ຫວຽດນາມ - ສ.ເກົາຫຼີ ເປີດກວ້າງການຮ່ວມມືດ້ານ AI ແລະ ເຕັກໂນໂລຊີເຄິ່ງຊັກນຳໄຟຟ້າ

ກອງປະຊຸມໄດ້ດຶງດູດຜູ້ແທນຫຼາຍກວ່າ 400 ຄົນ ເຂົ້າຮ່ວມ, ໃນນັ້ນມີຜູ້ຕາງໜ້າຈາກວິສາຫະກິດດ້ານເຄິ່ງຊັກນຳໄຟຟ້າຫຼາຍກວ່າ 50 ແຫ່ງ, ບັນດາສະຖາບັນຄົ້ນຄວ້າ, ມະຫາວິທະຍາໄລ ແລະ ທ້ອງຖິ່ນຂອງສອງປະເທດ.

ບັນດາຂໍ້ຕົກລົງທີ່ໄດ້ລົງນາມມີເປົ້າໝາຍເພື່ອຂຸດຄົ້ນຈຸດແຂງຂອງຫວຽດນາມ ແລະ ສ.ເກົາຫຼີ, ຊຸກຍູ້ການຄົ້ນຄວ້າປະຍຸກໃຊ້, ການນຳຜະລິດຕະພັນເຂົ້າສູ່ຕະຫຼາດການຄ້າ ແລະ ສ້າງໂອກາດເພີ່ມເຕີມໃນການເຂົ້າເຖິງຕະຫຼາດ.

ຫວຽດນາມ ແລະ ສ.ເກົາຫຼີ ໄດ້ລົງນາມໃນຂໍ້ຕົກລົງ 8 ສະບັບ ເພື່ອເພີ່ມທະວີການຮ່ວມມືດ້ານເຕັກໂນໂລຊີ ແລະ ເຊື່ອມໂຍງຕ່ອງໂສ້ສະໜອງລະຫວ່າງສອງປະເທດ.

ກ່າວຄຳເຫັນໃນກອງປະຊຸມ, ທ່ານ ເຈິ່ນ ຈຸງ ຕິ໊ງ, ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ໄດ້ຕີລາຄາວ່າ ສ.ເກົາຫຼີ ເປັນຄູ່ຮ່ວມມືສຳຄັນ ທີ່ມີຈຸດແຂງຫຼາຍດ້ານໃນຂົງເຂດປັນຍາປະດິດ (AI) ແລະ ເຕັກໂນໂລຊີເຄິ່ງຊັກນຳໄຟຟ້າ.

ຕາມທ່ານຮອງລັດຖະມົນຕີແລ້ວ, ຫວຽດນາມປາຖະໜາຢາກຫັນຈາກກິດຈະກຳຮ່ວມມືແບບດັ້ງເດີມ ໄປສູ່ການຮ່ວມກັນຄົ້ນຄວ້າ, ອອກແບບຊິບ, ພັດທະນາຮູບແບບ ແລະ ວິທີແກ້ໄຂດ້ານ AI, ສ້າງຜະລິດຕະພັນ ແລະ ເປີດກວ້າງຕະຫຼາດ. ຂະບວນການຮ່ວມມືຕ້ອງຕິດພັນກັບການຖ່າຍທອດເຕັກໂນໂລຊີ ແລະ ການຍົກສູງມູນຄ່າເພີ່ມຢູ່ຫວຽດນາມ.

ທ່ານຍັງສະເໜີໃຫ້ເອົາໃຈໃສ່ການຝຶກອົບຮົມບຸກຄະລາກອນໃນໄລຍະຍາວ ເພື່ອຕອບສະໜອງຄວາມຕ້ອງການຕົວຈິງຂອງວິສາຫະກິດ, ພ້ອມທັງສ້າງລະບົບນິເວດ AI - ເຄິ່ງຊັກນຳໄຟຟ້າ ໃນທິດທາງເປີດກວ້າງ, ປອດໄພ ແລະ ໜ້າເຊື່ອຖື.

ໃນກອງປະຊຸມ, ທ່ານ Kim Dong-jun, ທີ່ປຶກສາສະຖານທູດ ສ.ເກົາຫຼີ ປະຈຳຫວຽດນາມ ໄດ້ສະເໜີ 3 ທິດທາງການຮ່ວມມື ເພື່ອຊຸກຍູ້ສາຍພົວພັນລະຫວ່າງສອງປະເທດໃນຂົງເຂດ AI ແລະ ເຄິ່ງຊັກນຳໄຟຟ້າ.

ທິດທາງທຳອິດ, ຫວຽດນາມ ແລະ ສ.ເກົາຫຼີ ຕ້ອງປະສານງານກັນໃນການດຳເນີນບັນດາໂຄງການຄົ້ນຄວ້າ, ພັດທະນາ ແລະ ທົດລອງຊິບເຄິ່ງຊັກນຳໄຟຟ້າສະເພາະທາງ ເພື່ອຮັບໃຊ້ AI.

ທິດທາງທີສອງ, ສອງຝ່າຍຍູ້ແຮງການຝຶກອົບຮົມ ແລະ ແລກປ່ຽນບຸກຄະລາກອນ ຜ່ານການຄົ້ນຄວ້າຮ່ວມກັນ, ໂຄງການຝຶກງານ ແລະ ການເພີ່ມທະວີການເຊື່ອມໂຍງລະຫວ່າງສະຖານສຶກສາກັບວິສາຫະກິດ.

ທິດທາງທີສາມ, ຕ້ອງເປີດກວ້າງການຮ່ວມມືທາງທຸລະກິດ, ໂດຍສະເພາະໃນການພັດທະນາໂຄງລ່າງພື້ນຖານດິຈິຕອນ ແລະ ການກໍ່ສ້າງບັນດາສູນຂໍ້ມູນ AI.

ບັນດາທິດທາງດັ່ງກ່າວປະກອບສ່ວນຫັນການຮ່ວມມືດ້ານເຕັກໂນໂລຊີລະຫວ່າງຫວຽດນາມ ແລະ ສ.ເກົາຫຼີ ໃຫ້ເປັນຮູບປະທຳ, ນັບແຕ່ການຄົ້ນຄວ້າ, ການຝຶກອົບຮົມບຸກຄະລາກອນ ໄປຈົນເຖິງການພັດທະນາຜະລິດຕະພັນ ແລະ ຕະຫຼາດ.

ສະຫະພັນກຳມະບານຫວຽດນາມ - ສ.ເກົາຫຼີ ເພີ່ມທະວີການຮ່ວມມືປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານ ຍສໝ - ໃນສອງວັນທີ 19-20/10, ຄະນະຜູ້ແທນສະຫະພັນກຳມະບານ ສ.ເກົາຫຼີ (FKTU) ໄດ້ປະຕິບັດວຽກງານກັບສະຫະພັນໃຫຍ່ແຮງງານຫວຽດນາມ ທີ່ຮ່າໂນ້ຍ ແລະ ລົງສຳຫຼວດກິດຈະກຳກຳມະບານຢູ່ບັກນິງ, ໂດຍສຸມໃສ່ຍົກສູງປະສິດທິຜົນການເບິ່ງແຍງ ແລະ ປົກປ້ອງຜູ້ອອກແຮງງານ ໃນສະພາບການຫັນປ່ຽນເປັນດິຈິຕອນ ແລະ ການປະກົດຂຶ້ນຂອງຮູບແບບການຈ້າງງານໃໝ່.

ຫວຽດນາມ - ສ.ເກົາຫຼີ ຂະຫຍາຍການຮ່ວມມືພັດທະນາ AI ຍສໝ - ວັນທີ 29/10, ທີ່ຮ່າໂນ້ຍ, ເວທີປາໄສປັນຍາປະດິດ (AI) ແລະ ເຕັກໂນໂລຊີດິຈິຕອນ ຫວຽດນາມ - ສ.ເກົາຫຼີ 2026 ໄດ້ສຸມໃສ່ຊຸກຍູ້ການຮ່ວມມືດ້ານການຄົ້ນຄວ້າ, ພັດທະນາປັນຍາປະດິດ (AI), ໂຄງລ່າງພື້ນຖານຂໍ້ມູນ, ເຕັກໂນໂລຊີເຄິ່ງຊັກນຳໄຟຟ້າ ແລະ ການຝຶກອົບຮົມຊັບພະຍາກອນມະນຸດ, ມຸ່ງໄປສູ່ການເປັນເຈົ້າຂອງເຕັກໂນໂລຊີ, ການນຳຜະລິດຕະພັນອອກສູ່ຕະຫຼາດໃນເຊີງການຄ້າ ແລະ ການຂະຫຍາຍຕະຫຼາດ.