| ທີມບານເຕະຫວຽດນາມ ຕັ້ງໜ້າຝຶກແອບຢູ່ UAE | |
| ໜັງສືພິມ UAE: ຫວຽດນາມແມ່ນຈຸດພົ້ນເດັ່ນຂອງການເຕີບໂຕເສດຖະກິດ ຍ້ອນການຄວບຄຸມ COVID-19 ຢ່າງສຳເລັດຜົນ |
 |
| ພາບ: Vneconomy |
ທ່ານເອກອັກຄະລັດຖະທູດ ຫງວຽນແມັງຕວັນ ໃຫ້ຮູ້ວ່າ UAE ແມ່ນໜຶ່ງໃນບັນດາຄູ່ຮ່ວມມືເສດຖະກິດໃຫຍ່ຂອງ ຫວຽດນາມ, ເປັນຕົ້ນແມ່ນດ້ານການຄ້າ. ປັດຈຸບັນ UAE ແມ່ນຄູ່ຮ່ວມມືທາງການຄ້າ ໃຫຍ່ທີ່ສຸດ ຂອງ ຫວຽດນາມ ຢູ່ເຂດຕາເວັນອອກກາງ.
ວົງເງິນການຄ້າສອງສົ້ນປະຈຳປີ ບັນລຸເກືອບ 6 ຕື້ USD. ສອງປະເທດພວມສູ້ຊົນຍົກວົງເງິນການຄ້າສອງສົ້ນ ຂຶ້ນເຖິງ 10 ຕື້ USD.
ສິນຄ້າສົ່ງອອກໄປຍັງ UAE ແມ່ນຜະລິດຕະພັນກະເສດ, ສິນໃນນ້ຳ, ໝາກໄມ້ສົດ, ສະບຽງອາຫານປຸງແຕ່ງ, ວັດຖຸອຸປະກອນກໍ່ສ້າງ, ໂທລະສັບມືຖື, ເຄື່ອງຈັກ, ເຄື່ອງອາໄຫຼ່, ເຄື່ອງເອເລັກໂຕນິກ, ຕ່ຳແຜ່ນຕັດຫຍິບ, ເກີບໜັງ, ຜະລິດຕະພັນຈາກໄມ້ ເປັນຕົ້ນ.
ຄວາມຕ້ອງການນຳເຂົ້າຂອງ UAE ແມ່ນຫຼາຍຮູບຫຼາຍແບບ, ພິເສດແມ່ນບັນດາສິນຄ້າປະເພດທີ່ເປັນທ່າແຮງຂອງ ຫວຽດນາມ ຄື: ໂທລະສັບ, ເຄື່ອງເອເລັກໂຕນິກ, ເຄື່ອງອາໄຫຼ່ເອເລັກໂຕນິກ, ເຄື່ອງໃຊ້ສອຍ, ຜະລິດຕະພັນກະເສດ, ປ່າໄມ້, ສິນໃນນ້ຳ.
UAE ມີມາດຕະຖານສິນຄ້ານຳເຂົ້າທີ່ເໝາະສົມກັບ ຫວຽດນາມ, ມີຕະຫຼາດໃຊ້ສອຍທີ່ກ້ວາງໃຫຍ່ (ພາຍໃນປະເທດ, ບັນດາປະເທດ GCC, ອາບຟຼິກກາ, ອາເມລິກາໃຕ້.)
ລັດຖະບານ UAEໄດ້ຜັນຂະຫຍາຍຫຼາຍນະໂຍບາຍພິເສດບຸລິມະສິດເພື່ອດຶງດູດການລົງທຶນ, ການຄ້າຕ່າງປະເທດ. ບັນດາລະບຽບການດຳເນີນທຸລະກິດໄດ້ຫັນເປັນລະບຽບການຢູ່ລະດັບງ່າຍດາຍທີ່ສຸດ, ຍິ່ງໄປກ່ວານັ້ນແມ່ນຢູ່ບາງພາກພື້ນການຄ້າເສລີ, ລະບຽບການໃນການສ້າງບໍລິສັດເສຍເວລາພຽງແຕ່ 1 ວັນ.
ເພື່ອຍູ້ແຮງການສົ່ງອອກໄປຍັງ UAE, ບັນດາວິສາຫະກິດ ຫວຽດນາມ ຕ້ອງເອົາໃຈໃສ່ວ່າ ບັນດາຜະລິດຕະພັນຕ້ອງຕອບສະໜອງໄດ້ມາດຕະຖານສະບຽງອາຫານ Halah. ໂດຍແມ່ນປະເທດອິດສະລາມ, UAE ໄດ້ ແລະ ພວມນຳໃຊ້ຂໍ້ກຳນົດກ່ຽວກັບສະບຽງອາຫານ, ສິນໃນນ້ຳປະເພດຕ່າງໆ ທີ່ນຳເຂົ້າ UAE ຕ້ອງໄດ້ຮັບໃບຢັ້ງຢືນແມ່ນ ສະບຽງອາຫານ Halal (ນັບແຕ່ເດືອນມິຖຸນາ 2014).
ແຕ່ດົນນານມາແລ້ວ, ວິສາຫະກິດ ຫວຽດນາມ ສ່ວນຫຼາຍແມ່ນສົ່ງອອກວັດຖຸດິບ, ເມື່ອນຳເຂົ້າຕະຫຼາດສ່ວນຫຼາຍແມ່ນມີຍີ່ຫໍ້ຕ່າງປະເທດ, ຍັງບໍ່ທັນມີຍີ່ຫໍ້ສະເພາະຂອງຕົນ. ຕາມຄວາມຈິງແລ້ວ, ຢູ່ UAE ໄດ້ມີການປ່ຽນແປງຫຼາຍແລ້ວ. ຖ້າວິສາຫະກິດ ຫວຽດນາມ ຍັງສືບຕໍ່ວິທີການດັ່ງກ່າວ ຈະຖືກເສຍປຽບ ແລະ ມີຂໍ້ຈຳກັດຫຼາຍຢ່າງ.
ທ່ານເອກອັກຄະລັດຖະທູດ ຫງວຽນແມັງຕວັນ ຖືວ່າ ເພື່ອດຳເນີນທຸລະກິດປະສົບຜົນສຳເລັດຢູ່ ຕະຫຼາດ UAE, ບັນດາວິສາຫະກິດ ຫວຽດນາມ ຕ້ອງເຂົ້າໃຈຢ່າງຖືກຕ້ອງກ່ຽວກັບສາສະໜາ, ພາສາ ແລະ ວັດທະນະທຳໃນການດຳເນີນທຸລະກິດຂອງ ຊາວອາຣັບ, ເຂົ້າໃຈຢ່າງຈະແຈ້ງກ່ຽວກັບຕະຫຼາດກໍ່ຄືບັນດາບັນຫາລະອຽດອ່ອນ ກ່ຽວກັບສາສະໜາ ແລະ ວັດທະນະທຳການໃຊ້ຈ່າຍ, ຕອບສະໜອງໄດ້ບັນດາມາດຕະຖານກ່ຽວກັບການຫຸ້ມຫໍ່ຜະລິດຕະພັນ ແລະ ການໂຄສະນາຂອງເຂົາເຈົ້າ.
ເມື່ອຮ່ວມມືກັບບັນດາຄູ່ຮ່ວມມືຢູ່ UAE ຕ້ອງກຳແໜ້ນກົດໝາຍ, ຂໍ້ກຳນົດຂອງປະເທດປະຈຳຖິ່ນ,ວັດທະນະທຳ, ຮີດຄອງປະເພນີ ຂອງປະຊາຄົມນັກທຸລະກິດ (ແມ່ນບັນດາຊາວຕ່າງປະເທດ ທີ່ພວມທຳມາຫາກິນຢູ່ UAE).
ຕ້ອງເປີດຫ້ອງການຕາງໜ້າ, ສາຂາ ແລະ ສ້າງຕັ້ງບໍລິສັດຢູ່ UAE ເພື່ອຍາດແຍ່ງບັນດານະໂຍບາຍບຸລິມະສິດຂອງລັດຖະບານ UAE ທີ່ສະຫງວນໃຫ້ແກ່ວິສາຫະກິດຕ່າງປະເທດ, ພ້ອມທັງເປີດກ້ວາງການສຳຜັດກັບຕະຫຼາດ ແລະ ຫຼຸດຜ່ອນບັນດາຄ່າທຳນຽບຕ່າງໆ.
ບຸນຄົງ
