| ກອງປະຊຸມທາງໄກ ແມ່ຍິງ ຫວຽດນາມ ເຂົ້າຮ່ວມການກະທຳຮັບມືກັບການປ່ຽນແປງຂອງດິນຟ້າອາກາດ | |
| ຫາງສຽງສາກົນ ຕີລາຄາຢ່າງຕັ້ງໜ້າຕໍ່ຄຳໝັ້ນສັນຍາຂອງ ຫວຽດນາມ ຢູ່ COP26 |
 |
| ພາບປະກອບ |
ເວລາ 7 ໂມງ 55 ນາທີ 16 ວິນາທີ (ຕາມເວລາທີ່ຮ່າໂນ່ຍ) ວັນທີ 9 ພະຈິກ, ຈະຫຼວດ Epsilon ໝາຍເລກ 5 ໄດ້ຍິງຂຶ້ນສູ່ວົງໂຄຈອນ, ນຳເອົາດາວທຽມ NanoDragon ຂອງຫວຽດນາມ. ນີ້ເປັນຄັ້ງທີ 4 ທີ່ຈະຫຼວດ Epsilon ເລກທີ 5 ໄດ້ມີກຳນົດຍິງ ແລະ ໄດ້ນຳສົ່ງດາວທຽມ NanoDragon ຮ່ວມກັບດາມທຽມອື່ນອີກ 8 ດວງ ຂຶ້ນສູ່ອາວະກາດໄດ້ຢ່າງສຳເລັດຜົນ, ຫຼັງຈາກໄດ້ມີການເລື່ອນການຍິງສົ່ງດາວທຽມ 3 ຄັ້ງ ໃນວັນທີ 1 ຕຸລາ, ວັນທີ 7 ຕຸລາ ແລະ 7 ພະຈິກ ຍ້ອນສະພາບອາກາດ ແລະ ສະພາບເຕັກນິກ.
ປະມານ 11 ໂມງ 07 ນາທີ (ຕາມເວລາທ້ອງຖິ່ນ, ຄື 09 ໂມງ 07 ນາທີ ຕາມເວລາຂອງຫວຽດນາມ), ດາວທຽມ NanoDragon ຂອງຫວຽດນາມໄດ້ແຍກອອກຈາກຈະຫຼວດ Epsilon ໝາຍເລກ 5 (Epsilon-5) ຢ່າງສໍາເລັດຜົນ ແລະ ບິນລອຍໃນຮ້ວງອາວະກາດດ້ວຍຕົວມັນເອງ. ນີ້ເປັນດາວທຽມດວງສຸດທ້າຍທີ່ຖືກຈະຫຼວດປ່ອຍສູ່ອາວະກາດ. ຮອດເວລາ 11 ໂມງ 30 ນາທີ, NanoDragon ໄດ້ບິນລອຍຜ່ານນ່ານຟ້າຂອງຫວຽດນາມເປັນຄັ້ງທຳອິດ.
NanoDragon ເປັນດາວທຽມ 100% ທີ່ໄດ້ຮັບການຄົ້ນຄ້ວາ, ອອກແບບ ແລະ ຜະລິດຢູ່ຫວຽດນາມ. ມາຮອດປະຈຸບັນ, ສູນອາວະກາດຫວຽດນາມ ໄດ້ນຳດາວທຽມ 3 ດວງຂຶ້ນໄປເຄື່ອນໄຫວໃນອາວະກາດ, ເປັນຂີດໝາຍຄວາມສຳເລັດເບື້ອງຕົ້ນໃນການຜະລິດ ແລະ ການຍິງສົ່ງດາວທຽມຂະໜາດນ້ອຍຈຳນວນໜື່ງ, ມີຄວາມໝາຍໃນການສຶກສາ ແລະ ການທົດລອງທາງເຕັກໂນໂລຊີຂຶ້ນສູ່ອາວະກາດ.
NanoDragon ໄດ້ຖືກພັດທະນາ ໂດຍມີຈຸດປະສົງເພື່ອຢັ້ງຢືນໃຫ້ເຫັນວ່າ ສາມາດນຳໃຊ້ເຕັກໂນໂລຊີລຳແສງດາວທຽມຂະໜາດນ້ອຍທີ່ສຸດ ເພື່ອຮັບສັນຍານລະບຸຕົວຕົນຢ່າງອັດຕະໂນມັດ (AIS) ຂອງເຮືອ, ນໍາໃຊ້ໃນຈຸດປະສົງການຕິດຕາມ, ກວດກາຍານພາຫະນະຢູ່ເທິງທະເລ. ຄຽງຄູ່ກັນນັ້ນ, ດາວທຽມນີ້ຍັງຖືກອອກແບບມາເພື່ອກຳນົດຄຸນນະພາບຂອງລະບົບການຄວບຄຸມ, ກຳນົດທິດທາງດາວທຽມ ແລະ ຄອມພິວເຕີຈຳນວນໜຶ່ງທີ່ພັດທະນາໃໝ່ ຊຶ່ງໄດ້ຮັບການພັດທະນາສະເພາະແກ່ດາວທຽມຂະໜາດນ້ອຍ.
ໄຊພອນ
