 |
| ຂ່າວດີ ສປປ ລາວ ຍັງບໍ່ມີຜູ້ຕິດເຊື້ອໂຄວິດ-19 ເພີ່ມ ຕົວເລກສະສົມຍັງຢູ່ 19 ຄົນ |
ທ່ານ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ລາຍງານໃຫ້ຮູ້ວ່າ: ໃນວັນທີ 7 ພຶດສະພາ ໄດ້ເກັບຕົວຢ່າງມາກວດທັງໝົດ 129 ຄົນ, ກໍລະນີສົງໄສ 12 ຄົນ, ໃນນັ້ນຢູ່ນະຄອນຫລວງວຽງຈັນ 1 ຄົນ, ຫລວງພະບາງ 9 ຄົນ, ສະຫວັນນະເຂດ 2 ຄົນ ແລະ ຜູ້ຕິດເຊື້ອທີ່ອອກໂຮງໝໍ ແລ້ວກັບມາກວດຄືນ 2 ຄົນ ແມ່ນຜູ້ທີ່ປິ່ນປົວຫາຍດີຢູ່ໂຮງໝໍ ແຂວງຫລວງພະບາງ (ກໍລະນີ 5 ແລະ ກໍລະນີ 8) ພາຍຫລັງຕິດຕາມຄົບກຳນົດ 14 ວັນແລ້ວມາກວດຄືນ, ແຮງງານລາວ ທີ່ກັບມາຈາກປະເທດໄທ 105 ຄົນ, ເຊິ່ງຜົນກວດທັງໝົດ 129 ຄົນແມ່ນບໍ່ພົບເຊື້ອໃໝ່, ໝາຍຄວາມວ່າໃນວັນທີ 8 ພຶດສະພາ 202ບໍ່ມີກໍລະນີໃໝ່, ນັບແຕ່ເດືອນມັງກອນ ຮອດວັນທີ 8 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 2.733 ຕົວຢ່າງ, ກວດພົບເຊື້ອສະສົມ 19 ຄົນ.
ປັດຈຸບັນ ມີຜູ້ນອນຕິດຕາມ ຢູ່ໂຮງໝໍມິດຕະພາບ 10 ຄົນລວມທັງກໍລະນີ 14 ທີ່ເອົາກັບຄືນມາ ນອນຕິດຕາມອາການຢູ່ໂຮງໝໍ, ທັງໝົດເຫັນວ່າມີອາການເບົາບາງ, ໄດ້ເກັບຕົວຢ່າງມາກວດຄືນ ເຫັນວ່າ 6 ຄົນບໍ່ພົບເຊື້ອ ແລະ ມື້ນີ້ຈະໄດ້ເກັບຕົວຢ່າງ ມາກວດ ເປັນຄັ້ງທີ່ 2 ຖ້າບໍ່ພົບເຊື້ອ 2 ຄັ້ງຕິດຕໍ່ກັນ 24 ຊົ່ວໂມງ ຈະພິຈາລະນາໃຫ້ອອກໂຮງໝໍ ໄປຈໍາກັດບໍລິເວນຢູ່ເຮືອນອີກ 14 ວັນ.
ທ່ານ ພູທອນ ເມືອງປາກ ຍັງໃຫ້ຮູ້ອີກວ່າ: ໃນໄລຍະຜ່ອນຜັນ ບາງມາດຕະການ ແຕ່ນີ້ເຖິງ ວັນທີ 17 ພຶດສະພາ ຄະນະສະເພາະກິດ ຈະໄດ້ເອົາໃຈໃສ່ເຝົ້າ ລະວັງຢ່າງເຂັ້ມງວດ ຕໍ່ຜູ້ທີ່ຈະເດີນ ທາງເຂົ້າມາ ສປປ ລາວ ໂດຍການກວດວິເຄາະ ຫາເຊື້ອພະຍາດທຸກຄົນ ເພື່ອບໍ່ໃຫ້ນໍາເຊື້ອເຂົ້າມາປະເທດ ເຊິ່ງຜູ້ທີ່ມີຜົນກວດວິເຄາະເປັນບວກ ຈະໄດ້ເຂົ້ານອນຕິດຕາມຢູ່ໂຮງໝໍ ເພື່ອບໍ່ໃຫ້ມີຄວາມສ່ຽງທີ່ຈະແຜ່ ກະຈາຍເຊື້ອອອກໄປຕິດໃສ່ຜູ້ອື່ນ ສ່ວນຜູ້ທີ່ມີຜົນກວດວິເຄາະເປັນລົບ ຈະໄດຈຳກັດບໍລິເວນຢູ່ສູນ ຂອງແຕ່ລະແຂວງ ຈົນຄົບກຳນົດ 14 ວັນ.
ພ້ອມນີ້, ທ່ານຮອງລັດຖະມົນຕີ ກະຊວງສາທາລະນະສຸກ ຍັງຮຽກຮ້ອງໃຫ້ພໍ່ແມ່ ປະຊາຊົນ ບັນດາເຜົ່າ ທີ່ຢູ່ພາຍໃນປະເທດ ຕ້ອງໄດ້ເອົາໃຈໃສ່ ປະຕິບັດ ມາດຕະການປ້ອງກັນ ການຕິດເຊື້ອຕາມແຈ້ງການ ແລະ ຄຳແນະນຳຕ່າງໆ ຢ່າງຖືກຕ້ອງ ແລະ ເຂັ້ມງວດ ເພື່ອຊ່ວຍສະໜັບສະໜູນມາດ ຕະການຄວບຄຸມແກ້ໄຂການ ລະບາດຂອງພະຍາດ ໂຄວິດ-19 ນີ້ ໃຫ້ມີປະສິດທິຜົນ ເພື່ອຈະໄດ້ກຳນົດມາດຕະການ ຜ່ອນຜັນສືບຕໍ່ໄປອີກ ຫລັງຈາກວັນທີ 17 ພຶດສະພາ 2020. ໂດຍສະເພາະ ການປະຕິບັດມາດ ຕະການປ້ອງກັນ ການຕິດເຊື້ອຂອງມວນຊົນ ເປັນຕົ້ນການລ້າງມື ດ້ວຍນໍ້າສະອາດ ແລະ ສະບູ ຫລື ໃຊ້ເຈວລ້າງມື ຂ້າເຊື້ອດ້ວຍເຫລົ້າ 70% ຂື້ນໄປ, ການປະຕິບັດ ໄລຍະຫ່າງ, ການໃສ່ຜ້າປິດປາກ-ດັງ, ເວລາອອກຈາກບ້ານ ຫລື ຢູ່ສະຖານທີ່ບໍລິການຕ່າງໆ.
 | ສື່ມວນຊົນສາກົນສືບຕໍ່ຍ້ອງຍໍຊົມເຊີຍຜົນສໍາເລັດຂອງຫວຽດນາມໃນວຽກງານຄວບຄຸມໂລກລະບາດໂຄວິດ - 19 ຍສໝ - ຫວຽດນາມຍາມໃດກໍເປີດອົກເປີດໃຈ, ມີຄວາມໂປ່ງໃສໃນວິກິດການ ໂລກລະບາດ ໂຄວິດ - 19 ແລະ ໃຫ້ການໜູນຊ່ວຍອຸປະກອນການແພດແກ່ຫຼາຍປະເທດໃນໂລກ. |
 | ກອງບັນຊາການທະຫານແຂວງກວາງບິ່ງ (ຫວຽດນາມ) ໄດ້ມອບເຄື່ອງອຸປະກອນການແພດໃຫ້ແກ່ແຂວງຄຳມ່ວນເພື່ອຕ້ານການລະບາດຂອງພະຍາດ Covid - 19 ຍສໝ - ເມື່ອບໍ່ດົນມານີ້, ທີ່ດ່ານສາກົນນາເພົ້າ ແຂວງຄຳມ່ວນ ແລະ ດ່ານຈາຫລໍ ແຂວງກວາງບິ່ງ ສສ ຫວຽດນາມ ໄດ້ຈັດຂຶ້ນພິທີມອບຮັບເຄື່ອງອຸປະກອນການແພດ ເພື່ອຊ່ວຍເຫຼືອກອງບັນຊາການທະຫານ ແຂວງຄຳມ່ວນ ໃນການປ້ອງກັນ ແລະ ຕ້ານພະຍາດ Covid-19. |
 | ສະມາຄົມຊາວຫວຽດນາມ Löbau-Zittau ຕັດຫຍິບຜ້າອັດປາກ 7,000 ອັນ ເພື່ອສະໜັບສະໜູນ ປະຊາຊົນປະເທດ ເຢຍລະມັນໃນການປ້ອງກັນການລະບາດຂອງພະຍາດ ໂຄວິດ - 19 ຍສໝ - ວັນທີ 23 ເມສາ, ປະທານສະມາຄົມຫວຽດນາມ Löbau-Zittau ໃຫ້ຮູ້ວ່າ, ພາຍໃນເວລາເກືອບໜຶ່ງເດືອນຂອງການເປີດຕົວ, ສະມາຄົມໄດ້ຕັດຫຍິບຜ້າອັດປາກ 7,000 ອັນ ເພື່ອສະໜັບສະໜູນ ປະຊາຊົນປະເທດ ເຢຍລະມັນ ໃນການປ້ອງກັນການລະບາດຂອງພະຍາດ ໂຄວິດ - 19. |
ຂປລ
