 |
 |
ພິທີປະດັບຫລຽນໄຊ ແລະ ມອບໃບຍ້ອງຍໍ ຂອງລັດຖະບານ ແຫ່ງ ສປປ ລາວ.
ໃນວັນທີ 29 ພຶດສະພາ 2018 ບໍລິສັດ ສະຕາ ໂທລະຄົມ ໄດ້ຈັດພິທີປະດັບຫລຽນໄຊ ແລະ ມອບໃບຍ້ອງຍໍ ຂອງລັດຖະບານ ແຫ່ງ ສປປ ລາວ ໃຫ້ກົມກອງລວມໝູ່ ແລະ ບຸກຄົນ, ເນື່ອງໃນໂອກາດ ວັນສ້າງຕັ້ງບໍລິສັດສະຕາ ໂທລະຄົມ ຄົບຮອບ 10 ປີ (1/4/2018-1/4/2018), ໂດຍມີ ທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ທ່ານ ຫວຽນ ບາ ຮຸ່ງ ເອກອັກ ຄະລັດຖະທູດ ແຫ່ງ ສສ ຫວຽດນາມ ປະຈຳ ສປປ ລາວ ພ້ອມດ້ວຍ ພາກສ່ວນກ່ຽວຂ້ອງ, ແຂກຖືກເຊີນ ແລະ ພະນັກງານ ຢູນິເທວ ທົ່ວປະເທດ ເຂົ້າຮ່ວມ.
ພິທີປະດັບຫລຽນໃນຄັ້ງນີ້, ເປັນການຢັ້ງຍືນເຖິງຜົນງານ ການສູ້ຊົນບຸກບືນຂອງຢູນີເທວ, ເຊິ່ງແມ່ນໝາກຜົນແຫ່ງການຮ່ວມມື ຂອງສອງພັກ-ສອງລັດ ລາວ-ຫວຽດນາມ, ເຊິ່ງໄດ້ປະດັບຫລຽນໄຊ ຊັ້ນ 2 ໃຫ້ແກ່ບໍລິສັດ ສະຕາໂທລະຄົມ, ປະດັບຫລຽນໄຊ ພິລະອາດຫານ ຊັ້ນ II ໃຫ້ຈຳນວນ 15 ສະຫາຍ, ຫລຽນໄຊພິລະອາດຫານຊັ້ນ III ໃຫ້ຈຳນວນ 42 ສະຫາຍ ໃຫ້ກຽດມອບ, ໂດຍທ່ານ ພົນໂທ ຈັນສະໝອນ ຈັນຍາລາດ. ນອກນັ້ນ, ຍັງໄດ້ມອບໃບຍ້ອງຍໍຂັ້ນກະຊວງ ປ້ອງກັນປະເທດ ໃຫ້ຈຳນວນ 211 ສະຫາຍ ແລະ ມອບໃບຍ້ອງຍໍກົມໃຫ່ຍການເມືອງກອງທັບ ໃຫ້ ຈຳນວນ 269 ສະຫາຍ.
ໂອກາດດັ່ງກ່າວ, ທ່ານ ກາວ ແອັງເຊີນ ຜູ້ອຳນວຍການໃຫຍ່ ບໍລິສັດສະຕາໂທລະຄົມ ໄດ້ຂຶ້ນລາຍງານ, ໂດຍມີບາງຕອນໃຫ້ຮູ້ວ່າ: ບໍລິສັດ ສະຕາໂທລະຄົມ ສ້າງຕັ້ງຂຶ້ນ ໃນວັນທີ 1 ເມສາ 2008 ໂດຍການຮ່ວມທຸລະກິດ ລະຫວ່າງ ລາວເອເຊຍ ໂທລະຄົມ ແລະ ບໍລິສັດຫວຽດເທວ ໂກໂບ ໄດ້ມີການເຊັນສັນຍາຮ່ວມມື ໃນວັນທີ 25 ພະຈິກ 2017 ແລະ ເປີດນຳໃຊ້ເຄື່ອງໝາຍການຄ້າ ຢູນິເທວ ຢ່າງເປັນທາງການ ໃນວັນທີ 16 ຕຸລາ 2009 ຕະຫລອດໄລຍະ 10 ປີ ຢູນິເທວ ມີລາຍຮັບລວມ ຫລາຍກວ່າ 1,3 ຕື້ USD ແລະ ມອບອາກອນໃຫ້ລັດ 350 ລ້ານ USD, ເປັນເຄືອຂ່າຍທີ່ນອນໃນອັນດັບແຖວໜ້າ, ມີຈຳນວນເລກໝາຍຜູ້ນຳໃຊ້ມືຖື 3 ລ້ານໝາຍເລກ ຫລື ສ່ວນແບ່ງຕະຫລາດ 52%, ລະບົບພື້ນຖານໂຄງລ່າງເຕັກນິກກວ້າງໃຫ່ຍທີ່ສຸດ ມີຈຳນວນສູນສະຖານີສົ່ງສັນຍານ 2G/3G/4G ລວມຫລາຍກວ່າ 6000 ສູນ, ເຂດປົກຄຸມສັນຍານກວມ 95% ທົ່ວປະເທດ. ນອກຈາກວຽກງານ ການຂະຫຍາຍ ລະບົບພື້ນຖານໂຄງລ່າງຢ່າງກວ້າງຂວາງ ໃນທົ່ວປະເທດແລ້ວ ວຽກງານການປະກອບສ່ວນ ຊ່ວຍເຫລືອສັງຄົມ ຢູນິເທວ ກໍຖືເປັນສຳຄັນຄຽງຄູ່ກັບວຽກງານ ດຳເນີນທຸລະກິດ ໃນໄລຍະຜ່ານມາ ຢູນິເທວ ໄດ້ສະໜັບສະໜູນຫລາຍໂຄງການ ລວມມູນຄ່າທັງໝົດ 13 ລ້ານໂດລາສະຫະລັດ ອັນພົ້ນເດັ່ນແມ່ນ ໂຄງການສະໜັບສະໜູນ ອິນເຕີເນັດລົງສູ່ໂຮງຮຽນ ຫລາຍກວ່າ 900 ໂຮງຮຽນ ແລະ ອື່ນໆ. ພ້ອມນັ້ນ ຢູນິເທວ ຍັງໄດ້ຮັບຄວາມເຊື່ອໝັ້ນ ຈາກລັດຖະບານ ໃນການເປັນຜູ້ຈັດຕັ້ງຜັນຂະຫຍາຍ ບັນດາລະບົບທີ່ສຳຄັນ ເຊັ່ນ: ສະໜອງຟອນພາສາລາວ, ການສອບເສັງອອນລາຍ Olympic, ລະບົບຄຸ້ມຄອງພົນລະເມືອງ, ສະໜອງລະບົບ Core Banking ແກ່ທະນາຄານ ແຫ່ງ ສປປ ລາວ.
（ແຫຼ່ງຂໍ້ມູນ： ຂປລ）
