 |
| ທ່ານເອກອັກຄະລັດຖະທູດ ດັ້ງດິ່ງກຸ້ຍ, ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສປຊ (ພາບ: TTXVN) |
ກ່າວຄຳເຫັນທີ່ກອງປະຊຸມ, ທ່ານເອກອັກຄະລັດຖະທູດ ດັ້ງດິ່ງກຸ້ຍ, ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສປຊ, ຢັ້ງຢືນວ່າ ສານສາກົນ ສວມບົດບາດສຳຄັນໃນການແກ້ໄຂການຂັັດແຍ້ງກັນສາກົນໂດຍສັນຕິວິທີ. ຜ່ານໜ້າທີ່ພິພາກສາ ແລະ ໃຫ້ຄຳປຶກສາ, ສານສາກົນ ໄດ້ປະກອບສ່ວນຊຸກຍູ້ການປະຕິບັດກົດໝາຍສາກົນ ແລະ ສິດອຳນາດລະດັບສາກົນ. ຫວຽດນາມ ຖືວ່າ, ຄວາມເປັນລະບຽບຮຽບຮ້ອຍສາກົນ ຍືນຢູ່ຕໍ່ໜ້າບັນດາສິ່ງທ້າທາຍຢ່າງຮ້າຍແຮງ, ບັນດາການກະທຳທີ່ລະເມີດກົດບັດ ສປຊ ແລະ ກົດໝາຍສາກົນ.
ໃນສະພາບການນັ້ນ, ສະພາຄວາມໝັ້ນຄົງສປຊ ຕ້ອງຊຸກຍູ້ການປະຕິບັດກົດໝາຍສາກົນຄືແມ່ນເຄື່ອງມືທີ່ມີໃນປັດຈຸບັນ ເພື່ອແນໃສ່ຮັກສາສັນຕິພາບ ແລະ ຄວາມໝັ້ນຄົງສາກົນ, ເພີ່ມທະວີການສົມທົບກັບ ສານສາກົນ ໃນຂອບຂະໜາດໜ້າທີ່ຂອງບັນດາອົງການ ແລະ ເໝາະສົມກັບກົດບັດ ສປຊ. ທ່ານເອກອັກຄະລັດຖະທູດ ຖືວ່າ ປະທານສານສາກົນ ມີບົດບາດສຳຄັນກ່ຽວກັບການພິພາກສາ, ຄຸ້ມຄອງ, ຕາງໜ້າ ແລະ ການທູດ, ອາດຈະໜູນຊ່ວຍເພີ່ມທະວີການເຄື່ອນໄຫວ, ບົດບາດຂອງສານສາກົນ ໃນການຊຸກຍູ້ສິດອຳນາດ, ປະກອບສ່ວນເຂົ້າໃນການຮັກສາສັນຕິພາບ, ຄວາມໝັ້ນຄົງສາກົນ.
ທ່ານເອກອັກຄະລັດຖະທູດ ດັ້ງດິ່ງກຸ໊ຍ ໄດ້ເນັ້ນໜັກເຖິງຫຼັກການແກ້ໄຂການຂັດແຍ້ງສາກົນ ໂດຍສັນຕິວິທີ ແມ່ນໜຶ່ງໃນບັນດາຫຼັກການພື້ນຖານຂອງກົດໝາຍສາກົນ. ຫຼັກການນີ້ ກໍ່ລວມມີພາລະໜ້າທີ່ຕ້ອງປະຕິບັດຕາມບັນດາການພິພາກສາ, ຮູບຄະດີ, ຄຳຕັດສິນໃຈ ຂອງອົງການທີ່ມີສິດອຳນາດສານ, ການພິພາກສາສາກົນ. ທ່ານເອກອັກຄະລັດຖະທູດ ຢັ້ງຢືນເຖິງນະໂຍບາຍສະເໝີຕົ້ນສະເໝີປາຍຂອງ ຫວຽດນາມ ໃນການປະຕິບັດຫຼັກການພື້ນຖານຂອງກົດໝາຍສາກົນ ກ່ຽວກັບການແກ້ໄຂບັນດາການຂັດແຍ້ງກັນໂດຍສັນຕິວິທີ, ບໍ່ນຳໃຊ້ ຫຼື ນາບຂູ່ນຳໃຊ້ອາວຸດ, ທ່ານເອກອັກຄະລັດຖະທູດ ໃຫ້ຮູ້ວ່າ ຫວຽດນາມ ຕີລາຄາສູງ ແລະ ສະໜັບສະໜູນການເພີ່ມທະວີບົດບາດຂອງບັນດາອົງການນິຕິກຳສາກົນ ໃນການຊຸກຍູ້ການພົວພັນຮ່ວມມື, ມິດຕະພາບ ລະຫວ່າງບັນດາປະເທດ. ຫວຽດນາມ ໄດ້ເຂົ້າຮ່ວມຫຼາຍວິວັດການນິຕິກຳສາກົນ, ໃນນັ້ນ ມີບັນດາວິວັດການຂອງ ສານສາກົນ. ຫວຽດນາມ ຮຽກຮ້ອງໃຫ້ຍົກສູງກຳລັງຄວາມສາມາດໃນການນຳໃຊ້ບັນດາກົນໄກພິພາກສາ, ກຳມະການສາກົນ, ມີຄວາມປາດຖະໜາຢາກສືບຕໍ່ຊຸກຍູ້ການຮ່ວມມືກັບ ສານສາກົນ ໃນການເຄື່ອນໄຫວບຳລຸງສ້າງ ໄວໜຸ່ມໃນຂົງເຂດນິຕິກຳສາກົນ.
ສານສາກົນແມ່ນອົງການພິພາກສາຂອງ ສປຊ, ໄດ້ສ້າງຕັ້ງນັບແຕ່ປີ 1945, ມີສິດອຳນາດພິພາກສາການຂັດແຍ້ງກັນລະຫວ່າງບັນດາປະເທດ, ສະໜອງຄຳເຫັນປຶກສາດ້ານນິຕິກຳໃຫ້ແກ່ສະພາຄວາມໝັ້ນຄົງ ສປຊ, ສະມັດຊາໃຫຍ່, ບາງອົງການຈັດຕັ້ງສາກົນ ແລະ ອົງການສະເພາະກິດ ທີ່ ສະມັດຊາໃຫຍ່ ໄດ້ໃຫ້ອະນຸຍາດ. ມາຮອດປັດຈຸບັນ, ສານສາກົນ ໄດ້ພິພາກສາ 140 ຄະດີຮ້ອງຟ້ອງ ລະຫວ່າງບັນດາປະເທດ, ປັດຈຸບັນພວມພິພາກສາ 14 ຄະດີໃນບັນດາຂົງເຂດກ່ຽວກັບການທູດ, ກົງສຸນ, ອະທິປະໄຕຜືນແຜ່ນດິນ, ເສັ້ນຊາຍແດນໃນທະເລ, ສິດທິມະນຸດ, ສິ່ງແວດລ້ອມ.
ນີ້ແມ່ນກອງປະຊຸມສະເພາະທີ່ໄດ້ຈັດຕັ້ງທຸກປີ ເພື່ອແນໃສ່ແລກປ່ຽນຂໍ້ມູນ, ໂອ້ລົມສົນທະນາລະຫວ່າງ ສະພາຄວາມໝັ້ນຄົງ ສປຊ ກັບສານສາກົນ ກ່ຽວກັບບັນດາບັນຫານິຕິກຳທີ່ກ່ຽວຂ້ອງເຖິງການຮັກສາສັນຕິພາບ, ຄວາມໝັ້ນຄົງສາກົນ.
ບຸນຄົງ
