ນັກຮຽນຮູ້ອິນເດຍຕີລາຄາບົດບາດຂອງຫວຽດນາມກັບ ອາຊຽນ ແລະ ສະພາຄວາມໝັ້ນຄົງສະຫະປະຊາຊາດ

05:55 | 24/03/2020

ຍສໝ - ໃນຖານະທີ່ເປັນກໍາມະການບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດ, ຫວຽດນາມມີໂອກາດທີ່ເໝາະສົມກັບເປົ້າໝາຍການພັດທະນາຂອງອາຊຽນກັບຂໍ້ລິເລີ່ມຂອງສະຫະປະຊາຊາດ. ນັ້ນແມ່ນການປະເມີນຜົນຂອງ ທ່ານ ດຣ Pankaj Jha, ນັກຮຽນຮູ້ແຖວໜ້າຂອງອິນເດຍກ່ຽວກັບບັນຫາສາກົນ, ໄດ້ຖືກເຜີຍແຜ່ໃນເວັບ Modern Policy ໃນເດືອນມີນາ ປີ 2020.

ນັກຮຽນຮູ້ອິນເດຍຕີລາຄາບົດບາດຂອງຫວຽດນາມກັບ ອາຊຽນ ແລະ ສະພາຄວາມໝັ້ນຄົງສະຫະປະຊາຊາດ

ບັນຍາດກາດທີ່ກອງປະຊຸມຂອງສະພາຄວາມໝັ້ນຄົງສະຫະປະຊາຊາດ ໃນເມື່ອວັນທີ 11/3. (ພາບ:TTXVN)

ໜັງສືພິມຍຸກສະໄໝຂໍແນະນຳເນື້ອໃນບົດຂຽນ ຄືດັ່ງຕໍ່ໄປນີ້:

ຫວຽດນາມໄດ້ຮັບຕຳແໜ່ງເປັນປະທານອາຊຽນຈາກປະເທດໄທແຕ່ເດືອນພະຈິກ 2019 ດ້ວຍວາລະກອງປະຊຸມ ປີ 2020 ເຊິ່ງລວມມີຫຼາຍບັນຫາ ແລະ ສິ່ງທ້າທາຍ. ພາຍໃຕ້ຂອບເຂດທາງດ້ານພູມສາດ-ດ້ານການເມືອງ ທີ່ກວ້າງຂວາງຂອງພາກພື້ນມະຫາສະມຸດອິນເດຍ ແລະ ມະຫາສະມຸດປາຊີຟິກ. ອາຊຽນຮັບຮູ້ວ່າຈຳເປັນຕ້ອງມີຍຸດທະສາດ ສຳລັບພາກພື້ນນີ້.

ດ້ວຍເຫດນັ້ນ, ອາຊຽນອອກຖະແຫຼງການກ່ຽວກັບວິໄສທັດ ສຳລັບພາກພື້ນມະຫາສະມຸດອິນເດຍ ແລະ ມະຫາສະມຸດປາຊີຟິກ ແລະ ຈາກຖະແຫຼງການນີ້ ອາຊຽນຈຳເປັນຕ້ອງເປັນເຈົ້າການໃນການປັບຕົວເພື່ອເຂົ້າກັບໂຄງປະກອບສິດອໍານາດທີ່ມີການປ່ຽນແປງໄປເລື້ອຍໆ.

ບັນດາການຜັນແປຄືໃນປະຈຸບັນ - ຈາກຄວາມເຄັ່ງຕຶງໃນທະເລຕາເວັນອອກເນື່ອງຈາກການອ້າງສິດອະທິປະໄຕ ຂອງຈີນທີ່ບໍ່ມີເຫດຜົນ, ໄຟໄໝ້ປ່າໃນປະເທດອິນໂດເນເຊຍ, ຄວາມເຄັ່ງຕຶງລະຫວ່າງອິນໂດເນເຊຍ ແລະ ຈີນ ກ່ຽວກັບການຫາປາຜິດກົດໝາຍໃນທະເລຕາເວັນອອກ... ແມ່ນບັນດາສິ່ງທ້າທາຍຕ່າງປະຈໍາປີ ສໍາລັບ ປະທານອາຊຽນ.ບັນຫາໄຟໄໝ້ປ່າຢູ່ອິນໂດເນເຊຍ ແລະ ບັນຫາສິ່ງແວດລ້ອມອື່ນໆຮຽກຮ້ອງໃຫ້ມີວິທີການຮ່ວມມື.

ອາຊຽນ ຍັງຕ້ອງກຽມພ້ອມທີ່ຈະປະເຊີນກັບສະພາບການຊະລໍຕົວຂອງເສດຖະກິດໂລກ ຍ້ອນການລະບາດຂອງ COVID-19 ແລະ ການຂະຫຍາຍຕົວຂອງເສດຖະກິດທີ່ຫຼຸດລົງ ແມ່ນມີຜົນກະທົບບໍ່ພຽງແຕ່ໃນອາຊີເທົ່ານັ້ນ ແຕ່ກໍ່ໄປຍັງໃນທົ່ວໂລກອີກດ້ວຍ. ສິ່ງທ້າທາຍອີກຢ່າງໜຶ່ງ ໃນປີນີ້ ສຳລັບຫວຽດນາມ ແມ່ນຄວາມເຫັນດີເຫັນພ້ອມທີ່ຈຳເປັນໃນບັນດາປະເທດສະມາຊິກອາຊຽນ ແມ່ນວ່າບັນດາຝ່າຍໃນທະເລຕາເວັນອອກເຊິ່ງທີ່ມີຄວາມຂັດແຍ້ງກ່ຽວກັບກົດແຫ່ງການປະພຶດ (COC) ຕ້ອງການມີບັນດາຂໍ້ກຳນົດການຈັດຕັ້ງປະຕິບັດ ແລະ ການແກ້ໄຂຕາມລະບຽບກົດໝາຍ.

ຮ່າງ COC ໃນປະຈຸບັນໄດ້ແກ້ໄຂຫຼາຍບັນຫາຢ່າງກວ້າງຂວາງ, ເຊິ່ງສ່ອງແສງໃຫ້ເຫັນຄວາມປາດຖະໜາ ແລະ ຕຳແໜ່ງ ທາງດ້ານກົດໝາຍຂອງຜູ້ຮຽກຮ້ອງແຕ່ລະຄົນ. ເຖິງຢ່າງໃດກໍ່ຕາມ, ວິທີການແກ້ໄຂຄວາມວິຕົກກັງວົນຂອງບັນດາຝ່າຍ ແລະ ບັນລຸຮ່າງເອກະສານລວມແມ່ນໜ້າທີ່ທ້າທາຍ ສຳລັບຫວຽດນາມ.

ຫວຽດນາມ ຈະຕ້ອງນຳໃຊ້ທັກສະດ້ານການທູດທີ່ມີຄວາມຄ່ອງແຄ້ວ, ແລະ ມີການເຈລະຈາຕ່າງໆຢ່າງສະຫຼາດເພື່ອບັນລຸເປົ້າໝາຍນີ້. ຍິ່ງໄປກວ່ານັ້ນ, ຫວຽດນາມໄດ້ຮັບການຍອມຮັບເປັນພື້ນຖານເສດຖະກິດພົ້ນເດັ່ນ ແລະ ເປັນປະເທດທີ່ຈະເລີນຮຸ່ງເຮືອງກໍ່ຕ້ອງມີບົດບາດໃນພາກພື້ນ.

ນີ້ຈະຮຽກຮ້ອງໃຫ້ມີຄວາມຍືດຍຸ່ນຂອງການປັບຕົວຈາກສູດທີ່ແນ່ນອນຂອງການສ້າງຄວາມເຫັນດີເຫັນພ້ອມກັບການນຳໃຊ້ມາດຕະການທີ່ມີຄວາມຄ່ອງແຄ້ວເພື່ອບັນລຸຂໍ້​ແລກປ່ຽນສົນທະນາຮ່ວມກັນ. ກອງປະຊຸມລັບຂອງບັນດາລັດຖະມົນຕີຕ່າງປະເທດອາຊຽນ ໃນໄຕມາດທຳອິດຂອງ ປີ 2020 ຈະເປັນພື້ນຖານໃຫ້ແກ່ວາລະກອງປະຊຸມທັງໝົດ ສຳລັບປີ 2020.

ຫວຽດນາມໃນຖານະເປັນພື້ນຖານເສດຖະກິດທີ່ກໍາລັງພົ້ນເດັນທັງເປັນປະເທດສະມາຊິກ APEC ແລະ ເປັນປະເທດທີ່ໄດ້ຮັບຜົນປະໂຫຍດຈາກຂະບວນການ RCEP ຈະຕ້ອງບັນລຸເປົ້າໝາຍ ຄື: RCEP ຈະໄດ້ຮັບການເຊັນໂດຍມີ ຫລື ບໍ່ມີການເຂົ້າຮ່ວມຂອງອິນເດຍ.

ດ້ວຍການພົວພັນຄູ່ຮ່ວມຍຸດທະສາດຮອບດ້ານ ແລະ ການພົວພັນອັນເປັນມຸນເຊື້ອທີ່ດີງາມກັບອິນເດຍ, ຫວຽດນາມຈະນຳອິນເດຍກັບຄືນສູ່ໂຕະເຈລະຈາ. ນີ້ຈະແມ່ນຈຸດເດັ່ນຂອງບົດບາດເປັນປະທານອາຊຽນ. ກ່ອນໜ້ານັ້ນ, ອິນເດຍບໍ່ໄດ້ເຂົ້າຮ່ວມກອງປະຊຸມຢູ່ບາລີ ເພື່ອເຈລະຈາກັບສະມາຊິກອາຊຽນກ່ຽວກັບ RCEP.

ວຽກງານການຕ່າງປະເທດໃນປີ 2020 ​ແມ່ນ​ໄດ້ປະຕິບັດໜ້າ​ທີ່ວຽກ​ງານ​ທີ່​ສຳຄັນສໍາເລັດຜົນຫຼາຍດ້ານ

ບົດບາດຂອງປະທານອາຊຽນ 2020 ກໍ່ຈະປະສົບກັບຄວາມຫຍຸ້ງຍາກຫຼາຍຢ່າງ. ຫວຽດນາມກໍ່ປະສົບຜົນສຳເລັດໃນທາງບວກ ແລະ ມີປະສົບການຫຼາຍຢ່າງຈາກການ​ຮັບຕຳແໜ່ງ​ເປັນປະທານອາຊຽນ​ໃນ​ປີ 2011 ເຊິ່ງທີ່ໄດ້ແກ້ໄຂບັນດາບັນຫາທີ່ຄ້າຍຄືກັນ. ຫວຽດນາມ ໄດ້ປະຕິບັດຕາມ “ວິທີການຂອງອາຊຽນ” ແທນທີ່ຈະສະເໜີວິທີແກ້ໄຂໃໝ່, ແຕກຕ່າງຈາກວິທີການຄິດທຳມະດາ.

ສະພາບທາງດ້ານພູມສາດ-ການເມືອງ ແລະ ການຄິດໄລ່ດ້ານຍຸດທະສາດ ໃນປີ 2020 ຈະບໍ່ເປັນເລື່ອງງ່າຍ ສຳລັບຫວຽດນາມໃນການຕັດສິນໃຈ ແລະ ຫວຽດນາມຕ້ອງມີຄວາມເຂັ້ມແຂງ​ໃນການດັດປັບ ​ແລະ ການສ້າງຄວາມເຊື່ອໝັ້ນ​ໃນການແກ້ໄຂບັນຫາໃນລະດັບສາກົນ, ຄຳຖາມກໍ່ຄືວ່າບົດບາດໃຈກາງຂອງອາຊຽນຈະຍັງຄົງເປັນເຄື່ອງມືທີ່ມີປະສິດທິຜົນໃນການແກ້ໄຂບັນດາບັນຫາຢູ່ທະເລ.

ນັກຮຽນຮູ້ອິນເດຍຕີລາຄາບົດບາດຂອງຫວຽດນາມກັບ ອາຊຽນ ແລະ ສະພາຄວາມໝັ້ນຄົງສະຫະປະຊາຊາດ

ກອງປະຊຸມລັດຖະມົນຕີເສດຖະກິດອາຊຽນແຄບຄັ້ງທີ 26 ທີ່ນະຄອນດານັງ, ເດືອນມີນາ 2020.(ພາບ:TTXVN)

ບັນດາໂຄງການປະຊາຄົມອາຊຽນ - ຊຸມຊົນດ້ານການເມືອງຄວາມໝັ້ນຄົງ, ຊຸມຊົນດ້ານເສດຖະກິດ -ວັດທະນະທຳ ຈະຮອດເວລາທົບທວນໃນໄລຍະກາງໃນປີ 2020 ແລະ ປີ 2025 ຈະເປັນເວລາກຳນົດສຳລັບບັນດາໂຄງການເຫຼົ່ານີ້. ໂຄງການປະຕິບັດງານ III ຂອງຂໍ້ລິເລີ່ມການເຊື່ອມໂຍງອາຊຽນ (2016-2020) ຕ້ອງການຄວາມພະຍາຍາມຫຼາຍເພາະວ່າມາຮອດປະຈຸບັນນີ້ມີພຽງ 19/26 ເທົ່າກັບ (ກວມເອົາ 73,1%) ຂອງເປົ້າໝາຍ ທີ່ບັນລຸໄດ້.

ໜຶ່ງ ໃນບັນດາສິ່ງທ້າທາຍທີ່ໃຫຍ່ທີ່ສຸດ ສຳລັບບັນດາປະເທດອາຊຽນແມ່ນການຮັບມືກັບການລະບາດຂອງ COVID-19 ໃນພາກພື້ນ ແລະ ວາງແຜນປະຕິບັດງານຮອບດ້ານ ເພື່ອຄວບຄຸມການລະບາດ ແລະ ການວາງແຜນປະສານງານຂອງຄວາມພະຍາຍາມຮ່ວມກັນໃນພາກພື້ນ ເພື່ອບັນລຸເປົ້າໝາຍດັ່ງກ່າວ, ອາຊຽນ ຈຳເປັນຕ້ອງສ້າງສູນສຸກເສີນດ້ານສາທາລະນະສຸກ, ປັບປຸງລະບົບສະຖານທີ່ຄົ້ນຄ້ວາສຸຂະພາບວົງຄະນະຍາດ, ຄວບຄຸມການແຜ່ກະຈາຍຄວາມສ່ຽງ ແລະ ຮຽນຮູ້ປະສົບການໃນການຮັບມືກັບການລະບາດຂອງພະຍາດນີ້ຂອງປະເທດຈີນ. ຫວຽດນາມ ​ໃນ​ນາມ​ປະທານ​ອາ​ຊຽນ ຈະຕ້ອງຖືເປັນບູລິມະສິດໃນການແກ້ໄຂບັນຫານີ້ໃນປີ, ຖ້າບໍ່ດັ່ງນັ້ນ, ພະຍາດລະບາດດັ່ງກ່າວຈະກໍ່ໃຫ້ເກີດຜົນກະທົບທາງການເມືອງ, ເສດຖະກິດ ແລະ ວັດທະນະທຳຕໍ່ພາກພື້ນ.

ຫຼັງຈາກຄວາມເຄັ່ງຕຶງໃນທະເລຕາເວັນອອກໃນໄລຍະຜ່ານມາ, ຄວາມເປັນປະໂຫຍດຂອງສົນທິສັນຍາສັນຕິພາບ ແລະ ມິດຕະພາບໃນອາຊີຕາເວັນອອກສ່ຽງໃຕ້ ກຳລັງຖືກທ້າທາຍ ຈຳເປັນຕ້ອງທົບທວນຄືນ ແລະ ກຳນົດຢ່າງຈະແຈ້ງກ່ຽວກັບຄວາມຮັບຜິດຊອບທີ່ຈະຕ້ອງປະຕິບັດພາຍໃຕ້ TAC ສຳລັບບັນດາປະເທດໃຫຍ່ ແລະ ພາກພື້ນ.

ເພື່ອບັນລຸເປົ້າໝາຍດັ່ງກ່າວ, ຕ້ອງມີຊ່ອງທາງວິທີການ ເພື່ອສ້າງຄວາມໄວ້ເນື້ອເຊື່ອໃຈກັນລະຫວ່າງບັນດາຄູ່ຮ່ວມມືພ້ອມກັນນັ້ນກໍ່ປົກປ້ອງສິດຜົນປະໂຫຍດຂອງພາກພື້ນ. ສິດຜົນປະໂຫຍດລວມ ແລະ ຈຸດລວມຂອງບັນດາຄູ່ຮ່ວມເຈລະຈາ ແມ່ນກິດຈະກຳບັນເທົາທຸກດ້ານມະນຸດສະທຳ ແລະ ການຫຼຸດຜ່ອນໄພພິບັດ, ການຮັບມືກັບການກໍ່ການຮ້າຍ ແລະ ການເກັບກູ້ລະເບີດບໍ່ທັນແຕກ.

ໃນຖານະທີ່ເປັນກໍາມະທິການບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດ, ຫວຽດນາມມີໂອກາດສາມາດເຮັດໃຫ້ເປົ້າໝາຍການພັດທະນາຂອງອາຊຽນສອດຄ່ອງກັບຂໍ້ລິເລີ່ມຕ່າງໆຂອງສະຫະປະຊາຊາດ. ຄວາມຄ້າຍຄືກັນລະຫວ່າງວິໄສທັດອາຊຽນ 2025 ແລະ ວາລະກອງປະຊຸມການພັດທະນາແບບຍືນຍົງຂອງສະຫະປະຊາຊາດ 2030 ຕ້ອງມີການສຶກສາເພື່ອໃຫ້ຫວຽດນາມສາມາດສະເໜີບັນດາຂໍ້ສະເໜີທີ່ເປັນໄປໄດ້ສຳລັບການປະຕິບັດຕົວຈິງ.

ສິ່ງທ້າທາຍທີ່ກ່ຽວຂ້ອງກັບການລັກລອບຄ້າຂາຍ ແລະ ການຜະລິດຢາເສບຕິດ, ການຄ້າມະນຸດຕ້ອງໄດ້ຮັບການແກ້ໄຂທັງໃນອາຊຽນ ແລະ ສປຊ. ອາຊຽນໄດ້ຮັບຮອງເອົາແຜນປະຕິບັດງານ ເພື່ອປ້ອງກັນ ແລະ ຮັບມືຕໍ່ການເພີ່ມຂຶ້ນຂອງລັດທິຫົວຮຸນແຮງ ແລະ ແຜນການນີ້ຕ້ອງການ ການເປັນຕົວແທນ ແລະ ການສະໜັບສະໜູນຈາກອົງການສະຫະປະຊາຊາດ.

ຕຳແໜ່ງຂອງຫວຽດນາມຈະເປັນກຳລັງໜູນ ສຳ ລັບສິ່ງດັ່ງກ່າວ ແລະ ບັນດາຄວາມມານະພະຍາຍາມຂອງພາກພື້ນກໍ່ຄວນໄດ້ຮັບການຊຸກຍູ້ໃນທິດທາງນີ້. ຄວາມປອດໄພທາງອິນເຕີເນັດ ຍັງໄດ້ຖືກກ່າວເຖິງໂດຍອາຊຽນ ແລະ ສະຫະປະຊາຊາດ, ແຕ່ກົນໄກການຕິດຕາມກວດກາໃນພາກພື້ນຍັງຈຳກັດຢູ່.

ບົນພື້ນຖານຂໍ້ລິເລີ່ມຂອງອາຊຽນເຊັ່ນ: ສູນຄວາມປອດໄພເຄືອຂ່າຍອິນເຕິເນັດ ແລະ ຂໍ້ລິເລີ່ມການສ້າງຄວາມສາມາດດ້ານຄວາມປອດໄພຂອງຄວາມປອດໄພເຄືອຂ່າຍອິນເຕິເນັດ ໂດຍໄດ້ຮັບການຊ່ວຍເຫຼືອຂອງສິງກະໂປ ແລະ ຍີ່ປຸ່ນ, ຫວຽດນາມ ຈະໄດ້ຮັບການຕີລາຄາຢ່າງດີຖ້າປັບປຸງບັນດາບັນຫາເຫຼົ່ານີ້ເປັນຢ່າງດີ.

ພາຍໃນອາຊຽນ, ໃນສະພາບການປະຕິວັດເຕັກໂນໂລຢີ 4.0, ການເຊື່ອມຕໍ່ດີຈີຕອນ… ຍັງບໍ່ທັນຄົບຖ້ວນ, ຫວຽດນາມ ຕ້ອງຍູ້ແຮງຄວາມມານະພະຍາຍາມປະສານສົມທົບກັບບັນດາປະເທດ, ສະໜອງກົນໄກການການສົນທະນາ​​ແບບປົກກະຕິລະຫວ່າງບັນດາປະເທດອາຊຽນ ​ໃຫ້​ມີປະສິດທິຜົນກວ່າ. ຫວຽດນາມກໍ່ຕ້ອງຍູ້ແຮງຄວາມເປັນໄປໄດ້ຂອງບັນດາກົນໄກຮ່ວມມືລະຫວ່າງອາຊຽນ ແລະ ອົງການປະລະມານູສາກົນ (IAEA). ສິ່ງດັ່ງກ່າວຮຽກຮ້ອງໃຫ້ມີຄວາມເອົາໃຈໃສ່ເປັນພິເສດຢູ່ສະພາຄວາມໝັ້ນຄົງສະຫະປະຊາຊາດ ເພື່ອສ້າງກອບກົດໝາຍໃນອາຊີຕາເວັນອອກສ່ຽງໃຕ້ກ່ຽວກັບຄວາມປອດໄພ ແລະ ຄວາມໝັ້ນຄົງດ້ານນິວເຄຼຍ.

ປະຈຸບັນອາຊຽນຕ້ອງປະເຊີນ ​​ໜ້າ ກັບບັນດາການເຄື່ອນໄຫວຂອງການຫາປາທີ່ຜິດກົດໝາຍ, ແລະ ເລື່ອງນີ້ຕ້ອງໄດ້ຮັບການແກ້ໄຂໃນລະດັບໂລກ ແລະ ຈຳເປັນຕ້ອງມີສົນທິສັນຍາກ່ຽວກັບບັນຫານີ້. ຫວຽດນາມອາດຈະໃຫ້ຄວາມເອົາໃຈໃສ່ເປັນພິເສດຕໍ່ບັນຫານີ້ໃນກອງປະຊຸມສະຫະປະຊາຊາດ,ຫວຽດນາມ ກໍ່ຕ້ອງແກ້ໄຂສິ່ງທ້າທາຍຕ່າງໆທີ່ກ່ຽວຂ້ອງກັບການສຶກສາ, ຍູ້ແຮງ ແລະ ປົກປ້ອງສິດ, ການພັດທະນາທັກສະ ແລະ ການຝຶກອົບຮົມວິຊາຊີບໃຫ້ແມ່ຍິງ ແລະ ເດັກນ້ອຍ.

ມົນລະພິດສິ່ງແວດລ້ອມໃນທະເລ ແລະ ການປ່ຽນແປງດິນຟ້າອາກາດ ກໍ່ແມ່ນຫົວຂໍ້ປົກກະຕິໃນສະພາຄວາມໝັ້ນຄົງສະຫະປະຊາຊາດ ແລະ ຫວຽດນາມ ຕ້ອງການແກ້ໄຂບັນຫານີ້ໂດຍຕິດພັນກັບຄວາມກັງວົນໃນອາຊີຕາເວັນອອກສ່ຽງໃຕ້ ແລະ ໃຫ້ເຫດຜົນເພື່ອຕ້ອງການຄວາມພະຍາຍາມຮ່ວມກັນທົ່ວໂລກ. ບັນຫາອື່ນໆເຊັ່ນ: ການຄຸມຄອງຖ່ານຂີ້ຕົ້ມ, ໄຟໄໝ້ປ່າໂດຍຜ່ານການສະໜັບສະໜູນດ້ານການເງິນ… ຄວນສະເໜີຢ່າງລະມັດລະວັງ. ໃນຂະນະທີ່ວາລະກອງປະຊຸມອາຊຽນ ຈຳເປັນຕ້ອງລົງທືນຄວາມພະຍາຍາມຫລາຍຂື້ນເພາະໃນປີ 2020 ຈະມີຫລາຍຂໍ້ລິເລີ່ມທີ່ ຈຳເປັນຕ້ອງໄດ້ທົບທວນ ແລະ ປະເມີນເພື່ອວາງອອກແຜນທີ່ເສັ້ນທາງທີ່ສົມບູນແບບສຳລັບອະນາຄົດ.

ຄຽງຂ້າງນັ້ນ, ບັນດາບັນຫາໃນສະພາຄວາມໝັ້ນຄົງສະຫະປະຊາຊາດ, ຫວຽດນາມ ຕ້ອງຍົກອອກບັນດາ ຄຳໝັ້ນສັນຍາທີ່ກ່ຽວຂ້ອງເຖິງຄວາມຮັບຜິດຊອບຂອງບັນດາປະເທດພັດທະນາ ແລະ ກໍາລັງພັດທະນາ ກ່ຽວກັບມົນລະພິດທາງນໍ້າ, ການຊຸກ​ຍູ້ຊ່ວຍ​ເຫຼືອດ້ານການເງິນ ເພື່ອຫຼຸດຜ່ອນຄວາມເສຍຫາຍຈາກໄພທຳມະຊາດໃນລະດັບສາກົນ.ໃນຄວາມເປັນຈິງແລ້ວ, ບັນຫາມົນລະພິດຂອງແມ່ນໍ້າຂອງ ແລະ ການສ້າງເຂື່ອນຈະໄດ້ຮັບຄວາມສົນໃຈໃນປີນີ້.

ປີ 2020 ຈະເປັນປີທີ່ມີສິ່ງທ້າທາຍຫຼາຍຢ່າງ ພ້ອມທັງເປັນປີທີ່ນຳໃຊ້ຄຳໝັ້ນສັນຍາໃນພາກພື້ນ ແລະ ທົ່ວໂລກກ່ຽວກັບຄວາມໝັ້ນຄົງ, ຄວາມຈະເລີນຮຸ່ງເຮືອງ, ການພັດທະນາ, ການຄ້າ ແລະ ການເຊື່ອມຕໍ່. ດ້ວຍປະສົບການທີ່ຜ່ານມາໃນຖານະເປັນປະທານອາຊຽນ ແລະ ກໍາມະການບໍ່ຖາວອນຂອງສະພາຄວາມ ໝັ້ນຄົງສະຫະປະຊາຊາດ ກ່ອນໜ້ານີ້, ຫວຽດນາມ ສາມາດດຸ່ນດ່ຽງບັນດາຄຳໝັ້ນສັນຍາ, ເຮັດໃຫ້ປະຊາຄົມສາກົນ ມີຄວາມປະທັບໃຈໃນເວທີປາໄສພາກພື້ນ ແລະ ທົ່ວໂລກ.

(ໄຊພອນ)

ທ່ານອາດຈະມັກ

ເຫດການ