| ຫວຽດນາມ ນອນໃນກຸ່ມປະເທດແຖວໜ້າຂອງ ອາຊີ ກ່ຽວກັບການຮັບປະກັນສິດທິເດັກຍິງ | |
| ຫວຽດນາມ ເພີ່ມທະວີການຮ່ວມມື ກັບ ສະພາອັງກິດກ່ຽວກັບວັດທະນະທຳ, ຫົວຄິດປະດິດສ້າງ |
 |
| ທ່ານປະທານປະເທດຫວຽດນາມ ຫງວຽນຊວັນຟຸກເຂົ້າຮ່ວມ ພິທີສະເຫຼີມສະຫຼອງວັນສ້າງຕັ້ງສະມາຄົມພຸດທະສາສະໜາ ຫວຽດນາມ ຄົບຮອບ 40 ປີ (ພາບ: TTXVN) |
ຕອນເຊົ້າວັນທີ 7 ພະຈິກ, ຢູ່ຮ່າໂນ້ຍ, ທ່ານປະທານປະເທດຫວຽດນາມ ຫງວຽນຊວັນຟຸກ ໄດ້ເຂົ້າຮ່ວມ ພິທີສະເຫຼີມສະຫຼອງວັນສ້າງຕັ້ງສະມາຄົມພຸດທະສາສະໜາ ຫວຽດນາມ ຄົບຮອບ 40 ປີ (07/11/1981 – 07/11/2021). ດ້ວຍຫົວຂໍ້ “ພຸດທະສາສະໜາ ຫວຽດນາມ - 40 ປີ ແຫ່ງການເຊື່ອມໂຍງ ແລະ ພັດທະນາພ້ອມກັບປະເທດຊາດ”, ພິທີດັ່ງກ່າວຖືກຈັດຂຶ້ນຕາມຮູບການທາງໄກ ຈາກ ຮ່າໂນ້ຍ ແລະ ເຊື່ອມຕໍ່ກັບ 63 ແຂວງ, ນະຄອນໃນທົ່ວປະເທດ. ທ່ານເລຂາທິການໃຫຍ່ ຫງວຽນຝູຈ້ອງ, ທ່ານນາຍົກລັດຖະມົນຕີ ຟ້າມມິງຈິງ, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້ ກໍໄດ້ສົ່ງກະຕາດອກໄມ້ມາອວຍພອນ.
ກ່າວຄຳເຫັນທີ່ພິທີ, ທ່ານປະທານປະເທດຫວຽດນາມ ຫງວຽນຊວັນຟຸກ ເນັ້ນໜັກວ່າ: ປະຫວັດສາດ ຫວຽດນາມ ຍາມໃດກໍຈົດຈຳການປະກອບສ່ວນຢ່າງໃຫຍ່ຫຼວງຂອງສາສະໜາພຸດ ທີ່ມີຕໍ່ປະເທດຊາດ, ໃນນັ້ນ ມີພາລະກິດແຫ່ງການປົດປ່ອຍຊາດ, ທ້ອນໂຮມປະເທດຊາດເປັນເອກະພາບໃນເມື່ອກ່ອນ, ກໍຄືໃນໄລຍະແຫ່ງການສ້າງສາ, ປົກປັກຮັກສາປະເທດຊາດໃນວັນນີ້. ພຸດທະສາສະໜາ ຍາມໃດກໍແມ່ນສະມາຊິກທີ່ໜ້າໄວ້ເນື້ອເຊື່ອໃຈ, ມີການປະກອບສ່ວນສຳຄັນເຂົ້າໃນການສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ. ທ່ານກ່າວວ່າ:
“ອາດເວົ້າໄດ້ວ່າ ໃນປະຫວັດສາດກວ່າ 2.000 ປີ ຂອງພຸດທະສາສະໜາ ຫວຽດນາມ ແມ່ນປະຫວັດສາດຂອງພຸດທະສາສະນິກກະຊົນຜູ້ຮັກຊາດ. ໂດຍສືບທອດມູນເຊື້ອຂອງພຸດທະສາສະໜາຮັກຊາດ ຈົນຮອດສະໄໝຂອງປະທານ ໂຮ່ຈີມິນ ໃນປັດຈຸບັນ, ບໍ່ວ່າຈະຢູ່ໃນສະໄໝຕໍ່ສູ້ປົກປັກຮັກສາປະເທດຊາດ ຫຼື ສະໄໝສັນຕິພາບ, ພັດທະນາປະເທດຊາດ, ພຸດທະສາສະໜາ ຫວຽດນາມ ກໍຕິດພັນກັບປະຫວັດສາດຂອງຊາດ ແລະ ລ້ວນແຕ່ມີຫຼາຍແບບຢ່າງທີ່ພົ້ນເດັ່ນໃນການກູ້ຊາດ, ປົກປັກຮັກສາປະເທດຊາດ ແລະ ສ້າງຄວາມຢູ່ເຢັນເປັນສຸກມາໃຫ້ປະຊາຊົນ”.
vovworld.vn
