 |
ບັນດາຜູ້ແທນຖ່າຍຮູບເປັນທີ່ລະລຶກ. (ພາບ: ຂປລ)
ສະພາແຫ່ງຊາດ ໄດ້ຈັດກອງປະຊຸມເປີດກວ້າງ ປະກອບຄຳຄິດຄຳເຫັນ ກ່ຽວກັບການເພີ່ມຊົນເຜົ່າບຣູ ຢູ່ ແຂວງສະຫວັນນະເຂດ ເຂົ້າໃນຊົນເຜົ່າໃນລາວ ໃນວັນທີ 9 ສິງຫາ 2018 ທີ່ນະຄອນຫລວງວຽງຈັນ, ໂດຍການເປັນປະທານ ຂອງ ທ່ານ ພົນໂທ ແສງນວນ ໄຊຍະລາດ ຮອງປະທານສະພາແຫ່ງຊາດ, ມີ ທ່ານ ຄຳໃບ ດຳລັດ ຮອງປະທານສູນກາງແນວລາວສ້າງຊາດ, ມີບັນດາພະນັກງານຂັ້ນສູນກາງ ແລະ ທ້ອງຖິ່ນ, ພະນັກງານອາວຸໂສບໍານານ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ກອງປະຊຸມໃນຄັ້ງນີ້, ແນໃສ່ປຶກສາຫາລື ປະກອບຄຳຄິດຄຳເຫັນ ແລະ ຄົ້ນຄວ້າ ເພີ່ມຊົນເຜົ່າ ທີ່ມີຊື່ເອີ້ນວ່າ ບຣູ ເຂົ້າຊົນເຜົ່າໃນລາວ ຈາກ 49 ຊົນເຜົ່າ ເປັນ 50 ຊົນເຜົ່າ, ເຊິ່ງຊົນເຜົ່າບຣູ ເປັນຊົນເຜົ່າທີ່ດຳລົງຄົງຕົວ ຢູ່ດິນແດນແຂວງສະຫວັນນະເຂດ ມາແຕ່ບູຮານນະການ ແລະ ໄດ້ເຄື່ອນຍ້າຍແຜ່ຂະຫຍາຍໄປສູ່ແຂວງອ້ອມຂ້າງ ແລະ ປະເທດໃກ້ຄຽງ. ໃນກອງປະຊຸມ ໄດ້ຮັບຟັງການສະເໜີ ບັນດາເອກະສານທີ່ສຳຄັນ ຈາກບັນດາພາກສ່ວນຮັບຜິດຊອບ ເປັນຕົ້ນ ແມ່ນຫລັກການຄົ້ນຄວ້າຊົນເຜົ່າວິທະຍາ, ບົດລາຍງານຜົນການຕິດຕາມກວດກາ ການປະຕິບັດມະຕິຕົກລົງຂອງກອງປະຊຸມ ສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ 6 ກ່ຽວກັບການຮັບຮອງເອົາຊື່ເອີ້ນ ແລະ ຈຳນວນຊົນເຜົ່າ, ການລາຍງານ ການຢືນຢັນ ກ່ຽວກັບຕົ້ນກຳເນີດ, ປະຫວັດຄວາມເປັນມາ ແລະ ຮີດຄອງປະເພນີ ທີ່ເປັນເອກະລັກສະເພາະຂອງຊົນເຜົ່າ ທີ່ມີຊື່ເອີ້ນວ່າ ບຣູ ແລະ ອື່ນໆ.
ໂອກາດດັ່ງກ່າວ, ທ່ານ ພົນໂທ ແສງນວນ ໄຊຍະລາດ ກ່າວວ່າ: ໃນໄລຍະຜ່ານມາ ສະພາແຫ່ງຊາດ ໄດ້ຮັບຮອງເອົາຊື່ເອີ້ນ ແລະ ຈຳນວນຊົນເຜົ່າເບື້ອງຕົ້ນ 49 ຊົນເຜົ່າ ໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ 6, ຫລັງຈາກນັ້ນ ໄດ້ຮັບການສະເໜີ ຈາກພະນັກງານບໍານານ ແລະ ປະຊາຊົນ ຈໍານວນໜຶ່ງ ຂອງແຂວງສະຫວັນນະເຂດ ເຖິງພາກສ່ວນທີ່ກ່ຽວຂ້ອງ ຂອງແຂວງ ແລະ ສູນກາງ ທີ່ຢາກໄດ້ຊື່ເອີ້ນຊົນເຜົ່າຕົນເອງວ່າ ບຣູ ຜ່ານການຄົ້ນຄວ້າຄຳສະເໜີຂອງປະຊາຊົນເຫັນວ່າ ມີເຫດຜົນ ແລະ ຄວາມຈໍາເປັນຕ້ອງໄດ້ເພີ່ມຊົນເຜົ່າດັ່ງກ່າວ .
ທ່ານ ພົນໂທ ແສງນວນ ໄຊຍະລາດ ຍັງໄດ້ເນັ້ນ ໃຫ້ບັນດາຜູ້ແທນທີ່ເຂົ້າຮ່ວມກອງປະຊຸມ ຈົ່ງພ້ອມກັນສຸມສະຕິປັນຍາ ແລະ ມີຄຳຄິດຄຳເຫັນ ປະກອບສ່ວນເຮັດໃຫ້ກອງປະຊຸມໃນຄັ້ງນີ້ ໄດ້ຮັບຜົນສຳເລັດຕາມຈຸດປະສົງເປົ້າໝາຍ ແລະ ຄາດວ່າຈະນຳເອົາບັນຫາດັ່ງກ່າວ ເຂົ້າພິຈະລານາ ໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ 8 ໃນທ້າຍ ປີ 2018 ນີ້.
（ແຫຼ່ງຂໍ້ມູນ： ຂປລ）
