 |
ສະມາຊິກສະພາແຫ່ງຊາດ ປະກອບຄຳເຫັນໃສ່ບົດລາຍງານລັດຖະບານ
ບັນດາສະມາຊິກ ສະພາແຫ່ງຊາດ (ສສຊ) ໄດ້ພ້ອມກັນສຸມໃສ່ປະກອບຄຳຄິດຄຳເຫັນໃສ່ບົດລາຍງານການເມືອງຂອງລັດຖະບານໂດຍໄດ້ເໜີໃຫ້ລັດຖະບານ ກໍຄື ກະຊວງກ່ຽວຂ້ອງແກ້ໄຂບາງບັນຫາໂດຍສະເພາະແມ່ນບັນຫາການເກັບລາຍຮັບທີ່ບໍ່ໂປ່ງໃສ, ການນຳໃຊ້ມາດຕະການຕໍ່ຜູ້ລະເມີດລະບຽບກົດໝາຍຍັງບໍ່ທັນຮັດກຸມ ໂດຍສະເພາະແມ່ນບັນຫາການບຸກລຸກປ່າສະຫງວນແຫ່ງຊາດ ແລະ ອື່ນໆ ລວມເຖິງບັນຫາການພັດທະນາຊັບພະຍາກອນມະນຸດໃຫ້ໄປຕາມຂະແໜງການບູລິມະສິດ ເປັນຕົ້ນວິຊາສະເພາະ ໃນສາຂາວິຊາກະສິກຳ, ຄູ ແລະ ພະຍາບານເພື່ອຕອບສະໜອງໃຫ້ແກ່ການ ພັດທະນາປະເທດຊາດ ແລະ ແກ້ໄຂຄວາມທຸກຍາກ.
 |
ສະມາຊິກສະພາແຫ່ງຊາດ ປະກອບຄຳເຫັນໃສ່ບົດລາຍງານລັດຖະບານ
ພ້ອມດຽວກັນນີ້, ສສຊ ສະເໜີໃຫ້ລັດຖະບານ ພິຈາລະນາ ແລະ ແກ້ໄຂ ໂຄງການລົງທຶນປູກກ້ວຍຂອງນັກລົງທຶນ ຕ່າງປະເທດ ເຊິ່ງປັດຈຸບັນເຫັນວ່າຍັງເປັນບັນຫາຢູ່, ສະເໜີໃຫ້ກວດກາຄືນ ບັນຫາລາຄາໄຟຟ້າ ໃນປັດຈຸບັນ, ກວດກາຄືນບັນຫາການເຊົ່າ-ສຳປະທານທີ່ດິນ ທີ່ຍັງບໍ່ທັນໄດ້ຮັບການແກ້ໄຂ, ການອະນຸຍາດຂຸດຄົ້ນເຄື່ອງປ່າຂອງດົງຂອງແຕ່ລະຂະແໜງການກ່ຽວຂ້ອງຍັງບໍ່ທັນ ມີການປະສານສົມທົບກັນລະອຽດ ອະນຸຍາດ ພໍໃຜພໍລາວ, ການແກ້ໄຂ ຄວາມທຸກຍາກ ແລະ ພັດທະນາຊົນນະບົດ ເຫັນວ່າ ບໍ່ໄປບໍ່ມາຫຍັງ, ນະໂຍບາຍ ໃນການພັດທະນາ ບາງເຂດ ຍັງບໍ່ທັນຈະແຈ້ງ ບໍ່ໄປລວງດຽວກັນ ແລະ ບັນຫາສຳຄັນອື່ນໆ.
（ແຫຼ່ງຂໍ້ມູນ： ຂປລ）
