ລາວ: ປົກປັກຮັກສາ ພັດທະນາແຫລ່ງທົ່ງໄຫຫີນ

ບັນດາແຫລ່ງໄຫຫີນທີ່ມີ ລ້ວນແຕ່ມີການປະກອບສ່ວນປົກປັກຮັກສາຈາກປະຊາຊົນທ້ອງຖິ່ນ ເຊິ່ງໄດ້ກໍ່ໃຫ້ເກີດຄວາມຮັກ ແລະ ຫວງແຫນ ມໍລະດົກອັນລໍ້າຄ່າຕະຫລອດມາ.

ແຫລ່ງໄຫຫີນ ແຂວງຊຽງຂວາງ-ທົ່ງໄຫຫີນ ທີ່ຮັບຮອງເຂົ້າເປັນມໍລະດົກໂລກ ທາງດ້ານວັດທະນະທໍາແຫ່ງທີ 3 ຂອງ ສປປ ລາວ ກວມເອົາທັງໝົດ 11 ແຫລ່ງໄຫຫີນ ໃນ 4 ເມືອງ ຂອງແຂວງຊຽງຂວາງ.

ແຫລ່ງໄຫຫີນ ແຂວງຊຽງຂວາງ-ທົ່ງໄຫຫີນ ທີ່ຮັບຮອງເຂົ້າເປັນມໍລະດົກໂລກ ທາງດ້ານວັດທະນະທໍາແຫ່ງທີ 3 ຂອງ ສປປ ລາວ ກວມເອົາທັງໝົດ 11 ແຫລ່ງໄຫຫີນ ໃນ 4 ເມືອງ ຂອງແຂວງຊຽງຂວາງ ຄື: ເມືອງແປກ, ເມືອງຜາໄຊ, ເມືອງຄຳ ແລະ ເມືອງພູກູດ. ແຫລ່ງໄຫຫີນດັ່ງກ່າວ ປະກອບ ມີ ແຫລ່ງໄຫຫີນ 1 ບ້ານນາໂອ, ແຫລ່ງໄຫຫີນ 2 ບ້ານນາໂຄ້, ແຫລ່ງໄຫຫີນ 3 ບ້ານຊຽງດີ, ແຫລ່ງໄຫຫີນ 8 ຫ້ວຍຫລວງ, ແຫລ່ງໄຫຫີນ 12 ບ້ານຜາແກ້ວ, ແຫລ່ງໄຫຫີນ 21 ພູເກັງ, ແຫລ່ງໄຫຫີນ 23 ບ້ານນໍ້າຮົ່ມ, ແຫລ່ງໄຫຫີນ 25 ບ້ານສອງຮັກ, ແຫລ່ງໄຫຫີນ 28ບ້ານນາຄວນ, ແຫລ່ງໄຫຫີນ 42 ພູຊ້າງ ບ້ານຊາງ ແລະ ແຫລ່ງໄຫຫີນ 52 ບ້ານຜາແກ້ວ.

ໃນມື້ຖະແຫລງຂ່າວ ປະກາດການຮັບຮອງເອົາແຫລ່ງໄຫຫີນ-ທົ່ງໄຫຫີນ ແຂວງຊຽງຂວາງ ເປັນມໍລະດົກໂລກຕອນບ່າຍວັນທີ 25 ກໍລະກົດ 2019 ທີ່ຫໍວັດທະນະທໍາແຫ່ງຊາດ, ທ່ານ ບຸນຕົ້ນ ຈັນທະພອນ ເຈົ້າແຂວງຊຽງຂວາງ ກ່າວບາງຕອນວ່າ: ນີ້ແມ່ນຜົນສໍາເລັດເບື້ອງຕົ້ນ, ສໍາຄັນຕໍ່ໄປນີ້ແມ່ນຈະສືບຕໍ່ເຜີຍແຜ່ ແລະ ປຸກລະດົມປະຊາຊົນສືບຕໍ່ເປັນເຈົ້າການປົກປັກຮັກສາ, ຮັກ ແລະ ຫວງແຫນທົ່ງໄຫຫີນ...

ຄໍາກ່າວອັນໜັກແໜ້ນ ແລະ ເຕັມໄປດ້ວຍຄວາມພາກພູມໃຈຂອງທ່ານເຈົ້າແຂວງຊຽງຂວາງ ໃນວັນນັ້ນ, ມັນເປັນການສ້າງຄວາມເຊື່ອໝັ້ນອັນແຮງກ້າໃຫ້ຊາວຊຽງຂວາງ ກໍ່ຄືຄົນລາວທຸກຄົນ ສືບຕໍ່ປົກປັກຮັກສາ ແລະ ພັດທະນາແຫລ່ງ ມໍລະດົກໂລກ ແຫ່ງທີ 3 ຢູ່ ສປປ ລາວ ຂອງພວກເຮົາ ໃຫ້ສາມາດຕໍ່ຍອດ ແຕກດອກອອກຜົນໃນທາງເສດຖະກິດສັງຄົມ, ກາຍເປັນແຫລ່ງທ່ຽວທ່ຽວທີ່ສາມາດສ້າງລາຍຮັບໃຫ້ແກ່ທຸກຊັ້ນຄົນລົງຮອດຮາກຖານບ່ອນທີ່ຕັ້ງຂອງແຫລ່ງໄຫຫີນ ຢ່າງຍືນຍົງ.

ແຫລ່ງໄຫຫີນ 1 ເປັນແຫລ່ງໄຫຫີນຂະໜາດໃຫຍ່, ຊຶ່ງຕັ້ງຢູ່ຫ່າງຈາກ ເທດສະບານແຂວງປະ ມານ 8 ກິໂລແມັດ.

ແຫລ່ງໄຫຫີນ 1 ເປັນແຫລ່ງໄຫຫີນຂະໜາດໃຫຍ່, ຊຶ່ງຕັ້ງຢູ່ຫ່າງຈາກເທດສະບານແຂວງປະມານ 8 ກິໂລແມັດ, ເປັນແຫລ່ງໄຫຫີນທີ່ໄດ້ຮັບການສໍາຫລວດ ແລະ ຂຸດຄົ້ນຫລາຍກວ່າໝູ່ ໃນໄລຍະຜ່ານມາຈົນເຖິງປັດຈຸບັນ. ແຫລ່ງໄຫຫີນແຫ່ງນີ້, ປະກອບດ້ວຍໄຫຫີນ 334 ໜ່ວຍ, ຝາປິດໄຫຫີນ 30 ອັນ ແລະ ກ້ອນຫີນໝາຍຂຸມສົບ 303 ກ້ອນ, ໂດຍປະກອບມີ 5 ກຸ່ມໄຫຫີນ ທີ່ຕັ້ງຢູ່ໃກ້ກັນ ໂດຍກວມເອົາ ເນື້ອທີ່ປະມານ 34 ເຮັກຕາ. ນອກຈາກນັ້ນ, ຍັງພົບເຫັນການແກະສະຫລັກ ໃສ່ຝາປິດໄຫຫີນຈໍານວນຫລາຍ ແລະ ມີຮູບແກະສະຫລັກໃສ່ໄຫຫີນ 1 ໜ່ວຍ, ຊຶ່ງເປັນໄຫຫີນພຽງໜ່ວຍດຽວໃນທົ່ວແຂວງ ທີ່ພົບເຫັນມີຮູບແກະສະຫລັກທີ່ມີລັກສະນະພິເສດ ເປັນຮູບຄົນຢືນ ແລະ ຍົກແຂນຂຶ້ນຟ້າ. ແຫລ່ງໄຫຫີນ 2 ເປັນທົ່ງໄຫຫີນຂະໜາດໃຫຍ່ ແລະ ເປັນໜຶ່ງໃນຈຳນວນທົ່ງໄຫຫີນທີ່ມີນັກທ່ອງທ່ຽວໄປຢ້ຽມຢາມຫລາຍຄຽງຄູ່ກັບແຫລ່ງໄຫຫີນ 1 ຊຶ່ງຕັ້ງຢູ່ ຫ່າງຈາກ ເທດສະບານແຂວງ ປະ ມານ 20 ກິໂລແມັດ, ໂດຍມີໄຫຫີນທັງໝົດ 93 ໜ່ວຍ ແລະ ຝາປິດໄຫຫີນ 14 ອັນ. ແຫລ່ງໄຫຫີນ 3 ເປັນແຫລ່ງໄຫຫີນໃຫຍ່ ເຊິ່ງມີທີ່ຕັ້ງຫ່າງຈາກ ແຫລ່ງໄຫຫີນ 2 ໄປທາງທິດຕາເວັນຕົກສ່ຽງໃຕ້ 2 ກິໂລແມັດ ປະກອບມີໄຫຫີນທັງໝົດ 6 ກຸ່ມ ໂດຍມີໄຫຫີນ 242 ໜ່ວຍ, ມີຝາປິດ38 ອັນ ແລະ ມີກ້ອນຫີນໝາຍຂຸມສົບ 21 ກ້ອນ.

ແຫລ່ງໄຫຫີນ 8 ຕັ້ງຢູ່ເປີ້ນພູສູງຂອງພູຢູ່ທາງທິດໃຕ້ ຂອງແຫລ່ງໄຫຫີນ 3 ໂດຍບ່ອນນີ້ມີຫລາຍຈຸດທີ່ເປັນແຫລ່ງຕັດຫີນ ແລະ ປະກອບມີ ຫລາຍກຸ່ມໄຫຫີນ ທີ່ຍັງບໍ່ທັນຖືກ ຄວັດເຈາະສຳເລັດ, ແຕກຫັກ ແລະ ບາງໜ່ວຍກໍສຳເລັດແລ້ວ, ຊຶ່ງແຫລ່ງໄຫຫີນນີ້ ປະກອບມີໄຫຫີນທັງໝົດ 12 ໜ່ວຍ ແລະ ກ້ອນຫີນ ໝາຍຂຸມສົບ 10 ກ້ອນ. ແຫລ່ງໄຫຫີນ 12 ນອນຢູ່ໃຈກາງປ່າເທິງສັນພູທາງທິດຕາເວັນຕົົກ ຂອງແຫລ່ງໄຫຫີນບ້ານຜາແກ້ວ (ແຫລ່ງໄຫຫີນ 52) ປະກອບກັບທັດ ສະນີຍະພາບ ຂອງຄວາມກວ້າງໃຫຍ່ສາຍພູ ທີ່ເນັ່ງຍຽດຢູ່ທາງ ທິດຕາເວັນຕົກສຽງໃຕ້, ໃນນັ້ນມີໄຫຫີນຄວັດເຈາະທັງສໍາເລັດ ແລະ ບໍ່ສຳເລັດ ຈໍານວນ 32 ໜ່ວຍ, ມີຝາປິດໄຫຫີນ 6 ອັນ ແລະ ກ້ອນຫີນໝາຍຂຸມສົບ11 ກ້ອນ.

ແຫລ່ງໄຫຫີນ 21 ເປັນແຫລ່ງຕັດຫີນຂະໜາດໃຫຍ່ ມີເນື້ອທີ່ປະມານ 20 ເຮັກຕາ ແລະ ໄດ້ຮັບການຢືນຢັນ ທາງວິທະຍາສາດ ແລ້ວວ່າ ເປັນບ່ອນຜະລິດໄຫຫີນສະໜອງ ໃຫ້ແກ່ແຫລ່ງໄຫຫີນ 1 ຊຶ່ງບາງຄັ້ງ ທົ່ງໄຫດັ່ງກ່າວກໍເອີ້ນວ່າພູເກ່ງ. ໃນແຫລ່ງໄຫຫີນ 21 ນີ້ ປະກອບມີໄຫຫີນ 34ໜວ່ຍ, ຝາປິດ 2 ອັນ ແລະ ຫີນໝາຍຂຸມສົບ 12 ກ້ອນ. ໄຫຫີນ 23 ຕັ້ງຢູ່ໃກ້ກັບ ບໍ່ນໍ້າຮ້ອນເມືອງຄໍາ ປະກອບມີໄຫຫີນ 4 ກຸ່ມ, ໃນນັ້ນ 3 ກຸ່ມແມ່ນແຫລ່ງໄຫຫີນ ແລະ ອີກ 1 ກຸ່ມແມ່ນແຫລ່ງ ຜະລິດໄຫຫີນ, ມີໄຫຫີນທັງໝົດ 27 ໜ່ວຍ, ຝາປິດ 1 ອັນ ແລະ ກ້ອນຫີນໝາຍຂຸມສົບ 27 ກ້ອນ. ໄຫຫີນ 25 ຕັ້ງຢູ່ເທິງເນີນພູພຽງໃກ້ກັບໝູ່ບ້ານ ປະກອບມີ 2 ກຸ່ມໄຫຫີນ, ມີໄຫຫີນຈໍານວນ 33 ໜ່ວຍ, ຝາປິດໄຫຫີນ 8 ອັນ ແລະ ກ້ອນຫີນ ໝາຍຂຸມສົບ 1 ກ້ອນ. ແຫລ່ງໄຫຫີນ 28 ເປັນແຫລ່ງໄຫຫີນທີ່ມີໄຫຫີນໜ່ວຍດຽວ ຕັ້ງຢູ່ຮົ່ມເງົາຂອງສັນພູ ໃກ້ກັບບ້ານນາຄວນ ຊຶ່ງມີຄວາມພິເສດທາງດ້ານພູມມີທັດ ຂອງສາຍພູທາງ ເບື້ອງຕາເວັນຕົກສ່ຽງເໜືອ ແລະ ເປັນໄຫຫີນຂະໜາດໃຫຍ່ຢູ່ໃນສະ ພາບທີ່ດີຫລາຍ.

ວຽກງານໃນຕໍ່ໜ້າ, ທ່ານເຈົ້າແຂວງຊຽງຂວາງ ຍັງໃຫ້ຮູ້ວ່າຈະມີການຊຸກຍູ້ໃຫ້ມີສ່ວນຮ່ວມລະຫວ່າງລັດ ແລະ ປະຊາຊົນ ຮ່ວມກັນພັດທະນາແຫລ່ງທ່ຽວທ່ຽວ ເປັນຕົ້ນການກໍ່ສ້າງປັບປຸງຖະໜົນຫົນທາງ; ລະດົມການລົງທຶນໃນດ້ານຕ່າງໆເພື່ອເປັນການສົ່ງເສີມການທ່ອງທ່ຽວໃຫ້ແຂງແຮງ ເປັນຕົ້ນ ການສ້າງເຮືອນພັກ, ໂຮງແຮມ, ຮ້ານອາຫານ, ຮ້ານບັນເທີງ ທີ່ສອດຄ່ອງກັບລະບຽບກົດໝາຍ; ລະດົມການປູກພືດອໍແກນິກ, ລ້ຽງສັດໃຫຍ່ສະໜອງຊີ້ນທີ່ປອດໄພ ໄດ້ມາດຕະຖານ; ສົ່ງເສີມຫັດຖະກໍາອັນເປັນມູນເຊື້ອ ຕໍ່າຫູກທໍໄໝປູກມອນລ້ຽງມ້ອນ; ປຸກລະດົມນໍ້າໃຈ ຮັກແຂກແພງຄົນ ຕ້ອນຮັບນັກທ່ອງທ່ຽວ; ປົກປັກຮັກສາຄວາມສະຫງົບ… ສ່ວນພິທີສະຫລອງໃຫຍ່ ແຫລ່ງໄຫຫີນເຂົ້າເປັນມໍລະດົກໂລກແມ່ນຈະຈັດຂຶ້ນໃນໂອກາດງານມະຫະກໍາກິລາແຫ່ງຊາດຄັ້ງທີ XI ທີ່ແຂວງຊຽງຂວາງຈະເປັນເຈົ້າພາບ ໃນເດືອນມີນາ 2020.

（ໄຊພອນ）