບດຳລົງຕຳແໜ່ງເປັນປະທານ ອາຊຽນ ໃນປີ 2022 ດ້ວຍຫົວຂໍ້ “ອາຊຽນ: ພ້ອມກັນແກ້ໄຂສິ່ງທ້າທາຍ”, ພ້ອມກັນປະກອບສ່ວນຊຸກຍູ້ຄວາມເປັນເອກະພາບ, ຄວາມສາມັກຄີ, ປັບປຸງບົດບາດໃຈກາງ ແລະ ກຳລັງສ້າງຄວາມເຂັ້ມແຂງດ້ວຍຕົນເອງຂອງອາຊຽນໃນການຮັບມືກັບບັນດາສິ່ງທ້າທາຍໃໝ່, ເພື່ອສັນຕິພາບ, ສະຖຽນລະພາບ, ການພັດທະນາແບບຍືນຍົງ ແລະ ຄວາມວັດຖະນາຖາວອນຢູ່ພາກພື້ນ.

14.ສອງຝ່າຍໄດ້ເນັ້ນໜັກເຖິງຫຼັກໝັ້ນລວມຂອງ ອາຊຽນ ກ່ຽວກັບລະດັບຄວາມສຳຄັນຂອງການຮັກສາສັນຕິພາບ, ຄວາມໝັ້ນຄົງ, ສະຖຽນລະພາບ, ຄວາມປອດໄພ, ຄວາມເສລີໃນການເດີນເຮືອ ແລະ ການບິນຢູ່ທະເລຕາເວັນອອກ, ຊຸກຍູ້ການໂອ້ລົມເຈລະຈາ ແລະ ສ້າງຄວາມໄວ້ເນື້ອເຊື່ອໃຈ, ປະຕິບັດການອົດກັ້ນ, ປະຕິບັດຕາມກົດໝາຍສາກົນ, ແກ້ໄຂບັນດາການຂັດແຍ້ງກັນໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982, ບໍ່ນາບຂູ່ ຫຼື ນຳໃຊ້ກຳລັງອາວຸດ, ຮັບປະກັນການປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ, ມານະພະຍາຍາມມຸ່ງໄປເຖິງການສ້າງສຳເລັດປະມວນຂໍ້ກຳນົດການປະພຶດຢູ່ທະເລຕາເວັນອອກ (COC) ຢ່າງມີປະສິດທິຜົນ ແລະ ແທດຈິງ, ສອດຄ່ອງກັບກົດໝາຍສາກົນ, ໃນນັ້ນມີ UNCLOS ປີ 1982. ສອງຝ່າຍກໍ່ສະໜັບສະໜູນ ອາຊຽນ ແລະ ຈີນ ຈັດຕັ້ງບັນດາການເຄື່ອນໄຫວແທດຈິງເພື່ອສະເຫຼີມສະຫຼອງ 20 ປີແຫ່ງວັນລົງນາມ DOC.

15.ໃນໂອກາດຢ້ຽມຢາມຄັ້ງນີ້, ທ່ານນາຍົກລັດຖະມົນຕີ Samdech Techo ແລະ ທ່ານປະທານປະເທດ ຫງວຽນຊວນຟຸກ ໄດ້ເປັນສັກຂີພິຍານພິທີລົງນາມໃນເອກະສານຮ່ວມມື ລວມມີ: (i) ໂຄງການຮ່ວມມື 2022 ລະຫວ່າງກະຊວງຕຳຫຼວດຫວຽດນາມ ແລະ ກະຊວງພາຍໃນກຳປູເຈຍ; (ii) ແຜນການຮ່ວມມືດ້ານປ້ອງກັນຊາດ ປີ 2022 ລະຫວ່າງສອງກະຊວງປ້ອງກັນປະເທດ; (iii) ບົດບັນທຶກຂໍ້ຕົກລົງຂອງກອງປະຊຸມຄັ້ງທີ 19 ຄະນະກຳມະການປະສົມ ຫວຽດນາມ - ກຳປູເຈຍ ກ່ຽວກັບການຮ່ວມມືດ້ານເສດຖະກິດ, ວັດທະນະທຳ, ວິທະຍາສາດ ແລະ ເຕັກນິກ; (iv) ບົດບັນທຶກກອງປະຊຸມຂອງສອງປະທານຄະນະກຳມະການຮ່ວມກ່ຽວກັບຊາຍແດນ ຫວຽດນາມ - ກຳປູເຈຍ ແລະ ກຳປູເຈຍ - ຫວຽດນາມ; (v) ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານການສຶກສາ ໄລຍະ 2021-2025; (vi) ບົດບັນທຶກຄວາມເຂົ້າໃຈກ່ຽວກັບການສິ້ນສຸດການເຈລະຈາສັນຍາການຄ້າຊາຍແດນ ຫວຽດນາມ - ກຳປູເຈຍ; (vii) ແຜນງານວຽກງານປີ 2022-2023 ລະຫວ່າງສອງກະຊວງຍຸຕິທຳ. ເນື່ອງໃນໂອກາດນີ້, ບັນດາວິສາຫະກິດຂອງສອງປະເທດຍັງໄດ້ລົງນາມໃນສັນຍາ ແລະ ຂໍ້ຕົກລົງກ່ຽວກັບການຮ່ວມມືດ້ານທຸລະກິດຈຳນວນໜຶ່ງ.

16. ສອງຝ່າຍໄດ້ຕີລາຄາສູງບັນດາໝາກຜົນອັນດີງາມ ແລະ ຄວາມໝາຍສຳຄັນຂອງການຢ້ຽມຢາມທາງລັດຖະກິດຂອງ ທ່ານປະທານປະເທດ ຫງວຽນຊວນຟຸກ ໄປຍັງລາຊະອານາຈັກ ກຳປູເຈຍ, ແມ່ນເຫດການເປີດກ້ວາງການເຄື່ອນໄຫວເພື່ອສະເຫຼີມສະຫຼອງ 55 ປີແຫ່ງວັນສ້າງຕັ້ງທາງການທູດລະຫວ່າງຫວຽດນາມ ແລະ ກຳປູເຈຍ, ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ນຳການພົວພັນຖານບ້ານໃກ້ເຮືອນຄຽງທີ່ດີ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ ແລະ ຍາວນານລະຫວ່າງສອງປະເທດ ນັບມື້ນັບເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ, ເພື່ອຜົນປະໂຫຍດຂອງປະຊາຊົນສອງປະເທດ ແລະ ປະກອບສ່ວນຮັກສາສັນຕິພາບ, ສະຖຽນລະພາບ, ການຮ່ວມມືຫຼາຍດ້ານ ແລະ ການພັດທະນາແບບຍືນຍົງຢູ່ພາກພື້ນ ແລະ ໃນໂລກ.

ທ່ານປະທານປະເທດ ຫງວຽນຊວນຟຸກ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະໜິດສະໜົມ ທີ່ພະບາດສົມເດັດພະບໍລົມມະນຽດ Norodom Sihamoni, ການນຳ ແລະ ປະຊາຊົນ ກຳປູເຈຍ ໄດ້ມອບໃຫ້ຄະນະຜູ້ແທນຂັ້ນສູງຫວຽດນາມ.

ພະນົມເປັນ, ວັນທີ 22 ທັນວາ 2021.

ບຸນຄົງ