| APEC ສ້າງພື້ນຖານໃໝ່ໃຫ້ແກ່ການພັດທະນາຢູ່ພາກພື້ນອາຊີ - ປາຊີຟິກ | |
| ຫວຽດນາມ ແລະ ບັນດາການປະກອບສ່ວນເຂົ້າໃນ APEC |
ທ່ານຮອງລັດຖະມົນຕີການຕ່າງປະເທດ ດັ້ງຮ່ວາງຢາງ ໄດ້ກ່າວວ່າ ໃນປີ 2021, ເຖິງວ່າຈະໄດ້ຮັບຜົນກະທົບຢ່າງໜັກໜ່ວງຈາກໂລກລະບາດໂຄວິດ-19, ແຕ່ຂະບວນວິວັດຂອງການຮ່ວມມື APEC ຈະສືບຕໍ່ໄດ້ຮັບການຍູ້ແຮງ. ດ້ວຍຫົວຂໍ້ “ພ້ອມກັນປະສານສົມທົບ, ພ້ອມກັນການກະທຳ, ພ້ອມກັນເຕີບໂຕ”, ນັບແຕ່ຕົ້ນປີມານີ້, APEC ໄດ້ມີການປະຊຸມເກືອບ 200 ຄັ້ງຢູ່ທຸກຂັ້ນ; ໃນນັ້ນ ຈຸດສຸມຕົ້ນຕໍແມ່ນການຮັບມືກັບການແຜ່ລະບາດຂອງພະຍາດໂຄວິດ-19, ການຟື້ນຟູເສດຖະກິດ, ສະພາບແວດລ້ອມການຄ້າ ແລະ ການລົງທຶນ, ການພັດທະນາແບບຍືນຍົງ ແລະ ກວມລວມ, ຍົກສູງປະສິດທິຜົນຂອງເວທີປາໄສ.
 |
| ທານຮອງລັດຖະມົນຕີການຕ່າງປະເທດ ດັ້ງຮ່ວາງຢາງ. (ພາບ: TTXVN) |
ຫວຽດນາມ ໄດ້ສົມທົບກັນຢ່າງແໜ້ນແຟ້ນກັບປະເທດເຈົ້າພາບ ນິວຊີແລນ ແລະ ບັນດາສະມາຊິກ APEC, ຍູ້ແຮງການຮ່ວມມື ແລະ ປະກອບສ່ວນເຂົ້າໃນບັນດາໂຄງການດຳເນີນງານຂອງ APEC ປີ 2021. ຫວຽດນາມ ແມ່ນປະເທດສຳຄັນໃນການສ້າງວິໄສທັດ APEC 2040 ແລະ ພວມຕັ້ງໜ້າເຂົ້າຮ່ວມການສ້າງແຜນການຜັນຂະຫຍາຍວິໄສທັດນີ້ ຢ່າງມີປະສິດທິຜົນ. ຫວຽດນາມ ກໍ່ແມ່ນໜຶ່ງໃນບັນດາພື້ນຖານເສດຖະກິດນຳໜ້າທີ່ຮຽກຮ້ອງໃຫ້ມີການເຂົ້າເຖິງວັກແຊງຢ່າງສະເໝີພາບ. ພິເສດ, ຫວຽດນາມ ໄດ້ໃຫ້ຄຳໝັ້ນສັນຍາຢ່າງແຮງ ແລະ ການກະທຳລະອຽດໃນການຮ່ວມມື APEC ເພື່ອຮັບມືກັບການປ່ຽນແປງຂອງດິນຟ້າອາກາດ.
ຕາມທ່ານຮອງລັດຖະມົນຕີການຕ່າງປະເທດ ດັ້ງຮ່ວາງຢາງ ແລ້ວ, ທີ່ກອງປະຊຸມສຸດຍອດການຮ່ວມມືເສດຖະກິດອາຊີ - ປາຊີຟິກ, ທ່ານປະທານປະເທດ ຫງວຽນຊວນຟຸກ ໄດ້ມີບົດກ່າວປາໄສທີ່ສຳຄັນ. ຫວຽດນາມ ຕັ້ງຫວັງວ່າ APEC ຈະສືບຕໍ່ຢືນຢັນບົດບາດເປັນເວທີປາໄສຮ່ວມມືຫຼັກແຫຼ່ງກ່ຽວກັບການຮ່ວມມື ແລະ ຮ່ວມສຳພັນດ້ານເສດຖະກິດ, ຊຸກຍູ້ການເຕີບໂຕເສດຖະກິດໃນພາກພື້ນ ແລະ ໂລກ, ສືບຕໍ່ຢືນຢັນບົດບາດສຳຄັນຂອງລັດທິຫຼາຍຝ່າຍ ແລະ ການຮ່ວມມືຫຼາຍຝ່າຍ. ຜ່ານນັ້ນ, APEC ຈະວາງອອກບັນດາມາດຕະການແກ້ໄຂ, ຊຸກຍູ້ການຮ່ວມມື ເພື່ອຮັບມືກັບການແຜ່ລະບາດຂອງພະຍາດ, ປຸກລຸກບັນດາກຳລັງໜູນໃໝ່, ຍູ້ແຮງການຟື້ນຟູເສດຖະກິດ, ນຳພາກພື້ນໄປສູ່ການພັດທະນາແບບຍືນຍົງ ແລະ ກວມລວມ. ດ້ວຍວິໄສທັດຂອງປະຊາຄົມອາຊີ - ປາຊີຟິກທີ່ເປີດກວ້າງ, ຂະຫຍັນຂັນເຄື່ອນ ແລະ ສ້າງຄວາມເຂັ້ມແຂງດ້ວຍຕົນເອງ ໃນປີ 2040, ບັນດາການນຳກໍ່ຈະຍົກອອກການກຳນົດທິດທີ່ສຳຄັນຂອງການຮ່ວມມື APEC ໃນ 2 ທົດສະວັດຕໍ່ໜ້າ ເພື່ອສັນຕິພາບ, ສະຖຽນລະພາບ ແລະ ການພັດທະນາ ອາຊີ - ປາຊີຟິກ.
ຄຳຮຸ່ງ
