 |
ຖໍ້ານໍ້າລອດເຊບັ້ງໄຟ ເມືອງບົວລະພາ ແຂວງຄຳມ່ວນ ສປປລາວ.
ວຽກງານພັດທະນາການທ່ອງທ່ຽວ ໃນປີ 2018 ຜ່ານມາ ລັດຖະບານໄດ້ເອົາໃຈໃສ່ ໃນການພັດທະນາໂຄ່ງລ່າງພື້ນຖານ ເພື່ອອຳນວຍຄວາມສະແດງດ້ານການທ່ອງທ່ຽວ ເປັນຕົ້ນແມ່ນ ການກໍ່ ສ້າງເສັ້ນທາງເຂົ້າແຫລ່ງທ່ອງທ່ຽວ ຢູ່ບັນດາແຂວງ, ພັດທະນາແຫລ່ງທ່ອງທ່ຽວ, ສະຖານທີ່ຈອດລົດ, ຫ້ອງນໍ້າສາທາລະນະ ແລະ ປ້າຍຊີ້ບອກຕ່າງໆ. ໂຄງການພັດທະນະໂຄ່ງລາງພື້ນຖານ ເພື່ອສົ່ງເສີມການທ່ອງທ່ຽວດ້ວຍທຶນກູ້ຢືມ ຈາກທະນາຄານພັດທະນາອາຊີ ກໍໄດ້ດຳເນີນການກໍ່ສ້າງເສັ້ນທາງປູຢາງ ແຕ່ທາງແຍກບ້ານຊ່າງໄຫ ຫາບ້ານປາກອູ ເມືອງປາກອູ ແລະ ກໍ່ສ້າງທ່າເຮືອບັກ ທີ່ບ້ານຈອມເພັດ ເມືອງຈອມເພັດ ແຂວງ ຫລວງພະບາງ, ເຊິ່ງຄາດວ່າ ຈະສຳເລັດພາຍໃນຕົ້ນເດືອນເມສາ 2019 ນີ້, ການກໍ່ສ້າງເສັ້ນທາງປູຢາງ ແຕ່ສາມແຍກທາງເລກທີ 12 ໄປຫາຖໍ້າຊ້າງ ແລະ ກໍ່ສ້າງສິ່ງອຳນວຍຄວາມສະດວກ ໃນບໍລິເວນພະທາດສີໂຄດຕະບອງ ເມືອງທ່າແຂກ ແຂວງຄຳມ່ວນ ເຊິ່ງປະກອບດ້ວຍຂົວຂ້າມຫ້ວຍ, ເສັ້ນທາງພາຍໃນເດີ່ນພະທາດ, ບ່ອນຈອດລົດ, ຮ້ານຂາຍເຄື່ອງທີ່ລະນຶກ, ຫ້ອງວາງສະແດງ ແລະ ຫ້ອງສະໜອງຂໍ້ມູນຂ່າວສານການທ່ອງທ່ຽວ ແລະ ຫ້ອງນ້ຳສາທາລະນະ ກໍຈະສຳເລັດພາຍໃນກາງເດືອນກຸມພາ 2019 ນີ້, ພ້ອມຍັງມີການກໍ່ສ້າງເສັ້ນທາງປູຢາງ ແຕ່ເທດສະບານເມືອງໄຊ ຫາ ຖໍ້າຈອມອອງ ແຂວງອຸດົມໄຊ ຍາວ 39 ກິໂລແມດ ຄາດຄະເນຈະສຳເລັດໃນທ້າຍປີ 2020.
ພ້ອມນີ້, ພາກສ່ວນທຸລະກິດ ກໍໄດ້ມີການລົງທຶນພັດທະນາສິ່ງອຳນວຍຄວາມສະດວກ ຮອງຮັບການທ່ອງທ່ຽວ ແລະ ແຫລ່ງທ່ອງທ່ຽວ ເຊັ່ນ: ການກໍ່ສ້າງໂຮງແຮມ, ເຮືອນພັກ ແລະ ຮ້ານອາຫານຢູ່ບັນດາແຂວງ, ພັດທະນາແຫລ່ງທ່ອງທ່ຽວ ໂດຍສະເພາະແມ່ນນໍ້າກັດຢໍຣະປາ ທີ່ແຂວງອຸດົມໄຊ, ສວນພຶກສາ ທີ່ແຂວງຫລວງພະບາງ, ສວນພຶກສາ ທີ່ນະຄອນຫລວງວຽງຈັນ, ຟາມພູຕາເວັນ ທີ່ແຂວງບໍລິຄຳໄຊ, ກິດຈະກຳຂີ່ສະລິງທີ່ຕາດຟາກ, ແຫລ່ງທ່ອງທ່ຽວຕາດເຢືອງ, ນ້ຳຕົກຕາດຄອນພະເພັງ ແຂວງຈຳປາສັກ ແລະ ອື່ນໆ ອີກຫລາຍແຫ່ງ.
（ແຫຼ່ງຂໍ້ມູນ： ສົມຫວັງ/ຂປລ）
