 |
ສະຫະພາບເອີຣົບ ແລະ ອົງການຢູນິເຊບລົງຊຸກຍູ້ໂຄງການຊ່ວຍເຫລືອໂພຊະນາການທີ່ແຂວງຜົ້ງສາລີ
ທ່ານ ລີໂອ ຟາເບີ ເອກອັກຄະລັດຖະທູດ ສະຫະພາບເອີຣົບ ແລະ ທ່ານ ອົກຕາວຽນ ບີໂວລ ຜູ້ຕາງໜ້າອົງການຢູນິເຊບ ປະຈຳ ສປປ ລາວ, ພ້ອມດ້ວຍຄະນະ ໄດ້ລົງຕິດຕາມຊຸກຍູ້ໂຄງການ ຢູ່ບ້ານຫ້ວຍຫຍື່ງເມືອງບຸນເໜືອ, ຫ້ວຍແປເໜືອ ແລະ ບ້ານ ສະຫວັນ ເມືອງຍອດອູ ແຂວງ ຜົ້ງສາລີ ເພື່ອສັງເກດສະພາບການປະຕິບັດໂຄງການ, ຂໍ້ສະດວກ, ຂໍ້ຫຍຸ້ງຍາກ ແລະ ການປັບປຸງຮ່ວມມື ດ້ານວຽກງານໂພຊະນາການ.
ທ່ານ ລີໂອ ຟາເບີ ໄດ້ກ່າວວ່າ: ສະຫະພາບເອີຣົບ, ອົງການຢູນິເຊບ ແລະ ລັດຖະບານລາວ ໄດ້ຊ່ວຍເຫລືອດ້ານໂພຊະນາການ ຜ່ານໂຄງການຮ່ວມມືດ້ານໂພຊະນາການ, ໂດຍສຸມໃສ່ການປະສານງານຫລາຍດ້ານ, ການປະຕິບັດໂຄງການ, ການສ້າງຫລັກຖານ, ການປູກຈິດສຳນຶກ ແລະ ການເສີມຂະຫຍາຍຄວາມເຂັ້ມແຂງຂອງສະຖາບັນດັ່ງກ່າວ, ເຊິ່ງການຢ້ຽມຢາມຄັ້ງນີ້ແມ່ນສຳຄັນຫລາຍ ເພາະຈະຊ່ວຍໃຫ້ພວກເຮົາເຂົ້າໃຈຄວາມຄືບໜ້າ ແລະ ສິ່ງທ້າທາຍ ໃນການປະຕິບັດໂຄງການ ເພື່ອປັບປຸງສະຖານະພາບດ້ານໂພຊະນາການຂອງແມ່ຍິງ ແລະ ເດັກ ທີ່ແຂວງຜົ້ງສາລີ.
ພ້ອມດຽວກັນນີ້, ທ່ານ ອົກຕາວຽນ ບີໂວລ ກໍ່ໄດ້ກ່າວວ່າ: ການຮ່ວມມືສຳລັບການປັບປຸງໂພຊະນາການ, ການລິເລີ່ມການຮ່ວມມືທີ່ໄດ້ຮັບທຶນຈາກຫລາຍແຫລ່ງ ລວມທັງສະຫະພາບເອີຣົບ, ອົງການຢູນິເຊບ ແລະ ບໍລິສັດລ້ານຊ້າງມິນິໂລ ແມ່ນການຊ່ວຍເຫລືອໃນການສ້າງໂອກາດ ແລະ ໄດ້ປະກອບສ່ວນໃຫ້ບັນດາຜົນສຳເລັດ ທີ່ສອດຄ່ອງກັບແຜນພັດທະນາເສດຖະກິດ-ສັງຄົມ, ເຊິ່ງໄດ້ຊຸກຍູ້ໃຫ້ເຫັນວ່າການຢຸດຕິການຂາດສານອາຫານໃນແຂວງຜົ້ງສາລີ ໄດ້ຮັບການປັບປຸງ, ພ້ອມທັງຮັບປະກັນວ່າ ເດັກນ້ອຍທຸກໆຄົນໃນແຂວງ ຈະຢູ່ລອດແລະ ເຕີບໂຕຢ່າງເຂັ້ມແຂງ.
ໃນໂອກາດດັ່ງກ່າວ, ຜູ້ຕາງໜ້າສະຫະພາບເອີຣົບ ແລະ ອົງການຢູນິເຊບ ໄດ້ພົບປະກັບທ່ານ ທອງສີ ເສົາສຸລິພົມ ຮອງເຈົ້າແຂວງໆ ຜົ້ງສາລີ ແລະ ຫົວໜ້າພະແນກການຕ່າງໆ ເພື່ອປຶກສາຫາລືກ່ຽວກັບການວາງແຜນເພື່ອແກ້ໄຂບັນຫານດ້ານໂພຊະນາການພາຍໃນແຂວງ. ແຂວງຜົ້ງສາລີ ມີເດັກນ້ອຍອາຍຸຕ່ຳກວ່າ 5 ປີ ຫລາຍກວ່າເຄິ່ງໜຶ່ງໃນແຂວງ ແມ່ນຂາດສານອາຫານສູງກວ່າຄ່າສະເລ່ຍຂອງປະເທດ ຫາກທຽບໃສ່ແຂວງອື່ນ ແມ່ນເປັນຕົວເລກທີ່ສູງກວ່າໝູ່ໃນ ສປປ ລາວ. ອີງຕາມການສຳຫລວດທາງດ້ານດັດສະນີໝາຍ ຄັ້ງທີ 2 ອັດຕາສ່ວນຂອງເດັກນ້ອຍ ທີ່ມີອາຍຸຕ່ຳກວ່າ 5 ປີ ຫລຸດລົງ 11% ແລະ ນ້ຳໜັກບໍ່ໄດ້ເກນຫລຸດລົງ 6% ໃນລະຫວ່າງປີ 2011 ແລະ2017.
ໂຄງການຮ່ວມມືສຳລັບການປັບປຸງໂພຊະນາການ ໄດ້ເລີ່ມຕົ້ນໃນເດືອນກໍລະກົດ 2016 ໄລຍະເວລາແມ່ນ 60 ເດືອນ ຈົນຮອດເດືອນມິຖຸນາ 2021, ໂດຍມີງົບປະມານທັງໝົດແມ່ນ 11 ລ້ານກວ່າເອີໂຣ ໃນນັ້ນສະຫະພາຍເອີຣົບ ໄດ້ສະໜັບສະໜູນ 9 ລ້ານເອີໂຣແລະ ຢູນິເຊບ ສະໜັບສະໜູນ 2 ລ້ານກວ່າເອີໂຣ. ໂຄງການດັ່ງກ່າວ, ແມ່ນກວມເອົາ 10 ແຂວງ ຂອງ ສປປ ລາວ ຄື: ແຂວງຜົ້ງສາລີ, ຫລວງພະບາງ, ຫລວງນ້ຳທາ, ຫົວພັນ, ບໍ່ແກ້ວ, ຊຽງຂວາງ, ຄຳມ່ວນ, ສະຫວັນນະເຂດ, ສາລະວັນ ແລະ ແຂວງອັດຕະປື, ເຊິ່ງເປົ້າໝາຍຂອງໂຄງການ ແມ່ນເພື່ອສ້າງຄວາມເຂັ້ມແຂງໃຫ້ການຄຸ້ມຄອງ ດ້ານໂພຊະນາການ ເພື່ອຕອບສະໜອງຕໍ່ຫລາຍໆດ້ານ, ເພື່ອຂະຫຍາຍການປະສານງານດ້ານຫລັກຖານ ແລະ ໂພຊະນາການແບບຍືນຍົງ, ພ້ອມທັງປັບປຸງສະຖານະພາບດ້ານໂພຊະນາການຂອງເດັກແລະ ແມ່ຍິງ ໃນ ສປປ ລາວ.
（ແຫຼ່ງຂໍ້ມູນ： ຂປລ）
