ຮອງນາຍົກລັດຖະມົນຕີ ທ່ານ ສອນໄຊ ສີພັນດອນ ລົງຢ້ຽມຢາມຊຸກຍູ້ການຊ່ວຍເຫຼືອແກ່ປະຊາຊົນຜູ້ປະສົບນໍ້າຖ້ວມ

ທ່ານສອນໄຊ ສີພັນດອນ ຫົວໜ້າສະເພາະກິດ ແກ້ໄຂໄພພິບັດ ເມືອງ ສະໜາມໄຊ ແຂວງອັດຕະປື ລົງຢ້ຽມຢາມພໍ່ແມ່ປະຊາຊົນຜູ້ປະສົບໄພ.

ໃນໂອກາດນີ້, ທ່ານໄດ້ໄປພົບປະກັບຄະນະຮັບຜິດຊອບແກ້ໄຂໄພພິບັດ ທີ່ປະຈຳຢູ່ພາກສະໜາມ ແລະ ໄດ້ຮັບຟັງການລາຍງານຄວາມຄືບໜ້າ ໃນການແກ້ໄຂໄພພິບັດໃນຄັ້ງນີ້້ ຄື: ໃນຈຳນວນ 6 ບ້ານທີ່ໄດ້ຮັບຜົນກະທົບໜັກ (ບ້ານໃໝ່, ບ້ານທ່າຫີນ, ບ້ານທ່າແສງຈັນ, ບ້ານສະໝອງ, ບ້ານຫີນລາດ ແລະ ບ້ານແທໃຫຍ່) ມີຈຳນວນ 1.617 ຄອບຄົວ, ແລະ ມີພົນລະເມືອງ 7.095 ຄົນ ແມ່ນໄດ້ຮັບການຊ່ວຍເຫຼືອ ແລະ ໄດ້ຖືກຈັດສັນໃຫ້ໄປອາໃສຢູ່ສູນອົບພະຍົບຊົ່ວຄາວ ຈໍານວນ 5 ຈຸດ ຄື: ຈຸດເທດສະບານເມືອງສະໜາມໄຊ ຈຳນວນ 3.731 ຄົນ, ຈຸດບ້ານດອນບົກ ຈໍານວນ 1.086 ຄົນ, ຈຸດບ້ານປິນດົງ ຈໍານວນ 500 ຄົນ, ຈຸດບ້ານຕໍາມໍຢອດ ຈໍານວນ 600 ຄົນ ແລະ ຈຸດເທດສະບານແຂງ ທີ່ຍົກຍ້າຍມາຈາກເມືອງປາກຊ່ອງ ຈໍານວນ 138 ຄົນ.

ສໍາລັບຜູ້ສູນຫາຍ ຈໍານວນ 131 ຄົນ (ຕາມການບອກເລົ່າຂອງປະຊາຊົນ ໃນເວລາເກີດເຫດນໍ້າຖ້ວມ), ມາຮອດປະຈຸບັນ ແມ່ນໄດ້ພົບເຫັນ ແລະ ເກັບກູ້ອອກມາໄດ້ແລ້ວ ຈຳນວນ 11 ສົບ ເຊິ່ງບັນດາໜ່ວຍງານກູ້ໄພ ແລະ ເຈົ້າໜ້າທີ່ທີ່ກ່ຽວຂ້ອງ ຍັງຄົງຈະສຶືບຕໍ່ດຳເນີນການຄົ້ນຫາຢ່າງເຄັ່ງຮ້ອນ, ໂດຍໃນນັ້ນ ໜ່ວຍກູ້ໄພຕ່າງໆທີ່ເຂົ້າມາຊ່ວຍເຫຼືອໃນຄັ້ງນີ້ ເຊິ່ງສັງລວມແລ້ວໃນຕອນນີ້ ແມ່ນມີຢູ່ທັງໝົດ 25 ຄະນະ, ລວມເປັນຈໍານວນພົນ 100 ກວ່າຄົນ ໂດຍມາຈາກຫຼາຍພາກສ່ວນ ທັງພາຍໃນ ແລະ ຕ່າງປະເທດ ຄື: ໜ່ວຍກູ້ໄພພາຍໃນປະເທດຂອງລາວເຮົາ, ໜ່ວຍກູ້ໄພຂອງສປຈີນ, ໜ່ວຍກູ້ໄພຂອງສສ ຫວຽດນາມ, ໜ່ວຍກູ້ໄພຂອງຣາຊະອານາຈັກໄທ,ເປັນຕົ້ນ.

ຄຽງຄູ່ກັນນີ້, ບັນດາປະຊາຊົນຜູ້ປະສົບເຄາະຮ້າຍໃນຄັ້ງນີ້ ຍັງໄດ້ຮັບການຊ່ວຍເຫຼືອເປັນຢ່າງດີຈາກທາງການ, ໂດຍໄດ້ຮັບມອບ ເງິນ, ເຄື່ອງອຸປະໂພກບໍລິໂພກ, ເຄື່ອງໃຊ້ຂອງສອຍທີ່ຈຳເປັນຕ່າງໆ, ລວມທັງ ການບໍລິການທາງດ້ານສາທາລະນະສຸກ ໃນຂັ້ນພື້ນຖານ; ເຖິງຢ່າງໃດກໍ່ດີ, ການຊ່ວຍເຫຼືອຕ່າງໆແກ່ບັນດາປະຊາຊົນຜູ້ປະສົບໄພນຳ້ຖ້ວມຢູ່ເມືອງສະໜາມໄຊ ແຂວງອັດຕະປື ຍັງຄົງຈະສືບຕໍ່ດຳເນີນໄປຢ່າງຕໍ່ເນື່ອງ ຈົນກ່ວາ ບັນດາບ້ານທີ່ປະສົບໄພພິບັດໃນຄັ້ງນີ້ ຈະໄດ້ຮັບການຟື້ນຟູ ແລະ ກັບຄືນສູ່ສະພາບປົກກະຕິ, ໂດຍມາຮອດປະຈຸບັນ ກໍ່ໄດ້ເລີ່ມມີການລົງມືກໍ່ສ້າງທີ່ພັກຊົ່ວຄາວ ໃຫ້ແກ່ປະຊາຊົນຜູ້ປະສົບໄພແລ້ວ ໂດຍກຳນົດເອົາ 3 ຈຸດ ຄື: ຈຸດດົງບາກ, ຈຸດໂຮງຮຽນບ້ານຫາດຍາວ ແລະ ຈູດບ້ານຕຳມໍປອດ ເມືອງສະໜາມໄຊ.

ໃນໂອກາດດຽວກັັນນີ້, ທ່ານຮອງນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ໄປສຳຫຼວດຕິດຕາມເບິ່ງສະພາບຢູ່ສະຖານທີ່ອື່ນໆ ທີ່ໄດ້ຮັບຜົນກະທົບຈາກນ້ຳຖ້ວມ ອີກຫຼາຍຈຸດ, ພ້ອມທັງ ໄດ້ພົບປະໂອ້ລົມກັັບປະຊາຊົນ ແລະ ມອບເຄື່ອງຊ່ວຍເຫຼືອບັນເທົາທຸກຈຳນວນໜຶ່ງໃຫ້ແກ່ເຂົາເຈົ້າ.

ບັນຍາກາດກອງປະຊຸມ.

ກ່ອນໜ້ານັ້ນໃນຕອນເຊົ້າ ຂອງວັນທີ 31 ກໍລະກົດ 2018 ຢູ່ທີ່ສໍານັກງານນາຍົກລັດຖະມົນຕີ, ໄດ້ຈັດກອງປະຊຸມຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ, ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການສະເພາະກິດ ແກ້ໄຂໄພພິບັດລະດັບຊາດ, ມີທ່ານລັດຖະມົນຕີ, ບັນດາທ່ານຮອງລັດຖະມົນຕີ, ບັນດາຜູ້ທີ່ຖືກແຕ່ງຕັ້ງໃນຄະນະກຳມະການສະເພາະກິດ ແກ້ໄຂໄພພິບັດລະດັບຊາດ ເຂົ້າຮ່ວມຢ່າງພ້ອມພຽງ.

ໃນໂອກາດກ່າວເປີດກອງປະຊຸມ, ທ່ານ ສອນໄຊ ສີພັນດອນ ກໍ່ໄດ້ແຈ້ງໃຫ້ຊາບກ່ຽວກັບທິດຊີ້ນໍາຂອງກອງປະຊຸມກົມການເມືອງ ຕໍ່ເຫດການໄພພິບັດທີ່ເກີດຂຶ້ນຢູ່ທີ່ເມືອງສະໜາມໄຊ, ແຂວງອັດຕະປື. ພ້ອມດຽວກັນນີ້, ກອງປະຊຸມ ຍັງໄດ້ພ້ອມກັນປະກອບຄໍາຄິດຄໍາເຫັນ ໃສ່ຮ່າງຂໍ້ຕົກລົງ ວ່າດ້ວຍການແບ່ງຄວາມຮັບຜິດຊອບພາຍໃນ ແລະ ແຜນການເຄື່ອນໄຫວລະອຽດແຕ່ລະດ້ານ ຂອງຄະນະສະເພາະກິດ. ນອກນັ້ນ, ກອງປະຊຸມ ຍັງໄດ້ລົງເລິກ, ຄົ້ນຄວ້າ ການສ້າງຕັ້ງໜ່ວຍງານຕ່າງໆ ທີ່ເຫັນວ່າມີຄວາມຈໍາເປັນ ແລະ ການລະດົມກໍາລັງໄປຊ່ວຍພາກສະໜາມ.

ໃນຕອນທ້າຍ, ທ່ານ ສອນໄຊ ສີພັນດອນ ໄດ້ຊີ້ນໍາໃຫ້ທຸກພາກສ່ວນທີ່ກ່ຽວຂ້ອງ ສືບຕໍ່ເອົາໃຈໃສ່ຊອກຄົ້ນຜູ້ປະສົບໄພ ຫຼື ຜູ້ທີ່ສູນຫາຍໃຫ້ຄົບຖ້ວນ; ການຈັດສົ່ງ, ການແຈກຢາຍ ວັດຖຸສິ່ງຂອງບັນເທົາທຸກຕ່າງໆ ຕ້ອງໄປເຖິງຜູ້ປະສົບໄພຢ່າງແທ້ຈິງ. ຄຽງຄູ່ກັນນັ້ນ, ຕ້ອງໄດ້ມີການຄຸ້ມຄອງ ແລະ ກວດກາການນໍາໃຊ້ທຶນຮອນ ແລະ ວັດຖຸສິ່ງຂອງທີ່ໄດ້ຮັບການຊ່ວຍເຫຼືອ ຈາກພາກສ່ວນຕ່າງໆ ໃຫ້ຖືກຕ້ອງຕາມເປົ້າໝາຍ, ເອົາໃຈໃສ່ໃນການໂຄສະນາປະຊາສຳພັນຂໍ້ມູນຂ່າວສານ ເພື່ອເຮັດໃຫ້ສັງຄົມໄດ້ຮັບຮູ້ ແລະ ເຂົ້າໃຈຕໍ່ເຫດການ. ສໍາລັບຜູ້ບໍລິໂພກຂ່າວຢູ່ທົ່ວສັງຄົມ ບໍ່ວ່າຈະເປັນຂ່າວຈາກສື່ສັງຄົມອອນລາຍ ຫຼື ຂ່າວທົ່ວໄປ ແມ່ນຕ້ອງຕິດຕາມການອອກຂ່າວ ຫຼື ຂໍ້ມູນທີ່ໄດ້ຮັບຈາກທາງການເທົ່ານັ້ນ ຈຶ່ງສາມາດເຊື່ອຖືໄດ້. ສໍາຄັນ, ຕ້ອງໄດ້ມີການວາງແຜນເພື່ອຟື້ນຟູຊີວິດການເປັນຢູ່ ຂອງຜູ້ທີ່ໄດ້ຮັບຜົນກະທົບຈາກໄພພິບັດໃນຄັ້ງນີ້ ໃຫ້ສາມາດດໍາລົງຊີວິດ ແລະ ເຂົ້າສູ່ສະພາບປົກກະຕິໂດຍໄວ.

（ຫັດ​ທະ​ບູນ）