 |
ທ່ານ ບຸນຍັງ ວໍລະຈິດ ປະທານປະເທດ ແຫ່ງສປປ ລາວ ໃຫ້ກຽດຕ້ອນຮັບ ທ່ານ ສົມເດັດ ອັກຄະມະຫາ ໂປເຢຍ ຈັກກຼີ ເຮັງ ຊຳຣິນ ປະທານສະພາແຫ່ງຊາດ ລາຊະອານາຈັກ ກຳປູເຈຍ.
ໃນວັນທີ 31 ພຶດສະພານີ້ ທີ່ທຳນຽບປະທານປະເທດ ໃນໂອກາດທີ່ຄະນະຜູ້ແທນດັ່ງກ່າວເດີນທາງ ມາຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການ ລະຫວ່າງວັນທີ 30 ພຶດສະພາ ຫາ 1 ມິຖຸນານີ້. ທ່ານ ບຸນຍັງ ວໍລະຈິດ ໄດ້ກ່າວສະແດງຄວາມຍິນດີຕ້ອນ ຮັບຊົມເຊີຍ ແລະ ຕີລາຄາສູງຕໍ່ ສົມເດັດ ອັກຄະມະຫາ ໂປເຢຍ ຈັກກຼີ ເຮັງ ຊຳຣິນ ແລະ ຄະນະ ທີ່ໄດ້ເດີນທາງມາຢ້ຽມຢາມສັນ ຖະວະໄມຕີ ສປປ ລາວ ຢ່າງເປັນທາງການໃນຄັ້ງນີ້ ຊຶ່ງເປັນການປະກອບສ່ວນສຳຄັນເຂົ້າໃນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ການຮ່ວມມື, ຄວາມສາມັກຄີຮັກແພງ ແລະ ຊ່ວຍເຫຼືອຊຶ່ງກັນ ແລະ ກັນ ທີ່ເປັນມູນເຊື້ອມາແຕ່ບູຮານນະການ ລະຫວ່າງ ສອງປະເທດ ລາວ - ກຳປູເຈຍ ເວົ້າລວມ, ເວົ້າສະເພາະ ແມ່ນການພົວພັນຮ່ວມມືລະຫວ່າງ ສອງສະພາແຫ່ງຊາດລາວ - ກຳປູເຈຍ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ. ໂອກາດນີ້, ສົມເດັດ ອັກຄະມະຫາ ໂປເຢຍ ຈັກກຼີ ເຮັງ ຊຳຣິນ ກໍໄດ້ກ່າວສະແດງຄວາມຂອບໃຈຕໍ່ ທ່ານ ບຸນຍັງ ວໍລະຈິດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ແຈ້ງຈຸດປະສົງຂອງການມາຢ້ຽມຢາມ ສັນຖະວະໄມຕີ ສປປ ລາວ ຢ່າງເປັນທາງການ ໃຫ້ ທ່ານປະທານປະເທດໄດ້ຮັບຊາບ.
（ແຫຼ່ງຂໍ້ມູນ： ສຸກສະຫວັນ/pasaxon.org.la）
