 |
| ທ່ານຮອງລັດຖະມົນຕີກະຊວງສາທາລະນະສຸກ ລົງກວດກາວຽກງານປ້ອງກັນ, ຕ້ານໂລກລະບາດໂຄວິດ - 19 ຢູ່ ວິງລອງ (ພາບ: TTXVN) |
ຕໍ່ໜ້າການຜັນແປຢ່າງສັບສົນຂອງໂລກລະບາດໂຄວິດ - 19, ຕອນບ່າຍວັນທີ 14 ກໍລະກົດ, ຄະນະປະຕິບັດງານຂອງ ກະຊວງສາທາລະນະສຸກ ໂດຍທ່ານ ໂດຊວັນຕວຽນ, ຮອງລັດຖະມົນຕີກະຊວງສາທາລະນະສຸກ ຫວຽດນາມ, ຮອງຫົວໜ້າຄະນະຊີ້ນຳແຫ່ງຊາດກ່ຽວກັບການປ້ອງກັນ, ຕ້ານໂລກລະບາດໂຄວິດ - 19 ເປັນຫົວໜ້າຄະນະ, ມາກວດກາວຽກງານປ້ອງກັນ, ຕ້ານໂລກລະບາດໂຄວິດ - 19 ຢູ່ແຂວງ ວິງລອງ. ນີ້ແມ່ນໜຶ່ງໃນບັນດາແຂວງ ທີ່ກວດພົບຜູ້ຕິດເຊື້ອພະຍາດໂຄວິດ - 19 ຫຼາຍທີ່ສຸດໃນຊຸມຊົນ.
ທ່ານຮອງລັດຖະມົນຕີ ໂດຊວັນຕວຽນ ໄດ້ແນະນຳທ້ອງຖິ່ນໂດຍກົງ ໃຫ້ຂັ້ນຕອນຄວບຄຸມໂລກລະບາດຢູ່ບ່ອນທີ່ຖືກປິດເຂດວ່າ ໃນເບື້ອງຕົ້ນ ແມ່ນຕ້ອງປິດເຂດໃນວົງກ້ວາງ, ພາຍຫຼັງກວດກາ, ຕີລາຄາໂລກລະບາດ, ເອົາຕົວຢາງວິໄຈຫາເຊື້ອແລ້ວ ຈະຮັດແຄບເຂົ້າ. ພ້ອມທັງ, ຍູ້ແຮງການເຜີຍແຜ່ໂຄສະນາການປະຕິບັດບັນດາມາດຕະການປ້ອງກັນ, ຕ້ານໂລກລະບາດໂຄວິດ - 19 ໃນເຂດແຍກຕົວ, ປິດເມືອງ, ດຳເນີນການພົ່ນຢາຂ້າເຊື້ອຢູ່ບັນດາຄອບຄົວທີ່ມີຜູ້ຕິດເຊື້ອ, ຜູ້ສຳຜັດໃກ້ກັບຜູ້ຕິດເຊື້ອ, ຮຽກຮ້ອງຕ້ອງແບ່ງວຽກງານຄວາມຮັບຜິດຊອບຢ່າງລະອຽດ ໃຫ້ແກ່ຜູ້ປະຕິບັດງານຢູ່ບັນດາປ້ອມຄວບຄຸມຂອງເຂດຖືກປິດ; ບັນດາກຸ່ມຮັບຜິດຊອບວຽກງານ Covid – 19 ໃນຊຸມຊົນ ຕ້ອງເພີ່ມທະວີການກວດກາ, ຕິດຕາມກວດກາຢ່າງຕໍ່ເນື່ອງ, ເອົາໃຈໃສ່ເປັນພິເສດເຖິງການຮັບປະກັນເຄື່ອງໃຊ້ທີ່ຈຳເປັນໃຫ້ແກ່ປະຊາຊົນໃນເຂດຖືກປິດ, ແຍກຫ່າງໃນສັງຄົມ.
ເມື່ອລົງກວດກາຢູ່ເຂດແຍກຕົວລວມໝູ່ ເຊິ່ງເປັນສະຖານທີ່ພວມແຍກຕົວຜູ້ສຳຜັດໃກ້ກັບຜູ້ຕິດເຊື້ອ 193 ຄົນ, ທ່ານຮອງລັດຖະມົນຕີ ໄດ້ເນັ້ນວ່າ ຄະນະບໍລິຫານເຂດແຍກຕົວຕ້ອງປະຕິບັດຂັ້ນຕອນແຍກຕົວຢ່າງເຂັ້ມງວດ, ເອົາໃຈໃສ່ຕໍ່ການຄວບຄຸມບັນດາເປົ້າໝາຍແຍກຕົວໃຫ້ເປັນຢາງດີ, ປະຕິບັດການຂ້າເຊື້ອຢ່າງເປັນປະຈຳ, ຕິດຕາມກວດກາຢ່າງເຄັ່ງຄັດ, ບໍ່ປະໃຫ້ເກີດການຕິດເຊື້ອຕໍ່ກັນໃນເຂດແຍກຕົວ.
vovworld.vn
