 |
ສະຫາຍ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ ໄດ້ເຂົ້າວາງພວງມາລາ ແລະ ເຊັນປື້ມໄຫວ້ອາໄລ ຕໍ່ການເສຍຊີວິດຂອງ ສະຫາຍ ເຈິ່ນ ດ໋າຍ ກວາງ ອະດີດກຳມະການກົມການເມືອງສູນກາງພັກ, ອະດີດປະທານປະເທດ ແຫ່ງ ສສ ຫວຽດນາມ.
ຄະນະພັກ, ຄະນະນຳ ບັນດາກະຊວງ, ອົງການ, ສະ ມາຄົມ, ກົມກອງຕ່າງໆ ໄດ້ເຂົ້າວາງພວງມາລາ ແລະ ເຊັນປື້ມໄຫວ້ອາໄລ ຢູ່ສະຖານທູດຫວຽດນາມ ປະຈຳ ສປປ ລາວ ຕໍ່ການເສຍຊີວິດຂອງ ສະຫາຍ ເຈິ່ນ ດ໋າຍ ກວາງ ອະດີດກຳມະການກົມການເມືອງສູນກາງພັກ, ອະດີດປະທານປະເທດ ແຫ່ງ ສສ ຫວຽດນາມ ເປັນຕົ້ນ ກະຊວງການເງິນ ນຳໂດຍ ສະຫາຍ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ, ກະຊວງພະລັງງານ ແລະ ບໍ່ແຮ່ ນຳໂດຍ, ສະຫາຍ ຄຳມະນີ ອິນທິລາດ ລັດຖະມົນຕີ ກະຊວງດັ່ງກ່າວ, ສະຫາຍ ນາງ ອິນລາວັນ ແກ້ວບຸນພັນ ປະທານສູນກາງສະຫະພັນຍິງລາວ, ສະຫາຍ ພົນຈັດຕະວາ ສົມພອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງຊາດລາວ ແລະ ຄະນະອື່ນໆ ເຂົ້າຮ່ວມ.
ພາຍຫລັງວາງພວງມະລາແລ້ວ ສະຫາຍ ສົມດີ ດວງດີ ແລະ ບັນດາລັດຖະມົນຕີ ໄດ້ເຂົ້າເຊັນປື້ມໄຫວອາໄລ, ໂດຍມີເນື້ອໃນສະແດງຄວາມໂສກເສົ້າເສຍໃຈ ເປັນຢ່າງຍິ່ງ ເມື່ອໄດ້ຮັບຂ່າວການຈາກໄປໂດຍບໍ່ມີວັນກັບຄືນມາຂອງສະຫາຍ ເຈິ່ນດ໋າຍ ກວາງ, ການຈາກໄປຂອງສະຫາຍ ບໍ່ພຽງແຕ່ເປັນການສູນເສຍຜູ້ນຳທີ່ເຄົາລົບຮັກຂອງພັກ, ລັດ ແລະ ປະຊາຊົນຫວຽດນາມ ແຕ່ຍັງເປັນ ການສູນເສຍເພື່ອນມິດ ສະຫາຍທີ່ໃກ້ຊິດ ແລະ ສະໜິດສະໜົມທີ່ສຸດຂອງພັກ, ລັດ ແລະ ປະຊາຊົນລາວ.
ສະຫາຍ ເຈິ່ນດ໋າຍ ກວາງ ເປັນຜູ້ໜຶ່ງທີ່ປະກອບສ່ວນອັນສໍາຄັນ ເຂົ້າໃນພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ ຂອງ ສສ ຫວຽດນາມ, ໂດຍສະເພາະ ໃນຂົງເຂດວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍພາຍໃນ ຂອງ ສສ ຫວຽດນາມ, ທັງເປັນຜູ້ທີ່ປະກອບສ່ວນອັນສຳຄັນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຕະຫລອດມາ.
（ແຫຼ່ງຂໍ້ມູນ： ຂປລ）
