| ຫວຽດນາມ ສະເໜີເຮັດປະມວນກົດແຫ່ງການປະພຶດຢູ່ທະເລຕາເວັນອອກໃຫ້ສຳເລັດໂດຍໄວ | |
| ເວທີປາໄສອາຊຽນ - ຍີ່ປຸ່ນ: ຕົກລົງຮັບປະກັນຄວາມໝັ້ນຄົງ ແລະ ຄວາມປອດໄພໃນການເດີນທະເລຢູ່ທະເລຕາເວັນອອກ |
ກອງປະຊຸມສຳມະນາໄດ້ມີການເຂົ້າຮ່ວມໂດຍກົງຂອງຜູ້ແທນກວ່າ 180 ທ່ານ ແລະ 400 ທ່ານໄດ້ລົງທະບຽນເຂົ້າຮ່ວມທາງອອນລາຍ, ໃນນັ້ນມີເກືອບ 60 ທ່ານ ແມ່ນບັນດານັກຊ່ຽວຊານທີ່ມີຊື່ສຽງຂອງ 30 ປະເທດໃນບັນດາທະວີບ, 90 ຜູ້ແທນທີ່ມາຈາກບັນດາອົງການຕາງໜ້າຕ່າງປະເທດຢູ່ຫວຽດນາມ (ລວມມີ 15 ທ່ານເອກອັກຄະລັດຖະທູດ). ນັກຂ່າວເກືອບ 30 ຄົນທີ່ມາຈາກ 20 ອົງການຂ່າວສານ ແລະ ໂທລະພາບທັງພາຍໃນ ແລະ ຕ່າງປະເທດ ໄດ້ເຂົ້າຮ່ວມກອງປະຊຸມໂດຍກົງ ເພື່ອລາຍງານກ່ຽວກັບກອງປະຊຸມດັ່ງກ່າວ.
ກ່າວຄຳເຫັນສະແດງຄວາມຊົມເຊີຍທີ່ກອງປະຊຸມ, ທ່ານຮອງລັດຖະມົນຕີການຕ່າງປະເທດ ຟ້າມກວາງຮ້ຽວ ໃຫ້ຂໍ້ສັງເກດວ່າ: ທະເລຕາເວັນອອກ ມີທີ່ຕັ້ງໃຈກາງຂອງພາກພື້ນມະຫາສະມຸດອິນເດຍ - ປາຊີຟິກ, ບັນດາການຜັນແປ ແລະ ພັດທະນາຢູ່ທີ່ນີ້ ຈະກາຍເປັນທຳນຽມທີ່ໄດ້ຮັບການທະວີຄູນໃນທົ່ວພາກພື້ນ ແລະ ໂລກ.
 |
| ພິທີເປີດກອງປະຊຸມສຳມະນາສາກົນ ກ່ຽວກັບທະເລຕາເວັນອອກ ຄັ້ງທີ 13. (ພາບ: VOV) |
ໃນຊຸມປີທີ່ຜ່ານມາ, ສະຖານະການຢູ່ທະເລຕາເວັນອອກ ຍັງຊ້ອນແຝງໄປດ້ວຍຄວາມວິຕົກກັງວົນໃໝ່ອີກ. ການແກ່ງແຍ່ງລະຫວ່າງບັນດາປະເທດໃຫຍ່ ແລະ ການປະກົດຕົວຂອງກົນໄກຮ່ວມມືໃໝ່ ໃນພາກພື້ນ ໄດ້ສ້າງບັນຫາໃໝ່ໃຫ້ແກ່ສະຖາປັດຕະຍະກຳພາກພື້ນ ທີ່ພວມເປັນຮູບເປັນຮ່າງ, ໂດຍສະເພາະ ແມ່ນບົດບາດໃຈກາງຂອງອາຊຽນ.
ຕາມທ່ານຮອງລັດຖະມົນຕີ ແລ້ວ, ໃນຂະນະທີ່ສົນທິສັນຍາຂອງສະຫະປະຊາຊາດ ກ່ຽວກັບກົດໝາຍວ່າດ້ວຍທະເລປີ 1982 ໄດ້ຮັບຖືວ່າ ແມ່ນມາດຖານປະພຶດລວມນັ້ນ, ແຕ່ຍັງມີຫຼາຍກົດໝາຍ ຫຼື ບັນດາການເຄື່ອນໄຫວຂອງປະເທດ ທີ່ບໍ່ສອດຄ່ອງ ຫຼື ກົງກັນຂ້າມກັບ UNCLOS. ສິດ ແລະ ຜົນປະໂຫຍດອັນຊອບທຳຂອງບັນດາປະເທດແຄມທະເລ ຍັງບໍ່ໄດ້ຮັບການເຄົາລົບຢ່າງຄົບຖ້ວນ. ສິ່ງນີ້ເປັນທີ່ຈະແຈ້ງວ່າ ບໍ່ມີປະໂຫຍດໃນການສ້າງຄວາມໄວ້ເນື້ອເຊື່ອໃຈ ແລະ ວິວັດການຮ່ວມມືໃນພາກພື້ນ. ນອກນີ້, ພະຍາດໂຄວິດ-19 ຍັງໄດ້ສົ່ງຜົນກະທົບຕໍ່ທຸກດ້ານຂອງໂລກຢ່າງເລິກເຊິ່ງ. ສະນັ້ນ, ໂລກພວມຕ້ອງການການຮ່ວມແຮງຮ່ວມໃຈກັນ ແລະ ຮ່ວມມື ເພື່ອຜ່ານຜ່າໂລກລະບາດ, ຟື້ນຟູເສດຖະກິດ, ສູ້ຊົນປະຕິບັດບັນລຸເປົ້າໝາຍທົ່ວໂລກ, ເພື່ອອະນາຄົດທີ່ດີກວ່າເກົ່າ.
ກອງປະຊຸມສຳມະນາວິທະຍາສາດສາກົນ ກ່ຽວກັບທະເລຕາເວັນອອກຄັ້ງທີ 13 ໄດ້ດຳເນີນໄປແຕ່ວັນທີ 18-19/11 ດ້ວຍ 8 ວາລະ ກ່ຽວກັບບັນດາຫົວຂໍ້ທີ່ຫຼາກຫຼາຍ ຄື: ທະເລຕາເວັນອອກໃນສະພາບການທົ່ວໂລກມີການປ່ຽນແປງ; ສາມສິບປີຫຼັງຈາກສົງຄາມເຢັນ; ປັບປຸງຄວາມເປັນລະບຽບຮຽບຮ້ອຍດ້ານນິຕິກຳຢູ່ທະເລຕາເວັນອອກໃນ 5 ປີຜ່ານມາ; ຈົ່ງຍຸຕິທໍາຕໍ່ຄວາມຈິງ: ປະຫວັດສາດ ແລະ ທະເລຕາເວັນອອກ; ອາຊຽນ ແລະ ຄູ່ເຈລະຈາດ້ານຄວາມໝັ້ນຄົງສີ່ຝ່າຍ (QUAD) ໃນໂຄງສ້າງພາກພື້ນ; ລະບົບຕ່ອງໂສ້ການສະຫນອງຖືກຂາດຕອນ: ຮັບປະກັນຄວາມສາມາດຟື້ນຟູບັນດາເສັ້ນທາງທະເລ ໃນສະພາບການໂລກລະບາດພະຍາດໂຄວິດ-19; ຊຸກຍູ້ການທູດວິທະຍາສາດ ເພື່ອຜົນປະໂຫຍດລວມຂອງມະຫາສະໝຸດ; ຄວາມໂປ່ງໃສ ໂດຍຜ່ານເຕັກໂນໂລຊີການຕິດຕາມກວດກາ. ນອກຈາກ 8 ວາລະປະຊຸມຢ່າງເປັນທາງການແລ້ວ, 3 ວາລະປະຊຸມການນໍາຊາວໜຸ່ມ ກໍ່ໄດ້ເປີດເປັນເວທີປາໄສເພື່ອໃຫ້ລຸ້ນໜຸ່ມແບ່ງປັນທັດສະນະ, ປະກອບສ່ວນສຽງເວົ້າ ກ່ຽວກັບບັນຫາທະເລຕາເວັນອອກ. ຄາດວ່າ ຈະມີບັນດາວາລະວິເຄາະ ປະກອບຄຳເຫັນ ພາຍຫຼັງກອງປະຊຸມສຳມະນາ ໂດຍມີການເຂົ້າຮ່ວມຂອງຜູ້ຊ່ຽວຊານຂັ້ນສູງຫວຽດນາມຫຼາຍທ່ານ ກ່ຽວກັບບັນດາເນື້ອໃນແລກປ່ຽນທີ່ກອງປະຊຸມສຳມະນາ.
ຄຳຮຸ່ງ
