 |
ທ່ານ ທາຮາ ແມັກຟໍຊັນ ເອກອັກຄະລັດຖະທູດນິວຊີແລນ ປະຈຳ ສປປ ລາວ ພ້ອມດ້ວຍຄະນະ ໄດ້ເຂົ້າພົບປະທ່ານ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງ.
ຂໍ້ມູນດັ່ງກ່າວໄດ້ຮັບການລາຍງານ ໃນໂອກາດທີ່ ທ່ານ ທາຮາ ແມັກຟໍຊັນ ເອກອັກຄະລັດຖະທູດນິວຊີແລນ ປະຈຳ ສປປ ລາວ ພ້ອມດ້ວຍຄະນະ ໄດ້ເຂົ້າພົບປະທ່ານ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງ ໃນວັນທີ 13 ພະຈິກ 2018 ເພື່ອຕິດຕາມໂຄງການຕ່າງໆຂອງລັດຖະບານນິວຊີແລນ ໃຫ້ການຊ່ວຍເຫລືອທີ່ກຳລັງຈັດຕັ້ງປະຕິບັດ ພາຍຫລັງທີ່ທ່ານໄດ້ຮັບຕຳແໜ່ງໃໝ່ ແລະ ເພື່ອເປັນການຂະຫຍາຍການຮ່ວມມື, ຊ່ວຍເຫລືອຊຸກຍູ້ການລົງທຶນຈາກຕ່າງປະເທດ ເຂົ້າ ມາລົງທຶນຢູ່ແຂວງຊຽງຂວາງ ໃຫ້ຫລາຍຂຶ້ນ.
ໂອກາດນີ້, ທ່ານເຈົ້າແຂວງຊຽງຂວາງ ກໍໄດ້ສະແດງຄວາມດີໃຈ ແລະ ຂອບໃຈມາຍັງ ລັດຖະບານ ກໍຄື ປະຊາຊົນນິວຊີແລນ ທີ່ໄດ້ໃຫ້ການຊ່ວຍເຫລືອແຂວງຊຽງຂວາງ ໃນຫລາຍຂົງເຂດ, ເຊິ່ງແຕ່ລະຂົງເຂດ ແມ່ນລ້ວນແຕ່ມີຄວາມ ຈຳເປັນຫລາຍ ແລະ ຖືກກັບເປົ້າໝາຍຂອງແຂວງວາງອອກ.
（ແຫຼ່ງຂໍ້ມູນ： ບຸນມີ ແສງທຸມມີ/ຂປລ）
