 |
ຕາດຫີນປາຝາ. (ພາບ: ຂປລ)
ຕາດຫີນປາຝາ ເປັນສະຖານທີ່ທ່ອງທ່ຽວທຳມະຊາດ ທີ່ສວຍງາມແຫ່ງໜຶ່ງທີ່ບໍ່ຄວນພາດ ສຳລັບຜູ້ທີ່ມັກ-ຮັກທຳມະຊາດ, ຮັກການຍ່າງຊົມປ່າ, ໄດ້ສໍາຜັດກັບອາກາດບໍລິສຸດ, ມີນ້ຳໃສໄຫລເຢັນດີ ທີ່ສໍາຄັນ ສາມາດລົງຫລີ້ນນ້ຳໄດ້ສະດວກສະບາຍ. ຕາດຫີນປາຝາ ຕັ້ງຢູ່ບ້ານນາເງິນ ເມືອງທຸລະຄົມ ແຂວງວຽງຈັນ, ຫ່າງຈາກທາງເລກ 10 ເຂົ້າໄປປະມານ 8 ກິໂລແມັດ.
 |
ຕາດຫີນປາຝາ. (ພາບ: ຂປລ)
ທ່ານ ນາງ ໄມເພັດ ໂພນສາມາ ເຈົ້າຂອງຕາດຫີນປາຝາ ໄດ້ໃຫ້ຮູ້ເມື່ອທ້າຍເດືອນຜ່ານມານີ້ວ່າ: ໄດ້ເລີ່ມບຸກເບີກສະຖານທີ່ແຫ່ງນີ້ ມາແຕ່ປີ 2006 ໄດ້ພົບເຫັນຫີນຂະໜາດໃຫຍ່ຄ້າຍຄືປາຝາ ແລະ ຊາວບ້ານໄດ້ເລົ່າປາກຕໍ່ປາກກັນວ່າ ເງີບຫີນຂະໜາດໃຫຍ່ດັ່ງກ່າວ, ເປັນຜົ້ງຄ້າຍຄືຖ້ຳ ແລະ ເຄີຍມີພະທຸດົງເດີນທາງມາປະຕິບັດທຳ ຢູ່ສະຖານທີ່ແຫ່ງນີ້, ຢູ່ດ້ານໜ້າຫີນປາຝາ ກໍຍັງມີຫີນຂະໜາດໃຫຍ່ຄ້າຍຄືງູໃຫຍ່, ຊຶ່ງທັງໝົດທີ່ວ່ານີ້ ຈຶ່ງເປັນທີ່ມາ ແລະ ສັນຍາລັກຂອງຄຳວ່າຕາດຫີນປາຝາ. ມາຮອດປີ 2007 ກໍໄດ້ມີການພັດທະນາ ໃຫ້ເປັນແຫລ່ງທ່ອງທ່ຽວທຳມະຊາດຢ່າງເຕັມຮູບແບບ ແລະ ເປີດບໍລິການໃຫ້ແກ່ແຂກພາຍໃນ ແລະ ຕ່າງປະເທດ ເຂົ້າມາທ່ຽວຊົມ, ໂດຍໄດ້ສ້າງຕູບນັ່ງຈຳນວນ 8 ຕູບ ເພື່ອເປັນບ່ອນພັກຜ່ອນຢູ່ແຄມນ້ຳ ແລະ ກໍໄດ້ຮັບຄວາມສົນໃຈ ຈາກຜູ້ມາທ່ຽວຊົມເປັນຢ່າງດີ.
ນອກຈາກນັ້ນ, ທ່ານ ນາງ ໄມເພັດ ໂພນສາມາ ຍັງໃຫ້ຮູ້ຕື່ມວ່າ: ປັດຈຸບັນ, ສະຖານທີ່ທ່ອງທ່ຽວພວກເຮົາ ໄດ້ມີການຂະຫຍາຍສະຖານທີ່ຈອດລົດໃຫ້ກວ້າງຂວາງ, ມີຮ້ານອາຫານໄວ້ຄອຍບໍລິການແຂກ ແລະ ຂະຫຍາຍຕູບຕື່ມອີກ 30 ກວ່າຕູບ, ພ້ອມມີເຮືອນພັກໄວ້ຮັບຮອງແຂກທີ່ມາພັກຄ້າງຄືນ, ເຊິ່ງຈະເປີດໃຫ້ບໍລິການໃນເດືອນກໍລະກົດນີ້. ພ້ອມນີ້, ທ່ານຍັງໄດ້ເຊີນຊວນແຂກທີ່ມາທ່ຽວຊົມ ຫລື ມາພັກຜ່ອນສະຖານທີ່ແຫ່ງນີ້, ຈົ່ງຊ່ວຍກັນຮັກສາສິ່ງແວດລ້ອມ, ຮັກສາຄວາມສະອາດ, ໂດຍສະເພາະຫ້າມຖິ້ມເສດອາຫານ ແລະ ເສດຂີ້ເຫຍື້ອລົງນ້ຳ ເພື່ອຫລີກເວັ້ນນໍ້າເໜົ່າເສຍ ແລະ ເປັນພິດຕໍ່ສັດນໍ້າ.
 |
ທ່ານ ນາງ ໄມເພັດ ໂພນສາມາ. (ພາບ: ຂປລ)
ຕາດຄູ່ ບ້ານອຸປະຊາ ເມືອງປາກຊ່ອງ ແຂວງຈໍາປາສັກ ເຊິ່ງນອກ ຈາກເປັນນໍ້າໂຕນຕາດ ທີ່ເກີດຈາກທຳມະຊາດ ບໍ່ສູງພໍເທົ່າໃດກໍດີ, ແຕ່ຈາກຄວາມຫົວໃສຂອງຜູ້ສຳປະ ທານ ໄດ້ຕົກ-ແຕ່ງຫລາຍສິ່ງຫລາຍຢ່າງ ເພື່ອອຳນວຍຄວາມສະດວກໃຫ້ແກ່ນັກທ່ອງທ່ຽວທີ່ມາຮອດຈອດເຖິງບໍ່ວ່າຈະເປັນການປຸກຕູບຖາວອນ ແລະ ຕູບຊາມຊາຕັ້ງຢູ່ແຄມໜອງ ແລະ ກາງນໍ້າໂຕນ ອ່າງລອຍນໍ້າສຳລັບເດັກນ້ອຍ ຫ້ອງນໍ້າ ທີ່ສະອາດ ບ່ອນຖ່າຍຮູບ ແລະ ອື່ນໆ ເຊິ່ງຕ້ອງບອກວ່າງາມສົມຈິງ ດັ່ງທຳມະຊາດ.
ສ່ວນອາຫານການກິນກໍພໍຮັບໄດ້ບໍ່ແແພງເກີນໄປ ຄ່ານັ່ງຕູບ ສາມສິບພັນກີບ ຄ່າຜ່່ານປະຕູເຂົ້າແຫລ່ວງທ່ອງທ່ຽວ ຫ້າພັນກີບຕໍ່ຄົນ ແລະ ທີີ່ປະທັບໃຈທີ່ພາກພູມໃຈທັງໄດ້ບຸນຕື່ມອີກຄືການໄດ້ນໍາເອົາເສດອາຫານ ຫລື ຂະໜົມ ເກືອປານ້ອຍປາໃຫຍ່ທີ່ລອຍລ່ອງໄປມາໃນໜອງຢ່າງຫລວງຫລາຍ. ເຖິງວ່າໄລຍະນີ້ເປັນ ຍາມຝົນກໍດີ, ແຕ່ການໄດ້ມາສຳຜັດ ມາສູບດົມເອົາອາກາດທີ່ແສນບໍລິສຸດ ມາເຫັນວິຖີຊີວິດຂອງປະຊາ ຊົນບັນດາເຜົ່າຢູ່ອ້ອມແອ້ມສະຖານ ທີ່ທ່ອງທ່ຽວແຫ່ງນີ້ນັບວ່າມ່ວນ ມີຄວາມສຸກຢ່າງແທ້ຈິງ.
 |
ຕາດຄູ່. (ພາບ: ຂປລ)
 |
ຕາດຄູ່. (ພາບ: ຂປລ)
ມີສອງເສັ້ນທາງໄປຫາສະຖານ ທີ່ທ່ອງທ່ຽວນີ້ຄືໜຶ່ງຈາກແຂວງເຊກອງມຸ່ງໜ້າສູ່ບ້ານຫລັກ 52 ເມືອງໄຊເສດຖາ ແຂວງອັດຕະປື ແລ້ວລ້ຽວຂວາໄປກວ່າ 50 ກິໂລແມັດ ແລະ ອີກເສັ້ນທາງໜຶ່ງຈາກນະ ຄອນປາກເຊ ສູ່ເມືອງປາກຊ່ອງ ເຊິ່ງຈະມີ 3 ເສັ້ນຄືເສັ້ນທາງຊ້າຍໄປແຂວງເຊກອງ, ສ່ວນເສັ້ນທາງຂວາກະບໍ່ຮູ້ວ່າໄປເຖິງເຂດໃດ ແລະ ເສັ້ນກາງມຸ່ງໜ້າໄປສູ່ຫ້ວຍກອງອອກສູ່ບ້ານຫລັກ 52 ແຂວງອັດຕະປື ໂດຍຈາກປາກຊ່ອງ ກວ່າ 30 ກິໂລແມັດ ກໍໄປເຖິງບ້ານໜອງອີໂອຍ ແລ້ວລ້ຽວຂວາໄປສູ່ບ້ານອຸປະຊາ ເຊິ່ງເປັນທີ່ຕັ້ງຂອງສະ-ຖານ ທີ່ທ່ອງທ່ຽວ ຕາດຄູ່.
（ໄຊພອນ）
