 |
ນາຍົກລັດຖະມົນຕີ ທອງລຸນ ສີສຸລິດ ຕ້ອນຮັບ ທ່ານນາງ ປາກ ຊູນ ຈາ ປະທານກຳມາທິການ ໂຍທາທິການ-ຂົນສົ່ງ ສ.ເກົາຫລີ. (ພາບ: ຂປລ)
ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາສູງຕໍ່ ທ່ານ ນາງ ປາກ ຊູນ ຈາ ທີ່ໄດ້ນຳພາຄະນະ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້, ເຊິ່ງເປັນການ ປະກອບສ່ວນອັນສຳຄັນ ເຂົ້າໃນການຮັດແໜ້ນສາຍພົວພັນຮ່ວມມື ຮອບດ້ານ ໂດຍສະເພາະການປະແລກປ່ຽນບົດຮຽນ, ຊ່ວຍເຫລືອເຊິ່ງກັນ ແລະ ກັນ ໃນວຽກງານຕ່າງໆ ລະຫວ່າງ ສອງຄະນະມິດຕະພາບ ລັດຖະສະພາລາວ-ສ.ເກົາຫລີ ໃຫ້ແຕກ ດອກອອກຜົນຍິ່ງໆຂຶ້ນ.
ພ້ອມນີ້, ທ່ານ ນາງ ປາກ ຊູນ ຈາ ກໍໄດ້ສະແດງຄວາມຂອບໃຈ ຕໍ່ ທ່ານ ທອງລຸນ ສີສຸລິດ ທີ່ໄດ້ໃຫ້ກຽດສະຫລະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງແຈ້ງຈຸດປະສົງ ໃນການເດີນທາງມາຢ້ຽມຢາມ ແລະ ເຮັດ ວຽກ ໃຫ້ທ່ານນາຍົກລັດຖະມົນຕີ ຮັບຊາບ ແລະ ຢືນຢັນວ່າຈະສືບຕໍ່ເສີມຂະຫຍາຍສາຍພົວພັນ ແລະ ການຮ່ວມມື ໃຫ້ແຕກດອກອອກຜົນ ແລະ ແໜ້ນແຟ້ນຍິ່ງໆຂຶ້ນ.
（ແຫຼ່ງຂໍ້ມູນ： ຂປລ）
