APEC ສ້າງພື້ນຖານໃໝ່ໃຫ້ແກ່ການພັດທະນາຢູ່ພາກພື້ນອາຊີ

ຍສໝ - ສັບປະດາກອງປະຊຸມສຸດຍອດການຮ່ວມມືດ້ານເສດຖະກິດອາຊີ-ປາຊີຟິກ (APEC) ຄັ້ງທີ 28 (APEC 28) ດ້ວຍຮູບແບບອອນລາຍ ແລະ ໂດຍການເປັນປະທານຂອງ ນິວຊີແລນ ໄດ້ໄຂຂຶ້ນຢ່າງເປັນທາງການໃນວັນທີ 5 ພະຈິກນີ້ ດ້ວຍກອງປະຊຸມບັນດາເຈົ້າໜ້າທີ່ຂັ້ນສູງ APEC…

	APEC ເນັ້ນໜັກເຖິງການເຄື່ອນໄຫວເພື່ອອະນາຄົດຂອງ ແມ່ຍິງ ແລະ ເດັກຍິງ
	ຫວຽດນາມ ແລະ ບັນດາການປະກອບສ່ວນເຂົ້າໃນ APEC

ໂດຍການປະກາດໂຄງການດຳເນີນງານສຳຄັນ, ກອງປະຊຸມສຸດຍອດ APEC ຄັ້ງທີ 28 ໄດ້ຮັບຄວາມເຊື່ອໜັ້ນວ່າ ຈະສ້າງເປັນພື້ນຖານການຮ່ວມມືທີ່ສຳຄັນໃໝ່ເພື່ອການພັດທະນາຢູ່ ອາຊີ - ປາຊີຟິກ, ເປັນພາກພື້ນເຕົ້າໂຮມຫຼາຍພື້ນຖານເສດຖະກິດແຖວໜ້າຂອງໂລກ, ປະກອບສ່ວນເຂົ້າເຖິງ 60% GDP ແລະ ເກືອບ 50% ການຄ້າທົ່ວໂລກ.

ສັບປະດາກອງປະຊຸມສຸດຍອດ APEC ຄັ້ງທີ 28 ແມ່ນການເຄື່ອນໄຫວຂອບຂະໜາດໃຫຍ່ ແລະ ສຳຄັນທີ່ສຸດໃນປີ APEC 2021 ດ້ວຍຫົວຂໍ້ “ພ້ອມກັນສົມທົບ - ພ້ອມກັນກະທຳ - ພ້ອມກັນເຕີບໂຕ”. ຫົວຂໍ້ນີ້ສຸມໃສ່ 3 ບຸລິມະສິດ ຄື: ນະໂຍບາຍເສດຖະກິດ, ການຄ້າ ເພື່ອຊຸກຍູ້ການຟື້ນຟູເສດຖະກິດ; ຍູ້ແຮງການຟື້ນຟູແບບກວມລວມ ແລະ ຍືນຍົງ; ຊຸກຍູ້ການປະດິດສ້າງ ແລະ ການຫັນເປັນດິຈິຕອນ.

APEC ສ້າງພື້ນຖານໃໝ່ໃຫ້ແກ່ການພັດທະນາຢູ່ພາກພື້ນອາຊີ - ປາຊີຟິກ

ທ່ານປະທານປະເທດ ຫງວຽນຊວນຟຸກ. (ພາບ: TTXVN)

ເຫດການນີ້ມີໜ້າທີ່ສຳຄັນແມ່ນການປຶກສາຫາລື ແລະ ຕັດສິນ ກ່ຽວກັບທິດທາງຍຸດທະສາດ ແລະ ວິໄສທັດການຮ່ວມມືລະຫວ່າງບັນດາພື້ນຖານເສດຖະກິດ APEC, ສ້າງພື້ນຖານໃຫ້ແກ່ການພັດທະນາຂອງພາກພື້ນອາຊີ - ປາຊີຟິກ ໃນໄລຍະຍາວ.

ບັນດາວາລະສຳຄັນ

ກອງປະຊຸມຜູ້ນຳເສດຖະກິດ APEC ຄັ້ງທີ 28 ໃນວັນທີ 12 ພະຈິກນີ້ ດ້ວຍຫົວຂໍ້ວ່າ “ການປະສານງານພາຍໃນ APEC ເພື່ອຊຸກຍູ້ການຟື້ນຟູເສດຖະກິດພາຍຫຼັງ Covid-19; ບັນດາໂອກາດ ແລະ ສິ່ງທ້າທາຍຕົ້ນຕໍໃນໂລກ ຫຼັງ Covid ແລະ ວິທີຮັບປະກັນວ່າຜົນປະໂຫຍດຈະຖືກແບ່ງປັນຢ່າງສະເໝີພາບ ລະຫວ່າງທົ່ວປວງຊົນໃນປັດຈຸບັນ ແລະ ອະນາຄົດ”. ກອງປະຊຸມໄດ້ສຸມໃສ່ປຶກສາຫາລື ສອງເນື້້ອໃນຕົ້ນຕໍ ຄື: ແງ່ຫວັງເສດຖະກິດໂລກ ແລະ ການຮ່ວມມືໃນການຟື້ນຟູຫຼັງໂລກລະບາດ, ຄາດວ່າຈະຮັບຮອງເອົາ 2 ເອກະສານ ຄື: ຖະແຫຼງການຂອງກອງປະຊຸມບັນດາຜູ້ນຳເສດຖະກິດອາຊີ - ປາຊີຟິກ ຄັ້ງທີ 28 ແລະ ແຜນການປະຕິບັດວິໄສທັດ APEC ຮອດ ປີ 2040.

ບັນດາວາລະສຳຄັນ

ພື້ນຖານການຂະຫຍາຍຕົວໃນອະນາຄົດ

ໜຶ່ງໃນບັນດາຫົວຂໍ້ ແລະ ວາລະທີ່ໜ້າສົນໃຈທີ່ສຸດ ໃນສັບປະດາກອງປະຊຸມສຸດຍອດ APEC ຄັ້ງທີ 28 ແມ່ນການຮັບຮອງເອົາແຜນການປະຕິບັດວິໄສທັດ APEC ຮອດປີ 2040. ແຜນການຜັນຂະຫຍາຍວິໄສທັດ APEC ຮອດປີ 2040 ໄດ້ຮັບຖືວ່າ ແມ່ນບາດກ້າວຕໍ່ໄປທີ່ສຳຄັນຂອງ APEC ໃນການສ້າງເປັນພື້ນຖານອັນຈະແຈ້ງ ແລະ ໜັກແໜ້ນເພື່ອການພັດທະນາຂອງພາກພື້ນອາຊີ-ປາຊີຟິກ ໃນສອງທົດສະວັດຂ້າງໜ້າ. ວິໄສທັດນີ້ ໄດ້ຮັບການຮັບຮອງເອົາຈາກບັນດາການນຳ APEC ໃນເດືອນພະຈິກ 2020 ດ້ວຍເປົ້າໝາຍ “ປະຊາຄົມອາຊີ-ປາຊີຟິກທີ່ເປີດກວ້າງ, ຂະຫຍັນຂັນເຄື່ອນ, ສ້າງຄວາມເຂັ້ມແຂງດ້ວຍຕົນເອງ ແລະ ສັນຕິພາບ ໃນປີ 2040, ເພື່ອຄວາມວັດທະນາຖາວອນຂອງພົນລະເມືອງທຸກຄົນ ແລະ ຄົນລຸ້ນຫຼັງ”.

ກ່ອນສັບປະດາກອງປະຊຸມສຸດຍອດ APEC ຄັ້ງທີ 28, ເດືອນກໍລະກົດ ຜ່ານມາ, ນິວຊີແລນ ໄດ້ດຳເນີນການພົບປະບໍ່ເປັນທາງການ ຄັ້ງທຳອິດ ລະຫວ່າງການນຳ APEC. ກອງປະຊຸມ ໄດ້ສຸມໃສ່ປຶກສາຫາລືວິທີການແກ້ໄຂ ເພື່ອເພີ່ມທະວີການຮ່ວມມືໃນພາກພື້ນ ແນໃສ່ຜ່ານຜ່າວິກິດການດ້ານສາທາລະນະສຸກ ແລະ ຍູ້ແຮງການຟື້ນຟູເສດຖະກິດຢູ່ ອາຊີ-ປາຊີຟິກ.

ອາດເຫັນໄດ້ວ່າ, ທຸກບາດກ້າວຜັນຂະຫຍາຍຂອງ APEC ໃນຊຸມປີມໍ່ໆມານີ້ ແມ່ນແນໃສ່ສ້າງພື້ນຖານຄວາມໝັ້ນຄົງ, ເຂັ້ມແຂງ ແລະ ອາດຈະເປັນໄປໄດ້ໃນການພັດທະນາພາກພື້ນ ອາຊີ - ປາຊີຟິກ ໄລຍະກາງ ແລະ ໃນໄລຍະຍາວນານ, ຮັບປະກັນໃຫ້ ອາຊີ - ປາຊີຟິກ ສືບຕໍ່ເປັນພາກພື້ນນໍາໜ້າໃນການຟື້ນຟູເສດຖະກິດ, ການພັດທະນາ ແລະ ການເຊື່ອມຕໍ່ຂອງໂລກໃນອະນາຄົດ.

ຄຳຮຸ່ງ