 |
| ພາບປະກອບ: vnexpress.net |
ສະມາຄົມຕັດຫຍິບ ແລະ ເກີບໜັງ ອາເມລິກາ (AAFA) ຫາກໍ່ຮຽກຮ້ອງໃຫ້ລັດຖະບານ ອາເມລິກາ ສົ່ງວັກຊິນໃຫ້ແກ່ ຫວຽດນາມ ຕື່ມອີກເພື່ອຮັກສາລະບົບສະໜອງ ໃນ 2 ຂົງເຂດ ຕ່ຳແຜ່ນຕັດຫຍິບ ແລະ ເກີບໜັງ. ວັນທີ 27 ກໍລະກົດ, ທ່ານປະທານ ທັງເປັນຜູ້ອຳນວຍການບໍລິຫານຂອງ AAFA Steve Lamar ໄດ້ສົ່ງຈົດໝາຍ 2 ສະບັບໄປຍັງທ່ານປະທານາທິບໍດີ ອາເມລິກາ Joe Biden ແລະ ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ. AAFA ຕາງໜ້າໃຫ້ແກ່ບັນດາ ຍິ່ຫໍ້ແຟຊັນທົ່ວໂລກ ຄື Adidas, Gap... ຮຽກຮ້ອງໃຫ້ລັດຖະບານ ອາເມລິກາ ສົ່ງວັກຊິນໃຫ້ ຫວຽດນາມ ຕື່ມອີກ, ລວມມີວັກຊິນ AstraZeneca ຈາກສາງສຳຮອງ.
ຕາມທ່ານ Steve Lamar ແລ້ວ, ການກະທຳນີ້ ບໍ່ພຽງແຕ່ກູ້ເອົາຊີວິດໃຫ້ແກ່ຫຼາຍລ້ານຄົນເທົ່ານັ້ນ ຫາກຍັງຊຸກຍູ້ການຟື້ນຟູພື້ນຖານເສດຖະກິດ ອາເມລິກາ ນຳອີກ.
ນອກຈາກ ວັກຊິນ, ຜູ້ຕາງໜ້າໃຫ້ແກ່ບັນດາວິສາຫະກິດຕ່ຳແຜ່ນຕັດຫຍິບ, ເກີບໜັງ ອາເມລິກາ ກໍ່ຮຽກຮ້ອງໃຫ້ລັດຖະບານ ອາເມລິກາ ມອບອຸປະກອນການວິໄຈຫາເຊື້ອ ແລະ PPE ທີ່ໄດ້ຮັບການມອບສິດນຳໃຊ້ໂດຍດ່ວນຂອງ ອາເມລິກາ (EUA) ອະນຸມັດ.
“ຜົນງານຂອງຂະແໜງຕ່ຳແຜ່ນຕັດຫຍິບ, ເກີບໜັງ ອາເມລິກາ, ດ້ວຍກຳມະກອນ ອາເມລິກາ ກ່ວາ 3 ລ້ານຄົນ ພວມອີງໃສ່ໂດຍກົງເຂົ້າບັນດານັກສະໜອງໃນທົ່ວໂລກ. ຫວຽດນາມ ແມ່ນນັກສະໜອງເຄື່ອງຕ່ຳແຜ່ນຕັດຫຍິບ, ເກີບໜັງ ໃຫຍ່ທີ 2 ໃຫ້ແກ່ຕະຫຼາດ ອາເມລິກາ, ກວມເອົາ 20% ຍອດຈຳນວນສິນຄ້ານຳເຂົ້າຂອງປະເທດນີ້. ຫວຽດນາມ ໄດ້ກາຍເປັນນັກສະໜອງຫຼັກສຳລັບບັນດາວັດຖຸດິບທີ່ສຳຄັນໃຫ້ແກ່ຂະແໜງຜະລິດເກີບໜັງຂອງ ອາເມລິກາ. ດັ່ງນັ້ນ, ຜົນສຳເລັດຂອງພວກຂ້າພະເຈົ້າແມ່ນອີງໃສ່ກຳລັງແຮງຂອງຂະແໜງອຸດສາຫະກຳ ຫວຽດນາມ ໂດຍກົງ”, ທ່ານ Steve Lamar ກ່າວ.
ໃນຈົດໝາຍທ່ານ Steve Lamar ໃຫ້ຮູ້ວ່າ: ບັນດາວິສາຫະກິດສະໜອງຂອງບັນດາຂະແໜງນີ້ ມັກສຸມໃສ່ບັນດາແຂວງທາງພາກໃຕ້, ອ້ອມຂ້າງ ນະຄອນໂຮ່ຈີມິນ, ດ້ວຍກຳລັງແຮງງານປະມານ 4 ລ້ານຄົນ, ວົງເງິນການສົ່ງອອກ ປະມານ 40 ຕື້ USD/ປີ. ປັດຈຸບັນ ບັນດາແຂວງນີ້ິ້ ພວມຖືກຜົນກະທົບຢ່າງໜັກໜ່ວງຈາກໂລກລະບາດໂຄວິດ - 19 ຮອບທີ 4.
“ບໍ່ມີວັກຊິນ ກໍ່ຈະບໍ່ມີວິທີໃດເພື່ອໃຫ້ຜູ້ອອກແຮງງານກັບຄືນເຮັດວຽກຢ່າງປອດໄພ”, ທ່ານ Steve Lamar ເນັ້ນໜັກ. ສິ່ງນີ້ອາດຈະພາໄປເຖິງບັນດາຜົນເສຍທີ່ບໍ່ໜ້າຈະເກີດກ່ຽວກັບຊີວິດອິນຊີ ແລະ ເຮັດໃຫ້ຊາວກຳມະກອນນັບພັນໆຄົນ ເຊິ່ງເປັນຜູ້ປະກອບສ່ວນໃຫ້ແກ່ພື້ນຖານເສດຖະກິດ ຫວຽດນາມ ແລະ ອາເມລິກາ ປະເຊີນໜ້າກັບສິ່ງທ້າທາຍຫຼາຍຢ່າງ ເມື່ອບັນດາວິສຫາກິດຕ້ອງຢຸດຕິການເຄື່ອນໄຫວ.
ໃນຈົດໝາຍສົ່ງໄປຍັງທ່ານນາຍົກລັດຖະມົນຕີ ຟ້າມມິງຈິງ, ທ່ານ Steve Lamar ເວົ້າວ່າ: ວິສາຫະກິດ ອາເມລິກາ ຫວັງວ່າ ທ່ານນາຍົກລັດຖະມົນຕີ ຈະບຸລິມະສິດແຈກຢາຍວັກຊິນໃຫ້ແກ່ບັນດາຂະແໜງຕັດຫຍິບ, ເກີບໜັງ, ພິເສດແມ່ນຢູ່ພາກໃຕ້, ໂດຍເປັນສະຖານທີ່ເກີດໂລກລະບາດໂຄວິດ - 19 ທີ່ພວມມີການຜັນແປຢ່າງສັບສົນ ເພື່ອແນໃສ່ຮັບປະກັນໃຫ້ຜູ້ອອກແຮງງານໃນບັນດາຂະແໜງນີ້ ສາມາດຜະລິດ ແລະ ຂົນສົ່ງສິນຄ້າຢ່າງປອດໄພ, ປະກອບສ່ວນເຂົ້າໃນການພັດທະນາຂອງ ເສດຖະກິດ ຫວຽດນາມ.
ບຸນຄົງ
