ຫວຽດນາມ - ລາວ ສືບຕໍ່ເຮັດໃຫ້ສາຍພົວພັນພິເສດເລິກເຊິ່ງຍິ່ງຂຶ້ນ

ການຢ້ຽມຢາມຄັ້ງນີ້ ດຳເນີນຕາມຄຳເຊີນຂອງທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີຜູ້ປະຈຳລັດຖະບານລາວ.

ທີ່ບັນດາການຕ້ອນຮັບ, ການນຳຂັ້ນສູງລາວ ໄດ້ຕ້ອນຮັບ ແລະ ຕີລາຄາສູງການຢ້ຽມຢາມຂອງທ່ານ ຟ້າມຢາຕູກ, ຮອງນາຍົກລັດຖະມົນຕີຜູ້ປະຈຳ, ເຫັນວ່າ ກິດຈະກຳນີ້ປະກອບສ່ວນປັບປຸງ ແລະ ເຮັດໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຄວາມຜູກພັນທາງຍຸດທະສາດ ລະຫວ່າງສອງປະເທດ ເລິກເຊິ່ງຍິ່ງຂຶ້ນ.

ທ່ານ ຟ້າມຢາຕູກ, ຮອງນາຍົກລັດຖະມົນຕີຜູ້ປະຈຳ ເຂົ້າຢ້ຽມຄຳນັບສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດລາວ.

ການນຳລາວ ໄດ້ອວຍພອນຕໍ່ບັນດາຜົນສຳເລັດຮອບດ້ານທີ່ຫວຽດນາມບັນລຸໄດ້ໃນໄລຍະຜ່ານມາ, ພ້ອມທັງ ໄດ້ສະແດງຄວາມເຊື່ອໝັ້ນວ່າ ຫວຽດນາມຈະສືບຕໍ່ຍາດໄດ້ຫຼາຍໄຊຊະນະສຳຄັນໃນຍຸກພັດທະນາໃໝ່, ປະຕິບັດສຳເລັດບັນດາເປົ້າໝາຍຍຸດທະສາດຮອດປີ 2030 ແລະ 2045.

ທ່ານ ຟ້າມຢາຕູກ, ຮອງນາຍົກລັດຖະມົນຕີຜູ້ປະຈຳ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງສົມກຽດ, ອົບອຸ່ນດ້ວຍນ້ຳໃຈສະຫາຍ, ອ້າຍນ້ອງ ຂອງການນຳ ແລະ ປະຊາຊົນລາວ; ພ້ອມທັງສົ່ງຄຳຢ້ຽມຢາມຖາມຂ່າວຢ່າງສຸພາບຂອງທ່ານ ໂຕເລິມ, ເລຂາທິການໃຫຍ່, ປະທານປະເທດ; ທ່ານ ເລມິງຮຶງ, ນາຍົກລັດຖະມົນຕີ; ທ່ານ ເຈິ່ນແທງເໝີນ, ປະທານສະພາແຫ່ງຊາດ ແລະ ທ່ານ ເຈິ່ນເກິ໋ມຕູ໊, ຄະນະນຳປະຈຳຄະນະເລຂາທິການ ເຖິງບັນດາສະຫາຍການນຳຂັ້ນສູງລາວ.

ທ່ານ ຟ້າມຢາຕູກ ໄດ້ອວຍພອນຕໍ່ບັນດາຜົນສຳເລັດທີ່ລາວບັນລຸໄດ້ ແລະ ໄດ້ສະແດງຄວາມເຊື່ອໝັ້ນວ່າ ລາວຈະປະຕິບັດສຳເລັດມະຕິກອງປະຊຸມໃຫຍ່ ຄັ້ງທີ XII ຂອງພັກ ແລະ ແຜນພັດທະນາເສດຖະກິດ - ສັງຄົມ 5 ປີ ຄັ້ງທີ X ຢ່າງມີໄຊ.

ທ່ານ ຟ້າມຢາຕູກ ຍັງໄດ້ແຈ້ງບາງຈຸດສຳຄັນກ່ຽວກັບສະພາບເສດຖະກິດ - ສັງຄົມຂອງຫວຽດນາມ, ຜົນການສັບຊ້ອນບັນດາຫົວໜ່ວຍບໍລິຫານ ແລະ ການຜັນຂະຫຍາຍຮູບແບບອຳນາດການປົກຄອງທ້ອງຖິ່ນ 2 ຂັ້ນ.

ທ່ານ ຟ້າມຢາຕູກ ຢືນຢັນວ່າ ຫວຽດນາມຍາມໃດກໍໃຫ້ຄວາມສຳຄັນ ແລະ ກຳນົດການຮັກສາ, ປັບປຸງ, ພັດທະນາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຄວາມຜູກພັນທາງຍຸດທະສາດ ຫວຽດນາມ - ລາວ ເປັນບຸລິມະສິດແຖວໜ້າໃນນະໂຍບາຍການຕ່າງປະເທດ.

ທ່ານ ໄດ້ສະແດງຄວາມຍິນດີຕໍ່ການທີ່ສາຍພົວພັນສອງປະເທດໃນໄລຍະຜ່ານມາ ສືບຕໍ່ພັດທະນາຢ່າງດີງາມ, ນັບມື້ນັບເຂົ້າສູ່ລວງເລິກ, ເປັນຮູບປະທຳ ແລະ ມີປະສິດທິຜົນ; ບັນດາການຢ້ຽມຢາມ, ການພົບປະຕິດຕໍ່ຂັ້ນສູງ ແລະ ບັນດາກົນໄກຮ່ວມມືສຳຄັນ ໄດ້ຮັບການຮັກສາເປັນປະຈຳ, ຄຽງຄູ່ກັບການປະສານງານຢ່າງແໜ້ນແຟ້ນໃນບັນດາບັນຫາຍຸດທະສາດ.

ສອງຝ່າຍເຫັນດີສືບຕໍ່ຜັນຂະຫຍາຍບັນດາຂໍ້ຕົກລົງຂັ້ນສູງຢ່າງມີປະສິດທິຜົນ; ເຮັດໃຫ້ການຮ່ວມມືປ້ອງກັນຊາດ - ຄວາມໝັ້ນຄົງເລິກເຊິ່ງຍິ່ງຂຶ້ນ; ຊຸກຍູ້ການເຊື່ອມໂຍງສອງເສດຖະກິດ, ໂດຍສະເພາະ ໃນບັນດາຂົງເຂດພະລັງງານ, ຄົມມະນາຄົມ - ຂົນສົ່ງ ແລະ ໂຄງລ່າງຊາຍແດນ.

ສອງປະເທດຍັງເຫັນດີເພີ່ມທະວີການຮ່ວມມືດ້ານການສຶກສາ, ການຝຶກອົບຮົມ, ພັດທະນາຊັບພະຍາກອນມະນຸດ; ພ້ອມທັງກະກຽມຢ່າງຮອບຄອບບັນດາກິດຈະກຳລະນຶກ 65 ປີແຫ່ງການສ້າງຕັ້ງສາຍພົວພັນການທູດ ແລະ 50 ປີແຫ່ງການລົງນາມສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ ໃນປີ 2027.

ຊາວໜຸ່ມຂະແໜງການເງິນ ຫວຽດນາມ - ລາວ ເປີດກວ້າງການຮ່ວມມືໄລຍະ 2026 - 2030 ຍສໝ​ - ໃນແຕ່ລະປີ, ຊາວໜຸ່ມກະຊວງການເງິນຫວຽດນາມ ແລະ ລາວ ຄາດວ່າຈະສືບຕໍ່ຈັດຄະນະປະຕິບັດງານສອງຝ່າຍ, ເພີ່ມທະວີການແລກປ່ຽນວຽກງານວິຊາສະເພາະ ແລະ ເສີມສ້າງຄວາມຜູກພັນລະຫວ່າງພະນັກງານໜຸ່ມຂອງສອງປະເທດ.

ຈາກຫ້ອງຮຽນພາສາລາວ ສູ່ຂົວເຊື່ອມມິດຕະພາບ ຫວຽດນາມ - ລາວ ຍສໝ - ເນື່ອງໃນໂອກາດສະເຫຼີມສະຫຼອງ 81 ປີແຫ່ງວັນຊາດຫວຽດນາມ, ທ່ານ ຫງວຽນມິງເຕິມ, ເອກອັກຄະລັດຖະທູດຫວຽດນາມປະຈຳລາວ ຄາດຫວັງວ່າ ບັນດາພະນັກງານທີ່ພວມຮຽນພາສາລາວຢູ່ມະຫາວິທະຍາໄລແຫ່ງຊາດລາວ ຈະບໍ່ພຽງແຕ່ຍົກສູງຄວາມສາມາດດ້ານພາສາເທົ່ານັ້ນ, ຫາກຍັງກາຍເປັນ “ທູດວັດທະນະທຳ”, ປະກອບສ່ວນທະນຸຖະໜອມສາຍພົວພັນພິເສດລະຫວ່າງສອງປະເທດ.