ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຊົມ ເຊີຍຕໍ່ ທ່ານ ຫງວຽນ ດັງ ຮຸ່ງ
ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຊົມ ເຊີຍຕໍ່ ທ່ານ ຫງວຽນ ດັງ ຮຸ່ງ ທີ່ໄດ້ຮັບການແຕ່ງຕັ້ງ ໃຫ້ມາດຳລົງຕຳແໜ່ງ ເປັນກົງສຸນໃຫຍ່ ຄົນໃໝ່ ແຫ່ງ ສສ.ຫວຽດນາມ ປະຈຳ ແຂວງຫລວງພະບາງ ຂອງ ສປປ ລາວ ແລະ ຮັບຜິດຊອບ 8 ແຂວງພາກເໜືອຂອງລາວ, ຊຶ່ງຈະເປັນການປະກອບສ່ວນອັນສຳຄັນໃນການພັດທະນາ ແລະ ຮັດແໜ້ນການພົວພັນຮ່ວມມື ລະຫວ່າງບັນດາແຂວງ ພາກເໜືອຂອງລາວ ກັບບັນດາແຂວງຂອງ ສສ.ຫວຽດນາມ ໃຫ້ນັບມື້ນັບແໜ້ນແຟ້ນຍິ່ງຂຶ້ນ. ພ້ອມດຽວກັນນີ້, ທ່ານຮອງລັດຖະມົນຕີ ກໍ່ສະແດງຄວາມຂອບໃຈ ແລະ ຕີລາຄາສູງ ຕໍ່ການຊ່ວຍເຫລືອອັນລໍ້າຄ່າ ຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ ໃຫ້ແກ່ ພັກ, ລັດ ແລະ ປະຊາຊົນລາວ ຕະຫລອດໄລຍະຜ່ານມາ ແລະ ສະເໜີໃຫ້ມີການສືບຕໍ່ຊຸກຍູ້ ບັນດາແຂວງຂອງຫວຽດນາມ ໃຫ້ການຮ່ວມມື ແລະ ສະໜັບສະໜູນ ໃນລະດັບທ້ອງຖິ່ນຂອງ ສປປ ລາວ, ໂດຍສະເພາະແມ່ນບັນດາແຂວງຂອງຫວຽດນາມ ທີ່ເປັນແຂວງແຮກສ່ຽວ ກັບແຂວງຫລວງພະບາງ (ແຂວງກວ່າງນິງ, ແຂວງຖາຍຫງວຽນ, ແຂວງເຊີນລາ ແລະ ນະຄອນໂຮ່ຈິມິງ). ສອງຝ່າຍ ຍັງໄດ້ຕີລາຄາສູງ ຕໍ່ຜົນສຳເລັດຂອງກອງປະຊຸມ ປຶກສາຫາລື ດ້ານການເມືອງ ປະຈຳປີ 2019 ລະຫວ່າງ ສອງກະຊວງການຕ່າງປະເທດ ແລະ ກອງປະຊຸມຄະນະກຳມະການຮ່ວມມືທະວີພາຄີ ລະຫວ່າງ ສອງລັດຖະບານ ລາວ-ຫວຽດນາມ ຄັ້ງທີ 42 ຊຶ່ງເປັນເຫດການທີ່ພົ້ນເດັ່ນ ພ້ອມທັງເປັນການເປີດສັງກາດ ໃໝ່ໃຫ້ແກ່ການຮ່ວມມືສອງຝ່າຍໃນຕໍ່ໜ້າ. ພ້ອມນີ້, ທ່ານ ທອງສະຫວັນ ພົມວິຫານ ຍັງໄດ້ສະແດງຄວາມເຊື່ອໝັ້ນວ່າ ທ່ານ ຫງວຽນ ດັງ ຮຸ່ງ ຈະສືບຕໍ່ເອົາໃຈໃສ່ເຕົ້າໂຮມຄວາມສາມັກຄີ ຊາວຫວຽດ ນາມ ທີ່ກຳລັງດຳລົງຊີວິດ ແລະ ທຳມາຫາກິນຢູ່ບັນດາ ແຂວງພາກເໜືອຂອງລາວ ໂດຍສະເພາະແມ່ນຢູ່ແຂວງຫລວງພະບາງ ໃຫ້ສືບຕໍ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ກໍ່ຄື ການຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ລັດ, ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບໄດ້ຮັບການພັດທະນາຂຶ້ນສູ່ບາດກ້າວອັນໃໝ່. ໃນໂອກາດດຽວກັນ, ທ່ານ ຫງວຽນ ດັງ ຮຸ່ງ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອົບອຸ່ນຂອງ ທ່ານ ທອງສະຫວັນ ພົມວິຫານ ແລະ ສະແດງຄວາມຂອບໃຈມາຍັງລັດຖະບານ ແຫ່ງ ສປ ປ ລາວ ທີ່ໄດ້ອະນຸມັດໃຫ້ທ່ານ ມາປະຕິບັດໜ້າທີ່ຢູ່ ສປປ ລາວ, ພ້ອມທັງຢືນຢັນຈະສືບຕໍ່ເພີ່ມທະວີຊຸກຍູ້ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະ ຫວ່າງສອງປະເທດ ລາວ-ຫວຽດນາມ ໃຫ້ນັບມື້ຈະເລີນ ງອກງາມຂຶ້ນເລື້ອຍໆ.
（ແຫຼ່ງຂໍ້ມູນ： ຂປລ）
