| ລາວ: ລັດຖະບານ ກຳນົດບາງມາດຕະການຈຸດສຸມ ໃນ 6 ເດືອນທ້າຍປີ 2020 | |
| ທູດລາວ ປະຈໍາ ສສ ຫວຽດນາມ ເຂົ້າຢ້ຽມຂ່ຳນັບຫົວໜ້າຄະນະຂົນຂວາຍປະຊາຊົນ ສູນກາງພັກຄອມມູນິດຫວຽດນາມ |
 |
| ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ. |
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ໄດ້ຂຶ້ນຊີ້ແຈງຕໍ່ຄຳຊັກຖາມຂອງສະພາແຫ່ງຊາດ ກ່ຽວກັບນະໂຍບາຍ, ວິທີການ ແລະ ມາດຕະການຊຸກຍູ້ ແລະ ສົ່ງເສີມການລົງທຶນ ເພື່ອຮັບປະກັນເຮັດໃຫ້ການເຕີບໂຕຂອງເສດຖະກິດແຫ່ງຊາດ, ສາມາດສືບຕໍ່ຂະຫຍາຍຕົວຢ່າງຕໍ່ເນື່ອງ ຕໍ່ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ໃນຕອນເຊົ້າຂອງວັນທີ 25 ມິຖຸນານີ້, ພາຍໃຕ້ການເປັນປະທານຂອງ ທ່ານນາງ ປານີ ຢາທໍ່ຕູ້ ປະ ທານສະພາແຫ່ງຊາດ.
ທ່ານ ສອນໄຊ ສີພັນດອນ ກ່າວວ່າ: ສະພາແຫ່ງຊາດໄດ້ຮັບຮອງເອົາແຜນດັດແກ້ໂຕເລກມະຫາພາກ ໃນໄລຍະ 4 ປີ (2017-2020) ຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ຕາມມະຕິ 014/ສພຊ, ລົງວັນທີ 24/11/2016 ຊຶ່ງຄາດໝາຍ GDP ຂະຫຍາຍຕົວໃນ ລະດັບ ສະເລ່ຍ 7,2% ໃນນັ້ນ ປີ 2017 ເທົ່າກັບ 7%, ປີ 2018 ເທົ່າກັບ 7%, ປີ 2019 ເທົ່າກັບ 7,3% ແລະ ປີ 2020 ເທົ່າກັບ 7,5%, ຄາດຄະເນຄວາມຕ້ອງການທຶນ ເພື່ອການພັດທະນາ ທັງໝົດ 173.329 ຕື້ກີບ ຫຼື 21,4 ຕື້ໂດລາ ກວມເອົາ 29% ຂອງ GDP, ໃນນີ້ ການລົງທຶນຂອງລັດກວມປະມານ 12-15% ຂອງການ ລົງທຶນລວມທັງໝົດ, ແຫຼ່ງທຶນຈາກການຊ່ວຍເຫຼືອທາງການ ເພື່ອການພັດທະນາ ກວມປະມານ 15-24%, ການລົງທຶນ ຂອງເອກະຊົນພາຍໃນ ແລະ ຕ່າງປະເທດ ກວມປະມານ 40-49% ແລະ ການລົງທຶນຈາກລະບົບເງິນຕາ ກວມປະມານ 21-23% ຂອງທຶນລວມທັງໝົດ. ຜ່ານການຈັດຕັ້ງປະຕິບັດຕົວຈິງຄາດວ່າ GDP ຈະຂະຫຍາຍຕົວ ໂດຍສະເລ່ຍໃນລະດັບ 5,9% ຫຼຸດແຜນການທີ່ວາງໄວ້ 1,3% (ແຜນການ 7,2%) ແລະ ການສະໜອງທຶນເພື່ອການພັດທະນາໃນໄລຍະ 4 ປີ ກໍຈະບໍ່ສາມາດບັນລຸໄດ້ຕາມແຜນທີ່ວາງໄວ້.
ທ່ານ ສອນໄຊ ສີພັນດອນ ກ່າວອີກວ່າ: ລັດຖະບານໄດ້ເອົາໃຈໃສ່ຂົນຂວາຍ, ດຶງດູດ ແລະ ຄຸ້ມຄອງການຈັດຕັ້ງປະຕິບັດ 4 ແຫຼ່ງທຶນ ເພື່ອການພັດທະນາໃຫ້ມີປະສິດພາບສູງຂຶ້ນ ດ້ວຍການກໍານົດນະໂຍບາຍ, ນິຕິກໍາ ແລະ ມາດຕະການ ໂດຍສຸມໃສ່ບັນດາວຽກງານຈຸດສຸມ 6 ເດືອນທ້າຍປີ 2020 ໃນ 4 ແຫຼ່ງທຶນຕົ້ນຕໍ ຄື:
ການລົງທຶນຈາກງົບປະ ມານຂອງລັດ
1.) ໃຫ້ທຸກພາກສ່ວນສືບຕໍ່ປະຕິບັດກົດ ໝາຍ ວ່າດ້ວຍການລົງທຶນ ຂອງລັດ ແລະ ຄໍາແນະນໍາ ຈັດຕັ້ງປະຕິບັດກົດໝາຍດັ່ງກ່າວ ຢ່າງເຄັ່ງຄັດ.
2.) ສືບຕໍ່ຈັດຕັ້ງປະຕິບັດໂຄງການລົງທຶນຂອງລັດ ທີ່ສະພາແຫ່ງຊາດຮັບຮອງໄປແລ້ວໃນປີ 2020 ເພື່ອສ້າງເງື່ອນໄຂ ໃຫ້ມີການຈ້າງງານ, ການຈັດຊື້ວັດສະດຸ ແລະ ການຈັດຈ້າງຕ່າງໆໃນສັງຄົມ ຊຶ່ງເປັນການຊຸກດັນໃຫ້ເສດຖະກິດຂະຫຍາຍຕົວ ໃນລະດັບ 3,6% ລວມທັງການແກ້ບັນຫາໄພວ່າງງານໃຫ້ໄດ້ໃນລະດັບໜຶ່ງ.
3.) ສືບຕໍ່ກວດກາໂຄງການລົງທຶນຂອງລັດທີ່ມີມູນຄ່າສູງ ປະຕິບັດຕາມແຈ້ງການເລກທີ 130/ຫສນຍ, ລົງວັນທີ 22 ມັງກອນ 2019 ໃນຂອບເຂດທົ່ວປະເທດ ພ້ອມທັງຄົ້ນຄວ້າເຈລະຈາຄືນໃໝ່ໃນດ້ານມູນຄ່າໂຄງການໃຫ້ສົມເຫດສົມຜົນຂຶ້ນຕື່ມ. ພາຍຫຼັງສໍາເລັດແລ້ວຈະໄດ້ນໍາສະເໜີສະພາແຫ່ງຊາດຮັບຮອງຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການກ່ຽວຂ້ອງໃນການຫັກລົບມູນຄ່າດັ່ງກ່າວອອກຈາກແຜນການລົງທຶນຂອງລັດ.
4.) ສືບຕໍ່ປະຕິບັດຕາມນະໂຍບາຍຂອງລັດຖະບານ ໃນການແກ້ໄຂໜີ້ສິນໂຄງການລົງທຶນຂອງລັດ ດ້ວຍຮູບການ ອວ່າຍໜີ້ 3 ແຈ ແລະ ພັນທະບັດ ໃຫ້ສໍາເລັດໃນປີ 2020 ເພື່ອສ້າງສະພາບຄ່ອງໃຫ້ແກ່ລະບົບທະນາຄານ ແລະ ຫົວໜ່ວຍທຸລະກິດຜູ້ປະກອບສາມາດເຄື່ອນໄຫວທຸລະກິດໄດ້ໃນລະດັບໜຶ່ງ ຊຶ່ງມາເຖິງປັດຈຸບັນຄະນະແກ້ໄຂໜີ້ສິນລະດັບຊາດກໍາລັງຈັດຕັ້ງປະຕິບັດ.
5.) ສໍາລັບບັນດາໂຄງການລົງທຶນຂອງລັດທີ່ຂະແໜງການ ແລະ ທ້ອງຖິ່ນກູ້ຢືມໂດຍກົງ ຫຼື ເປັນຜູ້ຄໍ້າປະກັນກັບທະນາຄານ ຈະໄດ້ພິຈາລະນາແກ້ໄຂເປັນອັນສະເພາະໄປໃນແຕ່ລະກໍລະນີ.
ການລະດົມການລົງທຶນຈາກການຊ່ວຍເຫຼືອ ແລະ ກູ້ຢືມ Official development assistance (ODA) ຫຼື ທຶນຈາກການຊ່ວຍເຫຼືອທາງການເພື່ອການພັດທະນາ
1.) ສຸມໃສ່ຈັດຕັ້ງປະຕິບັດດໍາລັດສະບັບເລກທີ 357/ລບ, ລົງວັນທີ 9 ຕຸລາ 2019 ໃນການຄຸ້ມຄອງ ແລະ ນໍາໃຊ້ການຊ່ວຍເຫຼືອທາງການເພື່ອການພັດທະນາ.
2.) ສືບຕໍ່ລະດົມ ແລະ ຊຸກຍູ້ການຈັດຕັ້ງປະຕິບັດບັນດາທຶນຊ່ວຍເຫຼືອຈາກບັນດາຄູ່ຮ່ວມພັດທະນາ ແລະ ບັນດາເພື່ອນມິດຍຸດທະສາດໃຫ້ສາມາດດໍາເນີນໄປຕາມແຜນທີ່ວາງໄວ້.
3.) ຮີບຮ້ອນຜັນຂະຫຍາຍຍຸດທະສາດການລະດົມທຶນການຊ່ວຍເຫຼືອ ແລະ ກູ້ຢືມ ເພື່ອເປັນບ່ອນອີງ ໃນການລະດົມທຶນ.
4.) ສໍາລັບເງິນກູ້ຢືມຈະຕ້ອງໄດ້ຄົ້ນຄວ້າວິໄຈລະອຽດ ແລະ ຄັດເລືອກໂຄງການທີ່ຈໍາເປັນຮີບດ່ວນ, ມີປະສິດທິຜົນສູງດ້ວຍຮູບແບບດອກເບ້ຍຜ່ອນຜັນ, ໄລຍະເວລາຊໍາລະຍາວ ແລະ ບໍ່ມີເງື່ອນໄຂຜູກມັດ.
5.) ເອົາໃຈໃສ່ກວດກາ, ຕິດຕາມ ແລະ ປະເມີນຄືນການຈັດຕັ້ງປະຕິບັດແຫຼ່ງທຶນຊ່ວຍເຫຼືອທາງການເພື່ອການພັດທະນາ ໂດຍຜ່ານການລາຍງານ ແລະ ລົງຕິດຕາມກວດກາໂຄງການຕົວຈິງ ຂອງແຕ່ລະພາກສ່ວນຢ່າງເປັນ ປົກກະຕິ.
6.) ຈະໄດ້ເລື່ອນກອງປະຊຸມໂຕະມົນ ປະຈໍາປີ 2020 ເນື່ອງຈາກຍັງມີຄວາມສ່ຽງສູງ ຈາກການລະບາດຂອງພະຍາດໂຄວິດ 19 ໄປຕົ້ນປີ 2021.
ການດຶງດູດການລົງທຶນພາກເອກກະຊົນພາຍໃນ ແລະ ຕ່າງປະເທດ
1. ສືບຕໍ່ປັບປຸງຂັ້ນຕອນ ແລະ ລະບຽບການໃນການສ້າງ ແລະ ດໍາເນີນທຸລະກິດ ຕາມ 10 ຕົວຊີ້ວັດ ໃຫ້ດີຂຶ້ນຕາມຄໍາສັ່ງເລກທີ 02/ນຍ ໃຫ້ເປັນຮູບປະທໍາຈະແຈ້ງ ໂດຍສະເພາະຕົວຊີ້ວັດທີ່ຍັງຄ້າງ ແລະ ສືບຕໍ່ປັບປຸງ ວຽກງານການປະສານງານປະຕູດຽວ, ບໍລິການອອກໃບອະນຸຍາດລົງທຶນ ແລະ ການອອກໃບອະນຸຍາດດໍາເນີນທຸລະກິດໃນຂອບເຂດທົ່ວປະເທດ ສະບັບເລກທີ 03/ນຍ ໃຫ້ມີຄວາມວ່ອງໄວ.
2. ຄົ້ນຄວ້ານະໂຍບາຍຫຼຸດຜ່ອນດ້ານພາສີອາກອນ ຂອງຂະແໜງການສົ່ງເສີມການລົງທຶນເຊັ່ນ: ຂະແໜງກະສິກໍາ (ສຸມໃສພິເສດໃນການສົ່ງເສີມການຜະລິດກະສິກໍາ (ພືດ-ສັດ) ທີ່ມີຕະຫຼາດຮອງຮັບແລ້ວ ແລະ ມີທ່າແຮງໃນການຂະຫຍາຍຕະຫຼາດ), ຂະແໜງບໍລິການ (ທ່ອງທ່ຽວ, ຂົນສົ່ງ, ທຸລະກິດທີ່ຕິດພັນກັບການສ້າງສິ່ງອໍານວຍຄວາມສະດວກດ້ານການທ່ອງທ່ຽວ ແລະ ທຸລະກິດທີ່ຕິດພັນກັບການໂຄສະນາດຶງດູດນັກທ່ອງທ່ຽວ), ຂະແໜງການອຸດສະຫະກໍາປຸງແຕ່ງຂະໜາດນ້ອຍ ແລະ ຂະໜາດກາງ ແລະ ອື່ນໆ;
3. ຊຸກຍູ້ສົ່ງເສີມການລົງທຶນໃນເຂດເສດຖະກິດພິເສດ, ເຂດ ແລະ ນິຄົມອຸດສາຫະກໍາ, ໂດຍເອົາໃຈໃສ່ເລັ່ງຄົ້ນຄວ້ານະໂຍບາຍຫຼຸດຜ່ອນພາສີອາກອນຕ່າງໆຕື່ມອີກ, ເພື່ອດຶງດູດການລົງທຶນຈາກພາກເອກະຊົນເຂົ້າມາລົງທຶນໃນເຂດດັ່ງກ່າວ ແລະ ເພື່ອຮອງຮັບໃຫ້ແຮງງານລາວ ທີ່ກັບມາຈາກຕ່າງປະເທດທີ່ມີຜົນກະທົບທາງດ້ານເສດຖະກິດ ໄດ້ມີວຽກເຮັດງານທໍາ ໂດຍສຸມໃສ່ເຂດເສດຖະກິດທີ່ເປັນທ່າແຮງເປັນຕົ້ນ ເຂດກວມລວມໄຊເຊດຖາ, ສະຫວັນ-ເຊໂນ. ພ້ອມນັ້ນ ກໍຊຸກຍູ້ການອະນຸມັດການລົງທຶນຂອງບໍລິສັດ ອໍາມະຕະ ໃຫ້ເປັນໄປຕາມແຜນການລົງທຶນ;
4. ຊຸກຍູ້ໃຫ້ຂະແໜງການກ່ຽວຂ້ອງ ຄົ້ນຄວ້ານະໂຍບາຍຫຼຸດຜ່ອນກ່ຽວກັບການເກັບອາກອນກໍາໄລ ແລະ ເກັບລາຍໄດ້ຈາກອາກອນປິ່ນອ້ອມອື່ນໆ ໃຫ້ຂະແໜງການທ່ອງທ່ຽວ , ການຜະລິດ ເພື່ອສົ່ງອອກ ຕາມຄວາມເໝາະສົມ.
5. ເມື່ອສ້າງເງື່ອນໄຂຊຸກຍູ້ ແລະ ສືບຕໍ່ເຮັດໃຫ້ບັນດາຜູ້ປະກອບການ, ຫົວໜ່ວຍວິສາຫະກິດ ແລະ ໂຮງຈັກໂຮງງານຕ່າງໆ ໃຫ້ສາມາດກັບຄືນມາເຮັດການຜະລິດທຸລະກິດໄດ້ປົກກະຕິ, ມີການຈ້າງງານເກີດຂຶ້ນ ດ້ວຍ ການໃຫ້ນະໂຍບາຍດ້ານອາ ກອນທີ່ຈິງໃຈເຊັ່ນ: ການຍົກ ເວັ້ນອາກອນກໍາໄລ ໃນກໍລະນີມີການຂະຫຍາຍການຜະລິດ ຫຼື ວິສາຫະກິດມີການລົງທຶນເພີ່ມ.
ການລົງທຶນຈາກລະບົບການເງິນ-ເງິນຕາ
1) ສືບຕໍ່ຊຸກຍູ້ ບັນດາທະນາຄານທຸລະກິດ ໃຫ້ເຂົ້າຮ່ວມໂຄງການສິນເຊື່ອ SME ຈໍານວນ 200 ຕື້ກີບ ຊຶ່ງອະນຸມັດໃນງວດທໍາອິດ 100 ຕື້ກີບ ໃຫ້ສາມາດດໍາເນີນການໂດຍໄວ ໂດຍພິຈາລະນາປ່ອຍສິນເຊື່ອໃຫ້ແກ່ວິສາຫະກິດ ຂະໜາດນ້ອຍ ແລະ ກາງ ຄື: ຂະແໜງປູກຝັງ ແລະ ລ້ຽງສັດ, ປຸງແຕ່ງກະສິກໍາ, ຫັດຖະກໍາ ແລະ ການທ່ອງທ່ຽວ ເພື່ອຊຸກຍູ້ການຜະລິດເພື່ອທົດແທນການນໍາເຂົ້າ ແລະ ເພີ່ມສິນຄ້າເພື່ອສົ່ງອອກໃຫ້ຫຼາຍຂຶ້ນ.
2) ສໍາລັບໂຄງການເງິນກູ້ຈາກທະນາຄານພັດທະນາແຫ່ງຊາດຈີນ (CDB) ຈໍານວນ 100 ລ້ານໂດລາ ໃນງວດທໍາອິດ ໃນ 300 ລ້ານໂດລາ, ສະເໜີໃຫ້ທະນາຄານແຫ່ງ ສ ປປ ລາວ ຮີບຮ້ອນເຈລະຈາກັບຝ່າຍຈີນ (CDB) ເພື່ອຂໍຜ່ອນຜັນເງື່ອນໄຂເງິນກູ້ດັ່ງກ່າວໃຫ້ສໍາເລັດໂດຍໄວ ເພື່ອໃຫ້ສາມາດນໍາເອົາເງິນກູ້ດັ່ງກ່າວ ປ່ອຍໃຫ້ພາກສ່ວນທຸລະກິດ ຕາມຈຸດປະສົງ ແລະ ເປົ້າໝາຍຂອງເງິນກູ້.
3) ສືບຕໍ່ຄົ້ນຄ້ວາ, ປັບປຸງ ແລະ ພັດທະນານະໂຍບາຍຄຸ້ມຄອງສິນເຊື່ອ ເພື່ອຊຸກຍູ້ການເຂົ້າເຖິງແຫຼ່ງທຶນຂອງ SME ໃຫ້ມີຄວາມສະດວກ ແລະ ວ່ອງໄວກວ່າເກົ່າ, ສະໜອງສິນເຊື່ອໃຫ້ທະນາຄານທຸລະກິດ ໃນອັດຕາດອກເບ້ຍຕໍ່າ ເພື່ອສົ່ງເສີມ SME ພາຍໃນ ພ້ອມດຽວກັນນັ້ນ, ສືບຕໍ່ການຈັດຕັ້ງປະຕິບັດຂໍ້ຕົກລົງວ່າດ້ວຍນະໂຍບາຍສິນເຊື່ອ ເພື່ອແກ້ໄຂຜົນກະທົບຈາກການລະບາດພະຍາດໂຄວິດ-19 ໃນການແກ້ໄຂຜົນກະທົບທາງດ້ານເສດຖະກິດ ສປປ ລາວ ສະບັບເລກທີ 238/ທຫລ, ລົງວັນທີ 26 ມີນາ 2020 ແລະ ຂໍ້ຕົກລົງວ່າດ້ວຍໂຄງການສິນເຊື່ອເພື່ອຊຸກຍູ້ ການຜະລິດ ແລະ ການແກ້ໄຂຜົນກະທົບໂຄວິດ-19 ສະບັບເລກທີ 318/ທຫລ, ລົງວັນທີ 19 ພຶດສະພາ 2020 ໃຫ້ມີປະສິດທິຜົນ.
 | ສື່ມວນຊົນລາວ ລົງຂ່າວຢ່າງຫຼວງຫຼາຍກ່ຽວກັບບັນດາກອງປະຊຸມຂອງອາຊຽນ ທີ່ກອງປະຊຸມບໍ່ເປັນທາງການລັດຖະມົນຕີການຕ່າງປະເທດອາຊຽນ, ບັນດາລັດຖະມົນຕີໄດ້ແລກປ່ຽນທັດສະນະກ່ຽວກັບສະພາບການຂອງພາກພື້ນ ແລະ ໃນໂລກ. |
 | ລາວຕີລາຄາສູງຫວຽດນາມໃນບົດບາດເປັນປະທານອາຊຽນ ຍສໝ - ທ່ານ ທອງ |
 | ນາຍົກລັດຖະມົນຕີ ຄາດປີນີ້ເສດຖະກິດລາວ ຈະຂະຫຍາຍຕົວລະດັບ 3,6% ສຳລັບປັດໄຈທີ່ເຮັດໃຫ້ GDP ຂະຫຍາຍຕົວໃນລະດັບ 3,6% ໃນ 2020 ມີດັ່ງນີ້: ຂະແໜງກະສິກຳ: ຂະຫຍາຍຕົວ 2,3% ຫລຸດແຜນການ 0,4%, ເຖິງວ່າຈະບໍ່ບັນລຸຕາມແຜນການທີ່ວາງໄວ້ແຕ່ເຫັນວ່າປະຊາຊົນ ໄດ້ຫັນມາສູ່ການຜະລິດກະສິກໍາ ເພື່ອສະໜອງພາຍໃນເພີ່ມຂຶ້ນ ຕາມຄວາມຕ້ອງການຂອງຕະຫລາດຍ້ອນການຈໍາກັດການສົ່ງອອກສິນຄ້າກະສິກໍາ ຂອງປະເທດເພື່ອນບ້ານ ເຮັດໃຫ້ການບໍລິໂພກຜະລິດຕະພັນພາຍໃນຫລາຍຂຶ້ນ. |
pasaxon.org.la
