| ສະເໜີໂຄງການ ການນໍາຂັ້ນສູງແມ່ນໍ້າຂອງ - ສະຫະລັດອາເມລິກາ | |
| ອາເມລິກາ ສະໜັບສະໜູນ ຫວຽດນາມ ໃຫ້ມີຄວາມເຂັ້ມແຂງ, ເປັນເອກະລາດ ແລະ ຈະເລີນຮຸ່ງເຮືອງ, ມີບົດບາດສຳຄັນໃນພາກພື້ນ |
ຕອນເຊົ້າວັນທີ 25 ສິງຫາ, ຢູ່ທຳນຽບປະທານປະເທດ, ທ່ານນາງຮອງປະທານປະເທດ ວໍ້ຖິແອັງຊວນ ໄດ້ເປັນປະທານພິທີຕ້ອນຮັບ ທ່ານນາງຮອງປະທານາທິບໍດີ ອາເມລິກາ Kamala Harris ໃນການຢ້ຽມຢາມຫວຽດນາມຢ່າງເປັນທາງການ ແຕ່ວັນທີ 24 ຫາວັນທີ 26 ສິງຫາ.
ທ່ານນາງ Harris ສະແດງຄວາມເປັນກຽດທີ່ໄດ້ເປັນຮອງປະທານາທິບໍດີສະຫະລັດອາເມລິກາ ຄົນທຳອິດທີ່ມາຢ້ຽມຢາມຫວຽດນາມ ແລະ ສະແດງຄວາມຂອບໃຈການນຳ ແລະ ປະຊາຊົນຫວຽດນາມ ທີ່ໄດ້ໃຫ້ການຕ້ອນຮັບຢ່າງພິຖີພິຖັນ ແລະ ຖືເປັນສຳຄັນຍິ່ງ.
 |
| ທ່ານນາງຮອງປະທານາທິບໍດີ ອາເມລິກາ Kamala Harris ແລະ ທ່ານປະທານປະເທດ ຫງວຽນຊວນຟຸກ. ພາບ:TTXVN |
ທ່ານນາງຮອງປະທານາທິບໍດີ ອາເມລິກາ ໄດ້ຢືນຢັນຄືນວ່າ ສະຫະລັດອາເມລິກາ ໄດ້ສະໜັບສະໜູນ ຫວຽດນາມທີ່ເປັນປະເທດເຂັ້ມແຂງ, ເປັນເອກະລາດ ແລະ ວັດທະນາຖາວອນ, ສືບຕໍ່ປ່ຽນແປງໃໝ່, ເປີດກວ້າງການເຊື່ອມໂຍງເຂົ້າກັບສາກົນ ແລະ ຮັບດຳລົງບົດບາດນັບມື້ນັບສໍາຄັນໃນອາຊຽນ ແລະ ພາກພື້ນ.
ໃນການຕ້ອນຮັບທ່ານນາງ Kamala Harris ຫຼັງຈາກນັ້ນ, ທ່ານປະທານປະເທດ ຫງວຽນຊວນຟຸກ ຢືນຢັນວ່າ ຫວຽດນາມປະຕິບັດນະໂຍບາຍການຕ່າງປະເທດທີ່ເປັນເອກະລາດ ແລະ ເປັນເຈົ້າຕົນເອງຢ່າງສະເໝີຕົ້ນສະເໝີປາຍ ແລະ ພ້ອມແລ້ວທີ່ຈະເປັນຄູ່ຮ່ວມມືທີ່ໜ້າໄວ້ໃຈ, ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະໂລກ.
ທ່ານປະທານປະເທດ ປາດຖະໜາວ່າ ຫວຽດນາມ ແລະ ອາເມລິກາ ຈະສືບຕໍ່ເພີ່ມທະວີການພົວພັນຄູ່ຮ່ວມມືຮອບດ້ານໃຫ້ນັບມື້ນັບເຂົ້າສູ່ລວງເລິກ, ມີປະສິດທິຜົນ, ໝັ້ນແກ່ນ ແລະ ຕ່າງຝ່າຍຕ່າງມີຜົນປະໂຫຍດ, ບົນພື້ນຖານຫຼັກການເຄົາລົບເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ, ລະບອບຂອງກັນແລະກັນ, ເພື່ອສັນຕິພາບ, ສະຖຽນລະພາບ ແລະ ການຮ່ວມມືພັດທະນາຢູ່ພາກພື້ນ ແລະ ໃນໂລກ.
ທ່ານນາງຮອງປະທານາທິບໍດີອາເມລິກາ ໄດ້ຕີລາຄາສູງຄວາມມານະພະຍາຍາມຂອງຫວຽດນາມ ໃນການຄວບຄຸມໂລກລະບາດ COVID-19 ແລະ ຢັ້ງຢືນຄືນຄຳໝັ້ນສັນຍາຂອງອາເມລິກາ ທີ່ຈະສືບຕໍ່ໜູນຊ່ວຍຫວຽດນາມໃນການຍູ້ໂລກລະບາດໃຫ້ຖອຍໄປ.
 |
| ທ່ານນາງຮອງປະທານປະເທດ ວໍ້ຖິແອັງຊວນ ໄດ້ເປັນປະທານພິທີຕ້ອນຮັບ ທ່ານນາງຮອງປະທານາທິບໍດີ ອາເມລິກາ Kamala Harris. ພາບ:TTXVN |
ທີ່ການພົບປະໂອ້ລົມກັບທ່ານນາຍົກລັດຖະມົນຕີ ຟ້າມມິງຈິງ, ທ່ານນາງຮອງປະທານາທິບໍດີອາເມລິກາ ໄດ້ແຈ້ງຂ່າວໃຫ້ທ່ານນາຍົກລັດຖະມົນຕີ ຟ້າມມິງຈິງ ຊາບວ່າ ອາເມລິກາ ໄດ້ສະຫງວນວັກຊີນ Pfizer ໜຶ່ງລ້ານໂດສມອບໃຫ້ແກ່ຫວຽດນາມ.
ຕອນບ່າຍມື້ນີ້ (25 ສິງຫາ), ທ່ານນາງ Harris ໄດ້ເຂົ້າຮ່ວມພິທີເປີດ ຫ້ອງການ ຂອງ ສູນປ້ອງກັນ ສະກັດກັ້ນ ແລະ ຄວບຄຸມໂລກພະຍາດອາເມລິກາ (CDC) ພາກພື້ນອາຊີຕາເວັນອອກສ່ຽງໃຕ້ ທີ່ຮ່າໂນ້ຍ ດ້ວຍຮູບການອອນລາຍ ແລະ ເປັນສັກຂີພະຍານໃນພິທີເຊັນສັນຍາການເຊົ່າທີ່ດິນ ສໍາລັບໂຄງການກໍ່ສ້າງສະຖານທູດສະຫະລັດອາເມລິກາ ຫຼັງໃໝ່.
ຄຳຮຸ່ງ
