ທ່ານນາງຮອງປະທານປະເທດ ໃຫ້ການຕ້ອນຮັບບັນດາຜູ້ຕາງໜ້າຍິງຄະນະທູຕານະທູດຕ່າງປະເທດ ປະຈຳ ຫວຽດນາມ

ຍສໝ - ຫວ່າງແລ້ວນີ້, ທ່ານນາງຮອງປະທານປະເທດ ຫວໍທິແອັງຊວັນ ໄດ້ໃຫ້ການຕ້ອນຮັບເອກອັກຄະລັດຖະທູດຍິງ, ອຸປະທູດບັນດາອົງການທູຕານຸທູດຕ່າງປະເທດ ປະຈຳ ຫວຽດນາມ.

	APEC ເນັ້ນໜັກເຖິງການເຄື່ອນໄຫວເພື່ອອະນາຄົດຂອງ ແມ່ຍິງ ແລະ ເດັກຍິງ
	ສັກວັກຊິນກັນໂຄວິດ - 19 ໃຫ້ແກ່ແມ່ຍິງທີ່ຖືພາ 13 ອາທິດຂຶ້ນໄປ

ທ່ານນາງຮອງປະທານປະເທດ ໃຫ້ການຕ້ອນຮັບບັນດາຜູ້ຕາງໜ້າຍິງຄະນະທູຕານະທູດຕ່າງປະເທດ ປະຈຳ ຫວຽດນາມ (ພາບ: hanoimoi.com.vn)

ກ່າວຄຳເຫັນທີ່ການພົບປະ, ທ່ານນາງຮອງປະທານປະເທດໄດ້ຢ້ຳຄືນປະຫວັດສາດ ພັນໆປີ ຂອງຊົນຊາດ ຫວຽດນາມ ທີ່ຕິດພັນກັບວິວັດການສ້າງສາ ແລະ ປົກປັກຮັກສາ ປະເທດຊາດ. ໃນວິວັດການນັ້ນ, ຮູບແບບແມ່ຍິງ ຫວຽດນາມ ຍາມໃດກໍ່ມີຊີວິດຊີວາ, ສວມບົດບາດສຳຄັນໃນຄອບຄົວ ແລະ ສັງຄົມ. ປັດຈຸບັນ, ແມ່ຍິງ ຫວຽດນາມ ນັບມື້ນັບຢັ້ງຢືນໄດ້ບົດບາດ ແລະ ການປະກອບສ່ວນອັນໃຫຍ່ຫຼວງໃນພາລະກິດແຫ່ງການປ່ຽນແປງໃໝ່ ແລະ ເຊື່ອມໂຍງເຂົ້າກັບສາກົນ ຂອງປະເທດຊາດ.

ທ່ານນາງຮອງປະທານປະເທດ ຫວໍທິແອັງຊວັນ ໄດ້ຢັ້ງຢຶນວ່າ ການຊຸກຍູ້ຄວາມສະເໝີພາບ ລະຫວ່າງຍິງ ຊາຍ ແລະ ມອບສິດໃຫ້ແກ່ແມ່ຍິງ ແລະ ເດັກນ້ອຍຍິງ ຍາມໃດກໍ່ແມ່ນສິ່ງບຸລິມະສິດສະເໝີຕົ້ນສະເໝີປາຍຂອງ ລັດ ຫວຽດນາມ. ໃນຊຸມປີຜ່ານມາ, ຫວຽດນາມ ບັນລຸໄດ້ຄວາມຄືບໜ້າຂອງບັນດາບົດບາດນຳພາຂອງແມ່ຍິງໃນຫຼາຍຂົງເຂດຢ່າງຈະແຈ້ງ.

ລັດຖະທຳມະນູນ ຫວຽດນາມ ໃນປີ 2013 ໄດ້ຢັ້ງຢືນ: ພົນລະເມືອງ ຍິງ ແລະ ຊາຍມີຄວາມສະເໝີພາບໃນທຸກດ້ານ, ລັດ, ສັງຄົມ ແລະ ຄອບຄົວສ້າງເງື່ອນໄຂເພື່ອໃຫ້ແມ່ຍິງພັດທະນາຢ່າງຮອບດ້ານ, ເສີມຂະຫຍາຍບົດບາດຂອງຕົນໃນສັງຄົມ.

ທ່ານນາງຮອງປະທານປະເທດ ແຈ້ງໃຫ້ຊາບວ່າ ອັດຕາສະມາຊິກສະພາແຫ່ງຊາດຊຸດທີ XV ເພດຍິງ ບັນລຸ 30,26% ສູງທີ່ສຸດໃນໄລຍະ 45 ປີຜ່ານມາ. ອັດຕາການນຳຫຼັກແຫຼ່ງເພດຍິງໃນບັນດາກະຊວງ, ອົງການທຽບເທົ່າກັບກະຊວງ ແມ່ນ 50%. ອັດຕາວິສາຫະກິດໂດຍແມ່ຍິງແມ່ນເຈົ້າຂອງຢູ່ ຫວຽດນາມ ບັນລຸ 26,5%, ຢືນຢູ່ອັນດັບທີ 6 ໃນຈຳນວນປະເທດທີ່ມີອັດຕານັກທຸລະກິດຍິງສູງທີ່ສຸດ…

ພິເສດ, ໃນການຕໍ່ສູ້, ຕ້ານໂລກລະບາດໂຄວິດ - 19, ມີແມ່ຍິງຫຼາຍຄົນໄດ້ເສີມຂະຫຍາຍບົດບາດພົ້ນເດັ່ນໃນດ່ານໜ້າການຕ້ານໂລກລະບາດ, ພ້ອມແລ້ວທີ່ຈະເສຍສະຫຼະ 6ໍ ທຸກຄວາມອັນຕະລາຍ ເພື່ອປົກປ້ອງສຸຂະພາບ, ຊີວິດອິນຊີຂອງປະຊາຊົນ.

ເນື່ອງໃນໂອກາດສະເຫຼີມສະຫຼອງ ວັນແມ່ຍິງ ຫວຽດນາມ 20 ຕຸລາ, ທ່ານນາງ ຫວໍທິແອັງຊວັນ ໄດ້ສະແດງຄວາມມຮູ້ບຸນຄຸນຕໍ່ບັນດາແມ່ຍິງຊາວຕ່າງປະເທດ ທີ່ພວມດຳລົງຊີວິດຢູ່ ຫວຽດນາມ ຍ້ອນການປະກອບສ່ວນ ແລະ ນ້ຳໃຈອັນດີງາມທີ່ສະຫງວນໃຫ້ແກ່ຊາວຫວຽດນາມ. ບັນດາການປະກອບສ່ວນສຳຄັນດັ່ງກ່າວ ໄດ້ປະກອບສ່ວນເຂົ້າໃນການຊຸກຍູ້ການພົວພັນມິດຕະພາບ ແລະ ການຮ່ວມມືຢ່າງເລິກເຊິ່ງ, ແທດຈິງ ລະຫວ່າງ ຫວຽດນາມ ກັບບັນດາຄູ່ຮ່ວມມືຕ່າງປະເທດ ໃນໄລຍະທີ່ຜ່ານມາ.

ທ່ານນາງປະທານປະເທດ ເນັ້ນໜັກ: ລັດ ແລະ ປະຊາຊົນ ຫວຽດນາມ ຍາມໃດກໍ່ຈົດຈຳ, ຄວາມເຄົາລົບນັບຖື ແລະ ຄວາມຮູ້ບຸນຄຸນຕໍ່ການໜູນຊ່ວຍອັນລ້ຳຄ່າ, ທັນການ, ມີປະສິດທິຜົນຂອງບັນດາປະເທດ ແລະ ປະຊາຄົມສາກົນທີ່ສະຫງວນໃຫ້ແກ່ ຫວຽດນາມ ໃນໄລຍະຕໍ່ສູ້ປົດປ່ອຍຊາດ, ທ້ອນໂຮມປະເທດຊາດເປັນເອກະພາບໃນເມື່ອກ່ອນ, ກໍ່ຄືພາລະກິດແຫ່ງການສ້າງສາ ແລະ ປົກປັກຮັກສາປະເທດຊາດໃນປັດຈຸບັນ.

ໃນຄວາມມານະພະຍາຍາມຕ້ານໂລກລະບາດໂຄວິດ - 19, ຫວຽດນາມ ຂໍສະແດງຄວາມຂອບອົກຂອບໃຈຢ່າງຈິງຈັງ ຕໍ່ບັນດາປະເທດ, ເພື່ອນມິດ, ຄູ່ຮ່ວມມື, ບັນດາເອກອັກຄະລັດຖະທູດ ທີ່ໄດ້ມີການຮ່ວມມືຢ່າງແໜ້ນແຟ້ນ, ໜູນຊ່ວຍຢ່າງຕັ້ງໜ້າ, ມີປະສິດທິຜົນ, ສະໜອງ ວັກຊິນ, ຢາປິ່ນປົ່ວ ແລະ ວັດຖຸອຸປະກອນການແພດ, ປະກອບສ່ວນຊ່ວຍ ຫວຽດນາມ ຄວບຄຸມໂລກລະບາດໂຄວິດ - 19, ກັບຄືນສູ່ສະພາບປົກກະຕິໃໝ່.

ທ່ານນາງຮອງປະທານປະເທດ ຢັ້ງຢືນວ່າ ຫວຽດນາມ ຍາມໃດກໍ່ປະຕິບັດແນວທາງການທູດຢ່າງສະເໝີຕົ້ນສະເໝີປາຍ, ເອກະລາດ, ເປັນເຈົ້າຕົນເອງ, ສັນຕິພາບ, ການຮ່ວມມື ແລະ ພັດທະນາ, ຫັນການພົວພັນການທູດເປັນຫຼາຍຮູບແບບ, ຫຼາຍຝ່າຍ, ແມ່ນເພື່ອນມິດ, ຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈ ແລະ ແມ່ນສະມາຊິກທີ່ຕັ້ງໜ້າ, ມີຄວາມຮັບຜິດຊອບ ຂອງປະຊາຄົມສາກົນ, ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນຢ່າງຮອບດ້ານ, ເລິກເຊິ່ງກວ້າງຂວາງ. ພັກ, ລັດ ແລະ ປະຊາຊົນ ຫວຽດນາມ ຍາມໃດກໍ່ສ້າງເງື່ອນໄຂສະດວກເພື່ອໃຫ້ບັນດາເອກອັກຄະລັດຖະທູດ ປະຕິບັດໜ້າທີ່ຂອງຕົນໃຫ້ເປັນຢ່າງດີ. ຫວັງວ່າ ບັນດາເອກອັກຄະລັດຖະທູດຍິງ ດ້ວຍທ່າແຮງຂອງແມ່ຍິງ ແມ່ນຄວາມຢຶດໝັ້ນ, ທົນທານ, ອ່ອນໂຍນ, ເຫັນອົກເຫັນໃຈ ແລະ ເໜືອກ່ວາສິ່ງໃດໝົດແມ່ນ ນ້ຳໃຈຮັກແພງມະນຸດ ຈະສືບຕໍ່ແມ່ນຂົວເຊື່ອມຕໍ່ຢ່າງມີປະສິດທິຜົນ, ຊຸກຍູ້ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດກັບປະເທດຂອງບັນດາທ່ານເອກອັກຄະລັດຖະທູດ ໃຫ້ຫຼາຍກ່ວາອີກ.

ຫວຽດນາມ ແລະ ບັນດາປະເທດ ສືບຕໍ່ຮ່ວມມືກັນຢ່າງແໜ້ນແຟ້ນ ໃນການຊຸກຍູ້ຄວາມສະເໝີພາບລະຫວ່າງຍິງຊາຍ ນັບທັງຂອບເຂດການຮ່ວມມືສອງຝ່າຍ ແລະ ຫຼາຍຝ່າຍ, ຍ້ອນບັນດາເປົ້າໝາຍພັດທະນາແບບຍືນຍົງ, ເພື່ອອະນາຄົດທີ່ມີຄວາມຂະຫຍັນຂັນເຄື່ອນ, ກວມລວມ ແລະ ວັດທະນາຖາວອນ.

ຫວຽດນາມ ໄດ້ນຳໜ້າຢ່າງບໍ່ຢຸດຢັ້ງໃນບັນດາການດຳເນີນງານກ່ຽວກັບແມ່ຍິງ, ສັນຕິພາບ ແລະ ຄວາມໝັ້ນຄົງ, ຜັນຂະຫຍາຍນັບມື້ນັບພະນັກງານເພດຍິງຫຼາຍຄົນ ໃນກຳລັງຮັກສາສັນຕິພາບ ແລະ ກໍ່ແມ່ນແບບຢ່າງທີ່ດີໃຫ້ແກ່ປະເທດອື່ນ, ສະແດງໃຫ້ເຫັນການເຂົ້າຮ່ວມຂອງແມ່ຍິງ ໃນວິວັດການສ້າງສາ ສັນຕິພາບ ແລະ ແກ້ໄຂຜົນຮ້າຍຢ້ອນຫຼັງຈາກການປະທະກັນ.

ບັນດາເອກອັກຄະລັດຖະທູດ, ອຸປະທູດຍິງ ໄດ້ສະແດງຄວາມເຊື່ອໝັ້ນ ແລະ ພ້ອມແລ້ວທີ່ຈະຮ່ວມມືກັບ ຫວຽດນາມ ໃນບັນຫາຄວາມສະເໝີພາບລະຫວ່າງຍິງຊາຍ ຜ່ານບັນດາພາຫະນະ ແລະ ວິທີການທີ່ແຕກຕ່າງກັນຄື ການຮ່ວມມືພັດທະນາ, ຂໍ້ລິເລີ່ມດຳເນີນທຸລະກິດ ແລະ ການຄ້າ, ການໂອ້ລົມສົນທະນານະໂຍບາຍ, ແບ່ງປັນບົດຮຽນ, ປະສົບການ, ແລກປ່ຽນບັນດາແບບຢ່າງທີ່ດີ, ຮ່ວມມືຢູ່ບັນດາເວທີປາໄສຫຼາຍຝ່າຍ… ເພື່ອແນໃສ່ມອບສິດໃຫ້ແກ່ແມ່ຍິງ ແລະ ເດັກຍິງໃຫ້ຫຼາຍກ່ວາອີກ.

ບຸນຄົງ