ສະພາວິຊາຊີບນັກບັນຊີ – ນັກກວດສອບ ສະເໜີເຂົ້າເປັນສະມາຊິກສະຫະພັນນັກບັນຊີສາກົນ

14:09 | 30/04/2019

ຄະນະບໍລິຫານງານສະພາວິຊາຊີບນັກບັນຊີ ແລະ ນັກກວດສອບ ເພື່ອບັນລຸເປົ້າໝາຍຍຸດທະສາດສ້າງຄຸນນະພາບວິຊາຊີບການບັນຊີໃຫ້ເປັນທີ່ເຊື່ອຖືໄດ້ລະດັບພາກພື້ນ ແລະ ສາກົນ ເຊິ່ງປັດຈຸບັນກຳລັງຍື່ນເອກະສານເຂົ້າເປັນສະມາຊິກສະຫະພັນນັກບັນຊີສາກົນ ( IFAC ).ກອງປະຊຸມສະຫຼຸບການເຄື່ອນໄຫວ ປະຈຳປີ 2018 ແລະ ທິດທາງເຄື່ອນໄຫວວຽກປີ 2019 ຂອງສະພາວິຊາຊີບນັກບັນຊີ ແລະ ນັກກວດສອບ ຈັດຂຶ້ນໃນວັນທີ 26 ເມສາ 2019 ຜ່ານມາ ທີ່ໂຮງແຮມວຽງຈັນ ແກຣນ ໂດຍການເຂົ້າຮ່ວມຂອງ ທ່ານ ນາງທິບພະກອນ ຈັນທະວົງສາ ຮອງລັດຖະມົນຕີ ກະຊວງການເງິນ ພ້ອມດ້ວຍຄະນະບໍລິຫານສະພາວິຊາຊີບ ແລະ ສະມາຊິກເຂົ້າຮ່ວມ.

ສະພາວິຊາຊີບນັກບັນຊີ – ນັກກວດສອບ ສະເໜີເຂົ້າເປັນສະມາຊິກສະຫະພັນນັກບັນຊີສາກົນ

ທ່ານ ນາງ ພິລານີ ພິດສະໄໝ ປະທານສະພາວິຊາຊີບນັກບັນຊີ ແລະ ນັກກວດສອບ.

ທ່ານ ນາງ ພິລານີ ພິດສະໄໝ ປະທານສະພາວິຊາຊີບນັກບັນຊີ ແລະ ນັກກວດສອບ ກ່າວວ່າສະພາວິຊາຊີບນັກບັນຊີໄດ້ໃຫ້ຄວາມສຳຄັນໃນເລື່ອງການພັດທະນາບຸກຄະລາກອນ ແລະ ຫຼັກສູດການຮຽນ – ການສອນ ແລະ ຈັນຍາບັນຕ່າງໆເພື່ອໃຫ້ເປັນທີ່ເຊື່ອໝັ້ນໃນລະດັບພາກພື້ນ ແລະ ສາກົນເທື່ອລະກ້າວ

ໂດຍສະເພາະໃນຍຸກຂອງການເຊື່ອມໂຍງ ປັດຈຸບັນສະພາວິຊາຊີບນັກບັນຊີໄດ້ຍື່ນເອກະສານໃນທ້າຍປີ 2018 ເພື່ອສະໝັກເປັນສະມາຊິກສົມທົບຂອງສະຫະພັນນັກບັນຊີສາກົນ ( IFAC ) ເບື້ອງຕົ້ນມີຄວາມເປັນໄປໄດ້ສູງທີ່ ( IFAC ) ຈະຮັບເຂົ້າເປັນສະມາຊິກ ເນື່ອງຈາກມີຄວາມພ້ອມຫຼາຍດ້ານ ແລະ ເອກະສານກໍເຫັນວ່າຄົບຖ້ວນຕາມເງື່ອນໄຂທີ່ ( IFAC ) ກໍານົດ.

ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ ກ່າວວ່າ: ການປັບປຸງຄຸນນະພາບວິຊາຊີບການບັນຊີຂອງລາວເປັນທີ່ຮັບຮູ້ຈາກສາກົນເທື່ອລະກ້າວ ເຊິ່ງໄດ້ສະແດງໃຫ້ເຫັນຜ່ານການຖືກຮັບຮູ້ຂັ້ນເບື້ອງຕົ້ນຈາກການປະເມີນເອກະສານສະໝັກເປັນສະມາຊິກສົມທົບຂອງສະຫະພັນນັກບັນຊີສາກົນ ປັດຈຸບັນໃນອາຊຽນຍັງເຫຼືອພຽງແຕ່ ລາວ ແລະ ມຽນມາ ທີ່ຍັງບໍ່ທັນເຂົ້າເປັນສະມາຊິກ.

ສິ່ງທີ່ສະພານັກບັນຊີຈະຕ້ອງໄດ້ສືບຕໍ່ຢ່າງແຂງແຮງ ຄື: ສ້າງນັກຊ່ຽວຊານບັນຊີທີ່ມີຄຸນນະພາບໃຫ້ຫຼາຍຂຶ້ນ ເພື່ອປະກອບສ່ວນໃນການສ້າງຂໍ້ມູນ – ຂ່າວສານການບັນຊີໃຫ້ເປັນທີ່ໜ້າເຊື່ອຖື ແລະ ຊ່ວຍໃນການໃຫ້ຄຳປຶກສາຫາລືແກ່ຫົວໜ່ວຍເສດຖະກິດຕ່າງໆໃຫ້ສາມາດພັດທະນາຕົນໃນສະພາບເສດຖະກິດໃນປັັດຈຸບັນ ແລະ ອະນາຄົດທີ່ມີການເຊື່ອມໂຍງໃນພາກພື້ນ ແລະ ສາກົນ.

（ແຫຼ່ງຂໍ້ມູນ： ABC LAOS NEWS）