 |
ພະນະທ່ານປະທານປະເທດ ບຸນຍັງ ວໍລະຈິດ ໂອ້ລົມຊີ້ນຳ ຄະນະຮັບຜິດຊອບແກ້ໄຂ ໄພພິບັດທຸກໆຂັ້ນ.
ໃນໂອກາດດຽວກັນ, ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື ໄດ້ລາຍງານໃຫ້ຊາບ ກ່ຽວກັບສະພາບ ການແກ້ໄຂ ແລະ ຊ່ວຍເຫຼືອປະຊາຊົນ ທີ່ຖືກຜົນກະທົບຈາກໄພນໍ້າຖ້ວມ ຢູ່ທີ່ ເມືອງສະໜາມໄຊ ວ່າ: ເມືອງສະໜາມໄຊ ເປັນເມືອງໜຶ່ງທີ່ທຸກຍາກ ຫ່າງຈາກເທດສະ ບານແຂວງ 35 ກິໂລແມັດ, ມີ 40 ບ້ານ, 6.771 ຄອບຄົວ, ມີພົນລະເມືອງ 36 ພັນກວ່າຄົນ ໃນນີ້ ມີບ້ານ ທີ່ ໄດ້ຮັບຜົນກະທົບຈາກໄພນໍ້າຖ້ວມ 13 ບ້ານ,ມີ 2.717 ຄອບຄົວ, ມີພົນລະເມືອງ 13.067 ຄົນ, ໃນນີ້ໄດ້ຮັບຜົນກະທົບ 100% ມີ 6 ບ້ານ ຄື: ບ້ານຫີນລາດ, ບ້ານສະໜອງໃຕ້, ບ້ານທ່າຫີນ,ບ້ານໃໝ່, ບ້ານທ່າແສງຈັນ ແລະ ບ້ານໃຫຍ່ແທ, ໃນ 6 ບ້ານດັ່ງກ່າວ ມີຈໍານວນ 1.611 ຄອບຄົວ, ມີ 7.095 ຄົນ ແລະ ໄດ້ຍົກຍ້າຍມາຢູ່ເຂດທີ່ປອດໄພຢູ່ 6 ຈຸດ ຄື: ຈຸດເທສະບານ ເມືອງ ສະ ໜາມໄຊ, ຈຸດບ້ານຕະມໍຢອດ, ຈຸດບ້ານດອນບົກ, ຈຸດບ້ານປິນດົງ,ຈຸດພັກໂຮງຮຽນ ມສ ຈັນທາ ແລະ ບ້ານຄອນທູດ. ສໍາລັບຈໍານວນຜູ້ສາບສູນມີທັງໝົດ 131 ຄົນ. ມາຮອດປະຈຸບັນສາມາດເກັບກູ້ຊາກ ສົບ ໄດ້ໃນສະໜາມ ຈໍານວນ 34 ສົບ, ຍິງ 18 ສົບ. ໃນນີ້, ມີເດັກອາຍຸ 10 ປີລົງມາ ຈໍານວນ 13 ສົບ, ຍິງ 6 ສົບ ແລະ ເສຍຊີວິດຕື່ມອີກ 5 ສົບຢູ່ທີ່ໂຮງໝໍ ເຊິ່ງລວມຜູ້ເສຍຊີວິດທັງໝົດ ຈໍານວນ 39 ຄົນ, ຍິງ 18 ຄົນ ແລະ ຜູ້ທີ່ຍັງສາບສູນມີ 97 ຄົນ.ຕໍ່ເຫດການທີ່ເກີດຂຶ້ນດັ່ງກ່າວ, ທາງອໍານາດການປົກຄອງແຂວງອັດຕະປື ໄດ້ສຸມທຸກກໍາລັງ ຈາກພາກ ສ່ວນ ໄປຊ່ວຍເຫຼືອປະຊາຊົນທີ່ຖືກຜົນກະທົບຢ່າງຮີບດ່ວນ ໂດຍສົມທົບກັບກຳລັງປ້ອງ ກັນຊາດ, ປ້ອງກັນຊາດຄວາມສະຫງົບ, ແພດໝໍ, ສື່ມວນຊົນ, ອາສາສະໝັກ ຈາກພາຍ ໃນ ແລະ ຕ່າງ ປະເທດ ເພື່ອຊ່ວຍເຫຼືອ ຈົນສຸດຄວາມສາ ມາດ ໃນການຊ່ວຍເຫຼືອບັນ ເທົາທຸກ ແລະ ຊອກຄົ້ນຫາຜູ້ປະສົບໄພທີ່ ສູນຫາຍຈາກໄພພິບັດດັ່ງກ່າວ. ພ້ອມດຽວ ກັນກໍ່ໄດ້ມີການລະດົມທຶນຮອນ, ວັດຖຸອຸປະກອນ,ເຄື່ອງອຸໂພກບໍລິໂພກ ຈາກພາກສ່ວນຕ່າງໆໃນຂອບເຂດທົ່ວປະເທດ ແລະ ການຊ່ວຍ ເຫຼືອໃນດ້ານຕ່າງຈາກຕ່າງປະເທດ ມາຮອດປະຈຸບັນໄດ້ຮັບເງິນຈາກການບໍລິຈາກທັງໝົດ 19 ຕື້ກວ່າກີບ. ນອກຈາກນີ້, ຍັງໄດ້ຮັບເງິນຈາກບໍລິສັດທີ່ເປັນຂາຫຸ້ນໂຄງການເຂື່ອນ ເຊປຽນ-ເຊນໍ້ານ້ອຍ ຈໍານວນ 18 ຕື້ກວ່າກີບ ແລະ 1 ລ້ານໂດລາສະຫະລັດ; ສໍາລັບເຄື່ອງອຸປະໂພກ-ບໍລິໂພກ ລວມເປັນມູນຄ່າທັງໝົດ 63 ຕື້ກວ່າກີບ.
 |
 |
ພະນະທ່ານ ປະທານປະເທດຢ້ຽມຢາມ ຖາມຂ່າວ ພໍ່ແມ່ພີ່ນ້ອງຜູ້ປະສົບໄພ.
ໃນໂອກາດໃຫ້ກຽດໂອ້ລົມ ຄັ້ງນີ້, ທ່ານປະທານປະເທດ ບຸນຍັງ ວໍລະຈິດ ໄດ້ເນັ້ນໜັກໃຫ້ອໍານາດການປົກຄອງແຂວງອັດຕະປື ເອົາໃຈໃສ່ຮີບຮ້ອນແຈກຢາຍເງິນ ໃຫ້ແຕ່ລະຄອບຄົວທີ່ຮັບຜົນກະທົບຈາກໄພພິບັດໂດຍໄວ, ຕ້ອງຮັບປະກັນຄວາມໂປ່ງໃສທີ່ສຸດ, ພະຍາຍາມບໍ່ໃຫ້ມີການຕົກຫລົ່ນເສຍຫາຍ ແມ່ນແຕ່ອັດດຽວ; ຮັບປະກັນຖືກຕ້ອງຕາມລະບຽບ ແລະ ວ່ອງໄວກວ່າເກົ່າ; ໃຫ້ນຳໃຊ້ເຄື່ອງຂອງ ອຸປະກອນຕ່າງໆ ທີ່ແຕ່ລະພາກສ່ວນທັງພາຍໃນ ແລະ ຕ່າງປະເທດແຈກຢາຍແກ່ປະຊາຊົນ ໂດຍໄວ, ໂດຍສະເພາະແມ່ນເຄື່ອງຂອງຮັບໃຊ້ໃນຊີວິດປະຈຳວັນ ແລະ ຈຳເປັນທີ່ສຸດ; ສຳລັບການປຸກສ້າງເຮືອນພັກເຊົາຊົ່ວຄາວ ແມ່ນໃຫ້ລະດົມກຳລັງມະຫາຊົນ, ກອງກຳລັງ ແລະ ສະມາຊິກຂອງອົງການຈັດຕັ້ງມະຫາຊົນທົ່ວປະເທດ ໃຫ້ເຂົ້າມາຊ່ວຍເປັນກຳລັງໃນການກໍ່ສ້າງ, ແຕ່ຕ້ອງມາດ້ວຍຄວາມສະຫມັກໃຈ ແລະ ໃຫ້ເຂົາເຈົ້າຊ່ວຍກຸ້ມຕົນເອງ ໃນການດຳລົງຊີວິດໃນໄລຍະຢູ່ເຂດປະສົບໄພ, ພະຍາຍາມບໍ່ໃຫ້ສິ້ນເປືອງງົບປະມານທີ່ມາຊ່ວຍເຫຼືອປະຊາຊົນ; ເອົາໃຈໃສ່ບັນຫາສຸຂະພາບຂອງປະຊາຊົນໂດຍລວມ ບໍ່ສະເພາະແຕ່ຢູ່ເມືອງສະໜາມໄຊ ລວມທັງເມືອງອື່ນໆທີ່ໄດ້ຮັບຜົນກະທົບ, ໂດຍສະເພາະແມ່ນການເກີດພະຍາດຕິດແປດ ທີ່ມີຄວາມສ່ຽງໃນການລະບາດໄວວາ; ໃຫ້ລະດົມແພດໝໍພາຍໃນແຂວງກ່ອນ ຖ້າຍັງບໍ່ພຽງພໍຈຶ່ງສະເໜີການຊ່ວຍເຫຼືອເພີ່ມເຕີມນຳລັດຖະ ບານ. ພ້ອມກັນນີ້, ກໍ່ໃຫ້ເອົາ ໃຈໃນການາກວດກາຄຸນນະ ພາບ ຂອງສະບຽງອາຫານປະເພດຕ່າງໆ ທີ່ໄດ້ຮັບການບໍລິ ຈາກ ມາແຕ່ລະໄລຍະ ທີ່ຍັງຄ້າງໄວ້ໃນສາງຈຳນວນໜຶ່ງ, ໂດຍສະເພາະແມ່ນອາຫານແຫ້ງ-ອາຫານສົດ ກ່ອນທີ່ຈະມີການແຈກຢາຍ ແລະ ປຸງແຕ່ງໃຫ້ແກ່ປະຊາຊົນນຳໄປບໍລິໂພກ; ໃຫ້ເອົາໃຈໃສ່ສ້ອມແປງບັນດາຫ້ອງຮຽນ ທີ່ໄດ້ຮັບຄວາມເສຍຫາຍ ແລະ ເປ່ເພ ໃຫ້ສຳເລັດໂດຍໄວ ເພື່ອກະກຽມເປີດສົກຮຽນໃໝ່ໃນຕົ້ນເດືອນກັນຍາ ທີ່ຈະມາເຖິງນີ້. ນອກຈາກນີ້ ກໍ່ໃຫ້ປະກອບອຸປະກອນການຮຽນຄົບຊຸດໃຫ້ແກ່ນັກຮຽນທີ່ມາຈາກເຂດປະສົບໄພພິບັດ ທີ່ຍັງຂາດເຂີນອຸປະກອນການຮຽນ ລວມທັງຊຸດນັກຮຽນ ລວມທັງຄູອາ ຈານຜູ້ທີ່ໄດ້ຮັບຜົນກະທົບເຊັ່ນກັນ. ສຳລັບອຸປະ ກອນຕ່າງໆເຫລົ່ານັ້ນຫາກຍັງບໍ່ໄດ້ຮັບການຊ່ວຍເຫຼືອຈາກພາກສ່ວນຕ່າງໆ ຫລື ບໍ່ພຽງພໍກໍ່ໃຫ້ນຳໃຊ້ງົບປະມານທີ່ໄດ້ຮັບຈາກການຊ່ວຍເຫຼືອນັ້ນ ມາຈັດຊຶ້ໃຫ້ນັກຮຽນ ແລະ ຄູອາຈານໂດຍໄວ.
 |
ທ່ານ ບຸນຍັງ ວໍລະຈິດ ຍັງໄດ້ມອບເງິນຈໍານວນ 1 ຕື້ກີບ ເພື່ອນໍາໄປຊ່ວຍເຫຼືອ ຜູ້ທີ່ປະສົບໄພພິບັດທີ່ເກີດຂຶ້ນຢູ່ເມືອງສະໜາມໄຊ.
ພ້ອມດຽວກັນນີ້, ທ່ານ ບຸນຍັງ ວໍລະຈິດ ຍັງໄດ້ມອບເງິນຈໍານວນ 1 ຕື້ກີບ ເພື່ອນໍາໄປຊ່ວຍເຫຼືອ ຜູ້ທີ່ປະສົບໄພພິບັດທີ່ເກີດຂຶ້ນຢູ່ເມືອງສະໜາມໄຊ. ຈາກນັ້ນ, ທ່ານປະທານປະເທດພ້ອມດ້ວຍຄະນະ ຍັງໄດ້ເດີນທາງໄປຢ້ຽມຜູ້ປະສົບໄພ ຢູ່ທີ່ໂຮງໝໍແຂວງອັດຕະປື , ພ້ອມທັງຢ້ຽມຢາມ ແລະ ມອບເຄື່ອງຊ່ວຍເຫຼືອໃຫ້ປະຊາຊົນ ທີ່ຖືກຜົນກະທົບທີ່ຍົກຍ້າຍຈາກປາກຊ່ອງ ຈໍານວນ 53 ຄອບຄົວ, 187 ຄົນ ຢູ່ທີ່ໂຮງຮຽນມັດທະຍົມສຶກ ສາສົມບູນຈັນທາ ຕື່ມອີກ.
（ຫັດທະບູນ）
