 |
ນາຍົກລັດຖະມົນຕີ ຕ້ອນຮັບຜູ້ຕາງໜ້າຈາກ 3 ອົງການຈັດຕັ້ງສາກົນ. (ພາບ:ຂປລ)
ໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ທ່ານ ໂຮເຊ ກຣາເຊຍໂນ ດາ ຊິວວາ, ທ່ານ ເດວິດ ບີສລີ ແລະ ທ່ານ ໂທມັດ ຣັດ ທີ່ໄດ້ນຳພາຄະນະ ເດີນທາງມາຢ້ຽມຢາມ ສປປ ລາວ ໃນຄັ້ງນີ້, ເຊິ່ງເປັນການປະກອບສ່ວນເຂົ້າໃນການຮັດແໜ້ນການພົວພັນຮ່ວມມື ລະຫວ່າງ ສປປ ລາວ ແລະ ສາມອົງການຈັດຕັ້ງສາກົນດັ່ງ ພ້ອມທັງສະແດງຄວາມໃຈ ຕໍ່ອົງການ FAO, ອົງການ WFP ແລະ ອົງການ IFAD ທີ່ໄດ້ໃຫ້ການສະໜັບສະໜູນ ຊ່ວຍເຫລືອແກ່ ສປປ ລາວ ໃນຫລາຍຂົງເຂດວຽກງານ ໂດຍສະເພາະວຽກງານການແກ້ໄຂຄວາມທຸກຍາກຂອງປະຊາຊົນ ແນໃສ່ປະກອບສ່ວນເຮັດໃຫ້ ສປປ ລາວ ຫລຸດພົ້ນອອກຈາກສະຖານະພາບປະເທດດ້ອຍພັດທະນາ ເທື່ອລະກ້າວ.
ໃນວັນດຽວກັນ ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ກໍໄດ້ໃຫ້ກຽດຕ້ອນຮັບ ທ່ານ ໂຮເຊ ກຣາເຊຍໂນ ດາຊິວວາ ຜູ້ອຳນວຍການໃຫຍ່ ອົງການ FAO, ທ່ານ ເດວິດ ບີສລີ ເລຂາບໍລິຫານງານ ອົງການ WFP, ທ່ານ ໂທມັດ ຣັດ ຫົວໜ້າອົງການ IFAD ປະຈຳ ສສ ຫວຽດນາມ ທັງເປັນຜູ້ຮັບຜິດ ຊອບ ປະຈຳ ສປປ ລາວ ເຊັ່ນດຽວກັນ.
ໃນໄລຍະຜ່ານມາ ສປປ ລາວ ໄດ້ຮັບການຊ່ວຍເຫລືອຈາກ 3 ອົງການດັ່ງກ່າວ ເປັນຕົ້ນ ອົງການ FAO ມີມູນຄ່າຫລາຍກວ່າ 52 ລ້ານໂດລາສະຫະລັດ, ອົງການ IFAD ມູນຄ່າ 47,6 ລ້ານໂດລາສະຫະລັດ ແລະ ອົງການ WFP ມູນຄ່າ 78 ລ້ານໂດລາສະຫະລັດ ເຊິ່ງບັນດາໂຄງການຊ່ວຍເຫລືອສ່ວນໃຫຍ່ ແມ່ນສຸມໃສ່ວຽກງານຄ້ຳປະກັນສະບຽງອາຫານ, ໂພສະນາການ ແລະ ສົ່ງເສີມກະສິກຳແບບຍືນຍົງ. ປັດຈຸບັນ ລັດຖະບານ ພວມສຸມໃສ່ການຈັດຕັ້ງປະຕິບັດ ແຜນພັດທະນາເສດ ຖະກິດ-ສັງຄົມ 5 ປີ ຄັ້ງທີ 8(2016-2020) ແລະ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ເຊິ່ງໜຶ່ງໃນເປົ້າໝາຍທີ່ສຳຄັນແມ່ນເພື່ອປັບປຸງຊີວິດການເປັນຢູ່ຂອງພໍ່ແມ່ປະຊາຊົນ ໃນຂອບເຂດທົ່ວປະເທດ ໃຫ້ນັບມື້ນັບດີຂຶ້ນເປັນກ້າວໆ ແລະ ນຳພາປະເທດຊາດຫລຸດພົ້ນອອກຈາກສະ ຖານະພາບປະເທດດ້ອຍພັດທະນາໃນອະນາຄົດ.
ການເດີນທາງມາຢ້ຽມຢາມຂອງຄະນະດັ່ງກ່າວ ໃນຄັ້ງນີ້ ຖືເປັນນິມິດໝາຍອັນໃໝ່ ແລະ ບາດກ້າວທີ່ສຳຄັນ ສະແດງໃຫ້ເຫັນເຖິງສາຍພົວພັນ ແລະ ການຮ່ວມມືທີ່ດີຂອງ ສປປ ລາວ ແລະ 3 ອົງການດັ່ງກ່າວໃນໄລຍະຜ່ານມາ, ພ້ອມນັ້ນ ທັງສອງຝ່າຍເຫັນດີເອກະພາບຈະສືບຕໍ່ຮ່ວມມືກັນໃນຕໍ່ໜ້າ ກໍຄືການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ ໄລຍະທີ 2 ແລະ ການລົບລ້າງໄພອຶດຫິວ ເຊິ່ງເປັນວຽກທີ່ຕິດພັນໂດຍກົງກັບບຸລິມະສິດ ແລະ ເປົ້າໝາຍ ຂອງທັງ 3 ອົງການ ໃຫ້ບັນລຸຕາມຄາດໝາຍ.
（ແຫຼ່ງຂໍ້ມູນ： ຂປລ）
