 |
ທີມກູ້ໄພຍັງສືບຕໍ່ຄົ້ນຫາຜູ້ທີ່ຍັງຕົກຄັ້ງໃນເຂດປະສົບໄພພິບັດ.
ການກູ້ໄພ ແລະ ການຊ່ວຍເຫລືອ ຜູ້ປະສົບໄພພິບັດ ມີຄວາມຄືບໜ້າເປັນລຳດັບ ເປັນຕົ້ນແມ່ນການຊອກຄົ້ນຫາສົບຜູ້ເສຍຊີວິດ, ຜູ້ທີ່ສົງໄສອາດຈະຕົກຄ້າງຜ່ານມາ, ການເຄື່ອນຍ້າຍຜູ້ປະສົບໄພເຂົ້າມາ ຢູ່ຈຸດພັກຊົ່ວຄາວ ຢູ່ເມືອງສະໜາມໄຊ, ການຊ່ວຍເຫລືອເບື້ອງຕົ້ນ, ການຮັບເຄື່ອງບໍລິຈາກ ແລະ ແຈກຢາຍໃຫ້ຜູ້ປະສົບໄພ. ພ້ອມນີ້ ໄດ້ໃຫ້ຄວາມສຳຄັນ ວຽກງານສຸຂະສຶກສາ, ກວດກາ ແລະ ປິ່ນປົວສຸຂະພາບ ພ້ອມທັງເລັ່ງມືວຽກງານຕ່າງໆ ເພື່ອອຳນວຍຄວາມສະດວກ ເຮັດໃຫ້ການກູ້ໄພ ແລະ ຊ່ວຍເຫລືອບັນເທົາທຸກ, ແກ້ໄຂຜົນກະທົບຄັ້ງນີ້ ກັບຄືນສູ່ສະພາວະປົກກະຕິໂດຍໄວ.ລັດຖະບານ ໄດ້ເພີ່ມການຊີ້ນຳ ຢ່າງໃກ້ຊິດ ລວມທັງລົງຕິດຕາມຊຸກຍູ້ຕົວຈິງ ຢູ່ພື້ນທີ່ປະສົບໄພ ອັນໄດ້ສ້າງຄວາມເຊື່ອໝັ້ນ ແລະ ໃຫ້ກຳລັງໃຈທຸກພາກສ່ວນ ໄດ້ປະຕິບັດພາລະກິດທຸ່ມເທ ແຂ່ງກັບເວລາ. ນອກຈາກນີ້, ຂະແໜງການຈາກສູນກາງທີ່ກ່ຽວຂ້ອງ ກໍໄດ້ຈັດສົ່ງພະນັກງານລົງຊ່ວຍ ເພື່ອບໍລິຫານຄຸ້ມຄອງ ແລະ ອຳນວຍຄວາມສະດວກ ເຮັດໃຫ້ການກູ້ໄພ, ການຊ່ວຍເຫລືອດຳເນີນໄປຢ່າງວ່ອງໄວກວ່າເກົ່າ. ສຳລັບການຊ່ວຍເຫລືອຜູ້ປະສົບໄພຄັ້ງນີ້, ມີໜ່ວຍກູ້ໄພທັງໝົດ 31 ພາກສ່ວນ, ມີ 180 ຄົນ. ສະເພາະວັນທີ 29 ມິຖຸນາ 2018 ນີ້, ໄດ້ມີໜ່ວຍກູ້ໄພມາເພີ່ມອີກ 4 ຄະນະ ຄື: ຈາກປະເທດໄທ 3 ຄະນະ, ມີ 49 ຄົນ, ຈາກ ສປ ຈີນ 1 ຄະນະ, ມີ 8 ຄົນ, ອາສາສະໝັກການແພດ 1 ຄະນະ, ມີ 4 ຄົນ, ອາສາສະໝັກບໍລິການຂົນສົ່ງ 3 ຄະນະ, ມີລົດ 18 ຄັນ ເຊິ່ງໄດ້ຊ່ວຍເຮັດໃຫ້ການຄົ້ນຫາ ແລະ ຊ່ວຍເຫລືອຂະຫຍາຍເປັນວົງກວ້າງຕື່ມອີກ. ພ້ອມນັ້ນ, ຍັງໄດ້ເຕົ້າໂຮມປະຊາຊົນ 6 ບ້ານ ຍ້າຍມາຢູ່ເຂດປອດໄພ ເພື່ອຊ່ວຍເຫລືອບັນເທົາທຸກ ໃນ 6 ຈຸດ ມີພົນລະເມືອງທັງໝົດ 5.964 ຄົນ. ທັງພົບອີກ 1 ສົບ, ລວມເປັນ 9 ສົບ. ຈຳນວນພົນລະເມືອງ ທີ່ຈະຕ້ອງກວດກາຄືນ (ສະຖິຕິ ປີ 2018) ຍັງບໍ່ທັນພົບເຫັນ 1.122 ຄົນ, ບັນຫານີ້ ຈະຮີບຮ້ອນ ອອກບັດໃຫ້ຜູ້ປະສົບໄພ ທີ່ຢູ່ຈຸດປອດໄພແລ້ວ ເພື່ອຈະໄດ້ກວດກາຄືນໃຫ້ລະອຽດຕື່ມ.
ໃນຂະນະດຽວກັນ, ທາງແຂວງ ໄດ້ຈັດຕັ້ງສູນຮັບເຄື່ອງບໍລິຈາກ ແລະ ເຄື່ອງຊ່ວຍເຫລືອບັນເທົາທຸກ 2 ຈຸດ ຄື: ຢູ່ຫ້ອງວ່າການປົກຄອງແຂວງ ແລະ ຢູ່ເມືອງສະໜາມໄຊ, ມາຮອດປັດຈຸບັນ ບັນດາອົງການຈັດຕັ້ງຂອງລັດ, ພາກເອກະຊົນ, ນັກທຸລະກິດ, ສະມາຄົນ, ມູນນິທິ, ກຸ່ມຄົນ, ບຸກຄົນ ທັງພາຍໃນ ແລະ ຕ່າງປະເທດ ໄດ້ນຳເອົາເຄື່ອງອຸປະໂພກ-ບໍລິໂພກ ແລະ ເງິນສົດມາຊ່ວຍເຫລືອຜູ້ປະສົບໄພ ລວມມູນຄ່າທັງໝົດ 33.696.185.847 ກີບ. ໃນນັ້ນ, ເງິນສົດ 12.457.244.928 ກີບ, ເປັນສະກຸນຕ່າງປະເທດ 39.550 ບາດ ແລະ 100 ໂດລາສະຫະລັດ. ເຄື່ອງຊ່ວຍເຫລືອສ່ວນຫລາຍ ໄດ້ມອບຢູ່ແຂວງ ແລະ ສົ່ງຕໍ່ມາເມືອງ, ຈຳນວນໜຶ່ງຜູ້ບໍລິຈາກໄດ້ນຳໄປມອບ ໃຫ້ຜູ້ປະສົບໄພ ຢູ່ເມືອງ ຫລື ແຈກຢາຍດ້ວຍຕົນເອງ ອັນໄດ້ເຮັດໃຫ້ຜູ້ປະສົບໄພໄດ້ ຮັບການຊ່ວຍເຫລືອຫລາຍຂຶ້ນ.
ແຂວງໄດ້ຕັ້ງຈຸດບໍລິການສຸຂະພາບ ຢູ່ເທດສະບານເມືອງ 6 ຈຸດ ແລະ ຢູ່ນອກພື້ນທີ່ເສັ້ນທາງບໍ່ທັນສາມາດ ເຂົ້າເຖິງສະດວກ ມີ 6 ຈຸດ, ມີພະນັກງານແພດໝໍ ທັງໝົດ 97 ຄົນ. ໃນນັ້ນ, ແພດຈາກຕ່າງປະເທດ 31 ຄົນ, ໄດ້ຮັບຄົນເຈັບເຂົ້າໂຮງໝໍເມືອງ ຈຳນວນ 107 ຄົນ, ບໍລິການພາກສະໜາມ 497 ຄົນ. ນອກນີ້ ໄດ້ຕິດຕັ້ງ ແລະ ຜະລິດນ້ຳສະອາດ, ສະໜອງວິດຖ່າຍທີ່ຈຳເປັນ, ທັງໂຄສະນາສຸຂະສຶກສາໃຫ້ຄວາມຮູ້ ເພື່ອປ້ອງກັນພະຍາດ ແລະ ຕິດຕາມດູແລ ແມ່ມານ ແລະ ເດັກນ້ອຍ. ສຳລັບວຽກງານເຝົ້າລະວັງ ໄດ້ພົບໄຂ້ຍຸງທີ່ມີອາການເຕືອນ ແຕ່ມື້ເກີດເຫດ 4 ກໍລະນີ, ຖອກທ້ອງ 18 ກໍລະນີ, ທ້ອງບິດ 8 ກໍລະນີ, ອັກເສບປອດ 2 ກໍລະນີ.
ການສະໜອງສະບຽງອາຫານ ສຳລັບຜູ້ທີ່ມາໃໝ່ ກໍໄດ້ເອົາໃຈໃສ່ເປັນພິເສດ, ໄດ້ຮັບການຮັກສາສຸຂະພາບ, ເຄື່ອງນຸ່ງຫົ່ມທີ່ຈຳເປັນ, ຈັດສົ່ງໄປຈຸດພັກ ສະໜອງອາຫານ ແລະ ນ້ຳດື່ມ. ສຳລັບຜູ້ທີ່ເຂົ້າພັກແລ້ວ ແຕ່ລະວັນໄດ້ຈັດຕັ້ງໜ່ວຍຊ່ວຍເຫລືອ ປຸງແຕ່ງອາຫານເພື່ອແຈກຢາຍ ໂດຍມີເອື້ອຍນ້ອງແມ່ຍິງ ຈາກຫລາຍພາກສ່ວນ ທັງພາຍໃນ ແລະ ຕ່າງແຂວງ ລວມທັງທີມອາສາສະໝັກປຸງແຕ່ງອາຫານ ຈາກປະເທດໄທ ໄດ້ບໍລິການກັບທີ່ ແລະ ນອກສະຖານທີ່ ເຊິ່ງເຮັດໃຫ້ວຽກງານກູ້ໄພໄດ້ເດີນໜ້າດ້ວຍດີ.
ໃນມື້ດຽວກັນ ທ່ານ ນາງ ມີນາຄອນ ໄຊສົມພູ ຮອງເລຂາພັກແຂວງ ຄະນະຊີ້ນຳ ປະຕິບັດໜ້າທີ່ພາກສະໜາມ ກ່ຽວກັບ ສະພາບນ້ຳຖ້ວມຢູ່ ເມືອງສະ ໜາມໄຊ ແຂວງອັດຕະປື ໄດ້ລາຍງານກ່ຽວກັບການຈັດຕັ້ງ ປະຕິບັດໜ້າທີ່ ພາກສະໜາມ ໃນຕອນແລງຂອງມື້ນີ້ ຖືວ່າ ນັບຕັ້ງແຕ່ທ່ຽງຄືນຂອງວັນທີ 26 ກໍລະກົດ ຈົນຮອດເວລານີ້ ສະຖານະການນ້ຳຖ້ວມແມ່ນໜັກໜ່ວງ ການເຂົ້າພື້ນທີ່ ເພື່ອຊອກຫາຄົນຫາຍ ເພື່ອກູ້ໄພແລະການຊ່ວຍເຫຼືອບັນເທົາທຸກ ທຸກໜ່ວຍງານໄດ້ສຸມກຳລັງເຂົ້າຊ່ວຍຢ່າງເຕັມກຳລັງ ເຮັດວຽກທັງກາງເວັນກາງຄືນ ຢ່າງສຸດຄວາມສາມາດ.
ການເຄື່ອນຍ້າຍຜູ້ທີ່ຍັງຕິດຄ້າງຢູ່ຕາມຈຸດຕ່າງໆ ແມ່ນຍັງສາມາດ ເຄື່ອນຍ້າຍມາສູ່ສູນພັກຊົ່ວຄາວ ຂອງຜູ້ປະສົບໄພ ແລະ ມື້ນີ້ໄດ້ເຄື່ນຍ້າຍມາຈາກ
- ບ້ານຫີນລາດ 12 ຄອບຄົວ ມີຈໍານວນ ທັງໝົດ 64 ຄົນ ຍິງ 25ຄົນ
- ບ້ານທ່າແສງຈັນ 4 ຄອບຄົວ ມີ 21 ຄົນ
- ບ້ານທ່າຫີນ 9 ຄອບຄົວ ມີຈໍານວນ 34 ຄົນ ຍິງ 16 ຄົນ
- ບ້ານສະໝອງໃຕ້ ມີ 3 ຄອບຄົວ ມີຈຳນວນ 18 ຄົນ ຍິງ 7 ຄົນ
- ບ້ານ ໃໝ່ ມີ 1 ຄອບຄົວ ມີຈຳນວນ 4 ຄົນ ຍິງ 1 ຄົນ
- ບ້ານໃຫຍ່ແທ ມີ 42 ຄອບຄົວ ມີຈໍານວນ 267 ຄົນ ຍິງ 139 ຄົນ
- ບ້ານຕະມໍຢອດ 1 ຄອບຄົວ ມີຈໍນວນ 5 ຄົນ ຍິງ 3 ຄົນ
ຖືວ່າ ລວມປະຊາຊົນທີ່ຖືກຍົກຍ້າຍມາຢູ່ສູນພັກຊົວຄາວໃນມື້ນີ້ມີ 72 ຄອບຄົວ ມີຈໍານວນ 413 ຄົນ ຍິງ 199 ຄົນ.
ລວມປະຊາຊົນທີ່ຖືກຍົກຍ້າຍມາສູ່ສູນພັກຊົ່ວຄາວ ໃນປັດຈຸບັນນີ້ ມີທັງໝົດ 3,732 ຄົນ ນອກຈາກນີ້ ຍັງມີປະຊາຊົນ ຢູໃນ 3 ຈຸດຄື ເມືອງປະທຸມພອນແລະເມືອປາກຊ່ອງມີ 257 ຄອບຄົວ ມີຈຳນວນ 1,407 ຄົນ ຍິງ 626 ຄົນ ໃນນັ້ນ ຢູ່ຈຸດບ້ານຕະມໍຢອດມີ 595 ຄົນ ຢູ່ບ້ານໃຫຍ່ແທ 1,332 ຄົນ ຢູ່ຈຸດບ້ານປິ່ນດົງ 500 ຄົນ.
ສໍາລັບຈໍານວນຜູ້ທີ່ບໍ່ທັນພົບເຫັນມີ 1,126 ຄົນ ໃນນັ້ນຜູ້ສູນຫາຍຕາມການຢັ້ງຢືນຂອງຄອບຄົວມີ 131 ຄົນ ສະເພາະມື້ວັນ ທີ 27 ກໍລະກົດ 2018 ນີ້ ສາມາດເກັນກູ້ໄດ້ໜຶ່ງສົບ ເປັນເດັກ ແຕ່ຍັງບໍ່ມີຜູ້ມາຢັ້ງຢືນເອົາ ລວມກັບມື້ທີ່ຜ່ານມາ ລວມທັງໝົດເປັນ 6 ສົບ.
ທ່ານ ນາງ ມີນາຄອນ ໄຊສົມພູ ກ່າວວ່າ ສະພາບຝົນຕົກ ແມ່ນເບົາບາງ ບໍ່ຮຸນແຮງ ແຕ່ຍັງສື່ບຕໍ່ເປັນອຸປະສັກໃຫ້ແກ່ ການປະຕິບັດໜ້າທີ່ຂອງ ທຸກໜ່ວຍງານ.
（ຫັດທະບູນ）
