ນາຍົກລັດຖະມົນຕີ ທ່ານ ທອງລຸນ ສີສຸລິດ ພົບປະໂອ້ລົມ ການນຳຫລັກແຫລ່ງແຂວງເຊກອງ

ທ່ານ ທອງລຸນ ສີສຸລິດ ຢ້ຽມຢາມ ໂຮງຮຽນມັດທະຍົມຊົນເຜົ່າ ແຂວງ ເຊກອງ.

ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ຮັບຟັງ ການລາຍງານຫຍໍ້ ສະພາບ ການພັດທະນາເສດຖະກິດ-ສັງຄົມ ຂອງແຂວງປະຈຳປີ 2018 ເຫັນວ່າ ທົ່ວແຂວງ ສືບຕໍ່ມີຄວາມສະຫງົບ ທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດ ຂະ ຫຍາຍຕົວ 8,3%, ລາຍຮັບສະເລ່ຍຕໍ່ຫົວຄົນ 1.623 ໂດລາ/ຄົນ/ປີ; ການເກັບລາຍຮັບເຂົ້າງົບປະມານ ຮອດປະຈຸບັນ ປະຕິບັດໄດ້ 93% ຂອງແຜນການ; ຄອບຄົວທຸກຍາກ ຍັງເຫລືອ 8,7%; ອັດຕາເຂົ້າຮຽນສຸດທິ ຊັ້ນປະຖົມ ກວມ 97%, ມັດທະ ຍົມຕົ້ນ ກວມ 84,7%, ມັດທະ ຍົມຕອນປາຍ ກວມ 56,8% ແລະ ອື່ນໆ.

ທ່ານ ທອງລຸນ ສີສຸລິດ ຢ້ຽມຢາມ ພໍ່ແມ່ປະຊາຊົນສ້າງ ເສດຖະກິດ ຢູ່ ແຂວງ ເຊກອງ.

ໃນໂອກາດດຽວກັນ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ຕໍ່ຄະນະພັກ, ຄະ ນະນຳ ແລະ ພາກສ່ວນທີ່ກ່ຽວ ຂ້ອງຂອງແຂວງ ໂດຍໄດ້ຍົກໃຫ້ເຫັນ ສະພາບການພັດທະນາເສດຖະກິດ-ສັງຄົມ ທີ່ສຳຄັນຂອງຊາດ; ການພົວ ພັນຮ່ວມມື ລະຫວ່າງ ສປປ ລາວ ກັບບັນດາປະເທດຈຳນວນໜຶ່ງ; ສະພາບການ ທີ່ເກີດຂຶ້ນຢູ່ໃນພາກພື້ນ ແລະ ສາກົນ ທີ່ພົ້ນເດັ່ນ; ມູນເຊື້ອອັນດີງາມ ຂອງປະຊາຊົນບັນດາເຜົ່າຊາວແຂວງເຊກອງ ແລະ ອື່ນໆ. ອັນສຳຄັນ, ທ່ານໄດ້ມີຄຳເຫັນຊີ້ນຳ ແກ່ການນຳຂອງແຂວງ ໃຫ້ສືບຕໍ່ເອົາໃຈໃສ່ຕໍ່ວຽກງານກໍ່ສ້າງຮາກຖານການເມືອງ ໃຫ້ເລິກເຊິ່ງເຖິງຖອງ ແລະ ເປັນປົກກະຕິຕໍ່ເນື່ອງ; ສຸມໃສ່ປະຕິບັດວຽກງານແກ້ໄຂຄວາມທຸກຍາກ ຂອງປະຊາຊົນ ໃຫ້ນັບມື້ດີຂຶ້ນເປັນກ້າວໆ, ເຮັດໃຫ້ປະຊາຊົນ ຮູ້ຈັກວິທີທຳມາຫາກິນ, ມີຢູ່ມີກິນ, ຮູ້ຄ້າ-ຮູ້ຂາຍ, ຮູ້ລົງທຶນ, ຮູ້ທຳການຜະລິດແບບໃໝ່ ທີ່ທັນສະໄໝ ເຊິ່ງການແກ້ໄຂຄວາມທຸກຍາກນັ້ນ ແມ່ນໃຫ້ເນັ້ນໃສ່ຄຸນນະ ພາບ ແລະ ຄວາມຍືນຍົງ ເປັນສິ່ງສຳຄັນ (ບໍ່ໃຫ້ແລ່ນນຳຕົວເລກພຽງດ້ານດຽວ); ເອົາໃຈໃສ່ດຶງດູດການລົງທຶນ ໃຫ້ຫລາຍກວ່າເກົ່າ ໂດຍຄຽງຄູ່ໄປດ້ວຍຄຸນນະ ພາບ ແລະ ມີປະສິດທິຜົນສູງ (ຕ່າງຝ່າຍຕ່າງມີຜົນປະໂຫຍດ ຕະຫລອດຮອດປະຊາຊົນ ກໍ່ໃຫ້ມີຜົນປະໂຫຍດ); ສືບຕໍ່ຮັກສາມູນເຊື້ອອັນດີງາມຂອງຊາດ, ຂອງເຜົ່າ ກໍ່ຄື ມູນເຊື້ອພິລະອາດຫານ, ດຸໝັ່ນຂະຫຍັນພຽນ, ສາມັກຄີຊ່ວຍເຫລືອເຊິ່ງກັນ ແລະ ກັນ ຂອງປະຊາຊົນຊາວແຂວງເຊກອງ ໃຫ້ກວ້າງຂວາງ ແລະ ຍືນຍົງຕະຫລອດໄປ. ທັງໝົດນັ້ນ, ກໍ່ເພື່ອສ້າງເງື່ອນໄຂເອື້ອອຳນວຍ ໃຫ້ແກ່ການປົກປັກຮັກສາ ແລະ ສ້າງສາພັດທະນາແຂວງເຊກອງ ໃຫ້ມີຄວາມໜັກແໜ້ນ, ເຂັ້ມແຂງ ແລະ ກ້າວໜ້າຢ່າງບໍ່ຢຸດຢັ້ງ.

ທ່ານ ທອງລຸນ ສີສຸລິດ ຢ້ຽມຢາມ ພໍ່ແມ່ປະຊາຊົນສ້າງ ເສດຖະກິດ ຢູ່ ແຂວງ ເຊກອງ.

ໃນມື້ດຽວກັນ, ທ່ານນາຍົກລັດຖະມົນຕີ ພ້ອມຄະນະ ຍັງໄດ້ໄປພົບປະໂອ້ລົມ ຄູອາຈານ ແລະ ນັກຮຽນ-ນັກສຶກສາ ທີ່ໂຮງຮຽນເຕັກນິກວິຊາຊີບປະສົມຂອງແຂວງ ແລະ ໂຮງຮຽນສາມັນກິນ-ນອນຊົນເຜົ່າຂອງແຂວງ. ນອກຈາກນັ້ນ, ຍັງໄດ້ໄປຢ້ຽມຢາມໂຄງການປູກອ້ອຍ ແລະ ຜະລິດນໍ້າຕານ ລວມທັງ ຟາມລ້ຽງງົວ ຂອງບໍລິສັດ ແມ່ນໍ້າຂອງຮ່ວມທຸລະກິດ ຈຳກັດ ທີ່ບ້ານຕິ້ວ, ເມືອງລະມາມ ຕື່ມອີກ. ໃນນັ້ນ, ການໄປຢ້ຽມຢາມໂຮງຮຽນແຕ່ລະບ່ອນ, ທ່ານນາຍົກລັດຖະ ມົນຕີ ໄດ້ມອບເຄື່ອງໃຊ້ຫ້ອງການ (ຄອມພິວເຕີ, ເຄື່ອງພິມເອກະສານ ແລະ ອື່ນໆ ຈຳນວນ 2 ຊຸດ) ພ້ອມດ້ວຍເງິນສົດ ຈໍານວນ 20 ລ້ານກີບ.
ພາບ ແລະ ຂ່າວ: ກົມປະຊາສຳພັນ ສນຍ

（ແຫຼ່ງ​ຂໍ້​ມູນ​： ຂ​ປ​ລ）