 |
ທ່ານນາຍົກລັດຖະມົນຕີ ທອງລຸນ ສີສຸລິດ ແລະ ທ່ານປະທານາທິບໍດີ ເກົາຫຼີໃຕ້ ມູນ ແຈ ອິນ ທີ່ ສິງກະໂປ.
ໃນໂອກາດພົບປະຄັ້ງນີ້, ສອງຝ່າຍໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີຂອງສອງປະເທດ ທີ່ໄດ້ຮັບການເສີມຂະຫຍາຍ ແລະ ມີບາດກ້າວຂະຫຍາຍຕົວຢ່າງໄວວາ ຕະ ຫລອດໄລຍະ 2 ທົດສະວັດ ນັບແຕ່ໄດ້ສ້າງຕັ້ງສາຍພົວພັນການທູດນຳກັນ ໃນປີ 1995 ເປັນຕົ້ນມາ, ເຊິ່ງເຫັນໄດ້ຈາກມີການແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງການນຳຂັ້ນສູງຂອງສອງປະ ເທດ ຢ່າງເປັນປົກກະຕິ, ການລົງທຶນຂອງ ສ.ເກົາຫລີ ກໍມີຈຳນວນເພີ່ມຂຶ້ນ, ເຊິ່ງຖືກຈັດຢູ່ໃນອັນດັບທີ 5 ຂອງການລົງທຶນຕ່າງປະເທດຢູ່ ສປປ ລາວ, ຈຳນວນນັກທ່ອງທ່ຽວ ສ.ເກົາຫລີ ເດີນທາງມາທ່ອງທ່ຽວ ສປປ ລາວ ກໍນັບມື້ນັບເພີ່ມຂຶ້ນ.ໃນໂອກາດດັ່ງກ່າວ, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ນຳເອົາຄວາມຢື້ຢາມຖາມຂ່າວ ຈາກ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄປຍັງ ທ່ານປະທານາທິບໍດີ ແຫ່ງ ສ.ເກົາຫລີ, ພ້ອມທັງສະແດງຄວາມຂອບໃຈຕໍ່ ລັດຖະບານ ແລະ ປະຊາຊົນ ສ.ເກົາຫລີ ທີ່ໄດ້ໃຫ້ການຊ່ວຍເຫລືອດ້ານຕ່າງໆ ແກ່ ສປປ ລາວ, ໂດຍສະເພາະການຊ່ວຍເຫລືອບັນເທົາທຸກ ໃຫ້ແກ່ປະຊາຊົນລາວ ທີ່ໄດ້ຮັບເຄາະຮ້າຍ ຈາກໄພພິບັດນ້ຳຖ້ວມ ອັນເນື່ອງມາຈາກສັນເຂື່ອນໄຟຟ້າ ເຊປຽນ-ເຊນ້ຳນ້ອຍແຕກ ຢູ່ເມືອງສະໜາມໄຊ, ແຂວງອັດຕະປື ໃນທ້າຍເດືອນກໍລະກົດ 2018 ທີ່ຜ່ານມາ.
 |
ບັນຍາກາດການພົບປະສອງຝ່າຍ ລາວ-ເກົາຫຼີໃຕ້.
ໃນໂອກາດດຽວກັນ, ທ່ານ ປະທານາທິບໍດີ ມູນ ແຈ ອິນ ກໍໄດ້ສະແດງຄວາມຍິນດີ ຈະສືບຕໍ່ໃຫ້ການສະໜັບສະໜູນ ແລະ ຊ່ວຍເຫລືອ ສປປ ລາວ ໂດຍສະເພາະໂຄງການຕ້ານຕາຝັ່ງເຈື່ອນຕາມລຳແມ່ນ້ຳຂອງ, ການຟື້ນຟູພື້ນຖານໂຄງລ່າງ ແລະ ຊ່ວຍເຫລືອພັດທະນາໝູ່ບ້ານແບບທັນສະໄໝ ຢູ່ເມືອງສະໜາມໄຊ, ແຂວງອັດຕະປື. ໃນໂອກາດດັ່ງກ່າວ, ທ່ານປະທານາທິບໍດີ ສ.ເກົາຫລີ ຍັງໄດ້ສະ ແດງຄວາມເສົ້າສະຫລົດໃຈ ມາຍັງລັດຖະບານ ແລະ ປະຊາຊົນລາວ ຕໍ່ເຫດການສັນເຂື່ອນໄຟຟ້າ ເຊປຽນ-ເຊນ້ຳນ້ອຍແຕກ ຢູ່ເມືອງສະໜາມໄຊ, ແຂວງອັດຕະປື ຕື່ມອີກ. ພ້ອມນັ້ນ, ຍັງໄດ້ແລກປ່ຽນທັດ ສະນະຕໍ່ບາງບັນຫາພາກພື້ນ ແລະ ສາກົນ ທີ່ສອງຝ່າຍສົນໃຈ.
（ແຫຼ່ງຂໍ້ມູນ： ຂປລ）
