 |
ເພີ່ມທະວີການແກ້ໄຂສະພາບການເສື່ອມຖອຍດ້ານຄຸນທາດການເມືອງ ແລະ ຄຸນສົມບັດສິນທໍາປະຕິວັດຂອງສະມາຊິກພັກ-ພະນັກງານ
ບັນຫານີ້ກໍເປັນອີກໜຶ່ງບັນຫາສຳຄັນທີ່ຕ້ອງໄດ້ເລັ່ງແກ້ໄຂພາຍໃນພັກແຕ່ລະຂັ້ນເພື່ອເຮັດໃຫ້ການເຄື່ອນໄຫວຂອງສະມາຊິກພັກ-ພະນັກງານມີຄວາມໂປ່ງໃສ, ຊື່ສັດບໍລິສຸດ, ເປັນແບບຢ່າງທີ່ດີ-ນຳໜ້າປົກປ້ອງສິດຜົນປະໂຫຍດລວມໝູ່ນໍາໄປສູ່ການປັບປຸງຮາກຖານການເມືອງຂອງລະບອບປະຊາທິປະໄຕປະຊາຊົນໃຫ້ເຂັ້ມແຂງ ແລະ ໜັກແໜ້ນໄດ້ປະກົດຜົນເປັນຈິງ. ໃນໄລຍະຜ່ານມາ, ພັກ ປປ ລາວ ຍາມໃດກໍເຫັນໄດ້ຄວາມສຳຄັນຂອງຮາກຖານການເມືອງ ແລະ ກໍໄດ້ອອກມະຕິ, ຄຳສັ່ງຫຼາຍສະບັບກ່ຽວກັບການກໍ່ສ້າງ-ປັບປຸງຮາກຖານການເມືອງເປັນຕົ້ນແມ່ນມະຕິ 51/ກມສພ ເມື່ອປີ 1980, ມະຕິກອງປະຊຸມສູນກາງຄັ້ງທີ 6 ສະໄໝທີ IV ປີ 1988 ແລະ ຄັ້ງທີ 3 ສະໄໝ VIII ປີ 2006, ມະຕິເລກທີ 09/ກມສພ ປີ 2012, ມະຕິເລກທີ 25/ກມສພ ປີ 2014 ແລະ ອື່ນໆ. ມະຕິຄຳສັ່ງເຫຼົ່ານັ້ນໄດ້ກາຍເປັນແຜນນະໂຍບາຍພື້ນຖານຂອງພັກທັງເປັນບ່ອນອີງໃຫ້ແກ່ການກຳນົດບັນດາມາດຕະການຕົວຈິງກ່ຽວກັບການກໍ່ສ້າງ, ປັບປຸງຮາກຖານການເມືອງຕິດພັນກັບການພັດທະນາຊົນນະບົດຮອບດ້ານ ແລະ ການລຶບລ້າງ ຄວາມທຸກຍາກຂອງປະຊາຊົນ. ຜ່ານການຈັດຕັ້ງປະຕິບັດຕົວຈິງຢ່າງຕໍ່ເນື່ອງໄດ້ເຮັດໃຫ້ລະບົບການເມືອງຢູ່ຂັ້ນຮາກຖານໄດ້ຮັບການກໍ່ສ້າງ, ປັບປຸງຢ່າງເປັນລະບົບຕໍ່ເນື່ອງທັງໃນດ້ານການຈັດຕັ້ງກໍຄືການເຄື່ອນໄຫວຕາມພາລະບົດບາດແລະຂອບເຂດສິດຂອງແຕ່ລະການຈັດຕັ້ງ. ແນວໃດກໍຕາມ, ຄຽງຄູ່ກັບຜົນສຳເລັດກໍຍັງມີຈຸດອ່ອນຈຳນວນໜຶ່ງທີ່ຕ້ອງໄດ້ສືບຕໍ່ນຳພາ-ຊີ້ນຳແກ້ໄຂ, ຊຶ່ງໃນມະຕິ 056/ຄບສພ ກໍໄດ້ເນັ້ນວ່າ: “ບັນດາການຈັດຕັ້ງຮາກຖານ ພັກ ແລະ ອົງການມະຫາຊົນ ຢູ່ຮາກຖານສຳນັກງານອົງການໂດຍສະເພາະແມ່ນບັນດາອົງການຂອງລັດ ແລະ ລັດວິສາ ຫະກິດ ຍັງບໍ່ທັນສາມາດເສີມຂະຫຍາຍບົດບາດນຳພາອັນຕັ້ງໜ້າໃນການສຶກສາອົບຮົມການເມືອງ-ແນວຄິດ, ການ ຕິດຕາມ, ກວດກາກໍຄືການຄຸ້ມ ຄອງການເຄື່ອນໄຫວຂອງສະມາຊິກພັກ, ພະນັກງານ, ລັດຖະກອນຍັງບໍ່ທັນແຂງແຮງ, ເລິກເຊິ່ງ, ເຂັ້ມງວດ, ທ່າອ່ຽງເສື່ອມຖອຍດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນດຳລົງຊີວິດ, ຖືເບົາການຝຶກຝົນຕົນເອງ, ນຳໄປເຖິງປະກົດການສວຍໃຊ້ໜ້າທີ່ຕຳແໜ່ງ, ສໍ້ລາດບັງຫຼວງ ແລະ ລະເມີດສິດເປັນເຈົ້າຂອງປະຊາຊົນ”. ບັນຫາທີ່ກ່າວມາເທິງນັ້ນພວມເປັນບັນຫາໃຫຍ່, ເປັນໄພອັນຕະລາຍທີ່ທ້າທາຍຕໍ່ບົດບາດອິດທິພົນກໍຄືຄວາມສາມາດນຳພາ ແລະ ຄວາມເປັນແບບຢ່າງນຳໜ້າຂອງພັກ ປປ ລາວ .
ພັກ ປປ ລາວ ໄດ້ຢັ້ງຢືນວ່າ:“ບັນຫາທີ່ສັງຄົມເປັນຫ່ວງຫຼາຍທີ່ສຸດໃນປັດຈຸບັນນີ້ແມ່ນປະກົດການພະຍາດອາດຍາສິດ, ຫ່າງເຫີນຕົວຈິງ-ຮາກຖານ ແລະ ການລະເມີດສິດເປັນເຈົ້າຂອງປະຊາຊົນ, ສວຍໃຊ້ໜ້າທີ່ຕຳແໜ່ງ, ລະເມີດລະບຽບ-ກົດໝາຍ ແລະ ການສໍ້ລາດບັງຫຼວງທີ່ມີລັກສະນະຮ້າຍແຮງ, ແກ່ຍາວມາຫຼາຍປີທີ່ເກີດຂຶ້ນຢ່າງແຜ່ຫຼາຍໃນຖັນແຖວສະມາຊິກພັກ-ພະນັກງານຢູ່ທຸກລະດັບ, ມີທ່າອ່ຽງສັບສົນ, ແກ້ໄຂໄດ້ຍາກ, ບາງກໍລະນີເຈົ້າໜ້າທີ່ຂອງພັກ-ລັດຍັງກ່ຽວຂ້ອງໂດຍກົງກັບການຄ້າຂາຍເຖື່ອນ, ບັນຫາໄມ້, ຢາເສບຕິດ ແລະ ອື່ນໆ. ບັນຫານີ້ຜ່ານມາເຖິງວ່າໄດ້ມີການກວດກາແດ່ແລ້ວແຕ່ກໍຍັງບໍ່ທັນເລິກເຊິ່ງທົ່ວເຖິງ, ການແກ້ໄຂຜົນຂອງການກວດກາຍັງຊັກຊ້າ ຫຼື ບໍ່ທັນໄດ້ຮັບການແກ້ໄຂຢ່າງເຖິງຖອງ ແລະ ເດັດຂາດ, ຖັນແຖວສະມາຊິກພັກ - ພະນັກງານທີ່ເສຍທາດຂາດຄຸນຈຳນວນບໍ່ໜ້ອຍກໍບໍ່ໄດ້ຮັບການກວດກາລົງເລິກ ແລະ ແກ້ໄຂ ຕາມກົດລະບຽບຂອງພັກ ແລະ ກົດໝາຍທີ່ມີໄວ້ຢ່າງເດັດຂາດ, ເຂັ້ມງວດ ແລະ ທັນການ, ລັດຖະບານລາວກໍໄດ້ເປັນເອກະພາບກັນແລ້ວວ່າບັນຫາເຫຼົ່ານັ້ນນັບທັງບັນຫາສະພາບຫຍໍ້ທໍ້ຕ່າງໆທີ່ເກີດຂຶ້ນໃນຂົງເຂດເສດຖະກິດ-ການເງິນ ແລະ ຂົງເຂດ ອື່ນໆ ພວມເປັນບັນຫາໃຫຍ່, ເປັນໄພອັນຕະລາຍທີ່ທ້າທາຍຕໍ່ບົດບາດອິດທິພົນກໍຄືຄວາມ ສາມາດນຳພາ ແລະ ຄວາມເປັນແບບຢ່າງນຳໜ້າຂອງພັກ ປປ ລາວ ຊຶ່ງແນ່ນອນວ່າມັນເລັ່ງທວງໃຫ້ຄະນະພັກ, ຄະນະກວດກາແຕ່ລະຂັ້ນຕ້ອງສືບຕໍ່ເພີ່ມທະວີຄວາມຮັບຜິດຊອບນຳພາ-ຊີ້ ນຳຕໍ່ວຽກງານຕິດຕາມກວດກາ ໃຫ້ແທດເຖິງໜັກແໜ້ນ ແລະ ເຂັ້ມແຂງຢ່າງບໍ່ຢຸດຢັ້ງ”. ສະພາບຄວາມເປັນຈິງຂອງຮາກຖານການເມືອງໃນປັດຈຸບັນມີຄວາມຈຳເປັນພາວະວິໄສທີ່ຈະຕ້ອງໄດ້ຄົ້ນຄວ້າສະພາບການຈັດຕັ້ງປະຕິບັດວຽກງານດັ່ງກ່າວໃນໄລຍະຜ່ານມາ ແລະ ທິດທາງວຽກງານໃນຊຸມປີຕໍ່ໜ້າ, ເຮັດແນວໃດເພື່ອສືບຕໍ່ປັບປຸງລະບົບຮາກຖານການເມືອງຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນໄດ້ເທື່ອລະກ້າວ. ບັນຫາສຳຄັນໃນນີ້ແມ່ນສະພາບການເສື່ອມຖອຍດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດຂອງສະມາຊິກພັກ-ພະນັກງານທີ່ມີການເຄື່ອນໄຫວບໍ່ຖືກຕ້ອງ. ເມື່ອເວົ້າເຖິງຄຸນທາດການເມືອງ ແລະ ຄຸນສົມບັດສິນທຳ ປະຕິວັດຕ້ອງໄດ້ເຂົ້າໃຈຢ່າງເລິກເຊິ່ງຄວາມໝາຍຄວາມສຳຄັນຂອງມັນ. ຄຸນທາດການເມືອງແມ່ນອົງປະກອບອັນໜຶ່ງທີ່ສຳຄັນຢູ່ໃນຄຸນນະພາບຂອງສະມາຊິກພັກ-ພະນັກງານ, ແມ່ນມາດຖານແຖວໜ້າ ແລະ ຄວາມຮຽກຮ້ອງຕ້ອງການອັນເປັນພື້ນຖານທີ່ຂາດບໍ່ໄດ້ທັງເປັນພື້ນຖານໃຫ້ແກ່ການຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ ແລະ ການເຄື່ອນໄຫວປະຕິບັດໜ້າທີ່ວຽກງານປະຈຳວັນຂອງສະມາຊິກພັກ - ພະນັກງານ ຊຶ່ງເນື້ອແທ້ຂອງຄຸນທາດການເມືອງໝາຍເຖິງທັດສະນະຫຼັກໝັ້ນຊົນຊັ້ນ, ທັດສະນະມິດ-ສັດຕູ ແລະ ຄວາມເດັດດ່ຽວໜຽວແໜ້ນຕໍ່ອຸດົມການສັງຄົມນິຍົມ, ບໍ່ມີແນວຄິດຫຼາຍພັກ-ຫຼາຍເຄົ້າ, ຍາມໃດກໍມີຄວາມຕື່ນຕົວເປັນເຈົ້າການຮັບໃຊ້ຊົນຊັ້ນ, ຮັບໃຊ້ປະເທດ ຊາດ ແລະ ປະຊາຊົນດ້ວຍ ຄວາມຊື່ສັດບໍລິສຸດ.
ຄຸນສົມບັດສິນທຳປະຕິວັດແມ່ນພື້ນຖານຂອງສະຕິສັງຄົມຕິດພັນກັບການດຳລົງຊີວິດຂອງຄົນເຮົາຊຶ່ງສະແດງເຖິງຄວາມເຄົາລົບ, ຄວາມຈົງຮັກພັກດີ, ຄວາມບໍລິສຸດຜຸດຜ່ອງ, ອົດທົນຜ່ານຜ່າ ຕໍ່ອຸປະສັກຄວາມຫຍຸ້ງຍາກ, ດຸໝັ່ນ, ປະຢັດ ແລະ ທ່ຽງທຳ, ບໍ່ຫຼິ້ນກິນຟຸມເຟືອຍ, ບໍ່ສໍ້ລາດ ບັງຫຼວງ, ບໍ່ຖືປະໂຫຍດສ່ວນຕົວສູງກວ່າຜົນປະໂຫຍດສ່ວນລວມ, ມີຄວາມຊື່ສັດຕໍ່ປະເທດຊາດ, ຕໍ່ປະຊາຊົນ. ຈາກພຶດຕິກຳຕົວຈິງໃນ ການກໍ່ສ້າງ-ປັບປຸງຮາກຖານ ການເມືອງໃນໄລຍະຜ່ານມາໄດ້ພິສູດໃຫ້ເຫັນວ່າການທີ່ຈະ ເຮັດໃຫ້ພັກມີຮາກຖານການເມືອງເຂັ້ມແຂງ ແລະ ໜັກ ແໜ້ນໄດ້ນັ້ນ ກ່ອນອື່ນໝົດ ແມ່ນຕ້ອງແກ້ໄຂ ແລະ ປັບປຸງ ສະມາຊິກພັກໃນການປັບປຸງຕ້ອງເອົາໃຈໃສ່ດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດ ຊຶ່ງ ເປັນ ການສະແດງທາດແທ້ການປະພຶດຂອງສະມາຊິກພັກ-ພະນັກງານ. ພັກ ປປ ລາວ ຢືນຢັນສະເໝີິວ່າສະມາຊິກພັກພະນັກງານມີບົດບາດຕັດສິນຜົນໄດ້ຜົນເສຍຂອງການຈັດຕັ້ງປະຕິບັດແນວທາງ. ປະທານ ໄກສອນ ພົມວິຫານ ໄດ້ກ່າວ ວ່າ: “ແນວທາງ, ແຜນນະໂຍບາຍ ແລະ ນະໂຍບາຍຂອງພັກ ຈະຖືກຕ້ອງປານໃດກໍດີຖ້າພະນັກງານ, ສະມາຊິກພັກ ຫາກ ຂາດຄວາມຮູ້, ຄວາມສາມາດດ້ານຕ່າງໆ ເພື່ອນຳພາ ແລະ ຈັດຕັ້ງປະຕິບັດແລ້ວ, ແນວທາງ, ແຜນນະໂຍບາຍດັ່ງກ່າວກໍຈະດີພຽງແຕ່ຢູ່ໜ້າເຈ້ຍເທົ່ານັ້ນ”. ນອກນີ້, ຈາກພຶດຕິກຳແຫ່ງການນຳພາພັກ ປປ ລາວ ກໍໄດ້ຢືນຢັນວ່າ: “ແນວທາງ, ນະໂຍບາຍຂອງພັກເຖິງວ່າຈະຖືກຕ້ອງປານໃດກໍຕາມຖ້າພະນັກງານ, ສະມາຊິກພັກ ຫາກຂາດຄຸນທາດການເມືອງ, ຂາດຄວາມຮູ້, ຄວາມສາມາດໃນດ້ານຕ່າງໆແລ້ວແນວທາງ ນະໂຍບາຍດັ່ງກ່າວ ກໍຈະບໍ່ໄດ້ຮັບການຈັດຕັ້ງປະຕິບັດໃຫ້ເກີດດອກອອກຜົນ”. ອັນນີ້ກໍຊີ້ໃຫ້ເຫັນວ່າຖ້າຫາກສະມາຊິກ ພັກ-ພະນັກງານ ເສຍທາດຂາດຄຸນ, ເສື່ອມຖອຍດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດແລ້ວຈະກໍໃຫ້ເກີດໄພອັນຕະລາຍອັນໜັກໜ່ວງຕໍ່ການຜັນຂະຫຍາຍແນວທາງນະໂຍບາຍຂອງພັກ, ຕໍ່ຄວາມເຊື່ອໝັ້ນຂອງປະຊາຊົນໃນ ການຊີ້ນຳ-ນຳພາຂອງພັກເຮັດໃຫ້ຄວາມເຊື່ອໝັ້ນຕໍ່ເສັ້ນທາງກ້າວຂຶ້ນສັງຄົມນິຍົມຢູ່ປະເທດລາວມີທ່າອ່ຽງຫຼຸດລົງ ຈາກນັ້ນກໍສັ່ນຄອນເຖິງຫຼັກໝັ້ນອຸດົມການສັງຄົມນິຍົມ ແລະ ລັດທິ ມາກ-ເລນິນ. ເພື່ອເປັນການແກ້ໄຂສະພາບ ການ ເສື່ອມຖອຍດ້ານຄຸນທາດການເມືອງ ແລະ ຄຸນ ສົມບັດສິນທໍາປະຕິວັດ ຂອງ ສະມາຊິກພັກ - ພະນັກງານ ໄດ້ທັນການ, ແນໃສ່ການກໍ່ສ້າງ ແລະ ປັບປຸງຮາກຖານ ການເມືອງຂອງລະບອບປະຊາທິປະໄຕ ປະຊາຊົນ ໃຫ້ ເຂັ້ມແຂງ ແລະ ໜັກແໜ້ນ, ຊຶ່ງກ່ອນອື່ນຕ້ອງເພີ່ມທະວີ ຄວາມຮັບຜິດຊອບພາຍໃນ ພັກແຕ່ລະຂັ້ນ ໃຫ້ແທດເຖິງ ໜັກແໜ້ນ ແລະ ເຂັ້ມແຂງໃນ ການປະຕິບັດບາງວຽກງານທີ່ ສຳຄັນຄື:
ໜຶ່ງ. ຄະນະພັກຕ້ອງເລັ່ງ ສຶກສາອົບຮົມການເມືອງ - ແນວຄິດໃຫ້ບັນດາສະມາຊິກ ພັກ-ພະນັກງານ ເພື່ອເຮັດໃຫ້ ເຂົາເຈົ້າເຊື່ອມຊຶມ, ກຳແໜ້ນ ແລະ ຈັດຕັ້ງປະຕິບັດບັນດາ ແນວທາງ, ແຜນນະໂຍບາຍ ຂອງພັກ ແລະ ລະບຽບກົດໝາຍ ຂອງລັດ, ມີທັດສະນະຫຼັກໝັ້ນ ການເມືອງ, ມີຄວາມຈົງຮັກພັກດີ, ເອກະພາບຕໍ່ແນວທາງປ່ຽນ ແປງໃໝ່ ແລະ ອຸດົມການສັງຄົມ ນິຍົມທີ່ມີຫຼັກການຂອງພັກ, ຕ້ານແນວຄິດຫຼາຍພັກຫຼາຍເຄົ້າ, ເດັດດ່ຽວຕ້ານກົນອຸບາຍ ແລະ ການຫັນປ່ຽນໂດຍສັນຕິ ຂອງອິດທິກຳລັງປໍລະປັກພ້ອມ ທັງເປັນເຈົ້າການຈຳກັດການ ເສື່ອມຖອຍດ້ານແນວຄິດການເມືອງ, ເປັນແບບຢ່າງຝຶກຝົນ ຫຼໍ່ຫຼອມຕົນເອງ ທັງດ້ານແນວຄິດ ແລະ ຄຸນສົມບັດສິນທຳ ປະຕິວັດໄປພ້ອມໆກັບການຍົກສູງລະດັບຄວາມຮູ້, ຄວາມ ສາມາດທາງດ້ານທິດສະດີ, ວິຊາສະເພາະ ແລະ ຄວາມອາດສາມາດໃນການນຳໃຊ້ວັດຖຸເນັກນິກເຄື່ອງມືທັນສະໄໝ ຕ່າງໆ ເຂົ້າໃນວຽກງານຂອງຕົນ ຮັບຜິດຊອບ. ສອງ. ສະມາຊິກພັກຕ້ອງເພີ່ມທະວີການຕໍ່ສູ້ພາຍໃນ ການຈັດຕັ້ງພັກ ຍົກເປັນໜຶ່ງໃນ ໜ້າທີ່ຕົ້ນຕໍຂອງຈຸພັກ, ໜ່ວຍ ພັກ, ຮາກຖານພັກ ແມ່ນໝາຍ ເຖິງການຕຳນິສົ່ງຂ່າວຊຶ່ງກັນ ແລະ ກັນ ດ້ວຍຄວາມບໍລິສຸດ, ເອົາໃຈໃສ່ຍົກສູງຄຸນນະພາບ ການດຳເນີນຊີວິດຂອງຄະນະພັກ ແລະ ການຈັດຕັ້ງພັກ, ຍົກສູງຄຸນນະພາບການຕຳນິຕົນເອງ ແລະ ຕຳນິກໍ່ສ້າງກັນພາຍໃນພັກ, ຕີຖອຍແນວຄິດຈົ່ງຈຽມ ໂດຍບໍ່ກ້າເວົ້າບໍ່ກ້າຕຳນິກັນ ຊຶ່ງ ຕ້ອງເຂົ້າໃຈວ່າການຕຳນິສົ່ງ ຂ່າວກັນພາຍໃນພັກ ຍັງເປັນ ການເຕືອນສະຕິໃຫ້ສະມາຊິກ ພັກໄດ້ຄໍານຶງເຖິງທຸກບາດກ້າວ ການເຄື່ອນໄຫວຂອງຕົນ ຊຶ່ງສະມາຊິກພັກ ລ້ວນແຕ່ພົວພັນຢ່າງສະໜິດແໜ້ນກັບການທົດ ສອບໃນໜ້າທີ່ການເມືອງ ກໍຄື ການເຄື່ອນໄຫວດຳລົງຊີວິດ ປະຈຳວັນ, ຕ້ອງເຮັດໃຫ້ການ ຈັດຕັ້ງຂອງພັກແຕ່ລະຂັ້ນ, ໜ່ວຍພັກ ແລະ ສະມາຊິກ ພັກ ເຫັນໄດ້ເຖິງຄວາມຈຳເປັນພາວະວິໄສທີ່ຈະຕ້ອງໄດ້ເລັ່ງ ແກ້ໄຂສະພາບ ການເສື່ອມຖອຍດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດ ຂອງສະມາຊິກພັກ-ພະນັກງານ ເລັ່ງໃສ່ເພື່ອເຮັດໃຫ້ພັກເຮົາ ເຂັ້ມແຂງ.
ສາມ. ຕ້ອງເອົາໃຈໃສ່ເປັນ ພິເສດໃນການດຳເນີນຕິດຕາມ ກວດກາພາຍໃນພັກ, ຍົກສູງ ນໍ້າໃຈຮັບຜິດຊອບຕໍ່ປະເທດຊາດ, ຕໍ່ພັກ ແລະ ຕໍ່ປະຊາຊົນ, ເດັດດ່ຽວຕ້ານພະຍາດອາດຍາສິດ, ແກ້ໄຂບັນຫາສະມາຊິກພັກ-ພະນັກງານ ທີ່ຂາດຄວາມ ຮັບຜິດຊອບ, ບຸກຄົນເສື່ອມຄຸນປ່ຽນທາດ, ສໍ້ລາດບັງຫຼວງ, ຫຼິ້ນກິນຟຸມເຟືອມ, ເວົ້າບໍ່ໄປຄ່ຽງຄູ່ ກັບການປະຕິບັດຊຶ່ງຕ້ອງໄດ້ ອອກແຮງສຶກສາອົບຮົມ ໃຫ້ ມີແນວຄິດຮັກຊາດ, ແນວຄິດ ລວມໝູ່ ແລະ ແນວຄິດສັງຄົມນິຍົມເພື່ອຕີຖອຍແນວຄິດບູຊາ ເງິນເປັນພະເຈົ້າ, ມັກສະໜຸກ, ແນວຄິດເອກະຊົນເຫັນແກ່ຕົວ, ຕີຖອຍການເສື່ອມຖອຍດ້ານ ການເມືອງ-ແນວຄິດ, ການປ່ຽນທາດຂາດຄຸນພາຍໃນພັກຄຽງຄູ່ກັບການສະກັດກັ້ນ ແລະ ຕີຖອຍການບິດເບືອນຫັນປ່ຽນ ໂດຍສັນຕິຂອງພວກອິດທິກຳລັງປໍລະປັກ, ຕ້ອງມີຄວາມເດັດ ຂາດເຂັ້ມງວດໃນການແກ້ໄຂບັນຫາບໍ່ໃຫ້ມີທ່າອ່ຽງອ່ອນແລ້ວແທງແຂງແລ້ວເວັ້ນຊຶ່ງຕ້ອງໄດ້ເຮັດແທ້ທຳຈິງປະຕິບັດ ລະບຽບວິໄນຕໍ່ສະມາຊິກພັກພະນັກງານ ທີ່ຝ່າຝືນລະບຽບ ກົດໝາຍ ກໍຄືມາດຖານຄຸນສົມບັດ, ແບບແຜນດຳລົງຊີວິດຂອງພະນັກງານປະຕິວັດ. ສີ່. ຕ້ອງຍົກສູງຄວາມເປັນ ຈິງໃນການຈັດແບ່ງປະເພດຂອງສະມາຊິກພັກ ຈຶ່ງຈະຮັບ ປະກັນໄດ້ວ່າໜ່ວຍພັກປອດໃສ, ໜັກແໜ້ນ ແລະ ເຂັ້ມແຂງແທ້. ການແບ່ງປະເພດແບບຜິວເຜີນບໍ່ມີລັກສະນະຕົວຈິງມັນເຮັດໃຫ້ການຈັດຕັ້ງຮາກຖານພັກ ສູນເສຍລັກສະນະ ຕໍ່ສູ້ ພາໃຫ້ຜູ້ທີ່ດີໝົດກຳລັງໃຈ, ຫຼົງລືມ, ຂາດສະຕິ ແລະ ຂາດ ຄຸນສົມບັດສິນທຳປະຕິວັດ, ນໍ້າໃຈເສຍສະຫຼະເພື່ອຊາດ ແລະ ເພື່ອປະຊາຊົນ ກໍຫຼຸດ ໜ້ອຍຖອຍລົງ ໃນທີ່ສຸດຮາກຖານພັກກໍອ່ອນແອ. ຍ້ອນແນວນັ້ນການຍົກສູງຄວາມເປັນຈິງ ໃນການຈັດແບ່ງປະເພດຂອງ ສະມາຊິກພັກ ຈຶ່ງມີບົດບາດ ສຳຄັນໃນການແກ້ໄຂສະພາບການເສື່ອມຖອຍດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດຂອງສະມາຊິກພັກ-ພະນັກງານ.
（ແຫຼ່ງຂໍ້ມູນ： pasaxon.org.la）
