ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ.

ການເຄື່ອນໄຫວຢ້ຽມຢາມ ແລະ ເຮັດວຽກໃນຄັ້ງນີ້, ທ່ານ ໄດ້ຮັບຟັງການລາຍງານສະ ພາບການພັດທະນາເສດຖະກິດ-ສັງຄົມຂອງເມືອງນອງໃນໄລຍະທີ່ຜ່ານມາໂດຍສັງເຂບ,ເປັນຕົ້ນແມ່ນການເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ ຕາມ 8 ແຜນງານ, 101 ໂຄງ ການ, ມາຮອດປັດຈຸບັນເມືອງນອງສາມາດປະຕິບັດໄດ້ 62 ໂຄງການ, ກວມເອົາ 61,4% ຂອງແຜນງານຊຶ່ງມີມູນຄ່າ 26, 25 ຕື້ກີບ; ພ້ອມກັນນັ້ນອໍານາດການປົກຄອງຂອງເມືອງໄດ້ສືບຕໍ່ເອົາໃຈໃສ່ຈັດຕັ້ງປະຕິບັດວຽກງານກະສິກໍາ ໂດຍໄດ້ເອົາໃຈໃສ່, ປຸກລະດົມ ແລະ ອໍານວຍຄວາມສະດວກໃຫ້ປະຊາຊົນຫັນມາປູກພືດເປັນສິນຄ້າ ເປັນຕົ້ນແມ່ນ: ປູກຢາງໂບງ, ກ້ວຍ, ມັນຕົ້ນ, ຫວາຍ, ໄມ້ກິນໝາກ… ແລະ ຂະຫຍາຍການລ້ຽງສັດ ເພື່ອສ້າງລາຍຮັບໃຫ້ແກ່ປະຊາຊົນ, ແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນກ້າວໆ, ນອກຈາກນັ້ນ ອໍານາດການປົກຄອງໄດ້ອໍານວຍຄວາມສະດວກໃນການກໍ່ສ້າງເຂື່ອນໄຟຟ້າ ເຊລະນອງ 1, ເຊລະນອງ 2, ເຊລະນອງ 3 ແລະ ເຂື່ອນຫ້ວຍລະລາບ ບ້ານໂອ້ຍຕານຕີບ, ປັດຈຸບັນປະຊາຊົນ ຊາວເມືອງນອງໄດ້ຊົມໃຊ້ໄຟຟ້າຖາວອນ ກວມ 83% ແລ້ວ.

ບັນຍາກາດກອງປະຊຸມ.

ໃນຕອນບ່າຍຂອງມື້ດຽວກັນ, ທ່ານ ບຸນທອງ ຈິດມະ ນີ ພ້ອມຄະນະ ໄດ້ເຮັດວຽກ ຮ່ວມກັບຄະນະພັກ-ຄະນະນໍາ, ອົງການປົກຄອງແຂວງສະຫວັນນະເຂດ ໂດຍ ທ່ານໂພໄຊ ໄຊຍະສອນ ໄດ້ລາຍງານສະພາບລວມຂອງແຂວງໂດຍຫຍໍ້ ໂດຍສະເພາະແມ່ນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ຊຶ່ງຜ່ານມາແຂວງສະຫວັນນະເຂດໄດ້ເອົາໃຈໃສ່ວາງມາດຕະການຕ່າງໆເພື່ອຊຸກຍູ້ເສດຖະກິດ ເຮັດໃຫ້ເສດຖະກິດມີການຂະຫຍາຍຕົວຢ່າງຕໍ່ເນື່ອງ ລວມຍອດຜະລິດຕະພັນພາຍໃນບັນລຸໄດ້ 9.393,96 ຕື້ກີບ ເທົ່າກັບ 49,47% ຂອງແຜນການປີ (ໃນນັ້ນ ດ້ານກະສິກໍາກວມ 15,98%, ອຸດສາຫະກໍາ-ຫັດຖະກໍາ ກວມ 10,08%, ບໍລິການກວມ 42,69% ຂອງ GDP); ຮັບຟັງລາຍງານກ່ຽວກັບການກະກຽມກອງປະຊຸມໃຫຍ່ 3 ຂັ້ນຂອງຄະນະພັກແຂວງ ຊຶ່ງໄດ້ຈັດຕັ້ງເຊື່ອມຊຶມບັນດານິຕິກໍາກໍ່ສ້າງພັກ-ພະນັກງານໃຫ້ ຄະນະພັກຮາກຖານ, ໜ່ວຍພັກຮາກຖານ ພ້ອມແຕ່ງຕັ້ງຄະນະຊີ້ນໍາ ເພື່ອມີການຊີ້ນໍາ-ນໍາພາເປັນເອກະພາບ ແລະ ໄປລວງດຽວກັນ, ປັດຈຸບັນແມ່ນໄດ້ສໍາເລັດການຂຶ້ນແຜນກໍານົດພະນັກງານນໍາພາ-ຄຸ້ມຄອງ ຂັ້ນສູນກາງຄຸ້ມຄອງແລ້ວ, ສ່ວນແຜນການກໍານົດພະນັກງານນໍາພາ-ຄຸ້ມຄອງຂັ້ນແຂວງ, ຂັ້ນເມືອງ-ນະຄອນ ແມ່ນໄດ້ສ້າງມາແຕ່ປີ 2016 ແລ້ວ.

ໂອກາດການລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດໃນຄັ້ງນີ້, ທ່ານ ບຸນທອງ ຈິດມະນີ ໄດ້ໃຫ້ກຽດໂອ້ລົມ ແລະ ມີທິດຊີ້ນຳຕໍ່ຄະນະພັກ-ຄະນະນໍາ ຂອງແຂວງ, ເມືອງ ຕະຫຼອດຮອດພໍ່ແມ່ປະຊາຊົນ ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ຄະນະນຳແຂວງ, ເມືອງ ທີ່ໄດ້ມີຄວາມຕັດສິນໃຈສູງໃນການຊີ້ນຳ-ນຳພາວຽກງານຮອບດ້ານ, ໂດຍສະເພາະແມ່ນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ໄດ້ເນັ້ນໃຫ້ຄະນະພັກ, ອົງການປົກຄອງແຕ່ລະຂັ້ນຈົ່ງພ້ອມກັນສືບຕໍ່ນຳພາ-ຊີ້ນຳການພັດທະນາຕາມຂອບເຂດຄວາມຮັບຜິດຊອບຂອງຕົນໃຫ້ມີຄວາມກ້າວໜ້າຢ່າງເປັນຮູບປະທຳ ໂດຍສຸມໃສ່ການແກ້ໄຂຄວາມທຸກຍາກຂອງປະຊາຊົນເປັນບັນຫາສຳຄັນໄປຄຽງຄູ່ກັບວຽກງານປ້ອງກັນຊາດ ປ້ອງກັນຄວາມສະຫງົບເພື່ອເຮັດໃຫ້ສັງຄົມມີຄວາມເປັນລະບຽບຮຽບຮ້ອຍໂດຍຖືເອົາວຽກງານດັ່ງກ່າວສອດຫ້ອຍກັບການເຮັດວຽກງານການເມືອງ-ແນວຄິດ, ສຶກສາອົບຮົມໃຫ້ຄະນະພັກ ແລະ ສະມາຊິກພັກ, ພະນັກງານ-ລັດຖະກອນ ກຳແໜ້ນແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດໃຫ້ເລິກເຊິ່ງໄປພ້ອມກັບວຽກງານລົງກໍ່ສ້າງຮາກຖານການເມືອງ, ນຳເອົາແນວທາງນະໂຍບາຍຂອງພັກ ແລະ ນິຕິກຳຕ່າງໆລັດຖະບານລົງເຜີຍແຜ່ໃຫ້ປະຊາຊົນບັນດາເຜົ່າໄດ້ຮັບຮູ້ເຂົ້າໃຈ, ຮຽກຮ້ອງໃຫ້ຄະນະພັກ, ສະມາຊິກພັກ, ພະນັກງານ-ລັດຖະກອນຈົ່ງຕັ້ງໜ້າຈັດຕັ້ງປະຕິບັດວຽກງານຕາມໜ້າທີ່ຄວາມຮັບຜິດຊອບຂອງຕົນດ້ວຍຈັນຍາບັນ, ມີສະຕິຕໍ່ການຈັດຕັ້ງ, ເປັນເຈົ້າການເຄົາລົບ ແລະ ປະຕິບັດມະຕິ, ຄໍາສັ່ງ, ກົດລະບຽບຂອງພັກ, ກົດໝາຍ ແລະ ລະບຽບການຂອງລັດຕິດພັນກັບການຍົກລະດັບດ້ານການສຶກສາໃຫ້ໄວໜຸ່ມ ,ຊາວໜຸ່ມມີຄວາມຮູ້, ຄວາມສາມາດເພື່ອໄດ້ມີວຽກເຮັດງານທຳທີ່ແນ່ນອນ ແລະ ໝັ້ນຄົງ, ວຽກງານສາທາລະນະສຸກຕ້ອງໄດ້ເອົາໃຈໃສ່ຈັດຕັ້ງປະຕິບັດຢ່າງຕໍ່ເນື່ອງ ເພື່ອຮັບປະກັນດ້ານສຸຂະພາບຂອງປະຊາຊົນບັນດາເຜົ່າທັງສູ້ຊົນຈັດຕັ້ງປະຕິບັດວຽກງານ 3 ສ້າງໃຫ້ປະກົດຜົນເປັນຈິງ, ພ້ອມກັນນັ້ນ ກໍໃຫ້ສືບຕໍ່ກະກຽມການດໍາເນີນກອງປະຊຸມໃຫຍ່ 3 ຂັ້ນ ຂອງຄະນະພັກແຕ່ລະຂັ້ນໃຫ້ທວງທັນເວລາຕາມທີ່ໄດ້ກໍານົດໄວ້.

（ແຫຼ່ງ​ຂໍ້​ມູນ​： ນາງ ປະທຸມພອນ/pasaxon.org.la）