ໃນລະຫວ່າງວັນທີ 10-11 ກັນຍາ 2018 ທີ່ເມືອງວິລະບູລີ ແຂວງ ສະຫວັນນະເຂດ, ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ (ສສຊ) ປະຈໍາ ເຂດເລືອກຕັ້ງທີ 13 ແຂວງສະຫວັນເຂດ, ພ້ອມດ້ວຍບັນດາ ສສຊ ແລະ ສະມາຊິກສະພາປະຊາຊົນແຂວງ (ສສຂ) ປະຈໍາເມືອງ ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ໂຄສະນາເຜີຍແຜ່ຜົນສໍາເລັດ ກອງປະຊຸມ ສະໄໝ ສາມັນເທື່ອທີ 5 ຂອງສະພາແຫ່ງຊາດ (ສພຊ) ຊຸດທີ VIII ແລະ ສະພາປະຊາຊົນແຂວງ (ສພຂ) ຊຸດທີ I ໃນນີ້, ໄດ້ລົງພົບປະ ແລະ ເຜີຍແຜ່ຢູ່ອົງ ການປົກຄອງເມືອງວີລະບູລີ, ບ້ານນາມະລຸ ແລະ ບ້ານນໍ້າຈະໂລະ; ເຂົ້າຮ່ວມ ມີ ບັນດາ ທ່ານຄະນະປະຈໍາພັກເມືອງ, ພະນັກງານ-ລັດຖະກອນ, ທະຫານ-ຕໍາຫລວດ, ພະນັກງານອາວຸໂສບໍານານ ຕະຫລອດຮອດພໍ່ແມ່ປະຊາຊົນ ອ້ອມຂ້າງເມືອງ ແລະ ບ້ານ.
 |
ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ (ສສຊ) ປະຈໍາ ເຂດເລືອກຕັ້ງທີ 13 ແຂວງສະຫວັນເຂດ.
ໃນກອງປະຊຸມດັ່ງກ່າວ, ໄດ້ຮັບຟັງການລາຍງານ ໂດຍສັງເຂບສະພາບແຜນພັດທະນາ ເສດຖະກິດ-ສັງຄົມ ຂອງເມືອງ ແລະ ບ້ານ ເຊິ່ງໃຫ້ເຫັນໄດ້ຂໍ້ສະດວກ ແລະ ຂໍ້ຫຍຸ້ງຍາກ, ພ້ອມທັງໃຫ້ຮູ້ເຖິງຜົນກະທົບ ຂອງບັນດາໄພພິບັດທໍາມະຊາດ ເປັນຕົ້ນ ສະພາບນໍ້າຖ້ວມ ທີ່ເຮັດໃຫ້ປະຊາຊົນພົບຄວາມຫຍຸ້ງຍາກໃນການດໍາລົງຊີວິດ; ຈາກນັ້ນ, ບັນດາທ່ານ ສສຊ ແລະ ສສຂ ໄດ້ຜັດປ່ຽນກັນເຜີຍແຜ່ຜົນສໍາເລັດ ຂອງກອງປະຊຸມ ດັ່ງກ່າວ. ໃນນີ້, ທ່ານຮອງປະທານສະພາແຫ່ງຊາດ ໄດ້ເຜີຍແຜ່ຜົນສຳເລັດກອງປະຊຸມ ສະໄໝສາມັນເທື່ອທີ 5 ຂອງ ສພຊ ຊຸດທີ VIII ເຊິ່ງຈັດຂຶ້ນ ລະຫວ່າງ 5-28 ມິຖຸນາ 2018 ເຊິ່ງໄດ້ພິຈາລະນາຮັບຮອງ ຫລາຍບັນຫາ ໃນກອງປະຊຸມ ເປັນຕົ້ນ ພິຈາລະນາ, ຮອງຮັບເອົາມະຕິກອງປະຊຸມສະພາແຫ່ງຊາດ 4 ສະບັບ. ໃນນັ້ນ ມະຕິກ່ຽວກັບວຽກງານ ຂອງລັດຖະບານ 3 ສະບັບ ແລະ ກ່ຽວກັບສານປະຊາຊົນສູງສຸດ 1 ສະບັບ; ຮັບຟັງການລາຍ ງານຂອງ ລັດຖະບານກ່ຽວກັບການປະຕິບັດມະຕິ ກອງປະຊຸມສະພາແຫ່ງຊາດ ວ່າດ້ວຍ ການອອກນິຕິກໍາລຸ່ມກົດໝາຍ ແລະ ຜົນກະທົບ ຈາກການນໍາໃຊ້ເຄມີອັນຕະລາຍເກີນຄ່າມາດຕະຖານ ຕໍ່ສິ່ງແວດລ້ອມ ແລະ ທໍາມະ ຊາດ, ຮັບຟັງການຊີ້ແຈງ ຈາກທ່ານນາຍົກລັດຖະມົນຕີ ແລະ ບັນດາລັດຖະມົນຕີ 5 ກະຊວງ ຕໍ່ຄໍາຖາມຂອງສະພາແຫ່ງຊາດ; ຮັບຟັງການລາຍງານຂອງສະພາແຫ່ງຊາດ ກ່ຽວກັບການປະຕິບັດແຜນການເຄື່ອນໄຫວ ວຽກງານ ຂອງຄະນະປະຈໍາສະພາແຫ່ງຊາດ ລະຫວ່າງ ກອງປະຊຸມສະໄໝສາມັນເທື່ອທີ 4 ຫາເທື່ອທີ 5 ແລະ ທິດທາງແຕ່ນີ້ ຮອດກອງປະຊຸມສະໄໝສາມັນເທື່ອທີ 6; ພິຈາລະນາ, ຮັບຮອງເອົາການສ້າງ ແລະ ປັບປຸງກົດໝາຍ ທັງໝົດ 13 ສະບັບ, ເຊິ່ງປະກອບມີກົດໝາຍສ້າງໃຫມ່ 5 ສະບັບແລະ ປັບປຸງ 8 ສະບັບ. ສັງລວມແລ້ວເນື້ອໃນທີ່ໄດ້ພິຈາລະນາ, ຮັບຮອງເອົາໃນກອງປະຊຸມຄັ້ງນີ້, ກໍເພື່ອຮັບປະກັນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍໃຫ້ດີຂຶ້ນເທື່ອລະກ້າວ ແລະ ນໍາເອົາຜົນປະໂຫຍດຕົວຈິງສູງສຸດ ມາໃຫ້ປະຊາຊົນລາວບັນດາເຜົ່າ.
 |
ບັນຍາກາດກອງປະຊຸມເຜີຍແຜ່ຜົນສຳເລັດ ກອງປະຊຸມ ສະໄໝ ສາມັນເທື່ອທີ 5 ຂອງສະພາແຫ່ງຊາດ (ສພຊ) ຊຸດທີ VIII ແລະ ສະພາປະຊາຊົນແຂວງ (ສພຂ) ຊຸດທີ I.
ໃນການລົງພົບປະ ແລະ ເຜີຍແຜ່ຜົນສໍາເລັດໃນຄັ້ງນີ້, ບັນດາ ສສຊ ແລະ ສສຂ ໄດ້ລົງຕິດຕາມ ແລະ ຢ້ຽມຢາມໂຮງານຜະລິດເຈ້ຍຊັນເປເປີ້ ຢູ່ເມືອງເຊໂປນ; ພ້ອມທັງໄດ້ຮັບຟັງຄໍາສະເໜີ, ຄໍາຄິດ ເຫັນຂອງປະຊາຊົນ ທີ່ພົບຄວາມຫຍຸ້ງຍາກໃນການດຳລົງຊີວິດ ແລະ ບັນຫາຕ່າງໆທີ່ເກີດຂຶ້ນຕົວຈິງ ເປັນຕົ້ນບັນຫາເສັ້ນທາງມີຄວາມຫຍຸ້ງຍາກ ໃນການໄປຫາໃນລະດູຝົນ, ບັນຫານໍ້າສະອາດ, ໄຟຟ້າ, ໂຮງຮຽນ, ໂທລະໂຄ່ງ ປະຈໍາ ບ້ານ, ທຶນບຸກເບີກເນື້ອທີ່ນາ ແລະ ຊ້າງປ່າທີ່ເຂົ້າມາທໍາລາຍຜົນຜະລິດເຄື່ອງປູກ ຂອງຝັງຂອງປະຊາ ຊົນເຂດບ້ານນາມະລຸ; ພ້ອມນັ້ນ, ບັນດາສສຊ ແລະ ສສຂ ກໍໄດ້ມີຄໍາຄິດຄຳເຫັນ ໃນການແກ້ໄຂ ບັນຫາເບື້ອງ ຕົ້ນ ແລະ ຮັບເອົາຄໍາສະເໜີຂອງປະຊົນ ໄປນໍາສະເໜີຕໍ່ພາກ ສ່ວນທີ່ກ່ຽວຂ້ອງ ເພື່ອຫາວິທີການແກ້ໄຂໃນຕໍ່ໜ້າ.
（ຫັດທະບູນ）
