 |
ພາບຈັດງານລ້ຽງ ສະເຫລີມສະຫລອງວັນຊາດ ມາເລເຊຍ ຄົບຮອບ 61 ປີ ແລະ ສະເຫລີມສະຫລອງຄົບຮອບ 52 ປີ ວັນສ້າງຕັ້ງສາຍພົວພັນການທູດ ລະຫວ່າງ ມາເລເຊຍ ແລະ ລາວ. (ພາບ: ຂປລ)
ໂອກາດດັ່ງກ່າວ, ທ່ານ ໂໝດ ໄອນີ ອາຕັນ (Mohd Aini Atan) ເອກອັກຄະລັດຖະທູດ ມາເລເຊຍ ປະຈຳ ສປປ ລາວ, ໄດ້ກ່າວເຖິງວິວັດທະນາການຂອງການພັດທະນາ, ການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ຂອງມາລາເຊຍ ໃນໄລຍະຜ່ານມາ, ເຊິ່ງປັດຈຸບັນ ມາເລເຊຍ ໄດ້ປະສົບຜົນສຳເລັດ ໃນການຈະເລີນເຕີບໂຕ ໃນຮູບແບບທີ່ມີຄວາມສົມບູນຢ່າງຍືນຍົງ ແລະ ຄົບວົງຈອນ.
ທ່ານ ໂໝດ ໄອນີ ອາຕັນ ຍັງໄດ້ຍົກໃຫ້ເຫັນເຖິງ ສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ມາເລເຊຍ ແລະ ລາວ ຕະຫລອດ ໄລຍະ 52 ປີ ໄດ້ມີຄວາມສຳພັນຢ່າງໃກ້ຊິດ ແລະ ຮ່ວມມືກັນຕະຫລອດມາ ແລະ ທີ່ຈະສືບຕໍ່ເສີມສ້າງ, ຮັດແໜ້ນສາຍພົວພັນ ມິດຕະພາບ ແລະ ການຮ່ວມມືອັນດີ ໃຫ້ນັບມື້ແຕກດອກອອກຜົນ ແລະ ເຕີບໃຫຍ່ຂະຫຍາຍຕົວຍິ່ງໆຂຶ້ນໃນຕໍ່ໜ້າ. ນອກຈາກນີ້, ລັດຖະບານມາເລເຊຍ ຍັງໄດ້ໃຫ້ການຊ່ວຍເຫລືອ ດ້ານການພັດທະນາ ຊັບພະຍາກອນມະນຸດ, ຊ່ວຍເຫລືອຜູ້ປະສົບໄພພິບັດທາງທຳມະຊາດ ແລະ ດ້ານອື່ນໆ ແກ່ ສປປ ລາວ.
ທ່ານທູດ ກ່າວຕື່ມວ່າ: ໃນດ້ານການຄ້າ ແລະ ການລົງທຶນ. ປັດຈຸບັນ ມາເລເຊຍ ຈັດເປັນອັນດັບທີ 4 ຂອງນັກລົງທຶນຕ່າງປະເທດ ທີ່ມາລົງທຶນໃນ ສປປ ລາວ, ເຊິ່ງມູນຄ່າການຄ້າສອງຝ່າຍ ໄດ້ສືບຕໍ່ຂະຫຍາຍຕົວເປັນຕົ້ນແມ່ນ ເສດຖະກິດພິເສດ ແລະ ເຂດເສດຖະກິດສະເພາະ, ທະນາຄານ ແລະ ບໍລິການດ້ານການເງິນ, ປະກັນໄພ, ທ່ອງທ່ຽວ, ການຜະລິດ, ການສຶກສາ, ບໍ່ແຮ່, ກໍ່ສ້າງ, ໄຟຟ້າພະລັງງານນ້ຳ, ກະສິກຳ, ການຄ້າ, ທີ່ປຶກສາ ແລະ ອື່ນໆຕື່ມອີກ.
（ແຫຼ່ງຂໍ້ມູນ： ຂປລ）
