ຫວິງລອງ ຂະຫຍາຍການຮ່ວມມືກັບສິງກະໂປ ແລະ ຍີ່ປຸ່ນ

ສຸມໃສ່ການລົງທຶນ ແລະ ກະສິກຳເຕັກໂນໂລຊີສູງ

ຕາມບົດລາຍງານເລກທີ 271-BC/TU ຂອງຄະນະພັກແຂວງຫວິງລອງ, ແຜນການຮັບຕ້ອນຄະນະຜູ້ແທນຕ່າງປະເທດ ແລະ ການສົ່ງຄະນະອອກໄປປະຕິບັດວຽກຢູ່ຕ່າງປະເທດ ປະຈຳປີ 2026 ໄດ້ຖືກກະກຽມຕັ້ງແຕ່ທ້າຍປີ 2025. ແຜນການດັ່ງກ່າວໃຫ້ບຸລິມະສິດແກ່ບັນດາຕະຫຼາດ ແລະ ຄູ່ຮ່ວມມືທີ່ມີທ່າແຮງດ້ານການຄ້າ ແລະ ການລົງທຶນ.

ໃນໄລຍະ 6 ເດືອນຕົ້ນປີ, ບັນດາກິດຈະກຳການຕ່າງປະເທດໄດ້ດຳເນີນຕາມຄວາມຄືບໜ້າທີ່ກຳນົດໄວ້. ສຳລັບການເດີນທາງນອກແຜນການ, ແຂວງໄດ້ຄວບຄຸມຢ່າງເຂັ້ມງວດ ແລະ ພິຈາລະນາຈັດຕັ້ງສະເພາະກໍລະນີທີ່ມີຄວາມຈຳເປັນແທ້ຈິງເທົ່ານັ້ນ.

ກິດຈະກຳທີ່ໂດດເດັ່ນແມ່ນການເດີນທາງໄປສິງກະໂປຂອງຄະນະຜູ້ແທນແຂວງ ນຳໂດຍສະຫາຍນາງ ໂຮ່ທິຮວ່າງອຽນ, ກຳມະການສູນກາງພັກ, ຮອງເລຂາຜູ້ປະຈຳຄະນະພັກແຂວງ, ເພື່ອຢ້ຽມຢາມ ແລະ ເຮັດວຽກກັບກຸ່ມບໍລິສັດ Sembcorp.

ຜ່ານການພົບປະ, ການນຳແຂວງຫວິງລອງ ແລະ ຝ່າຍສິງກະໂປໄດ້ແລກປ່ຽນ ແລະ ເຫັນດີຕໍ່ບັນດາເນື້ອໃນຮ່ວມມື ເພື່ອຜັນຂະຫຍາຍໂຄງການເຂດອຸດສາຫະກຳແປຮູບກະສິກຳເຕັກໂນໂລຊີສູງ ຫວຽດນາມ - ສິງກະໂປ ຢູ່ຫວິງລອງ. ໂຄງການນີ້ສອດຄ່ອງກັບທິດທາງບຸລິມະສິດຂອງແຂວງໃນການພັດທະນາກະສິກຳທັນສະໄໝ ແລະ ດຶງດູດທຶນລົງທຶນ.

ສ່ວນຢູ່ຍີ່ປຸ່ນ, ຄະນະຜູ້ແທນນຳໂດຍສະຫາຍ ເຈິ່ນຈີກວາງ, ຮອງເລຂາພັກແຂວງ, ປະທານຄະນະປະຊາຊົນແຂວງ, ໄດ້ດຳເນີນກິດຈະກຳສົ່ງເສີມການລົງທຶນຢູ່ແຂວງ Niigata ໃນທ້າຍເດືອນມິຖຸນາ 2026.

ການເດີນທາງຄັ້ງນີ້ສຸມໃສ່ການຊຸກຍູ້ຄວາມຮ່ວມມື ແລະ ຊັກຊວນການລົງທຶນໃນຂົງເຂດອຸດສາຫະກຳແປຮູບ, ກະສິກຳເຕັກໂນໂລຊີສູງ, ໂລຈິສຕິກ ແລະ ການຄ້າ.

ທ່ານ ເຈິ່ນຈີກວາງ, ປະທານຄະນະປະຊາຊົນແຂວງ ຫວິງລອງ ແລະ ບັນດາວິສາຫະກິດແຂວງ Niigata ມອບຂອງຂວັນ ແລະ ຖ່າຍຮູບເປັນທີ່ລະນຶກ ໃນໂອກາດການເດີນທາງໄປປະຕິບັດວຽກຢູ່ແຂວງ ນີງາຕະ ໃນທ້າຍເດືອນ 6 ປີ 2026.

ນອກຈາກສິງກະໂປ ແລະ ຍີ່ປຸ່ນແລ້ວ, ແຂວງຫວິງລອງຍັງໃຫ້ຄວາມສຳຄັນຕໍ່ການຮັກສາມິດຕະພາບກັບບັນດາທ້ອງຖິ່ນກຳປູເຈຍ. ຄະນະຜູ້ແທນນຳໂດຍສະຫາຍ ຫງວຽນກຸຍງທ້ຽນ, ຮອງປະທານຄະນະປະຊາຊົນແຂວງ, ໄດ້ເດີນທາງໄປຢ້ຽມຢາມ ແລະ ອວຍພອນບຸນປີໃໝ່ປະເພນີ ໂຈນຈະນຳທະເມ ປີ 2026 ຕໍ່ການນຳແຂວງກຳປົງສະປື, ບັນເຕຍເມັນໄຈ ແລະ ບັດຕຳບອງ.

ການຢ້ຽມຢາມດັ່ງກ່າວໄດ້ປະກອບສ່ວນຮັດແໜ້ນສາຍພົວພັນມິດຕະພາບລະຫວ່າງຫວິງລອງກັບບັນດາທ້ອງຖິ່ນຂອງປະເທດເພື່ອນບ້ານ.

ພ້ອມກັນນັ້ນ, ໃນໄລຍະ 6 ເດືອນຕົ້ນປີ, ການນຳແຂວງໄດ້ພົບປະເຮັດວຽກກັບບັນດາກຸ່ມບໍລິສັດໃຫຍ່ ເຊັ່ນ Sembcorp Industries ຂອງສິງກະໂປ, FBH Media ຂອງ ສ.ເກົາຫຼີ, Donacoop ແລະ VinaCapital, ເພື່ອຊັກຊວນບັນດາໂຄງການລົງທຶນຂະໜາດໃຫຍ່ ແລະ ນຳໃຊ້ເຕັກໂນໂລຊີສູງ.

ເສີມສ້າງຄູ່ຮ່ວມມືກັບ Ehime ແລະ ອົງການສາກົນ

ໃນດ້ານການຕ້ອນຮັບຄະນະຜູ້ແທນຕ່າງປະເທດ, ຫວິງລອງໄດ້ຕ້ອນຮັບຄະນະຜູ້ແທນຂັ້ນທ້ອງຖິ່ນ 3 ຄະນະ ໃນ 6 ເດືອນຕົ້ນປີ 2026. ໃນນັ້ນ, ມີຄະນະຜູ້ແທນແຂວງ Ehime ຂອງຍີ່ປຸ່ນ ນຳໂດຍເຈົ້າແຂວງ ເດີນທາງມາຢ້ຽມຢາມ, ເຮັດວຽກ ແລະ ສຳຫຼວດບັນດາວິສາຫະກິດຢູ່ທ້ອງຖິ່ນ.

ວັນທີ 12 ມັງກອນ 2026, ຄະນະປະຊາຊົນແຂວງຫວິງລອງ ແລະ ອົງການປົກຄອງແຂວງ Ehime ໄດ້ລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານເສດຖະກິດ. ເນື້ອໃນການຮ່ວມມືຄວບຄຸມຂົງເຂດການຄ້າ, ອຸດສາຫະກຳ, ການລົງທຶນ, ເຕັກໂນໂລຊີ, ປັນຍາປະດິດ (AI) ແລະ ການຝຶກອົບຮົມຊັບພະຍາກອນມະນຸດ.

ສອງຝ່າຍຍັງເຫັນດີທີ່ຈະເພີ່ມທະວີການແລກປ່ຽນຂໍ້ມູນ ແລະ ສ້າງໂອກາດທາງທຸລະກິດ, ຜ່ານການຈັດກິດຈະກຳພົບປະວິສາຫະກິດ, ກອງປະຊຸມເຊື່ອມໂຍງການຄ້າ ແລະ ສຳມະນາແນະນຳເຕັກໂນໂລຊີ. ນອກຈາກນັ້ນ, ທັງສອງທ້ອງຖິ່ນຍັງຈະຮ່ວມມືດ້ານການສົ່ງ ແລະ ຮັບແຮງງານ ລວມທັງນັກຝຶກງານດ້ານທັກສະ.

ສ່ວນອີກ 2 ຄະນະຜູ້ແທນຂັ້ນທ້ອງຖິ່ນ ທີ່ຫວິງລອງໄດ້ຕ້ອນຮັບ ແມ່ນຄະນະຈາກແຂວງກຳປົງສະປື ແລະ ບັນເຕຍເມັນໄຈ ຂອງກຳປູເຈຍ, ເຊິ່ງໄດ້ເດີນທາງມາຢ້ຽມຢາມ ແລະ ອວຍພອນເນື່ອງໃນບຸນປີໃໝ່ປະເພນີຫວຽດນາມ ປີ 2026.

ນອກຈາກນັ້ນ, ແຕ່ວັນທີ 4-5 ກຸມພາ 2026, ຄະນະຜູ້ແທນຈາກກົມພັດທະນາ ສັງກັດກະຊວງປ້ອງກັນຊາດກຳປູເຈຍ ໄດ້ມາຢ້ຽມຢາມ ແລະ ອວຍພອນກອງບັນຊາການທະຫານແຂວງຫວິງລອງ.

ໃນຂະນະດຽວກັນ, ການນຳແຂວງຍັງໄດ້ພົບປະເຮັດວຽກກັບບັນດາອົງການຜູ້ແທນການທູດ, ອົງການສາກົນ ແລະ ວິສາຫະກິດຕ່າງປະເທດ ຈາກອິນເດຍ, ເນເທີແລນ, ເບລາຣຸສ, ຈີນ, ສ.ເກົາຫຼີ, ຍີ່ປຸ່ນ ແລະ ສະຫະລັດ.

ແຂວງຍັງໄດ້ຕ້ອນຮັບ ແລະ ເຮັດວຽກກັບອົງການ IFAD, KOICA, JICA ແລະ AFD ເພື່ອຊອກຫາໂອກາດໃນການຮ່ວມມື ແລະ ການລົງທຶນ.

ສຳລັບການຮ່ວມມືຂັ້ນຂະແໜງການ, ວັນທີ 4 ກຸມພາ 2026, ພະແນກການເງິນແຂວງຫວິງລອງ ໄດ້ລົງນາມບົດບັນທຶກຄວາມເຂົ້າໃຈກັບບໍລິສັດ FBH Media Company ຂອງ ສ.ເກົາຫຼີ.

ຕາມເນື້ອໃນທີ່ຕົກລົງກັນ, ພາຍໃນ 6 ເດືອນນັບແຕ່ວັນລົງນາມ, ສອງຝ່າຍຈະປະສານງານໃນການສະໜອງຂໍ້ມູນທີ່ດິນ; ພິຈາລະນາເລືອກຮູບແບບການພັດທະນາດ້ວຍຕົນເອງ ຫຼື ການຮ່ວມທຶນ; ກຳນົດຂະໜາດການລົງທຶນ, ແຜນເບີກຈ່າຍທຶນ, ໂຄງສ້າງການເງິນ ແລະ ຄວາມຄືບໜ້າການດຳເນີນງານ ພ້ອມທັງບັນດາເງື່ອນໄຂໃນການນຳໃຊ້ຊັບສິນທາງປັນຍາ (IP).

ຮອດເວລາລາຍງານ, ພະແນກການເງິນໄດ້ສະໜອງຄຳແນະນຳ, ເອກະສານ ແລະ ຕອບບັນດາຂໍ້ສອບຖາມຕາມຂໍ້ສະເໜີຂອງບໍລິສັດ.

ເລັ່ງຜັນຂະຫຍາຍຂໍ້ຕົກລົງສູ່ການປະຕິບັດ

ຕາມການປະເມີນຂອງແຂວງຫວິງລອງ, ວຽກງານຈັດຄະນະອອກໄປປະຕິບັດວຽກຕ່າງປະເທດໄດ້ດຳເນີນຢ່າງຫ້າວຫັນ, ຮັດກຸມ ແລະ ຖືກຕ້ອງຕາມລະບຽບການ. ເນື້ອໃນການເດີນທາງແມ່ນສຸມໃສ່ການສົ່ງເສີມການລົງທຶນ ແລະ ການຮ່ວມມືພັດທະນາກະສິກຳເຕັກໂນໂລຊີສູງ.

ແຂວງໄດ້ປັບຫຼຸດຈຳນວນສະມາຊິກໃນແຕ່ລະຄະນະ ແລະ ຫຍໍ້ໄລຍະເວລາປະຕິບັດວຽກໃຫ້ເໝາະສົມ, ເພື່ອປະຢັດງົບປະມານ ແລະ ຍົກສູງປະສິດທິຜົນ. ນັບແຕ່ຂັ້ນກະກຽມຈົນເຖິງການຈັດຕັ້ງປະຕິບັດ, ແຂວງໄດ້ປະສານງານຢ່າງໃກ້ຊິດກັບກະຊວງການຕ່າງປະເທດ ແລະ ບັນດາອົງການຜູ້ແທນຫວຽດນາມປະຈຳຕ່າງປະເທດ, ໂດຍບໍ່ມີກໍລະນີລະເມີດເກີດຂຶ້ນ.

ແນວໃດກໍຕາມ, ແຂວງຍອມຮັບວ່າ ການຜັນຂະຫຍາຍຂໍ້ຕົກລົງຮ່ວມມືສາກົນບາງສະບັບທີ່ໄດ້ລົງນາມແລ້ວ ຍັງບໍ່ບັນລຸຄວາມຄືບໜ້າຕາມທີ່ຄາດໝາຍໄວ້.

ນອກຈາກນັ້ນ, ຈຳນວນພະນັກງານທີ່ຮັບຜິດຊອບວຽກງານການຕ່າງປະເທດຍັງຈຳກັດ; ຄວາມສາມາດດ້ານພາສາຕ່າງປະເທດ ແລະ ທັກສະການຕ່າງປະເທດຂອງພະນັກງານບາງສ່ວນຍັງບໍ່ສະເໝີກັນ. ໂດຍສະເພາະ, ທ້ອງຖິ່ນຍັງຂາດບຸກຄະລາກອນຊ່ຽວຊານດ້ານການທູດເສດຖະກິດ, ສົນທິສັນຍາ ແລະ ຂໍ້ຕົກລົງສາກົນ ລວມທັງວຽກງານແປພາສາ.

ໃນ 6 ເດືອນທ້າຍປີ 2026, ຫວິງລອງກຳນົດຈະສືບຕໍ່ຂະຫຍາຍສາຍພົວພັນກັບບັນດາຄູ່ຮ່ວມມືສາກົນ ແລະ ເລັ່ງນຳເນື້ອໃນທີ່ໄດ້ຕົກລົງກັນໄປສູ່ການປະຕິບັດໃຫ້ເກີດຜົນ.

ແຂວງສະເໜີໃຫ້ກະຊວງການຕ່າງປະເທດ ແລະ ບັນດາອົງການຜູ້ແທນຫວຽດນາມປະຈຳຕ່າງປະເທດ ສືບຕໍ່ສະໜອງຂໍ້ມູນ, ຊ່ວຍເຊື່ອມໂຍງກັບວິສາຫະກິດ, ນັກລົງທຶນ ແລະ ຄູ່ຮ່ວມມືສາກົນ; ພ້ອມທັງຮັກສາການຈັດສຳມະນາ ແລະ ກອງປະຊຸມສົ່ງເສີມການລົງທຶນ.

ຄຽງຄູ່ກັນນັ້ນ, ຫວິງລອງຍັງສະເໜີໃຫ້ຈັດຫຼັກສູດຝຶກອົບຮົມກ່ຽວກັບການເຈລະຈາສາກົນ, ພິທີການທູດ, ການຮັບມືວິກິດການ, ການສື່ສານຕ່າງປະເທດ ແລະ ພາສາຕ່າງປະເທດສະເພາະດ້ານ.

ພ້ອມກັນນັ້ນ, ແຂວງສະເໜີໃຫ້ບັນດາອົງການທີ່ມີອຳນາດເລັ່ງອອກຄຳແນະນຳຕໍ່ບັນດາບັນຫາທີ່ຍັງຄ້າງຄາ ແລະ ຈັດການຝຶກອົບຮົມຕາມຫົວຂໍ້ສະເພາະ, ເພື່ອໃຫ້ວຽກງານຄຸ້ມຄອງການຕ່າງປະເທດມີຄວາມເປັນເອກະພາບ, ຮັດກຸມ ແລະ ມີປະສິດທິຜົນສູງຂຶ້ນ.

ຊຸກຍູ້ສາຍພົວພັນມິດຕະພາບ, ການຮ່ວມມືທະວິພາຄີ ຫວຽດນາມ - ຍີ່ປຸ່ນ ຍສໝ - ທ່ານ Koizumi Shinjiro, ລັດຖະມົນຕີກະຊວງປ້ອງກັນປະເທດ ຍີ່ປຸ່ນ ໄດ້ເນັ້ນໜັກວ່າ ການຢ້ຽມຢາມຂອງທ່ານພົນເອກ ຟານວັນຢາງ ແມ່ນຂີດໝາຍການຢ້ຽມຢາມ ຍີ່ປຸ່ນ ຄັ້ງທຳອິດ ຂອງທ່ານລັດຖະມົນຕີກະຊວງປ້ອງກັນປະເທດ ຫວຽດນາມ ພາຍຫຼັງໄລຍະເວລາ 5 ປີ.

VJCE ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບ ຫວຽດນາມ - ຍີ່ປຸ່ນ ຍສໝ - ວັນທີ 18 ກໍລະກົດ, ສູນຊຸກຍູ້ການຮ່ວມມືທາງດ້ານວັດທະນະທຳ ແລະ ການສຶກສາ ຫວຽດນາມ - ຍີ່ປຸ່ນ (VJCE) ໄດ້ເປີດໂຕຫ້ອງການຜູ້ຕາງໜ້າຢູ່ທີ່ຮາໂນ້ຍ ຢ່າງເປັນທາງການ, ເຊິ່ງເປັນການເປີດສາກໄລຍະໃໝ່ ພາຍໃນການເຄື່ອນໄຫວເຊື່ອມຕໍ່ທາງດ້ານການສຶກສາ, ວັດທະນະທຳ ແລະ ການພົບປະແລກປ່ຽນລະຫວ່າງປະຊາຊົນ ລະຫວ່າງ ຫວຽດນາມ ແລະ ຍີ່ປຸ່ນ.